Heber 5 - Nouveau Testament en Ngienboum

¹ Mé zɔɔn ńgʉa pɔ́ tsetsɛ̀ɛ pʉ̀a mesoŋ ńtsɔ́’ɔ *nùŋe pwɔ́’ we lÿò pɔ́ légwɔ́ gie à ge fa’a mbwo Ssé, á nà twó pʉ̀a mesoŋ. À yé fà’ gwɔ́ lélɔg shúm ńtóo mvfò Ssé ńnyɛɛ yé mbɔɔ lénuŋe pwɔ́’ ńdɔg sẅíŋte yé ngie à lege menò tepòŋ pʉ̀a mesoŋ.

² Pá’ yé nùŋe pwɔ́’ giŋé ńkʉ́a yé kʉ́a nà meshÿó ntsèm la, ńgwɔ́ á jú’u mmó gie á gÿo tá pʉ̀a pie pɔ́ té ne ńzsé mmó gie pɔ́ gÿo yɛ̌ wɔ́, mbɔɔ pʉ̀a pie é fʉa mánzsè, éfʉa nò mbwo Ssé.

³ À lɔg pá’ yé lê twó yé giŋé ńkʉ́a yé kʉ́a la, ńgẅiin lénuŋe pwɔ́’ mbɔɔ ná yé twó ńdɔg sẅíŋte Ssé ngie à lege menò tepòŋ mé yé, tà á le nuŋe pɔ́ ndà’ nà twó pʉ̀a mesoŋ wɔ́,

⁴ ńgwɔ́ nyìŋ zɔɔn le ńnéŋe tà yé zɔ̌ gɔɔn ngie mé ná mekù’ *nùŋe pwɔ́’ we lÿò né yé wɔ́. E Ssé zɔ tsɔ́’ɔ nyìŋ ndʉŋ ndʉŋ pá’ à la tsɔ́’ɔ Aroŋ.

⁵ Á la gʉa ná Kristo ńgíŋe ńgwɔ́ pɔ́ pú’u. Yé zɔ la tè ńnéŋe tà ńgɔɔn ngie à gẅiin legú’ we *nùŋe pwɔ́’ we lÿò wɔ́. À la gwaa cʉ́’ʉ wɛ̌ á fó pɔ́ ne Ssé gwie à la gɔɔn né ye ngie: «Ɔ̀ɔ Míŋ wɔ̀ɔn, tà fó lyɛ̌’ɔɔn n gwɔ́ tá gù».

⁶ Á gíŋe ńgwɔ́ pɔ́ ndʉŋ ndʉŋ pá’ à la gíŋe ńgɔɔn tsɔ́ jʉ’ ngie: «Ɔ̀ɔ nùŋe pwɔ́’, tà ké lá’a gwɔ́ pɔ́ wɛ̌, á nà ntí gie Melekisedeg la gwɔ́ yé».

⁷ À giŋé ńgwɔ́ pɔ́ yé Yěsô gẅie à laa fʉ̀’ gie à la nyé ndùmo ssé tsetsá’, á sẅíŋte Ssé gẅie à lɔɔn ńgwɔ́ á gÿo tà yé le kwé, ḿbú’ mbwó mbwo yé tà ne ńga’te ńdʉa. E Ssé fó ná pá’ Yěsô zẅí’te kɔ̀ɔkɔ́ɔ pɔ́ mbwo yé, ńjú’u sẅíŋte yé.

⁸ À la gwɔ́ pɔ́ Míŋ Ssé tá’, ńgyá ngɔ́’ gyǎ, tà fó pɔ́ mǒ ńzí’i lé jú’ ncwò Ssé,

⁹ ḿbiŋ ńjú’ tà ńku’u nyìŋ gẅie ńgwɔ́ á gÿo pʉ̀a pie é jú’u ncwò wé pú ńtsẅɛ́ ndà’ ndà’.

¹⁰ Á gwaa gwɔ́, mbà Ssé la lɔgɔ yé ńgÿo *nùŋe pwɔ́’ we lÿò á nà ntí gie Melekisedeg la gwɔ́ yé.

Nyìŋ pɔ́ɔn le nyé té ke ńne ńzába pɔ́ ntʉ́m nà Ssé

¹¹ Á gʉa nà nò Melekisedeg, mbà peg gẅiin menò mie peg ge gɔɔn mǒ tà é gyɔ́ɔn gyɔ̌ɔn, lekyagte mɛ̌ menò mbwo pi à tʉ tɛ’, á nue mé té gɔɔn nò pi lwo ńjú’u mmó gie mé lɔgɔ ńgɔɔn wɔ́.

¹² Pi kɔ’ɔ́ gwɔ́ nà fʉ̀’ɔɔn é cʉ́’ gwɔ́ pɔ́ pàzí’i pʉ̀a nò Ssé tá’, pi giŋé ńne ńtsɔ́ɔn ngie mé gíŋe ńzí’i gẅi menò mie mé zyé mǒ lézí’i nyìŋ nò Ssé. Á gwɔ́ wɔ̌ tà pi nyé ńtsɔ́ɔn pɔ́ lepʉ́, tá mbà pi kɔ’ɔ́ cʉ́’ tsɔ́ɔn pɔ́ mmó léjÿó gie á ne ńtʉte.

¹³ Nyìŋ lɔɔn ńké ńnyé ńnóŋo pɔ́ lepʉ́, mbà à lɔɔn ńgwɔ́ á le ku’u lézsé nò á nà mmó gie á tyé ndʉŋ ndʉŋ wɔ́, á nue ngàŋ nyě pɔ́ mûɔ mbÿɛ́.

¹⁴ Tá ńgʉa ná pʉ̀a pie pɔ́ cÿɔgtě, mbà pɔ́ pfɛ́ pɔ́ mmó léjÿó gie á tʉte. Pɔ́ ée pʉ̀a pie pɔ́ kéen ńzí’i tà ńgẅiin mà we lesaŋá nò, ńzsé yé mbòŋo, ńzsé yé tepòŋ.