Kolosia 4 - Nouveau Testament en Ngienboum

¹ Pi metá pu’, pi gwɔ́ ndʉŋ ndʉŋ mvfò menkwɔɔn pí, ḿbiŋ ńgÿo pɔ́ mmó gie á zɛ́te ngie mé gÿo, ńne ńkímte ngie pi gí gẅiin gẅi Tá fà’ tÿǒ lepwó.

Ammó gie Pɔl ne ńkẅiŋte pʉ̀a Kristo mǒ

² Pi ké ne sẅíŋte Ssé sẅíŋte, tà pi lyé, pi gwɔ́ gÿo pú’u, ńne ńnáa ndǎg mbwo Ssé,

³ ńgíŋe ne sẅíŋte Ssé nà ség twó, à ná shÿó peg lɔg shwóŋó nò yé. Mèŋ fo pú’u, ńkyagte nò Kristo gie á la zɔɔn ńdyeen menÿɔ́g pʉ̀a lyeen, mèŋ n gee tsǎŋ pá’ɔɔn ńtí pɔ́ yɛ̌.

⁴ Pi cwoŋo sẅíŋte Ssé ńzsé ngie mèŋ n ge shʉa shʉa gɔɔn nò yé pá’ á ne ńzɛ́te ngie mèŋ n gɔɔn.

⁵ Á gʉa ná pʉ̀a pie é té pʉ̀a Kristo wɔ́, pi zsé ntí gie pi ge lɔg ńnéŋe tsetsɛ̀ɛ pɔ́b. E Ssé ná shʉa létsẅi Nkʉ̀ Mbòŋo mbwo pɔ́b, tà pi cʉ́’ yɛ̌ fʉ̀’ tɔ́g.

⁶ Pi gwɔ́ fʉ̀’ ntsèm ńgẅiin pɔ́ ncwò mbòŋo, ńgɔɔn pɔ́ nò gie á ge kẅéte, ńtsɔ́’ɔ nò mbwo nyìŋ pɔ́ pá’ á kě ḿboŋ ngie mé tsɔ́’.

Atsyɛ̀’te lɔg ńzsòte

⁷ Antʉ̀ nzẅìŋ fɛ́ wege Tishig, gẅie pega pɔ̌ zɔ pǔ fa’a mbwo Cʉ̀apʉ̀a ge tó shwóŋó gẅi pá’ mèŋ n gee jʉ’ɔɔn ńnéŋe pú’u. Aa ngàŋa fà’ tɛ’, à zsě pɔ́ nò Cʉ̀apʉ̀a.

⁸ Mèŋ n tʉʉ lélÿo ńtúmo yé ngie à gʉa shwóŋó gẅi pá’ peg lɔg ńnéŋe jʉ’ɔɔn pú’u, mbɔɔ pá’ à ge tó kẅiŋte gẅí.

⁹ Tychite pɔ́ Onesime ge gÿo pú tó. Onesine aa tsɔ̌ tà’ nyìŋ gẅi, ńgwɔ́ ntʉ̀ nzẅìŋ fɛ́ wege, ńzsé yé pɔ́ ndà’ nò Yěsô. Pɔ́ ge tó, éshwóŋó gẅi kɔ̀ɔkɔ́ɔ gie á ne ńcʉate jʉ’ɔɔn.

¹⁰ Alistag gẅie peg yé pǔ ńgwɔ́ ndá tsǎŋ, à tsyɛ’té gẅí. Malékuse gẅie aa míŋ fɛ́ Panebâse giŋé ńtsyɛ’te gẅi yé. Mèŋ n ka zɔɔn ńkíme yé mbwo pi. À lɔɔn ńkúu jʉ’ɛ, pi kúe yé mboŋó.

¹¹ Yěsô gẅie mé gíŋe ńtóŋo yé lê Jẅistẅis tsyɛ’té gẅi yé. Á gʉa tsetsɛ̀ɛ pà Yuda pie é ka zẅíŋe nò Kristo, ée ndà’ wɔ́b pɔɔn métá pie pega pɔ̌ ee jʉ’ɔɔn, éfa’a ńtí nò *lefùɔ Ssé. Pɔ́ zɔ̌ ka ne ńnéŋe ntʉ́m wɔ̀ɔn.

¹² Epafalas gẅie aa nyìŋ lá’ gẅi, a tsyɛ’té gẅí. Wɔɔn nyìŋ gẅie a fà’ fà’ Kristo ńnéŋe ngwòŋ fʉ̀’ ntsèm, ńne ńdɔgɔ lésẅíŋte Ssé, ḿma’a ncù ná twó sí. À gÿo pú’u, légwɔ́ gie pi ge tʉ tʉ ná nò Yěsô, atsɔ́ mmó le gíŋ ńzága ná pi wɔ́, pi ńnéŋe ngwòŋ fʉ̀’ ntsèm, ńzẅíŋ pɔ́ légÿo mmó gie e Ssé ne ńkwoŋo ngie pi gÿo.

¹³ Mèŋ n dɔ̌g nÿɔ́g mɔ́ɔn ńgyá pá’ à gya ngɔ́’, éfa’a ńtí gẅí, éfa’a ńtíi mbɔɔ pʉ̀a Ssé pie ée Laodisé mbɔɔ pie ée Hierapolis.

¹⁴ Ashǔ wege Lukase, á lɔ́gta lÿò, mbɔɔ Ndemas tsyɛ’té gẅí.

¹⁵ Pi tsyɛ’te mefɛ́ mefɛ́ pie ée Laodisé, ńtsyɛ’te Nimfa mbɔɔ cú’tè pʉ̀a Kristo gie áa ndá yé.

¹⁶ Pi ge tóŋo yɔɔn ŋwà’ne tà à mag, éfa’ shÿó túm náa mbwo pʉ̀a Kristo pie ée Laodisé, pɔ́ tóŋ yɔ́b. Ayɔ́b ŋwà’ne gie mèŋ n tǔm, pɔ́ ná pi gíŋe ńtóŋ gí.

¹⁷ Pi gɔɔn mbwò Aleshʉpe ngie, tà á lɔgɔ fà’ gie Cʉ̀apʉ̀a ka cʉ́me mbwo yé ńdɔg ńgÿo megʉa, ńgie à fa’ mboŋó.

¹⁸ Pi gyá tsyɛ̀’te gie mèŋ Pɔl n dɔgɔ́ kwà’ pwó yɔ́ɔn ńŋwé’e. Tà pi lege ngie mèŋ n gee ndá tsǎŋ. E Ssé ne ńgwɔ́ né pi metsèm!