Lukase 10 - Nouveau Testament en Ngienboum

Yěsô tǔm ngàŋa kwò yé ntsɔ̀b pʉ́a lê móm sɔɔn mbʉ́a

¹ Yɔɔn nò tɔ́g, Yěsô tsɔ́’ tsɔ́ *ngàŋa kwò yé ntsɔ̀b pʉ́a lê móm sɔɔn mbʉ́a, ńtúmó wɔ́b mépʉ́a mepʉ́a ngie pɔ́ vɔg ńgwɔ́ mvfò ńgiŋe tsɛ̀ɛ metÿǒsoŋ pâ mejʉ’ mie à ge gÿo pú cʉa wó.

² Pɔ́ gwaa gʉa, á gɔɔn né pɔ́b ngie: Eshúm sie mé gee ńdaga tsɛ̀ɛ nká’ gyɔ́ɔn tɛ’, nzẅìŋ megàŋa fà’ piŋ ńkɔ́g. Á poŋ ngie pi sẅíŋte ngàŋ nká’ à kẅi’i megàŋa fà’ pie pɔ́ ge ne laga shúm sé.

³ Pi lo, n túmo gẅi pɔ́ pà’ à lɔɔn ńgwɔ́ mé túm púɔ mvfó tsetsɛ̀ɛ menɔ̀ɔn ngẅì.

⁴ Tà pi gwɔ gʉa ḿbí nkáb, tà pi píi pɔ̀ɔn, tà pi pí melɔ̌ɔn lélɔg ńkúbe metsɔ́. Pi lɔɔn ne ńgee, tà pi zɔ́gɔ mánzsé ńtyé ńtsyɛ’te pʉ̀a.

⁵ Pi gʉa tà ńkúu ndá nyìŋ, pi vɔg ńgɔɔn ngie: E Ssé néŋ mbʉ́lè tsɛ̀ɛ yɔɔn ndá.

⁶ Pi gɔɔn pú’u, nyìŋ gẅie à kwǒŋ mbʉ́lè gwɔ́ ndá, mbà mbʉ́lè ge kúu ná yé. Tà á té pú’u wɔ́, mbà è ge piŋ kúu ná pi.

⁷ Pi vɔg tà ńkúu tsɛ̀ɛ yɛ̌ ndá wɔ́, pi ńnéŋe pɔ́ tsɛ̀ɛ ndá ayɛ̌, pi pɔ́ɔn légíŋe ńgʉa tsɔ́ jʉ’e ndyɛ̀’ɛ, mé náa kɔ́ wɔ́ pi pfɛ́, ńná melù’ pi nú, té kú shʉ́, mélà’mie nyìŋ fa’a fà’, mbà à ge jÿó pìi fà’.

⁸ Pi lɔɔn ńkúu tsɛ̀ɛ yɛ̌ tÿǒsoŋ wɔ́, tà pʉ̀a kúe gẅí, pɔ́ ná pɔ́ kɔ́ wɔ́, pi jÿó.

⁹ Megàŋa guɔ gwɔ́ jʉ’ó pi gÿo pɔ́ zéŋe, ńgɔɔn mbwo lá’ ngie: Afʉ̀’ gie Ssé ge zye lényɛ *lefùɔ sé tsoté tà ńgwɔ́ lejʉ́ŋ pi.

¹⁰ Tá’, pi lɔɔn ńké ńkúu nà tsɔ́ tÿǒsoŋ, pʉ̀a jʉ’ó lʉ’ʉ lékúe gẅí, pi fó jʉ’ó ńgʉa tà ńkúu ndùmo gyɛ̌, ńgɔɔn mbwo lá’ ngie:

¹¹ Peg pú’u pfepfɔ́b gí nà mekwò még ngie à piŋ nzèm ńkúu twó pi, tá pi ke ńzsé ngie afʉ̀’ gie Ssé ge nyɛ lefùɔ sé tsoté tà ńgwɔ́ lejʉ́ŋ pi.

¹² Oon, mèŋ shwóŋó gẅí, á ge lá’ gwɔ́ lyɛ̌’ gie Ssé ŋaga pʉ̀a mesoŋ, ngʉ̀ngʉ̀ pɛ̌ pʉ̀a gyɔ́ɔn ńcʉa ye pʉ̀a Sodom.

¹³ Yěsô gíŋe ngie: Ndoon twó pi pʉ̀a Kolazîŋ, mbɔɔ twó pi pʉ̀a Mbetsayida. Menò mmɔɔn mmɔɔn mie mé la gÿo lá’ pi, é laa pé’e ńgwɔ́ pɔ́ tsɛ̀ɛ tÿǒsoŋ Tir pɔ́ Sidoŋ, mbà pɔ́ léen ńdá’ ńkúbe mà, ḿmÿɔg, éshʉa mepɔ́ɔn ḿma’, ńzɔ́’ɔ pfó, ńdɔg ńdúŋ légwé.

¹⁴ Pi zsé mboŋó ngie: Á ge lá’ gwɔ́ lyɛ̌’ gie Ssé ŋaga pʉ̀a mesoŋ, egi ngʉ̀ngʉ̀ cʉa ye pʉ̀a Tir pâ pʉ̀a Sidoŋ,

¹⁵ ńgʉa ná pi pʉ̀a Kapernawúm, pi kwǎŋ ngie Ssé ge kwé’e gẅi tà pi kúu léfaŋ ka? E shwóŋó gẅi ngie ngǎŋ, à ge sẅí’i gẅi sẅí’i, pi gʉa tà ńkúu lá’ mepfó ssé.

¹⁶ Yěsô gíŋe ńgɔɔn mbwo *ngàŋa kwò yé ngie: Nyìŋ lɔɔn ńzẅíŋe shwóŋè gí, mbà à zẅiŋe pɔ́ shwóŋè yɔ́ɔn. Nyìŋ lɔɔn ńdʉ’ʉ gẅí, mbà à lʉ’ʉ pɔ́ wɔ̀ɔn, ńdɔ́gɔ pú’u, ńdʉ’ʉ nyìŋ gẅie à la túmo wɔ̀ɔn

pʉ̀a ntsɔ̀b pʉ́a lê móm sɔɔn mbʉ́a pǐŋ nzèm

¹⁷ Epʉ̀a ntsɔ̀b pʉ́a lê móm sɔɔn mbʉ́a pie Yěsô la túm la, é gʉa, ńgwaa piŋ nzèm ńgiŋe ńkága tɛ’, ńgɔɔn mbwo Yěsô ngie: Tá weg, afà’ pǔ ńgiŋ tɛ’ tà peg lɔg lezíŋ shú, ńgɔɔn nò mbwo *messé tepòŋ, pɔ́ jú’ ncwò wég.

¹⁸ Yěsô tsɔ́’ɔ mbwo pɔ́b ngie: Pi shwóŋó nò, mèŋ n ně ne ńdíe, ńgyá pá’ Sátà ye ŋwaŋ pá’ nně mbʉ̀ŋ la, éfó tÿǒ lepwó ńtsɔ́’ɔ ńgwe ssé.

¹⁹ Pi jú’, mèŋ n ka gwaa túmo gẅi pá’a, ńnáa gẅi métʉ̀ lélɔg neŋte membɔ́ɔn pâ pàmangɔ̂ɔn ssé, ńgíŋ ńnáa gẅi metʉ̀ lélɔg ńcʉa Sátà, ngàŋ mbù tà tsɔ́ mmó le gẅi gÿo.

²⁰ Mbɔɔ pú’u, tà pi kág pɔ́ pá’ *messé tepòŋ jǔ’ ncwò gẅí, pi kág pá’ Ssé ŋwe’é mézíŋ mí tsɛ̀ɛ ŋwà’ne tÿǒ lepwó.

²¹ Yěsô ne ńgɔɔn yɔɔn nò, à Zẅìge Ndʉalʉ̌a gÿo letʉ́m sé pú ńkág tɛ’, á lêen ńké ńgɔɔn ngie: Tá wɔ̀ɔn, Cʉ̀apʉ̀a, gù gẅie ɔ̀ sá’a tÿǒ lepwó mbɔɔ tsetsá’. Mèŋ sǐe gú pá’ ɔ̀ kéen ńnyɛ mɔɔn menò mbwo mecʉ̀cʉ̀ŋ, ńdÿoon mbwo megye pâ pʉ̀a pie é la zí’i. Oon mè Tá wɔ̀ɔn, ɔ̀ la gyá ngie ɔ̀ ge gÿo yɔɔn nò pɔ́ pú’u.

²² Yěsô gíŋe ńgɔɔn ngie: Tá wɔ̀ɔn léen ńnyé kɔ̀ɔkɔ́ɔ nà mbwo mɔ́ɔn. Ngwɔ́ tsɔ̌ nyìŋ le zsé múɔ wɔ́, ńdà’ Tá we zɔ zsé yé. Nyìŋ ké le Tá zsé, ńdà’ Míŋ we zɔ zsé yé, ḿbiŋ ńgÿo nyìŋ gẅie múɔ kwoŋó lényɛɛ Tá we mbwo yé.

²³ MÀbiŋ sele nnɛ́, ńtsẅe ńgɔɔn mbwo *ngàŋa kwò yé ngie: Pi ee pàshÿó mbòŋo tɛ’ pá’ pi ne ńgyá shúm sie pi ne ńgyá lɛ̀.

²⁴ Tà mèŋ n ké shwóŋó gẅí, lélÿo *pàntsẅì nkʉ̀ Ssé, mbàa mefùɔ lǎ tsɔ́ɔn légyá menò mie pi gyá lɛ̀ tɛ’, pɔ́ té gyá, ńtsɔ́ɔn lé jú’ menò mie pi ne ńjú’u lɛ̀, pɔ́ té jú’.

Kwoŋ Ssé, mbɔɔ fɛ́ gù

²⁵ Atsɔ̌ nkyàgte *lepʉ̌ Mǒsê jú’u shwóŋè Yěsô tà ńdu ssé, ńdʉŋte yé, ńzɛ́te yé ngie: Tsítsà, à lɔɔn ńgwɔ́ mèŋ n gÿo yɔ́ɔn lêkɔ́ tá ńgẅiin le gwɔ́ tèmì?

²⁶ Yěsô jú’ pú’u, ńgɔɔn mbwo yé ngie: Ɔ̀ tóŋo jú ŋwà’ne Ssé ńjú’u pɔ́ lêkɔ́?

²⁷ Á tsɔ́’ ngie: N tǒŋ ńjú’ ngie: «Kwoŋo Cʉ̀apʉ̀a Ssé ɔ̀ nê ngwòŋ ntʉ́m ɔ́ ntsèm, ńtÿɔ́g pɔ́ yé mvfò nà jú kɔ̀ɔkɔ́ɔ wɔ́, ḿbiŋ ńdɔg metʉ̀ mú ntsèm éfa’a mbwo yé, ńzába kwàŋte ɔ́ ndà’ ná yé, ńgíŋe ńkwoŋo fɛ́ gù nyìŋ mesoŋ pá’ twó mbùm ɔ́ la».

²⁸ Yěsô gɔɔn mbwó yé ngie: Ɔ̀ tsɔ̌’ mboŋó, gÿo pú’u, pi Ssé zɔ lá’a ńcʉ́’ʉ ńnéŋe.

²⁹ Nyìŋ ŋwɛ́ gwɔ́ zoŋo twó yé, ńgɔɔn ngie: Ayɛ̀ tà ḿboŋ, tà fɛ́ wɔ̀ɔn nyìŋ mesoŋ aa pá’ɔɔn ńgwɔ́ wɔ́?

³⁰ Yěsô lɔg sagá nò ńtsɔ́’ ngie: Atsɔ̌ nyìŋ lǎ’ fó Yerósalem, ńně ńcwóŋo né Yériko, metsǒŋ gwoon yé mánzsé, ńkẅé shúm sé, ésẅɛ menzsǒ ná yé, ńcúa yé ḿbwɔ́’te tà á cʉ́’ʉ ńgee pɔ́ ńkwé pɔ́ gwá’ ńkÿo.

³¹ Atsɔ̌ nuŋe pwɔ́’ ye Yuda gÿo ne ńcʉa jʉ’ó, ńgyá nyìŋ ŋwɛ́ nuŋe ssé, á lí’te, ḿpfó nà yetsɔ́ gwoŋó nzsè, ńtɔ́g ńcʉa.

³² Á gíŋ ńgwaa cʉa méjʉ’, atsɔ̌ nyìŋ nà ngẅɛ̀ Lěvi, gẅie pɔ́ zɔ̌ fa’a ndá Ssé, á tó yé tà ńkúu jʉ’ó, ńgyá nyìŋ ŋwɛ́ nuŋe, á gíŋe ńgÿo yé pɔ́ pú’u, ńdí’te, ḿpfó nà yetsɔ́ gwoŋó nzsè, ńtɔ́g ńcʉa.

³³ Tá’, tsɔ̌ nyìŋ Samalîɛ ne ńgee né legìŋ, ńgʉa tà ńkúu jʉ’ó, ńgyá yé, mezìŋe mé kúu yé.

³⁴ Á tóo lejʉ́ŋ yé, ńdɔg melù’ sɔg mefʉ̌ŋ mé, ńdɔg mèvɛ ńcÿɔ’, ńdɔg shúm nzsǒ ńkwɛ́, ńdêen ńké ńkaa yé ná nɔ̀ɔn gẅie à gwaa tó, ńnéŋe mǒ, ńdɔgɔ yé ńgʉa tà ńkúu ndá gie megʉ̀ péen, ńdá’a wó, ńdá’a lá’ ńdíe yé.

³⁵ Njÿó gÿo ńdʉ́a, á gyá ngàŋ ndá, éfa’ nkáb pàg pʉ́a, ńnáa mbwo yé, ńgɔɔn ngie: Kɔ nkáb yɛ̀, ńcʉ́’ ně ńdɔgɔ ńzoŋo nyìŋ wɔɔn. E lɔɔn ńcʉ́’ ńkɔ́g tà ɔ̀ kẅi’i pɔ́ láa wɔ́, mbà mèŋ n ge cʉ́’ʉ lépiŋ nzèm, é tsɔ́’, ńnáa mbwo gù.

³⁶ Yěsô gɔɔn pú’u, ńdêen ńké ńzɛ́te nkyàgte mbʉ̌ Ssé wa ngie: Ɔ̀ kwǎŋ jú ngie á gʉa ná pʉ̀a pɔɔn métá, awɔ̌ aa mǒ, ńgwɔ́ pá’ fɛ́ nyìŋ gẅie metsǒŋ la gwoon yé lɔɔn?

³⁷ A gɔɔn ngie: N kwǎŋ ngie aa nyìŋ gẅie à la tsɔ́ɔn mezìŋe mé, ńzoŋo yé. Yěsô lêen ńké ńgɔɔn né yé ngie: Lò, kwà’ gù jú ńnéŋe ńgÿo jú pú’u.

Mágtà pɔ́ Malîɛ kǔe Yěsô ndá pɔ́b

³⁸ Yěsô pâ *ngàŋa kwò yé gÿo ńcʉ́me mánzsé ńně ńgee, ńkúu tsɛ̀ɛ tsɔ́ lá’. Atsɔ̌ manzwě gẅie mé tóŋo yé le Mágtà kúe yé ndá yé.

³⁹ Mágtà la gẅiin fɛ́ we we manzwě, lezíŋ sé gwɔ́ le Malîɛ. Yěsô tó tà ńnéŋe ssé, Malîɛ tó ńnéŋe lejʉ́ŋ yé, ńně ńjú’u shwóŋè yé.

⁴⁰ Mágtà ně ńgége mbùm ye lécwoŋte shúm léjÿó, ńnéŋe tà ńtóo lejʉ́ŋ Yěsô ńgɔɔn né yé ngie: Andè, tà ɔ̀ gyǎ jú ngie áa mbòŋ pá’ Malîɛ ně ńgʉa ńnéŋe jʉ’ɛ, ḿbú ńnyé fà’ né mèŋ gílé mèŋ? Tsẅi ngie à tó ńkẅéte wɔ̀ɔn la.

⁴¹ Yěsô gɔɔn ngie: Mágtà, Mágtà, ɔ̀ pǔ’ mbùm ɔ̀, ńgwá ńgyá ngɔ́’ nà shúm tà ńgyɔ́ɔn.

⁴² Tá’ tà’a mmó gwɔ́ wó, ńgwɔ́ tʉ̀ nzẅìŋ, Malîɛ kaŋá yɛ̌ ŋwɛ́, ḿbɔ́ɔn nyìŋ léfó mbwo yé ńkẅé.