Heber 4 - Nouveau Testament en Ngienboum

¹ Tá’ le gwɔ́ gẅie e Ssé la ka’a sẅétè gie ńgwɔ́ pʉ̀a kúu tsoló à nyě pɔ́ wó. Pá’ wɛ̌ nkʉ̀ gíŋe ńgwɔ́ wégè la, pi pɔ́ɔn pá’ à lɔɔn ńgwɔ́ tsɔ̌ tà’ nyìŋ tsetsɛ̀ɛ pi lá’ le tsoló kú.

² Pege ka zɔɔn ńgíŋe ńjú’ yégè nkʉ̀ mbòŋo ŋwɛ́ pɔ́ pá’ pʉ̀a pie pɔ́ laa nkwòŋo tsẅɛ la jú’ yɔ́b. Tá pɔ́ la ké ńjú’ yɔ́b é té wɔ́b kẅétè, á nue pɔ́ la tè záb ntʉ́m wɔ́b mǒ wɔ̌.

³ Á gʉa ná pege pie pege ka jǔ’ tà ńzáb ntʉ́m mǒ, pege ge gÿo kúu tsɛ̀ɛ yɛ̌ sẅétè. Á gwɔ́ yɛ̌ ŋwɛ́ gie e Ssé la gɔɔn nò mǒ, á ná pá’ à la gɔɔn ngie: Mèŋ n ně ńdɔgɔ lóŋ ńkʉa ngie: Pɔ́ téen ńdá’a ńkúu tsɛ̀ɛ sẅétè gie n da nyɛte ńtí wɔ́b gwɔ́. E Ssé la gwaa gɔɔn pá’ɔɔn, mbà à la lá’ fa’ mefà’ mé á fʉ̀’ gie à la nyɛte njÿó tà é mag.

⁴ Mé la gɔɔn nò tsɛ̀ɛ tsɔ́ jʉ’ʉ ŋwà’ne yé, ńtí lyɛ’ɛ́ lá’ mbɔ́ɔntè sɔɔn mbʉ́a ngie: E Ssé la fa’ mefà’ mé ntsèm, ńzẅɛte nà lyɛ’ɛ́ lá’ mbɔ́ɔntè sɔɔn mbʉ́a.

⁵ À giŋé ńtóo ná yɔɔn jʉ’ʉ ŋwà’ne ńgɔɔn ngie: Pɔ́ téen ńdá’a ńkúu tsɛ̀ɛ sẅétè gie n da nyɛte ńtí wɔ́b gwɔ́.

⁶ E Ssé la záb ngie etsɔ́ pʉ̀a ge gÿo kúu tsoló, tá mevɔ́g mvfò pʉ̀a le jú’ nkʉ̀ mbòŋo la piŋ ńké tè tsoló kú, ńtí nue pɔ́ la jú’ pɔ́ té zẅíŋ.

⁷ Á cʉa pú’u, e Ssé gíŋe ńzába tsɔ́ lyɛ̌’ ye sẅé á gwɔ́ ngie: Á gwɔ́ pɔ́ lyɛ̌’ɔɔn. Mbà yɛ̌ nò la tɔ́g, á lá’ ńdɔg ncwò fùɔ Ndavíd ńgɔɔn mmó gie pege ně ńdá’ ńgɔɔn ngie: Pi lɔɔn ńjú’ ngyè Ssé lyɛ̌’ɔɔn Tà pi ziŋe metuŋó mí.

⁸ Á zɔɔn ńgwe’e ńgwɔ́ gie Yeshua la lɔg pʉ̀a ńgʉa tà pɔ́ kúu tsɛ̀ɛ yɛ̌ sẅétè, mbà à lɔɔn ńgwɔ́ e Ssé le gíŋe ńkíme tsɔ́ lyɛ’ɛ́ ndyɛ̀’ɛ wɔ́.

⁹ Á lɔgɔ pú’u, ńgɔɔn ngie: Asẅétè gie e Ssé la fa’ mefà’ mé tà ńgẅiin nà lyɛ’ɛ́ lá’ mbɔ́ɔntè sɔɔn mbʉ́a, gíŋe ńtyé tyé ńne ńzẅí’te pʉ̀a Ssé.

¹⁰ Á nue nyìŋ gẅie à kǔ tsɛ̀ɛ sẅétè gie e Ssé la nyɛte ńtí yé, à giŋé ńzẅɛte yé nà mefà’ mé pá’ e Ssé la fa’ mé yé tà ńzẅɛte

¹¹ Pú’u la, pege kag tʉ̀, ńkúu tsɛ̀ɛ yɛ̌ sẅétè, pege gÿo nà ntí gie à tsɔ̌ tà’ nyìŋ ná pege à tě ge tʉʉ twó pá’ metá pégè, ésɔ́ɔn wɔ́.

¹² Ashwóŋè Ssé zɔɔn ńgwɔ́ ntentʉ́ tà ńkwa’ fa’ mefà’, atwó yé sẅíte tà ńcʉa mbɔɔ ye yɛ̌ nně ncù wɔ́ gie e gẅiin mengʉ́ŋ mbʉ́a, á shú ńkúu ná nyìŋ kǔ tà ńcʉa nà jʉ’ gie azẅìge ngàŋ pɔ́ ntʉ́m wé temte wó, tà ńcʉa nà jʉ’ gie mejwoŋó mbùm ngàŋ pɔ́ mefóon mie ée tsɛ̀ɛ mekẅǐ mé ée wó. Á ŋaga nyìŋ ná mmó gie ngàŋ ne ńtsɔ́ɔn mbɔɔ ná gie à ne ńkwaŋa ntʉ́m yé.

¹³ Áa mvfò Ssé tsɔ́ mmó té lelyěen wɔ́, á tsɛ̀ɛ yɔɔn njÿó gie à la nyɛte. À gyá shúm ntsèm, à má’ nÿɔ́g ḿbú ńgyá kɔ̀ɔkɔ́ɔ pɔ́ pá’ á gwɔ́. Pege ge gÿo pú tyé mvfò ye é píte ncwò wégè.

Yěsô ku’u légwɔ́ kwà’ nùŋe pwɔ́’ we lÿò

¹⁴ Pá’ pege gẅiin tà’ *nùŋe pwɔ́’ we lÿò gẅie aa kwà’ wɛ̌, á gẅie à la gʉa tà ńkúu lejʉ́ŋ Ssé ńtí wégè, á gwɔ́ Yěsô, ńgwɔ́ míŋ Ssé la, pege kú’te nò gie mé ka shwóŋó wégé, pege záb ntʉ́m mǒ, ḿbiŋ ne shwóŋó yɛ̌ nò mbwo petsɔ́ pʉ̀a.

¹⁵ À wege *nùŋe pwɔ́’ we lÿò ŋwɛ́ zɔɔn ḿbú ńzsé ntí gie menò gyá wégè pú’u, menò la gyá yé, nkwà’te mentí mentí kúu yé yé pá’ pege, tá á ké ńdá’ tè tsɔ́ nò fʉa.

¹⁶ Pú’u la, tà pege mʉ́’te lésẅɛ’te nnɛ́ ńgʉa nê jʉ’ gie lʉŋe *lefùɔ Ssé áa wó, lélɔg pú’u, ńgwɔ́ lejʉ́ŋ yé Ssé gẅie à gẅiin pòŋo ntʉ́m. Pege sẅɛ’te nnɛ́ pú’u, tá Ssé tsɔ́ɔn mezìŋe mégè, ńnyɛɛ wégè pòŋo ntʉ́m yé, ńne ńkẅéte wégè ná fʉ̀’ gie pege zagá légÿo.