Lukase 12 - Nouveau Testament en Ngienboum

Yěsô gɔ̌ɔn ne pʉ̀a pé ngie pɔ́ pɔ́ɔn nkwoŋ menÿɔ́g pà farisay

¹ Yěsô ne shwóŋe pú’u, alá’ ne ńkẅi’i ńkwɔ́’ɔ ńtóo lejʉ́ŋ yé, ejʉ’ sẅɛ́ sẅɛ̌ tà mé ne néŋte mekwò pʉ̀a. Á gwaa gɔɔn nò mbwo lá’, ḿvɔg ńgɔɔn mbwo ngàŋa nkwò yé ngie: Pi laga twó gí, ḿbɔ́ɔn *mvòŋ pʉ̀a *farisay, tà pi cʉ́’ ngàŋ mepàb pá’ pɔ́b.

² Ammó gie áa lyɛ̌’ɔɔn ńgwɔ́ lelyěen á gẅiin lé lá’ ńkẅɛɛ mángyɛ̌. Atsɔ́ nò té wɔ́ gie à lɔɔn ńgwɔ́ á lyeen tà mé lá’ le zsé wɔ́.

³ Áa pú’u, tà ńgwɔ́ gie pi lɔɔn ńdá’ lêtsẅɛ́’, éshÿɔ́g ncwò gẅi ssé, ńgɔɔn nò, mbà jʉ’ ge gÿo fɔ́g mé pú jú’. Anò gie pi lemté pɔ́ letuŋó, á tsɛ̀ɛ lûm ndá, mbà mé ge lá’ kwɔ́’ɔ gyɛ̌ tá sá’a yɛ̌ nò.

Nyìŋ gẅie á zɛ́te ngie mé pɔ́gɔ yé

⁴ Mèŋ n gɔɔn yɔɔn nò mbwo pi meshǔ pɔ́ɔn ngie tà pi pɔ́g pʉ̀a mesoŋ. Pɔ́ ku’ pɔ́ ndà’ lézẅé nyìŋ ḿbiŋ ńké tè ku’u légÿo tà ńtɔ́g pú’u wɔ́.

⁵ Tà mèŋ shwóŋó gẅi nyìŋ gẅie pi gẅiin lépɔ́gɔ yé: Pi pɔ́g pɔ́ ndà’ Ssé á nue ngwɔ́ á zẅé nyìŋ, ḿbiŋ ńku’u léma’a yé tsɛ̀ɛ mmɔ̌g. Áa pú’u, tá mèŋ n gɔɔn ngie pi pɔ́g pɔ́ ndà’ Ssé.

⁶ Mé ée lá’ɔɔn sẅiŋ mejʉŋé tá’, mé lɔɔn fó ńcú’te tsɔ́ mbɔɔ méntʉ̀a mé sẅiŋ, ńkẅé mbòŋo kɔ́? Tà mbɔɔ pú’u, e Ssé ké tè tsɔ́ wɔb lege.

⁷ Áa mbwo Ssé, pi gwɔ́ mmó tʉ̀ nzẅìŋ ńcʉa mejʉŋé. À léen ńzɔɔn ńdá’ sáŋ menòŋo twó mí tà ńzsé nzẅìŋ. Pú’u la, pi pɔ́ɔn légíŋe ḿbɔ́gɔ tsɔ́ mmó.

⁸ Tà mèŋ n gíŋe shwóŋó gẅi yɔɔn nò, nyìŋ tyé mvfò lá’ ńgɔɔn ngie: Mèŋ, n gee nyìŋ Yěsô, mbà *Míŋ Nyìŋ ge lá’ gíŋe tyé yé mvfò *mecÿɔ́’ Ssé é gɔɔn ngie: Nyìŋ wɛ aa wɔ̀ɔn nyìŋ.

⁹ Tá ńké ńgwɔ́ gie nyìŋ tyé mvfò lá’, ńgɔɔn ngie: Mèŋ n tè nyìŋ Yěsô wɔ́, mbà *Míŋ Nyìŋ ge leen ké lá’ tyé mvfò *mecÿɔ́’ Ssé é gɔɔn yé ngie: Nyìŋ wɛ à tè wɔ̀ɔn nyìŋ wɔ́.

¹⁰ Nyìŋ lɔɔn shwóŋó tepòŋ ná *Míŋ Nyìŋ, mbà Ssé ge lá’ lege náa mbwo yé, tá ńké ńzoonte Zẅìge Ndʉalʉ̌a, mbà mé téen ńdá’a ńdege ńnáa mbwo ngàŋ wɔ́.

¹¹ Pi zsé ngie, tsɔ́ fʉ̀’ ge gÿo ku’, mé gwoon gẅí, ńgʉa ńŋaga gẅi kà pɔ́ *ndá cú’tè pà Yuda wɔ́, kà pɔ́ mvfò mefùɔ wɔ́, kà pɔ́ mvfò pàsá’a lá’ gwɔ́. Mé gwɔ́ tà ne ńdɔgɔ gẅi ńgee, tà pi pú’ mbùm gí ngie pi ge tóo wó é gɔɔn ngie kɔ́ wɔ́? É zoŋo twó gí lêkɔ́ wɔ́?

¹² Á ge gÿo gwɔ́ fʉ̀’ó, à Zẅìge Ndʉalʉ̌a shwóŋó gẅi nò gie pi ge gɔɔn.

Esagá nò ná legẅiin shúm njÿó

¹³ Atsɔ̌ nyìŋ fóo nùɔ lá’, ńgɔɔn né Yěsô ngie: Tsítsà tsẅi né fɛ́ wɔ̀ɔn ngie à gab shúm tá weg yé ńná sɔ́ɔn.

¹⁴ Yěsô tsɔ́’ɔ mbwo yé ngie: Awɔ̌ la zába wɔ̀ɔn léŋag mentsaŋ mí, kà pɔ́ légab shúm sí ńná né pi?

¹⁵ MÀbiŋ ńgɔɔn mbwo mânyìŋ ntsèm ngie: Pi laga twó gí! Tà pi fa’a lécú’te shúm, ńké ńkẅi’i kẅi’i, le gwɔ́ we nyìŋ tè gẅiin tsɔ́ nò ná shúm sie angàŋ gẅiin wɔ́, tà mbɔɔ pá’ à zɔɔn fó ńgẅiin pɔ́ kɔ́ wɔ́!

¹⁶ Ńdeen ńké saga mbwo pɔ́b ngie: Tsɔ̌ ngàŋa mmó lǎ’ ńgwɔ́ wó, metsetsá’ mé gwɔ́ tsɔ̌ ngù’ ńkwɔ́ shúm léjÿó tɛ’.

¹⁷ Á zye lékwaŋ ngie: Mèŋ n ge gÿo lêkɔ́ tá pú le’e shúm sɔ́ɔn? Ajʉ’ ge kɔ́g,

¹⁸ ńnéŋe tà ńgɔɔn ngie: Mèŋ n zsé pá’ n ge gÿo. Mèŋ n ge tágte menkiŋ mɔ́ɔn, é kwá kwà’ mie é fáŋ tɛ’, é lag shúm nká’, é pú cú’te wɔ́ba fù’ yɔ́ɔn, é ńnéŋe tsòló,

¹⁹ é sele gɔɔn né twó mbùm yɔ́ɔn ngie: Ashǔ, afù’ áa ssé nà mengù’ tà ńgyɔ́ɔn, zẅɛte! Pfɛ́ɛ! Núu! Pím pá’ ɔ̀ kwǒŋ!

²⁰ Tá’, e Ssé gɔɔn né yé ngie: Ɔɔ gʉ̀gʉ̀, mèŋ, n ge lɔgɔ gú gʉa pɔ́ kwà’ lêtsẅɛ́’ lyɛ̌’ɔɔn. Eshúm sie ɔ̀ sěen ńcú’te tsɛ̀ɛ menkìŋ lɛ cʉ́’ se wɔ́?

²¹ Yěsô ma’a twó ngie: Yɔɔn áa nò gie á gÿo nyìŋ gẅie à lagá fù’ ńcú’te ngie aa ngàŋa mmó, ḿbiŋ ńgwɔ́ menÿɔ́g Ssé ńké tè wɛ̌ wɔ́.

Á poŋ létÿɔ́g pɔ́ Ssé mvfò nà kɔ̀ɔkɔ́ɔ

²² Yěsô gíŋe ńgɔɔn mbwo *ngàŋa kwò yé gie: N dɔgɔ shwóŋó gẅi ngie tà pi ńnéŋe ḿbú’u mbùm gí nà nò mmó léjÿó ngie: Peg ge pfɛ́ɛ kɔ́? Tà pi pú’ mbùm gi nà nò nzsǒ ngie: Peg ge ma’a kɔ́?

²³ Pi zsé mboŋó ngie, gẅi le gwɔ́ cʉa shúm léjÿó, mbùm nyìŋ piŋ ńgwɔ́ mmó tʉ̀ nzẅìŋ ńcʉa menzsǒ.

²⁴ Pi líe meshʉ́ŋ tá ńgyá. Pɔ́ ée ntě ḿbye mmó wɔ́, ńké tě ńdaga shúm ńnáa ndá wɔ́, pɔ́ té ntàŋ gẅiin, menkìŋ mɔ́b té wó wɔ́. E Ssé zɔɔ ńjÿɔ́gɔ wɔ́b. Pi ee mbwo Ssé, ńgwɔ́ mmó tʉ̀ nzẅìŋ ńcʉa meshʉ́ŋ.

²⁵ Pi lɔɔn ńgwɔ́ pi le séen ńdɔg pɔ́ pá’ pi ne ḿbú’u mbùm gi, ńkú’u lékẅi’i tà’a lyɛ̌’ nà melyɛ’ɛ́ lá’ mí wɔ́.

²⁶ Tà á lɔɔn ńgwɔ́ gie pi fó tè ku’u légÿo pú’u wɔ́, pi piŋ ḿbú’ mbùm gi ná setsɔ́ shúm mélà’a kɔ́?

²⁷ Pi líe metôtǒ mie ée nà legǐ nká’ ńgyá lésí. Legǐ aa ntě fa’a fà’ wɔ́, ńké tě ḿbá’a menzsǒ wɔ́. Tà mèŋ n ké shwóŋó gẅí, legǐ ma’ nzsǒ, tà mbà fùɔ Salomo la lá’ ńgwɔ́ nà we legú’ ntsèm ntsèm à tè lá’ ḿma’ nzsǒ tà é poŋ pá’ yɔb wɔ́.

²⁸ Tà Ssé lɔɔn ḿma’ nzsǒ mbòŋo nà legǐ gẅie à zɔgɔ́ nká’ lyɛ̌’ɔɔn, njÿó lʉ́a mé kɔ́’ ńtuɔ mmɔ̌g, mbà á ge kúu ná pi tá à zág nzsǒ lá? Pi tè záb ntʉ́m nà Ssé fʉ̀’ ntsèm wɔ́.

²⁹ Á lɔɔn ńgwɔ́ pú’u, tà pi gíŋe ḿbú’ mbùm gí ngie mé ge pfɛ́ɛ kɔ́, mé ge núu kɔ́?

³⁰ Pàtèzsě Ssé zɔ̌ ńnéŋe ńgẅiin yɛ̌ ntí nkwaŋá. Á gʉa ná pi, mbà Tá gẅi Ssé zsé shúm sie é ge kẅéte gẅí.

³¹ Pi fa’ pɔ́ pá’ gẅi nkwaŋá ge tyé pɔ́ nà nò *lefùɔ Ssé, à lêen ńké ńcʉ́’ʉ ńná sɛ̌ shúm ńdɔgɔ ńkẅi’i kẅi’i.

³² Epʉ̀a pɔ́ɔn, pi gwɔ̌ pɔ́ mbó ntá’ tá’, tà pi pɔ́g, mélà’mie Tá gẅi Ssé ka gyǎ ngie à ge ná lefùɔ mbwo pi.

³³ Pi sẅíŋ shúm sie pi gẅiin, ńná nkáb mbwo pàtèmmó, ńdɔgɔ ńgẅiin púɔ pɔ̀ɔn nkáb pie é lɔɔn ńgwɔ́ é le tɔ́gte, ńdɔg ńde’e fù’ gí lejʉ́ŋ Ssé. Á jʉ’ gie á lɔɔn ńgwɔ́ wó, á le mag, metsǒŋ le ku’u léjʉ wɔ́, asɔ́ɔn á le ku’u léjÿó wɔ́.

³⁴ Pi lɔɔn ńde’e nkáb gi nzɔ̌ wɔ́, mbà ntʉ́m gẅi ge gwɔ́ pɔ́ jʉ’ó.

Á poŋ pʉ̀a pie ée pe Yěsô ńnéŋe ńne ńzẅí’te yé

³⁵ Pi cwoŋte mbùm gi, ńdyɛ melâm, ńtÿɔ́gte!

³⁶ Ńńnéŋe pá’ megàŋa fà’ pie é ne ńzẅí’te tá fà’ wɔ́b gẅie à ně ńgʉa jʉ’ ye leluŋó. Pɔ́ lá’a lá’ ńzẅí’te yé légwɔ́ gie à ge tó pú’te ncwò ndá, pɔ́ gwóon ńtsɔ́’.

³⁷ Pàshÿó mbòŋo ée ngàŋa fà’ gie tá fà’ wɔ́b gwaa tó, mbà pɔ́ kaa lyé. Oon, mèŋ shwóŋó gẅí, á gwɔ́ nénʉ́, à ge tém nzsǒ fà’, é tsẅi megàŋa fà’ pé ńnéŋe ssé, à lɔg shúm ńcʉa, ńgab pɔ́ pfɛ́.

³⁸ Tsɔ́ nò tá fà’ tó tsɛ̀ɛ tsẅɛ́’ kà pɔ́ nkwɔ̀’ njÿó wɔ́, ńtó ńgyá pɔ́ nyé pɔ́ te lyé, mbà pɔ́ ée pàshÿó mbòŋo.

³⁹ Pi gíŋe ńzsé mboŋó ngie nyìŋ laa pé’e ńgwɔ́ á gwɔ́ ńnéŋe mbʉ̀a ye ńzsé fʉ̀’ gie ntsǒŋ ge tó, mbà à lɔɔn ńgwɔ́ á lá’ té lyé, ḿbyɛ́b tà ntsǒŋ le kúu mbʉ̀a yé wɔ́.

⁴⁰ Pú’u, mbàa pi gí, pi cwoŋte mbùm gí ḿbyɛ́b, mélà’mie *Míŋ Nyìŋ ge gÿo tó, tá pi tè ne ńzsé fʉ̀’ wɔ́.

Nyìŋ gẅie a fa’a fa’ gẅie à gÿǒ mmó gie tá fà’ à ne ńkwoŋo pɔ́ gẅie à kaa gÿo

⁴¹ Piɛ jú’ pú’u, ńgɔɔn né Yěsô ngie: Andè, ɔ̀ saga sɔɔn legʉa pá’ɔɔn pɔ́ ndà’ mbwo peg kà mbwo mânyìŋ ntsèm?

⁴² Yěsô tsɔ́’ɔ mbwo yé ngie: Ngàŋa fà’ we nénʉ́, á gẅie à gẅiin legyè, aa pé’e ńgwɔ́ wɛ̌? Aa gẅie tá fà’ ge gÿo gwaa gʉa, é gɔɔn né yé ngie: Afà’ gie mèŋ n nyě mbwo gù á yɔɔn, cʉ́’ ná shúm léjÿó mbwo petsɔ́ megàŋa fà’ á nà fʉ̀’ gie á ne ńzɛ́te.

⁴³ Tá fà’ we lɔɔn ńdá’ ńgwaa piŋ nzèm, ńgyá á ne fa’a yɛ̌ fà’, mbà aa shÿó mbòŋo.

⁴⁴ Mèŋ shwóŋó gẅí, kwà’ nénʉ́, tá fà’ we ge cʉ́me shúm sé ntsèm ntsèm mbwo yé.

⁴⁵ Tá pege gɔɔn ngie ngàŋa fà’ cʉ̌’ nzèm, ńgɔɔn ngie: Tá fà’ wɔ̀ɔn tè lwo piŋ wɔ́, ńdeen ńké ńzye lécúa petsɔ́ megàŋa fà’, pe mbàŋa lâ pe pànzwě, ḿpfɛ́ɛ mmó, ńnú melù’ ḿbʉ́a.

⁴⁶ Á gwɔ́ pú’u, tá fà’ we vege vege ńtó á nà fʉ̀’ gie à tè ne ńzsé wɔ́, ńnéŋ ngʉ̀ngʉ̀ twó yé tɛ’, é jwoŋo yé, à gʉa ne jʉ’ gie mé jwoŋo pʉ̀a tepòŋ ńnáa wó.

⁴⁷ Ngàŋa fà’ gẅie à zsě mmó gie tá fà’ we ne ńkwoŋo, ḿbiŋ ńké tè tsɔ́ mmó cwoŋte, ńké tè gÿo mmó gie tá fà’ we ne ńkwoŋo wɔ́, mé ge lá’ cúa yé tɛ’.

⁴⁸ Tá ńké ńgwɔ́ gie ngàŋa fà’ lɔɔn tè ne ńzsé mmó gie tá fà’ we ne ńkwoŋo ngie à gÿo wɔ́, ḿbiŋ ńgÿo mmó gie ńgwɔ́ mé fó mǒ ńcúa yé tɛ’, mbà mé te gÿo cúa yé tɛ’ wɔ́. Mé lɔɔn ńnáa mmó mbwo nyìŋ á gyɔ́ɔn, mbà mé ge taa gíŋe kẅé à gyɔ́ɔn, mé piŋ ńcʉ́me shúm mbwo nyìŋ tà é gyɔ́ɔn, mbà ée nzẅìŋe mé ge lá’ gíŋe zɛ́te.

Anò Yěsô ge ma’a fagte tsetsɛ̀ɛ pʉ̀a

⁴⁹ Yěsô gíŋe ńgɔɔn mbwo *ngàŋa kwò yé ngie: Mèŋ n ka tǒ lélyɛ mmɔ̌g ndùmo ssé tsetsá’, m biŋ ně ńtsɔ́ɔn légwaa gyá, mbà é gwǒon tà ne ńkÿó.

⁵⁰ Á ne ńzɛ́te ngie mé gÿo ńnu’u wɔ̀ɔn tsɛ̀ɛ ngɔ́’ pá’ mé nu’u nyìŋ ntse la. Yɛ̌ lyɛ̌’ lɔɔn ńdá’ ńnyé té tɔ́g, mèŋ n de mboŋó jú’!

⁵¹ Tà pi kwaŋ ngie n ka tǒ, ńdɔg mbʉ́lè ńtóo ndùmo ssé tsetsá’, n ka lɔg pɔ́ fagte ńtó.

⁵² Tà fó fʉ̀’ɔɔn, á ge cʉ́’ʉ gee ná pʉ̀a métʉ̀a pie é těm ndá ńnéŋe, afagte gwɔ́ ssé. Pʉ̀a métá tyé ńgwɔ́ tà’ ncwò, pe mépʉ́a púte ḿbʉa wɔ́b. Pe métá pʉ̀a pe mépʉ́a yɔ́b.

⁵³ Tá múɔ ge gÿo lʉ’ʉ lé jú’u nò míŋ we we mbàŋa, mûɔ mbàŋa lʉ’ʉ lé jú’u nò tá we. Má múɔ gÿo ńdʉ’ʉ lé jú’u nò míŋ we we manzwě, múɔ manzwě à lʉ’ʉ lé jú’u nò má we. Anzwě múɔ gÿo ńdʉ’ʉ lé jú’u nò mándúm we, mándúm lʉ’ʉ lé jú’u nò nzwě múɔ.

Á poŋ nyìŋ zsé pá’, à ge tyé yé nzèm Ssé pú’u

⁵⁴ Yěsô gíŋe ńgɔɔn mbwo lá’ ngie: Pi gwɔ̌ tà ńgyá mbʉ̀ŋ fó nà tsɔ́ shÿó ńkwɔ́’, pi gwóon ńgɔɔn ngie mbʉ̀ŋ gee ndǔ, é ké ńdú,

⁵⁵ ḿbiŋ ńgyá fefà sele tà ńcʉ́’ fóo pɔ́ shÿó ntsíŋ ńcʉ’ʉ, pi gɔɔn ngie lùm gee ntʉ̌a, á ké ńtʉ́a.

⁵⁶ Megàŋ mepàb, pi líe lefàŋ pɔ́ tsetsá’ ńzsé mmó gie á gee ńgÿǒ, á piŋ ńgaa pi gyá menò mie é ne ńcʉate fʉ̀’ɔɔn, pi tè zsé mmó gie é lɔgɔ ńgɔɔn wɔ́?

⁵⁷ Mélà’a kɔ́ pi tè zsé légyá mmó gie mé lɔɔn ńgÿo á gwɔ́ mbòŋ wɔ́?

⁵⁸ Né ngie, nyìŋ pɔ́ nyìŋ lɔɔn ńgẅiin njǔ, á ne fa’a légÿo mé jÿɔ́’ɔ yé ndá tsǎŋ, mbà ngàŋ ge sẅíŋte yé, pɔ́ yé zso mánzsé ńnyɛte. À lɔɔn tè pú’u gÿo, mbà mé ge lɔgɔ yé gʉa mvfò tá ndá pàŋag ntsaŋ, à ŋag mé ńnéŋe yé ndá tsǎŋ.

⁵⁹ Tà mèŋ shwóŋó gẅí, ngàŋ ge lá’ gwɔ́ kẅɛɛ tsǎŋ, é pú tóŋo kɔ̀ɔkɔ́ɔ wɔ́ gie mé ne ńkʉ́a tà tsɔ́ le pyé.