Heber 7 - Nouveau Testament en Ngienboum

Melekisedeg à laa fùɔ, ńgíŋe ńgwɔ́ nùŋe pwɔ́’

¹ Melekisedeg ŋwɛ́ à laa fùɔ pʉ̀a Salem, ńgíŋe ńgwɔ́ nùŋe pwɔ́’ we Ssé, é Ssé gẅie à pi’i kɔ̀ɔkɔ́ɔ. Ábalam laa lyɛ̌’ gie à la gʉa ncù, ńtó ńdÿɔ́’ mefùɔ tà ńgyɔ́ɔn, ńjÿó wɔ́b, ńne ḿbiŋe nzèm, Melekisedeg gʉa ńzá’a yé, ńnéŋ mbʉ́lè ná yé.

² Á gabte shúm sie à lɔ̌g fóo ncù nzsè legém, ńnáa tà’ nzsè né yé. Lezíŋ Melekisedeg é zɔɔn ńdɔgɔ ńgɔɔn ngie: «Fùɔ nò gie á tyé ndʉŋ ndʉŋ», à gǐŋ ńgwɔ́ fùɔ pʉ̀a Salem pú’u, ńdɔgɔ ńgwɔ́ fùɔ mbʉ́lè.

³ Mé té tá pà Melekisedeg zsé. Mé té má we zsé, ńké tè zsé tsìŋe ndá gie á fóo mǒ wɔ́, mé té tóo tsɔ́ jʉ’ tsɛ̀ɛ ŋwà’ne Ssé ńjú’ mé gɔɔn nò ná lezyě yé wɔ́, ńké tè jú’ mé gɔɔn nò ná legwé we wɔ́. Á gwɔ́ pú’u, ńdɔgɔ ńgwɔ́ pá’ Míŋ Ssé, á nue aa nùŋe pwɔ́’ gẅie à gwɔ́ pɔ́ wó.

⁴ Pi gyá pá’ Melekisedeg lɔgɔ ńgwɔ́ máa nyìŋ pú’u, á yé gẅie Ábalam, á mangʉa njʉ’ pʉ̀a Israel, la lɔg shúm éfó ncù, ńgabte nzsè legém, ńnáa tà’ nzsè mbwo yé.

⁵ *Lepʉ̌ mǒsê zɛ́te mbwo pànuŋe pwɔ́’ pie é lɔgɔ ńgwɔ́ ngẅɛ̀ Lěvi ngie, pɔ́ zɛ́te mbwo pʉ̀a Israel ngie pɔ́ gabte kɔ̀ɔkɔ́ɔ wɔ́ gie pɔ́ gẅiin, ńgabte nzsè legém, ńnáa tà’ nzsè mbwo pɔ́b pànuŋe pwɔ́’, ńzɛ́te pú’u, mbwo mefɛ́ pɔ́b, tá pɔ́b metsèm pú fóo pɔ́ nà ngẅɛ̀ Ábalam.

⁶ Melekisedeg la tè nyìŋ ná ngẅɛ̀ ndá Lěvi wɔ́, tá’, Ábalam gabte shúm sé nzsè legém, ńnáa tà’ nzsè né yé, á kẅé, ńnéŋ mbʉ́lè ná yé gẅie e Ssé la ka’a mmó mbwo yé.

⁷ Mé zɔɔn ńzsé mboŋó ngie nyìŋ gẅie à ńnéŋe mbʉ́lè à cʉa nyìŋ gẅie à kẅé mbʉ́lè.

⁸ Pànuŋe pwɔ́’ pie é lɔgɔ ńgwɔ́ ngẅɛ̀ Lěvi, pie pɔ́ kẅé tà’ nzsè á nà shúm nzsè legém, pɔ́ ée pʉ̀a pie é ńnéŋe ńkwéte. Tá ńgʉa ná Melekisedeg gẅie à la kẅé tà’ nzsè á nà nzsè legém, aa nyìŋ gẅie aa ńgwɔ́ pɔ́ wó, pá’ ŋwà’ne Ssé ne shwóŋó wégè pú’u.

⁹ À lɔɔn ńgwɔ́ pege gɔɔn ngie e pʉ̀a Lěvi pie é kẅé tà’ nzsè, á nà nzsè legém, la ná yɔ́b tà’ nzsè á nà nzsè legém mbwo Melekisedeg, pú’u ńcʉa ná Ábalam.

¹⁰ Á nue á laa lyɛ̌’ gie Melekisedeg la gʉa ńzá’a Ábalam, Lěvi gwɔ́ yé ssé, ńcʉa ná pá’ à laa lepfòm Ábalam, ngàb ngẅɛ̀ wɔb.

¹¹ *Lepʉ̌ pʉ̀a Israel zɛ́te ngie mé lɔg pɔ́ púɔ ngẅɛ̀ Lěvi ńgÿo pànuŋe pwɔ́’. Pɔ́ gwɔ́ pànuŋe pwɔ́’ á nà ntí gie Aroŋ la gwɔ́ yé pú’u. Ammó laa pé’e á té zága nà yɔb ntí lenuŋe pwɔ́’ wɔ́, mbà lenyé wɔ́b, ńcʉ́’ fa’a tsɔ́ nùŋe pwɔ́’ pɔ́ nà ntí ye Melekisedeg lɔ̌ɔn ńge kẅéte nà kɔ́?

¹² Ntí ye lelɔg ńtsɔ́’ pànuŋe pwɔ́’ lɔɔn ńzɔɔn ńkúbe, mbà *lepʉ̌ gẅiin lékúbe yé.

¹³ Mé gɔɔn mɔɔn menò pá’ɔɔn ńtí Cʉ̀apʉ̀a wege. Yé gẅie à fóo nà tsɔ́ ngẅɛ̀ ye ndyɛ̀’ɛ, é gie tsɔ́ nyìŋ laa fó mǒ éfa’a fà’ á jʉ’ gie mé nuŋe pwɔ́’ wó wɔ́.

¹⁴ Pʉ̀a metsèm zɔɔn ne ńzsé ngie, Cʉ̀apʉ̀a wege fóo ná ngẅɛ̀ Jẅida, é ngẅɛ̀ gie Mǒsê la tè kím lezíŋ sɔ́b á fʉ̀’ gie à la ne ńgɔɔn nò ná pànuŋe pwɔ́’ wɔ́.

Yěsô aa nùŋe pwɔ́’ ná ntí ye Melekisedeg

¹⁵ Ammó gie mé ge fóo mǒ é nyɛte jú’u nò gie mé ně ńdá’ ńzye légɔɔn, áa pá’ wetsɔ̌ nùŋe pwɔ́’ gẅie à la kẅɛ, aa nà ntí ye Melekisedeg.

¹⁶ À tè gwaa gwɔ́ nùŋe pwɔ́’ pá’ɔɔn, á fóo ná tsɔ́ *lepʉ̌ sie mé la záb ngie pʉ̀a mesoŋ giŋe mǒ wɔ́. Á fóo pɔ́ nà metʉ̀ mie ée nà we le gwɔ́. Wɛ̌ le gwɔ́ á gwɔ́ tèmì,

¹⁷ mbà mé la ŋwe’e nò ńtí yé á gwɔ́ ngie: «Ɔ̀ɔ nùŋe pwɔ́’ gẅie à ge lá’a gwɔ́ pɔ́ wɛ̌ ngù’ nkɔ́ɔn nê nkɔ̌ɔn, á nà ntí ye Melekisedeg».

¹⁸ Mé lɔg pú’u, ḿvɔg ńtsɛ́ɛ nzẅìŋe nzsè gẅie mé la vɔg ńtsẅi ngie me giŋe mǒ, á nue mmó la zága ná yɛ̌ nzsè, é piŋ tè kẅéte.

¹⁹ Pú’u á nue *lepʉ̌ Mǒsê la tè gÿo tà tsɔ́ mmó ku’ ná ntí gie e Ssé ne ńkwoŋo wɔ́. Áa fʉ̀’ɔɔn, mbà Ssé la tsɔ́’ nzsè sẅé, nkwaŋá wégè ńnéŋe fʉ̀’ɔɔn ńcʉ́’ ńtyé pɔ́ mǒ. Ee mbòŋ ńcʉa yetsɔ́, á nue pege pfó mǒ ńgʉa tà ńkúu lejʉ́ŋ Ssé.

²⁰ E gíŋ ńgwɔ́ mbòŋ, á nue e Ssé la gwaa tÿɔ́gɔ *nùŋe pwɔ́’ we lÿo we yɛ̌ nzsè, ńgɔɔn nò tà ńkʉa. Pà nùŋe pwɔ́’ pe melÿò la gwaa kẅɛɛ ná ngẅɛ̀ Lěvi, e Ssé tè gɔɔn nò tà ńkʉa wɔ́,

²¹ tá á gʉa ná Yěsô, á gwɔ́ cʉ́’ʉ *nùŋe pwɔ́’ we lÿò, e Ssé gɔɔn nò né ye tà ńkʉa ngie: Mèŋ Cʉ̀apʉ̀a, n gɔ̌ɔn tà ńkʉa N tě ńdá’a ńkúbe nò gie mèŋ n gɔ̌ɔn wɔ́. N gɔ̌ɔn ngie: Ɔ̀ɔ nùŋe pwɔ́’, é la’a gwɔ́ pɔ́ wɛ̌ á nà ngù’ nkɔ́ɔn nê nkɔ̌ɔn

²² Á la fó mǒ, e Ssé lɔgɔ Yěsô ńcwóŋ lezyɛ̌ ná yɔɔn *kʉ̀a ye sẅé gie áa mbòŋ ńcʉa yetsɔ́.

²³ Ammó gie á gíŋe ńgwɔ́ mǒ gwɔ́ ngie: Pànuŋe pwɔ́’ pe ngẅɛ̀ Lěvi la gwaa gyɔ́ɔn gyɔ́ɔn á nue legwé lɔ̌ɔn ńtɔ’ɔ wɔ́b lé ké ńdá’a fa’a fà’ yɔ́b fa’ tà pɔ́ lekwé.

²⁴ Tá á ké ńgʉa ná Yěsô, mbà yê fa’a nùŋe pwɔ́’ té gie ńgwɔ́ tsɔ́ nyìŋ ndyɛ̀’ɛ fa’ wɔ́, á nue yé Yěsô ge lá’a gwɔ́ pɔ́ wó, é ngù’ nkɔ́ɔn nê nkɔ̌ɔn.

²⁵ Áa mmó gie á gíŋe ńgÿo á ku’u légÿo pʉ̀a pie pɔ́ ne ńdɔgɔ yé ńtsóte nnɛ́ nê lejʉ́ŋ Ssé, pɔ́ tsẅɛ́ ndà’ ndà’. Pú’u nue yé Yěsô aa ńgwɔ́ pɔ́ wó, pá’ à ge sẅíŋte Ssé nà twó yɔ́b.

²⁶ À lɔgɔ ńgwɔ́ *nùŋe pwɔ́’ we lÿò gẅie á la ne ńzɛ́te mbwo pege. Àa kwà’ Míŋ Ssé, ńgwɔ́ mbú’ nà kɔ̀ɔkɔ́ɔ, ńgwɔ́ té tsɔ́ nò tepòŋ ná ye, pâ pàgÿo menò tepòŋ té tsɔ́ nò tem, mbà Ssé la ńnéŋe yé tàa tÿǒ tà tsɔ́ mmó té gíŋe ńtɔ́gɔ yé ńgwɔ́ tÿǒ wɔ́.

²⁷ À tè pá’ petsɔ́ pànuŋe pwɔ́’ pe melÿò pie pɔ́ la gẅiin lénuŋe pwɔ́’ lyɛ̌’ ntsèm wɔ́. Pɔ́ lɔ́ɔn ḿvɔgɔ ńnuŋe pwɔ́’ ná mɔ́b menò tepòŋ, tá ḿbiŋe ńnuŋe pwɔ́’ ná menò tepòŋ petsɔ́ pʉ̀a. À la nuŋe wé pwɔ́’ pɔ́ tà’ legʉ̀a, á gwɔ́ pá’ à la náa twó mbùm yé nà tÿǒ nkǐ, á ku’ pú’u.

²⁸ *Lepʉ̌ Mǒsê zɔɔn ńgÿo mé lɔgɔ nyìŋ mesoŋ gẅie à kʉ́a kʉ̌a pá’ petsɔ́ ńgÿo *nùŋe pwɔ́’ we lÿò. Tá anò gie e Ssé la záb *lepʉ̌ Mǒsê ḿbiŋ tâ ńgɔɔn tà ńkʉa, á la gÿo á lɔgɔ Míŋ we gẅie à léen ńdá’ ńku’u nà kɔ̀ɔkɔ́ɔ gie yé Ssé la ne ńzẅí’te yé mǒ, ńdɔg gÿo *nùŋe pwɔ́’ we lÿò ná ngù’ nkɔ́ɔn nê nkɔ̌ɔn.