Kolosia 1 - Nouveau Testament en Ngienboum

Atsyɛ̀’te

¹ Yɔɔn ŋwà’ne fóo mbwo mèŋ Pɔl, e Ssé la kwoŋ ngie n gwɔ́ ngàŋ ntúm Yěsô Kristo. Peg fɛ́ wege Timoté náa

² mbwo pi pʉ̀a Ssé pie pi ńnéŋe Kolos. Pi pǔ ńgwɔ́ mefɛ́ mefɛ́ á nà nò Kristo, pi ké ńzsé pɔ́ ndà’ yɛ̌. Tá wege Ssé ne ńgwɔ́ né pi, ńne ńnéŋe sẅétè ntʉ́m pi.

Pɔl ne sẅíŋte Ssé nà twó pʉ̀a Kolos

³ Peg ee fʉ̀’ ntsèm ńgwaa ne sẅíŋte Ssé nà twó sí, ńne síe yé síe. Peg síe yé gẅie aa Tá pà Cʉ̀apʉ̀a wege Yěsô Kristo,

⁴ á nue mé ka shwóŋó wég ntí gie pi ne ńdɔgɔ ńzába ntʉ́m ná Yěsô Kristo mbɔɔ ntí gie pi ne ńdɔgɔ ńkwoŋo pʉ̀a Ssé métsèm.

⁵ Pi gÿo pú’u, nue pi ne ńzẅí’te mmó gie e Ssé la cwoŋte ńzába tÿǒ lepwó ńtí gẅí. Pi ka gwɔ zsé yɛ̌ mmó, éfó nà nò nénʉ́ gie mé ka shwoŋó gẅí, yɛ̌ nò nénʉ́ fóo ná Nkʉ̀ Mbòŋo.

⁶ Nkʉ̀ Mbòŋo ne saa jʉ’ tsɛ̀ɛ njÿó té vʉ’ʉ tsɔ́, ńgwɔ́ pá’ tÿǒ gie á ne ńzéme ntɔ̌ɔn, ńgíŋe ne ńgú’u la, ée tsetsɛ̀ɛ pi, ńgíŋe ńne ńgee ne mvfò pɔ́ pú’u, tà fó ndùŋ mvfò lyɛ̌’ gie pi la jú’ mé zye lékím pá’ e Ssé lɔgɔ menò mbòŋo mé ńcÿó gʉm pʉ̀a, pi kéen ńgyá yɛ̌ nò, ayɛ̌ nò gwɔ́ gie áa nénʉ́.

⁷ Peg ne ńzsé ngie Epafalas zɔ ka zí’i gẅi yɛ̌ nò. Aa fɛ́ weg we ntʉ̀ nzẅìŋ, pega pɔ̌ pǔ fa’a. Pi zsé ngie, yé gẅie aa lejʉ́ŋ pi lɛ, à zsě pɔ́ nò Kristo.

⁸ À ka shwoŋó wég ntí nkwòŋe gie Zẅìge Ndʉalʉ̌a ka ńnéŋe ntʉ́m pi.

⁹ Mɔɔn ée menò mie é gÿo tá peg laa kʉ́a lésẅíŋte Ssé nà twó sí tà fó lyɛ̌’ gie mé la shwóŋó wég ntí gie pi lɔ̌g ńkú’te nò Ssé pú’u wɔ́. Peg ne ńdúɔ mbwo Ssé ngie à gÿo pi kwa’ ńzsé mmó gie à kwoŋ, ńcʉa nà zsě nò mbɔɔ ná legyè sie Zẅìge Ndʉalʉ̌a ne ńnáa mbwo pi.

¹⁰ Pú’u, pi ku’u léńnéŋe ná ntí gie Cʉ̀apʉ̀a ne ńkwoŋo, ńne ńgÿo pɔ́ mmó gie á poŋo yé, éfa’ mefà’ mbòŋo mentí mentí, ńkẅi’i ńzsé yé Ssé.

¹¹ Peg gǐŋ ne ńdúɔ mbwo Ssé ngie à lɔg pá’ metʉ̀ pɔ́ legú’ e gwɔ́ pɔ́ mé, ńgÿo pi kwa’ ńtʉte tá ńku’u léshÿɔg menò ntsèm té tsyɛte nnɛ́.

¹² Pi lɔgɔ lekág ésíe Ssé gẅie aa Tá wege, yé gẅie à la gÿo pi ku’u légẅiin gí mmó nà tÿɔgɔ́ gẅie à la ka’a mbwo pʉ̀a pé. Wɛ̌ tÿɔgɔ́ ée nà jʉ’e kyɛ̀’.

¹³ À la sa’a wégè mbwo metʉ̀ nzěm, ńtsege wégè ńnéŋe tsɛ̀ɛ nò lefùɔ Míŋ we, à kwoŋo míŋ we ŋwɛ́ tɛ’.

¹⁴ Yé zɔ la gÿo e Ssé fó tsɛ̀ɛ nò tepòŋ ńcu’u wégè, ńdege mefʉa mégè, ńnáa mbwo pege.

Kristo pú ńcʉa kɔ̀ɔkɔ́ɔ

¹⁵ Mé té gyá Ssé wɔ́, tá Miŋ we gẅie mé lǎ gyá yé à gwɔ́ pɔ́ Ssé tà ḿmag. Yé zɔ tyé twó mvfò ná kɔ̀ɔkɔ́ɔ gie e Ssé la pwóon.

¹⁶ E Ssé la zɔɔn ńgÿo kɔ̀ɔkɔ́ɔ cʉa ná mbwó Míŋ we tá yé Ssé pwóon. Mé gɔɔn shúm ntsèm sie ée tÿǒ lepwó, mbɔɔ sie ée ndùmo ssé tsetsá’, éshúm sie mé gyá mbɔɔ sie mé té gyá, á kɔ̀ɔkɔ́ɔ gie áa tsɛ̀ɛ njÿó ńgẅiin metʉ, ńnẅɛɛ pʉ̀a, ésá’a setsɔ́, ńgẅiin jʉ’. E Ssé la gÿo sɛ̌ shúm cʉa ná mbwó Míŋ we tá mé pwóon, ḿbiŋ ḿbwóon é gwɔ́ pɔ́ se Míŋ we.

¹⁷ Njÿó la nyé pɔ́ tè gwɔ̌ wó, á gwɔ́ pɔ́ wó, akɔ́ɔkɔ́ɔ piŋ ńdɔgɔ pɔ́ pá’ á tswé’e ná yé tá ńgwɔ́ wó, ńké gwɔ̂ pɔ́ wó.

¹⁸ Ye zɔɔ twó nà mbùm nnɛ́ gie áa cú’tè pʉ̀a pé. Legwɔ́ wó we sẅé à zye pɔ́ ná yé, aa ndùŋ mvfò nyìŋ gẅie à la kwé ḿbiŋ ńzím, pú’u ńzsé ngie yé zɔ ge gwɔ́ ndùŋ mvfò ná kɔ̀ɔkɔ́ɔ.

¹⁹ Áa nénʉ́, mbà Ssé la kwoŋ ngie tà tsɔ́ mmó gie áa ná yé zága ná Míŋ we,

²⁰ ńgíŋ ńkwoŋ ngie à ge fó pɔ́ ná yé, éshwoŋte kɔ̀ɔkɔ́ɔ, égíŋ ńnéŋe lejʉ́ŋ yé, kà á gwɔ́ pɔ́ mmó gie áa ndùmo ssé tsetsá’ wɔ́, kà tÿǒ lepwó wɔ́, é lɔg pá’ Míŋ we la pfɛte metse mé nà tÿǒ nkǐ, é mag mbù gẅie é laa tsetsɛ̀ɛ yé lâ pʉ̀a mesoŋ.

²¹ Pi gí, pi laa tsɔ́ fʉ̀’ pi tè lejʉ́ŋ Ssé wɔ́, ńgwɔ́ pɔ́ ngʉ̀a shʉ̀shʉ̀a, ńgwɔ́ megàŋ mbù Ssé, á nue pi lɔ̌ɔn ńkwaŋa nò tepòŋ, ńgÿo pɔ́ yɛ̌.

²² Tá á ké ḿbiŋ ńgwɔ́ fʉ̀’ɔɔn, mbà á ka fó ná pá’ Míŋ we ka cʉ́’ʉ nyìŋ mesoŋ, ńkwé, éshwoŋte gẅi ńgíŋe ńnéŋe lejʉ́ŋ ye, éshwoŋte gẅi pú’u, légwɔ́ gie pi ge gwɔ́ ndʉalʉ̌a, é gwɔ́ pà tèfʉa, é gwɔ́ pà tè *lɔ̌’.

²³ Tá’, á ké ne ńzɛ́te ngie pi záb ntʉ́m ná yé Yěsô ńzsé ngie pi ge tyé té zóŋe, nkwaŋá gẅi e ké ńtyé pɔ́ nà mmó gie pi ne ńzẅí’te mbwo Ssé, mbà pi la jú’u yɛ̌ mmó á fʉ̀’ gie mé la ne ńtsẅii nkʉ̀ mbòŋo mbwo pi, é gwɔ́ pɔ́ wɛ̌ gẅie mé tsẅii mbwo nyìŋ mesoŋ ntsèm. Mèŋ Pɔl à yɔ́ɔn fà’ kéen ńcʉ́’ʉ létsẅi wɛ̌ nkʉ̀.

Afà’ gie Ssé ka nǎ mbwo Pɔl

²⁴ Áa fʉ̀’ɔɔn ngɔ́’ gie mèŋ n ne ńgyá ná twó gí gÿo mèŋ n kág kǎg. Ngɔ́’ gie mèŋ n gee tsoló áa pfwɔ́’ɔ ngɔ́’ Kristo gie mèŋ n gyá ntí mbùm ye gie áa cú’tè pʉ̀a pé.

²⁵ N kéen ńcʉ́’ʉ ngàŋa fà’ cú’tè pʉ̀a Kristo, pú’u, á léfa’a fà’ gie e Ssé ka cʉmé mbwo mèŋ ńtí gẅí. Yɛ̌ fà’ gwɔ́ légɔɔn shwóŋè Ssé pɔ́ ntsèm.

²⁶ À ka tsẅi ngie mèŋ n kyɛ́’ ntsem gie à la lá’ ńdÿoon mbwo pʉ̀a mesoŋ é mejwoŋó mejwoŋó tà fó ngù’. Á ké ńgwɔ́ fʉ̀’ɔɔn, mbà à kéen ńké ńkyɛ́’ yɛ̌ ntsem ńnyɛɛ mbwo pʉ̀a pie ée pé.

²⁷ Á nue e Ssé ka gyǎ ngie à ge gÿo pʉ̀a pé zsé mmó gie á la zɔɔn ńdyeen menÿɔ́g pʉ̀a lyeen, ńgwɔ́ gie à la ka’a légÿo ná metúmo metúm, yɛ̌ mmó gẅiin fù’, ḿbiŋ ḿboŋ tɛ’. Yɛ̌ ntsem gwɔ́ ngie pi zsé ngie Kristo aa tsɛ̀ɛ ntʉ́m gẅí, ńne ńgÿo pi zẅí’te fʉ̀’ gie pi ge lá’ kúu tsɛ̀ɛ legú’ Ssé.

²⁸ Áa yɛ̌, tá peg kě ne shwóŋó nò Kristo mbwo mânyìŋ ntsèm shwóŋ, ńdɔgɔ pɔ́ zsě nò gie e Ssé náa mbwo peg, ńzí’i pʉ̀a mmó, ńtẅíi letuŋó wɔ̌wɔ́ɔ, légwɔ́ gie à ge ké laa nnɛ́ ná Kristo é lɔgɔ gee pɔ́ lê mvfò, tá cÿɔgte pá’ pʉ̀a Ssé gẅiin légwɔ́ pú’u.

²⁹ Pi jú’u mmó gie mèŋ n kwé mǒ. Mèŋ n kě ńdɔgɔ pɔ́ metʉ̀ mie é fóo mbwo Kristo tá fa’a yɔɔn fà’. Mɛ̌ metʉ̀ kwa’ ńgwɔ́ soŋ nnɛ́ mèŋ ńne fa’a.