Lukase 1 - Nouveau Testament en Ngienboum

Nzyè nò

¹ Andè; Téofil, ɔ̀ zsě ngie pʉ̀a tà ńgyɔ́ɔn kéen ńkaa fà’a lécú’te menò mie é ka cʉa tsetsɛ̀ɛ pege tà ńŋwe’e,

² ńŋwe’e kwà’ pá’ pʉ̀a pie pɔ́ la gyá pá’ nò yɔɔn zyete, ḿbiŋ ńgyá pá’ á giŋe pú’u.

³ Pá’ á ka gwaa gwɔ́, mbà mèŋ n kéen ńgwáa ńtúŋté fa’ yɔ́ɔn tà fó letsiŋé nò la, mèŋ n ka gyá ngie á póŋ mèŋ n táŋte yɔ́ɔn mboŋó, ńŋwe’e tsɛ̀ɛ yɔɔn ŋwà’ne, ńnáa mbwo gù.

⁴ Mèŋ n gÿo pá’ɔɔn légwɔ́ gie ɔ̀ ge tóŋ lɔg zsé ngie menò mie mé la zí’i gú ée jʉ’ó ńgwɔ́ kwà’ pú’u.

Tsɔ̌ cÿɔ́’ Ssé ge pÿé ngie mé ge lá’ zyé Jâŋ Mbabtis

⁵ Á laa fʉ̀’ gie *Herôd laa fùɔ lá’ pà Jẅidea, atsɔ̌ *nuŋe pwɔ́’ gwɔ́ wó, lezíŋ sé gwɔ́ le Sakarîɛ, á fa’a nà nùɔ pʉ̀a pé Abia. Anzwě we laa yé nà ngẅɛ̀ Aroŋ, lezíŋ sé gwɔ́ le Lisape.

⁶ Sakarîɛ pɔ́ nzwě we laa pʉ̀a, ńkú’te *lepʉ̌ Ssé kwà’ mboŋó, ńjú’u ncwò Ssé, ḿbiŋe ńgÿo pɔ́ mmó gie à ne ńkwoŋo tà *lɔ̌’ téen ńkẅɛɛ wɔ́.

⁷ Pɔ́ la tè múɔ gẅiin, mélà’mie Lisape laa nkǐŋ manzwě, mbà pɔ́ giŋé ḿbú ńzẅiŋ.

⁸ Afʉ̀’ ye nùɔ fà’ we pà Sakarîɛ lêen ńké ńgÿo ńku’, á gwɔ́ *jʉ’ʉ Ssé Yerósalem ńne nuŋe pwɔ́’.

⁹ Pànuŋe pwɔ́’ lɔ́ɔn ńtsẅé ńgẅiin létyeente ńdɔg fa’a tà’ nyìŋ tsetsɛ̀ɛ pɔ́b gẅie à ge kúu tsɛ̀ɛ ndá, á *jʉ’ʉ Ssé, é tuɔ shúm gyě lélɔg ńgu’te Ssé, ńgÿo pú’u, tsɔ́ lyɛ̌’, e Ssé tsɔ́’ɔ Sakarîɛ.

¹⁰ Á gwaa gwɔ́ ndá ně tuɔ shúm gyě ŋwɛ́, alá’ gwɔ́ pǐ tà ńgyɔ́ɔn, ḿbú ne sẅíŋte Ssé metsèm.

¹¹ Sakarîɛ gwaa gyá, atsɔ̌ *cÿɔ́’ Ssé vege ńkẅɛɛ mvfò yé, ńtyé jʉ’ gie mé tuɔ shúm gyě wó, á nà gwoŋó pwó tʉ̀.

¹² Sakarîɛ gyá yé, além yé tsɔ́’ɔ, ecÿɔ́’ gwoon yé.

¹³ Tá *cÿɔ́’ Ssé gɔɔn né yé ngie: Sakarîɛ, te gíŋe ḿbɔ́g, e Ssé kéen ńjú’u nò gie ɔɔ ńtsẅé sẅíŋte yé mǒ, tà à ge cÿɔ’ɔ nzwě ɔ̀ Lisape, pi yé zyé tà’ mûɔ mbàŋa, ɔ̀ tsẅi lezíŋ sé le Jâŋ.

¹⁴ Múɔ ŋwɛ́ ge lá’ gwɔ́ mbwo gù, é gwɔ́ kwà’ mmó lekág, epʉ̀a tà ńgyɔ́ɔn gíŋe ńkága ná pá’ mé zyě yé.

¹⁵ À ge lá’ gwɔ́ mbwo Ssé é gwɔ́ nyìŋ tɛ’. À piŋ těen ńdá’a ńnúu melù’ wɔ́, tà mbɔɔ kɔ̀ɔkɔ́ɔ gie ńgwɔ́ nyìŋ nú ḿbʉ́a. À ge lá’ zɔɔn gwɔ kẅɛɛ lepfòm má we, mbà Zẅìge Ndʉalʉ̌a léen ńjÿó yé

¹⁶ À gÿo pʉ̀a Israel tà ńgyɔ́ɔn sele ntʉ́m wɔ́b, ḿbiŋe mbwo Cʉ̀apʉ̀a Ssé yɔb.

¹⁷ E Ssé ge lá’ náa yé metʉ̀, à lɔg ńgwɔ́ yé pá’ *Elîɛ, *ntsẅì nkʉ̀ Ssé, lélɔg ńgwɔ́ mvfò e fa’a pá’ à ge gÿo metá gẅiin nkwaŋá mbòŋo nà gubé yɔ́b, é piŋ gÿo pàte jǔ’ ncwò gẅiin ntʉ́m pʉ̀a pie é pɔ́g Ssé. Pú’u, e Ssé lɔg ńtáŋte pʉ̀a pie é ge lá’ ku’u légu’te yé.

¹⁸ Sakarîɛ la jú’ pú’u, ńzɛ́te *cÿɔ́’ Ssé ngie: Tà mèŋ n ge gyá kɔ́ tá zsé ngie á ge lá’ gwɔ́ nò? Pá’ peg wɔ̀ɔn manzwě pú ńzẅiŋ tɛ’ lɔɔn?

¹⁹ *Cÿɔ́’ Ssé tsɔ́’ ngie: Mèŋ n gee Ngáapeleya, ńju’u mbwo Ssé. Yé zɔ tumó wɔ̀ɔn ngie n tó ńtsẅi wɔɔn nkʉ̀ mbòŋo mbwo gù.

²⁰ Áa nò gie á ge kwà’ gÿo kẅɛ nà yé fʉ̀’, tá’ pá’ ɔ̀ kaa zẅíŋe lá, ɔ̀ ge cʉ́’ gwɔ́ pɔ́ támbǎ’ tà yɛ̌ fʉ̀’ gÿo ńku’.

²¹ Alá’ gie á laa pi ńzẅí’te Sakarîɛ la gyá, mbà à neŋé tsɛ̀ɛ ndá tà á cʉa, á kʉ’ʉ wɔ́b.

²² Á gwɔ́ tà ńkẅɛ, à té gíŋe ńku’u légɔɔn nò mbwo pɔ́b wɔ́, ńcʉ́’ ńdɔg pɔ́ mbwo ńtsẅii nò. Pɔ́ gwoon ńzsé ngie à tǒ ndá, e Ssé ńnyɛ́’ nÿɔ́g mé, á gyá tsɔ̌ nkʉ̀’ʉ nò. Á fó pú’u, ńcʉ́’ ńgwɔ́ pɔ́ támbǎ’.

²³ Sakarîɛ lu ńgwɔ́ tà mag mé melyɛ̌’ɛ fà’ á *jʉ’ʉ Ssé Yerósalem, ḿbiŋ né mbʉ̀a yé.

²⁴ Mɔɔn menò la tɔ́g, anzwě we Lisape gwoon shwoŋ, ńnéŋe ndyeen lyeen nà mesaŋ méntʉ̀a, ńne ńgɔɔn ntʉ́m yé ngie:

²⁵ Yɔɔn nò gie Cʉ̀apʉ̀a kéen ńdíe wɔ̀ɔn tà ńgÿo ná mèŋ, lélɔg sẅag shʉ́ gẅie ée ńzɔ́gɔ ńkúu wɔ̀ɔn tsetsɛ̀ɛ pʉ̀a mesoŋ pá’ n tè yɔ́ɔn múɔ gẅiin.

Cÿɔ́’ Ssé gɔ̌ɔn mbwo Malîɛ ngie à ge gÿo zyé mûɔ mbàŋa

²⁶ Lisape gwɔ́ shwoŋ tà ńgwɔ́ mesaŋ ntɔgɔ́, e Ssé túmo Cÿɔ́’ we Ngáapeleya tsɛ̀ɛ tsɔ́ tÿǒsoŋ Galilea gie mé tóŋo le Nǎzarɛd,

²⁷ á mbwo tsɔ̌ mûɔ nguɔ gẅie mé tóŋo yé lé Malîɛ, mbà mé ka pÿé yé mbwo Yesyɛ̂b, á nyìŋ nà tsiŋe ndá fùɔ Ndavíd, tà mé ńnéŋe ssé mǒ.

²⁸ *Cÿɔ́’ Ssé gʉa tà ńkúu ndá pɔ́b, ńgɔɔn né yé ngie: N tsyɛ’té gú, mbà Malîɛ, ɔɔ shÿó mbòŋo, Cʉ̀apʉ̀a lɔgɔ́ gú ńgÿo mmó, à ne ńdíe gú tɛ’.

²⁹ Malîɛ jú’, á pú ńcʉa yé tɛ’, á kwaŋte ngie: Yɔɔn ntí tsyɛ̀’te ée pá’ɔɔn ńdɔgɔ ńgɔɔn ngie kɔ́?

³⁰ *Cÿɔ́’ Ssé gɔɔn ngie: Malîɛ, tè pɔ́g, e Ssé cÿǒ gʉm jú.

³¹ Jú’u: Ɔ̀ ge gwɔ́ shwoŋ, é gÿo zyé tà’ mûɔ mbàŋa, é tsẅi lezíŋ sé le Yěsô.

³² À ge lá’ gwɔ́ nyìŋ ndÿò, mè tóŋo yé lé Míŋ Ssé gẅie à pi’i kɔ̀ɔkɔ́ɔ. Kwà’ yé Cʉ̀apʉ̀a Ssé zɔ gíŋe ńná lefùɔ ngàb ngẅɛ̀ wɔb Ndavíd né yé.

³³ Aa lá’a tsẅé sá’a ngẅɛ̀ Israel ntsèm; lefùɔ sé téen ńdá’a ḿmaga wɔ́.

³⁴ Malîɛ la jú’ pú’u, ńgɔɔn mbwo *cÿɔ́’ Ssé ngie: Tà yɔɔn nò ge lá’ cʉa lêkɔ́, pá’ n nyě tè zsě mámbàŋa lɔɔn?

³⁵ *Cÿɔ́’ Ssé tsɔ́’ɔ mbwo yé ngie: À Zẅìge Ndʉalʉ̌a ge sẅɛ́’ kúu ná gù, e Ssé gẅie à pi’i kɔ̀ɔkɔ́ɔ lɔg metʉ̀ mé ńkábte gú tà yɔɔn nò pumte. À cʉa pú’u, tá mé gÿo ńtóŋo múɔ gẅie ɔ̀ ge zyé le Ndʉalʉ̌a, é gíŋe tóŋo yé le Míŋ Ssé.

³⁶ Zɔɔn ńgyá fɛ́ gẅi Lisape. Mé ée ńtóŋo yé le nkǐŋ manzwě, à kěen ńzẅiŋ tɛ’ tá’, ée fʉ̀’ɔɔn ńgwɔ́ mesaŋ ntɔgɔ́ pá’ aa shwoŋ, tà à ge táa zyé mûɔ mbàŋa.

³⁷ À lɔɔn ńgwɔ́ nò le Ssé cʉa

³⁸ Malîɛ tsɔ́’ ngie: N gwɔ̌ pɔ́ ngàŋa fà’ Cʉ̀apʉ̀a: Á póŋ ngie à gÿo menò mie ɔ̀ shwóŋó wɔ̀ɔn mɛ̂, è pumte ná mèŋ. Á gɔɔn pá’ɔɔn, *cÿɔ́’ Ssé lêen ńké ńgʉa.

Malîɛ gʉ̌a ńgúɔ Lisape

³⁹ Malîɛ lɔg mɛ̌ melyɛ̌’, ńdu ssé, ńgiŋ pɔ́ lê metʉ̀ ńdɔ́g ye mekwɔ’ɔ́ Jẅidea ḿbʉ ńgʉa lé tsɔ́ tÿǒsoŋ,

⁴⁰ ńgʉ́a tà ńkúu mbʉ̀a Sakarîɛ, ńkúu ndá, ńtsyɛ’te Lisape.

⁴¹ Lisape jú’u tsyɛ̀’te Malîɛ, múɔ ŋele lepfòm yé, à Zẅìge Ndʉalʉ̌a sẅɛ́’ ńkúu ná yé.

⁴² Á kwé’e ngyè yé tÿǒ ńgɔɔn lé Malîɛ ngie: Ɔ̀ gẅiin mbʉ́lè Ssé, ńcʉa pànzwě metsèm. Mbʉ́lè gǐŋ ńgwɔ́ ná múɔ gẅie ɔ̀ ge táa zyé.

⁴³ Má pà Cʉ̀apʉ̀a wɔ̀ɔn tóo ńguɔ wɔ̀ɔn pá’ɔɔn, n gwɔ́ yɔ́ɔn wɔ́?

⁴⁴ Gyá pá’ n děen ńjú’u tsyɛ̀’te ɔ́, múɔ ŋele, ńkága lepfòm mèŋ.

⁴⁵ Ɔɔ shÿó mbòŋo, mélà’mie ɔ̀ ka zẅǐŋ ngie menò mie Ssé ka tǔm mé tsẅii mbwo gù, ge táa púmte.

⁴⁶ Malîɛ jú’ ńgɔɔn ngie: M bǔ ne ńnáa legú’ mbwo Cʉ̀apʉ̀a,

⁴⁷ Ntʉ́m wɔ̀ɔn ne ńkága tɛ’ ńtí pá’ à gÿǒ mèŋ n tsẅɛ́.

⁴⁸ À kimté wɔ̀ɔn, tá mèŋ n ke ńgwɔ́ pɔ́ nzèm nà pʉ̀a pie é jú’u ncwò wé Pʉ̀a mesoŋ nà mejwoŋó mejwoŋó ge lá’a cʉ́’ʉ tóŋo wɔ̀ɔn lé shÿó mbòŋo,

⁴⁹ mélà’mie Ssé ngàŋa tʉ̀ ntsèm kéen ńgÿo nkʉ̀’ʉ nò mbòŋo ná mèŋ. E Ssé ee Ssé

⁵⁰ À gÿo nò mbòŋo ná pʉ̀a pie pɔ́ kwoŋo yé ḿbiŋ ńgu’te ye, ńgíŋe ńgÿo ná púɔ pɔ́b á ná mejwoŋó mejwoŋó

⁵¹ À nyɛ metʉ̀ mé, ńgÿo memáa menò À tǎg pàŋá’te nnɛ́ ńdɔg sáa tsẅɛ

⁵² À sẅe’é méfùɔ nà lʉŋ sɔ́b ńkaa mepóŋ ńnéŋe mǒ

⁵³ À kéen ńdɔg shúm mbòŋo ńjÿɔ́g megàŋa nzyè, ńjwoŋ megàŋa mmó pɔ́ gʉa mbwo mesẅɛ̀ɛ

⁵⁴ À tóo ńkẅéte pʉ̀a Israel, é megàŋa fà’ pé À kaa lege lényɛɛ pòŋo ntʉ́m yé wɔ́,

⁵⁵ Áa mmó gie à la ka’a mbwo pàmangʉa njʉ̀’ pégè, Á mbwo Ábalam pɔ́ ngẅɛ̀ ndá yé mejwoŋó mejwoŋó

⁵⁶ Malîɛ la gɔɔn pú’u, pɔ́ Lisape lá’ ńnéŋe mmó mesaŋ méntá, tá á piŋ nzèm.

Mé ge zyé Jâŋ

⁵⁷ Afʉ̀’e Lisape ge zyé ku’, á zyé mûɔ mbàŋa.

⁵⁸ Megàŋ nkwɔ’ɔ́ mbʉ́a pâ mefɛ́ pé jú’ pá’ Cʉ̀apʉ̀a tsɔ̌ɔn mezìŋe mé, ńnáa yé mûɔ, pâ pɔ́ pú ńkág.

⁵⁹ Mûɔ gẅiin lyɛ̌’ lefɔ̌ɔn, mé tóo lépú’u yé ḿbiŋ ńtsẅi lezíŋ sé, éfa’a létóŋo yé lé Sakarîɛ pá’ tá we.

⁶⁰ Tá má we lʉ’ ńgɔɔn ngie: Me tóŋo yé le Jâŋ.

⁶¹ Pɔ́ tiŋ ńdʉ’, ńgɔɔn ngie atsɔ̌ nyìŋ tè tsetsɛ̀ɛ mefɛ́ pí lezíŋ sé gwɔ́ pɛ́’ɛ wɔ́.

⁶² Ńdêen ńké ńdɔg mbwó ńzɛ́te Sakarîɛ pá’ à kwǒŋ ngie mé tóŋo múɔ pú’u.

⁶³ Á zɛ́te mmó gie à ge ŋwe’e mmó mǒ, mé ná, á ŋwe’e ngie lezíŋ sé ée lé Jâŋ. Pɔ́ gyá á kʉ’ʉ wɔ́b tɛ’.

⁶⁴ Pɔ́ gwɔ́ gyá ncwò Sakarîɛ gwoon ńtsɔ́’ɔ tà á gwaa gíŋe zye légɔɔn nò, ńně ńgu’te Ssé.

⁶⁵ Megàŋ nkwɔ́’ɔ mbʉ́a la jú’ ngie Sakarîɛ giŋé ńgɔɔn nò ḿbú ḿmɔɔn tɛ’. Yɔɔn nò lêen ńké saa lá’, tà mé cʉ́’ ńgwɔ́ nzɔ̌ nzɔ̌ shÿó mekwɛ́ pà Jẅidea e shwóŋó pɔ́ yɛ̌.

⁶⁶ Awɔ̌ɔwɔ́ɔ gẅie à la jú’ mɔɔn menò le’e pɔ́ tsɛ̀ɛ ntʉ́m yé. Pɔ́ ne ńzɛ́te ngie: Yɔɔn ńtí múɔ ee pá’ɔɔn lá’ gwɔ́ kɔ́? Á zɔ́ɔn ńgwaa gwɔ́ Cʉ̀apʉ̀a ně ńdɔgɔ metʉ̀ mé ńtóonte yé.

Azɔ́bɔ ntse Sakarîɛ

⁶⁷ À Zẅìge Ndʉalʉ̌a pú ńjÿó tá we Sakarîɛ, á gɔɔn nò pá’ *ntsẅì nkʉ̀ Ssé lá, ngie:

⁶⁸ Pege zɔb ntse ńgú’te Cʉ̀apʉ̀a Ssé pà Israel, à tǒ ńkẅéte pʉ̀a pé, ńcu’u wɔ́b ndá nkwɔ̀ɔn.

⁶⁹ À tumó *Nzà’nkÿo we lÿò né pege. À kẅɛɛ nà ngẅɛ̀ nda ngàŋa fà’ wé, fùɔ Ndavid,

⁷⁰ Á gwɔ́ nò gie à la lá’ ńtsẅi tà ntyě sagá, oon, à la lɔg ncwò *pàntsẅì nkʉ̀ pé ńgɔɔn ngie:

⁷¹ Mèŋ n ge lá’ kẅé gẅi mbwo megàŋ mbù pí, mbɔɔ nà mbwo pʉ̀a pie pɔ́ té ne ńkwoŋo légyá gẅi wɔ́.

⁷² Wɔɔn aa pá’ poŋo ntʉ́m Ssé la zye ná pàmangʉa njʉ̀’ pégè, à giŋé ńgwɔ́ lyɛ̌’ɔɔn, ńkímte *kʉ̀a ndʉalʉ̌a gie pâ pɔ́ la gwa,

⁷³ ńkímte pá’ à la gɔɔn tà ńkʉa mbwo Ábalam, á mangʉa njʉ̀’ wege. À lɔ̌ɔn ńgɔɔn ńtíi wege ngie:

⁷⁴ N ge lá’ kẅé penkʉ́ pú, á nà mbwo megàŋ mbù pɔ́b, tá pɔ́ lêen ńké ńku’u léfa’a mbwo mèŋ té pɔ́g.

⁷⁵ Pɔ́ cʉ́’ pʉ̀a pɔ́ɔn, é gÿo pɔ́ wɔɔn lékwoŋ nà mengwòŋ melyɛ̌’ɛ lá’ mɔ́b ndùmo Ssé tsetsá’.

⁷⁶ Sakarîɛ gíŋe ńgɔɔn ngie: Á gʉa ná gù míŋ wɔ̀ɔn, mbà mé ge lá’a tóŋo ɔ́ lé *ntsẅì nkʉ̀ Ssé, e Ssé gẅie à pi’i kɔ̀ɔkɔ́ɔ Cʉ̀apʉ̀a gwaa tó, mbà ɔ̀ vɔ̌g ńgwɔ́ mvfò ńnyɛte mánzsé we.

⁷⁷ Ɔ̀ ge táa gÿo pʉ̀a pé zsé ngie á tsoté tà ḿbɔ́ɔnte pá’ à ge lege menò tepòŋ mɔ́b, é gÿo pɔ́ tsẅɛ́,

⁷⁸ mélà’mie à ne ńdíe wégè mboŋó, ḿbiŋ ne ńtsɔ́ɔn mezìŋe mégè tɛ’. À ge túmo Nyìŋ gẅie à ge gÿo pege gwɔ́ wó, angàŋ fó tÿǒ ńtó ńgwɔ́ nkà’,

⁷⁹ ńkyɛ’ pʉ̀a pie é ńnéŋe tsɛ̀ɛ nzěm, legwé piŋ ńne nÿɔgɔ wɔ́b, é tsege wɔ́b ńnéŋe tsɛ̀ɛ sẅétè.

⁸⁰ Míŋ Sakarîɛ gÿo ḿbʉ́le ńgú’ tà ńcʉ́’ʉ ndÿò, ńgʉa ńnéŋe nkwòŋo tsẅɛ̀, ńdá’a ńtsẅé pɔ́ wó tà ńkúu lyɛ̌’ gie à la nyɛ mbum ye mbwo pʉ̀a Israel.