Kolosia 3 - Nouveau Testament en Ngienboum

¹ Pá’ pia Kristo la púte ńzíme nà legwé la, pi tÿɔ́g lejÿɔ́g sí pɔ́ nà shúm sie ée tÿǒ lepwó, ajʉ’ gie Kristo aa wó, ńnéŋe nà gwǒŋo pwó Ssé ye tʉ.

² Pi nɔ́ɔnte pɔ́ mmó gie áa tÿǒ lepwó, tà pi nɔ́ɔnte gie áa ndùmo ssé tsetsá’.

³ Pi zsé ngie áa nà menò njÿó, mbà pi léen ńkwé. Agẅi le gwɔ́, aa mbwo Kristo á lejʉ́ŋ Ssé, mé té ne ńgyá pá’ à gwɔ̌ wɔ́.

⁴ Kristo zɔɔ kwà’ gẅi le gwɔ́. À ge lá’ gwɔ́ tà kẅɛ, pi gíŋ ńkẅɛ gí, pia pɔ́ zɔ púte ńgwɔ́ tsɛ̀ɛ legú’ we.

Anzẅìŋe le gwɔ́ pɔ́ le gwɔ́ we sẅé

⁵ Pá’ áa pú’u la, pi zẅé mà tepòŋ we ndùmo ssé tsetsá’ gẅie aa ná pi. Mé gɔɔn mmó pá’ mbàŋa letóŋ panzwě, é panzwě léfa’ mbàŋa, á mmó pá’ nò mpfwɔ́’, á mmó pá’ ntʉ́m nyìŋ légwá shÿó, pá’ legẅiin tsɔ́ ntí letsɔ̌ɔn shúm, pá’ letÿɔ̌g ntʉ́m nà shúm, á nue letÿɔ̌g ntʉ́m nà shúm, à giŋé ńgwɔ́ pɔ́ tsɔ̌ ntí legu’te shúm ngie ée Ssé.

⁶ Mɔɔn ée menò mie é gÿo e Ssé gyáŋa lóŋ ná pʉ̀a pie é té ne ńjú’u ncwò wé wɔ́,

⁷ ée menò mie pi ka ne ńgÿo á fʉ̀’ gie mɔɔn menò tepòŋ ka nyě sá’a gẅí.

⁸ Tá’, á ké ńgwɔ́ fʉ̀’ɔɔn ńne ńzɛ́te ngie pi sẅɛ mɛ̌ menò ná pi ńgwá’, pá’ mé gwá’a nzẅìŋe nzsǒ la. Mé gɔɔn nyìŋ gẅi légyáŋa lóŋ, á nyìŋ gẅi léńnéŋe ńcÿɔ́g cÿɔ́g, á nyìŋ gẅi lézá’ lekwɔɔn nyìŋ, á nyìŋ gẅi lézoon nzòon, á shwóŋe tepòŋ légíŋe ńkẅɛɛ ncwò pi.

⁹ Pá’ pi kéen sẅɛɛ mà we zẅìŋ pâ menò mé ná pi tà ńgwá’ la, tà cÿɔ̌ nò gíŋe ńgwɔ́ tsetsɛ̀ɛ pi.

¹⁰ Pi ee pɛ́’ɛ, mbà pi ka kaa mà we nyìŋ sẅé, ḿma’a mbùm pi. Wɛ̌ mà fóo mbwo Ssé. Yé zɔ̌ ne ńtáŋte ngwòŋ fʉ̀’ ntsèm légwɔ́ gie à ge sẅé we. E Ssé gÿo pú’u, légwɔ́ gie pi ge pú zsé yé.

¹¹ Pá’ pi metsèm kéen ńcʉ́’ pʉ̀a pe mesẅé la, à tyɛ̀’te té gíŋe ńgwɔ́ tsetsɛ̀ɛ pi tà áa gie mé ge gíŋe gɔɔn ngie: Wɔɔn aa nyìŋ Gelekia, wɔɔn gwɔ́ nyìŋ pà Yuda wɔ́. Mé le gíŋe ńgɔɔn ngie wɔɔn aa nyìŋ gẅie mé la pú’u yé, wɔɔn gwɔ́ nyìŋ gẅie mé la tè yé pú’ wɔ́. Kà pɔ́ légíŋe ńgɔɔn ngie wɔɔn la zí’i ŋwà’ne, wɔɔn tè zí’i wɔ́. Mé ké le gíŋe ńgɔɔn ngie wɔɔn nyìŋ aa nkwɔɔn, wɔɔn tè nkwɔɔn wɔ́ wɔ́. Kristo zɔ cʉ̌’ ńgwɔ́ gí nò ntsèm, ńgwɔ́ ntʉ́m pi metsèm.

¹² E Ssé la kwoŋo gẅí, ńtsɔ́’ɔ gẅí, ńdɔg ńgÿo pʉ̀a pé. Pú’u la, pi píi tsẅé sẅé ḿma’, ńtsɔ́ɔn mezìŋe petsɔ́ pʉ̀a tɛ’, ńgẅiin pòŋo ntʉ́m, ńná nnɛ́ ssé, ńgwɔ́ ngàŋ mbʉ́lè, ńgẅiin shÿɔ̀gɔ ntʉ́m.

¹³ Pi gẅiin shÿɔ̀gɔ ntʉ́m tsetsɛ̀ɛ pi, nyìŋ gẅi fʉa nò pi lege ńnáa mbwo ye, ńdege mefʉa mí tsetsɛ̀ɛ pi né pi, pá’ Cʉ̀apʉ̀a wege la lege mefʉa mí gí la.

¹⁴ Anò gie á cʉa mɔɔn menò ntsèm, aa pi légẅiin nkwòŋe tsetsɛ̀ɛ pi. Nkwòŋe ee nkenkÿo gẅie é ge kwɛ́ɛ gẅi lɔg gÿo tà’ leka’á pá’ á ne ńzɛ́te ngie pi temte pú’u.

¹⁵ Mèŋ n ne ńtsɔ́ɔn ngie mbʉ́lè gie e fóo mbwo Kristo e jÿó ntʉ́m gẅí, e Ssé la tóŋo gẅi métsèm légwɔ́ gie pi ge gẅiin mbʉ́lè ŋwɛ́, pá’ pi ge gwɔ́ mekèm tà’ mbùm nnɛ́. Pi ké ńgwɔ́ fʉ̀’ ntsèm, ńne ńnáa ndǎg mbwo Ssé.

¹⁶ Pi lɔgɔ shwóŋè Kristo ńzye ntʉ́m gẅi kwà’ mboŋó. À cʉa pú’u, pi gẅiin zse nò lélɔg ńzí’i mmó tsetsɛ̀ɛ pi, mbɔɔ lélɔg ńtÿɔ́gte mennɛ́ mí. Pi zɔb ntse ńdɔg ńgu’te Ssé nê ngwòŋ ntʉ́m gẅi ntsèm, ńdɔg ńná ndǎg mbwo yé. Pi zɔbɔ pú’u, mezɔ́b mie ée tsɛ̀ɛ ŋwà’ne Ssé, ńzɔbɔ zɔ́bɔ pʉ̀a Kristo, ńzɔb mezɔ́b mie Zẅìge Ssé ne ńnéŋe ntʉ́m pi.

¹⁷ Pi lɔɔn ne ńgÿo pɔ́ kɔ́ wɔ́, kà shwóŋó pɔ́ kɔ́ wɔ́, pi záb pɔ́ lezíŋ Cʉ̀apʉ̀a Yěsô mvfò, ńne ńnáa ndǎg mbwo Tá wege Ssé, ńcʉa ná Yěsô

Ntí gie pʉ̀a Kristo gẅiin lélɔg ńnéŋe pú’u, tsetsɛ̀ɛ pɔ́b

¹⁸ Pi pànzwě pie pi zɔ̌’, wɛ̌ nyìŋ wɔ́ ná pi, ná mbùm ye ssé mvfò ndùm we. Áa pá’ á poŋ ngie manzwě gẅie à la nnɛ́ ná Cʉ̀apʉ̀a gÿo.

¹⁹ Pi mbàŋa pie pi zɔ̌’, wɛ̌ nyìŋ wɔ́ ná pi kwoŋo nzwě we, tà á gÿo nzwě we cʉ́’ʉ ngàŋ ngɔ́’.

²⁰ Pi penkʉ́ pi jú’ ncwò metá pí lâ memá pí nà kɔ̀ɔkɔ́ɔ, á nue áa mmó gie á poŋo Cʉ̀apʉ̀a.

²¹ Pi metá penkʉ́, tà pi lába lóŋ penkʉ́ pí, ḿbɔ́g mbùm yɔ́b létsyɛte.

²² Pi menkwɔɔn pi jú’ ncwò pʉ̀a pie é gẅiin gẅi ndùmo ssé tsetsá’, á nà kɔ̀ɔkɔ́ɔ. Pi pɔ́ɔn léfa’a fà’ pɔ́ ndà’ fʉ̀’ gie pɔ́ tyé nzèm pi pá’ fʉ̀’ gie pi gÿo pɔ́ mmó gie á ge poŋ pʉ̀a mesoŋ la. Pi fa’ nê ngwòŋ ntʉ́m gẅi ntsèm ńtí pá’ pi ne ńnáa mekù’ Cʉ̀apʉ̀a.

²³ Mé lɔɔn ńná yɛ̌ ntí fà’ né pi wɔ́, pi fà’ pɔ́ nê ntʉ́m mbòŋo, pá’ fʉ̀’ gie pi fa’a pɔ́ mbwo Cʉ̀apʉ̀a tà pi tě fa’a pɔ́ mbwo pʉ̀a mesoŋ wɔ́ la.

²⁴ Tà pi lege ngie Cʉ̀apʉ̀a Kristo zɔ ge lá’ tsɔ́’ɔ fà’a gí, é gʉa ná shúm sé, é náa gí, á nue yé zɔɔ kwà’ nyìŋ gẅie pi fa’a mbwo ye.

²⁵ Tá ńké ńgwɔ́ gie nyìŋ lɔɔn ńgÿo mmó gie Ssé tè kwoŋ, mbà Kristo ge lá’ ná pɔ́ mmó gie á ku’u ná ye né yé, á nue e Ssé ee ntěen ńtuŋo metùŋ wɔ́.