Heber 13 - Nouveau Testament en Ngienboum

Mà gẅie à poŋ Ssé

¹ Pi kẅi’i ńgẅiin nkwòŋe tsetsɛ̀ɛ pi, pá’ á ne ńzɛ́te ngie pʉ̀a Kristo gÿo pú’u, tsetsɛ̀ɛ pɔ́b.

² Tà pi lege lékúe megʉ̀ pie é tǒ mbʉ̀a pi, etsɔ́ pʉ̀a la lá’ ńkúe megʉ̀ kǔe, tà ńdá’a lyɛ̌’ ńkúe *mecÿɔ́’ Ssé té zsé.

³ Pi kímte pʉ̀a pie pɔ́ ée ndá tsǎŋ tà à gwɔ́ pɔ́ pá’ fʉ̀’ gie pia pɔ̌ zɔ puté ńgwɔ́ ndá tsǎŋ la, ńkímte mbɔɔ pʉ̀a pie mé ne ńnyɛɛ wɔ́b ngɔ́’ pɔ́ pá’ fʉ̀’ gie mé nyɛɛ pɔ́ gẅi ngɔ́’ la.

⁴ Á poŋ ngie lɔ́ɔndá gwɔ́ mbwo mânyìŋ ntsèm ńgwɔ́ mmó mekù’, mámbàŋa zsé ndà’ nzwě we, manzwě zsé ndà’ ndúm we, e Ssé ge zɔɔn lá’ ŋag pʉ̀a pie pɔ́ pumo wɔ̌wɔ́ɔ pâ pɔ̌ nuŋe, mbɔɔ pàgÿo gÿɛ́.

⁵ Tà pi kwoŋ nkáb kwoŋ tà é cʉ́’ʉ sá’a gẅi sá’, pi kág kág nà kɔ́ wɔ́ gie pi gẅiin, á nue e Ssé la gɔɔn né nyìŋ mesoŋ ngie: «N te lá’ gwá’a gú wɔ́, é ké le nyé té ne ńdíe gú wɔ́.»

⁶ Áa mmó gie á gÿo nyìŋ wege ku’u légɔɔn nò tà á le mʉ́’te nà yé twó wɔ́ ngie: Cʉ̀apʉ̀a ne ńtóo ńkẅéte wɔ̀ɔn, N tě ně ńge ḿbɔ́gɔ tsɔ́ mmó wɔ́. Nyìŋ mesoŋ ku’u légÿo kɔ́ ná mèŋ?

⁷ Pi kímte pʉ̀a pie pɔ́ la vɔgɔ létsyeen gẅi ná mánzsè Ssé, é pʉ̀a pie pɔ́ la shwóŋó gẅi nò Ssé, ńkímte ntí gie pɔ́ la lɔg ńnéŋe tà ńdá’ ńkwé, pi pí fʉ̀’ nà yɔb ntí lezǎb ntʉ́m nà Ssé.

⁸ Yěsô Kristo à laa kúbe, à kaa kúbe, à tě ńdá’a lyɛ̌’ ńkúbe wɔ́.

⁹ Tà pi zẅíŋ mé zí’i gẅi menò ntí ntí mie é té tsẅé’e nà nò gie pege zába ntʉ́m mǒ wɔ́, e gÿo pi fʉa mánzsè. Á poŋ ngie atsɔ́ɔn mezìŋe Ssé zɔ néŋ ntʉ́m nyìŋ tà mbʉ̌ mie mé zába, é gɔɔn nò ná shúm léjÿó zɔ̌ le néŋ. Epʉ̀a pie pɔ́ kú’te mɛ̌ mbʉ̌ pɔ́ laa jÿó tsɔ́ pì mǒ wɔ́.

¹⁰ Pànuŋe pwɔ́’ pe pà Yuda, pɔ́ nuŋe pwɔ́’ tsɛ̀ɛ jʉ’e Ssé, ńzẅɛ́’ ḿpfɛ́ɛ pfwɔ́’ɔ mbab gie mé lɔ̌g nuŋe pwɔ́’, á ké ńgʉa ná pwɔ́’ gẅie Yěsô la nuŋe ńtí wégè, pɔ́ té mmó mǒ zẅɛ́’.

¹¹ Wɛ̌ pwɔ́’ gwɔ́ pɔ́ pá’ we *nùŋe pwɔ́’ we lÿò we pà Yuda. À lɔg metse menɔ̀ɔn pie mé zẅeté, ńgʉa ná kwà’ jʉ’e Ssé, á lélɔg ńzyɛ́b menò tepòŋ pʉ̀a mesoŋ, á cʉ́’ʉ pfó menɔ̀ɔn, mé lɔg fó jʉ’ gie mé tsẅé wó, ńkẅɛ, ńgʉa nzème pǐ ńtuɔ.

¹² Áa mmó gie á la gÿo, mbɔɔ Yěsô yé gwɔ́ lɔg metse mé é gÿo pʉ̀a mesoŋ cʉ́’ pʉ̀a Ssé, á kwé pɔ́ nzème pǐ, tà à tè kwé tÿǒsoŋ wɔ́. Áa jʉ’ gie à la gyá ngɔ́’ wó.

¹³ Pú’u la, pege fó yégè á jʉ’ gie mé tsẅé wó, ńkẅɛ, ńgʉa ńtsɛ́ɛ yé, ńne ńzẅíŋe ngie mé zoonte wégè pá’ yé.

¹⁴ Á nue à tÿǒsoŋ yégè ye ndùmo ssé tsetsá’ jʉ’ɔɔn á té gie á ge lá’a gwɔ́ pɔ́ wó wɔ́, tá peg ké ńně fa’a gie á ge gÿo tá tó.

¹⁵ Pege cʉa nzèm Yěsô, á gwɔ́ fʉ̀’ ntsèm, pege lɔgɔ légu’te Ssé, ńdɔg ńnuŋe pwɔ́’, é lɔgɔ pú’u, ńgwɔ́ pwɔ́’ pʉ̀a pie pɔ́ náa mekù’ ná lezíŋ sé.

¹⁶ Tà pi lege légÿo nò mbòŋo mbɔɔ lélɔgɔ mmó gie pi gẅiin ńkẅéte pʉ̀a, á nue legÿo mɛ̌ menò áa lii pwɔ́’ gie á poŋ Ssé.

¹⁷ Pi jú’ ncwò pʉ̀a pie pɔ́ tsyeen gẅí. Pi ná nnɛ́ ssé mvfò pɔ́b, á nue pɔ́ ne ńdíe gẅi ngwòŋ fʉ̀’ ntsèm, ńne ńzsé ngie pɔ́ ge lá’ tyé mvfò Ssé píte ntí gie pɔ́ la lɔg fa’a tsetsɛ̀ɛ pi. Pú’u la, pi gÿo nà ntí gie pɔ́ ge fa’a fà’ yɔ́b nê lekág, tà pɔ́ le ne ńga’te ga’te wɔ́, á nue á lɔɔn ńgwɔ́ pú’u, pi le zẅɛ́’.

¹⁸ Pi ké ńne sẅíŋte Ssé sẅíŋte nà twó ség. Peg kwa’ ńne ńjú’u ngie mbùm yeg tè ne ńcúa wég nà tsɔ́ nò wɔ́, á nue peg ne ńtsɔ́ɔn légwɔ́ gie kɔ́ zɔ̌ lɔɔn ńtyé ssé wɔ́, peg gÿo pɔ́ mmó gie á ne ńzɛ́te.

¹⁹ M bǔ ńcwoŋo ńdúɔ mbwo pi ngie pi nyɛte sẅíŋte Ssé, à zẅíŋ m biŋ nzèm ńtó ńtsɛ́ɛ gẅí.

Asẅíŋte

²⁰ E Ssé gẅie e mbʉ́lè fóo mbwo ye, à la gÿo Yěsô Cʉ̀apʉ̀a wege fó lá’ mepfó ńkwɔ́’. Yé Cʉ̀apʉ̀a wege la lɔg pá’ à pfɛté metse mé, e Ssé lɔg ńgwaa *kʉ̀a gie á té ńdá’a ḿmaga wɔ́, ńcʉ́’ʉ mbyɛ̀b mvfó we lÿò, pá’ à ge pyɛ́bɛ *njʉ̀njÿò yé.

²¹ Á poŋ ngie e Ssé mbʉ́lè ŋwɛ́, à gÿo pi ku’u légÿo nò mbòŋo légwɔ́ gie pi ge gÿo pɔ́ mmó gie à ne ńkwoŋo. Á poŋ ngie yé Ssé fó ná Yěsô Kristo, ńgÿo ammó gie á poŋo yé, à gwɔ́ ná pege. Legú’ à gwɔ́ mbwo Yěsô Kristo á nà ngù’ nkɔ́ɔn nê nkɔ̌ɔn! *Amen.

Lɔg ńkwɛ́ metwó mbɔɔ tsyɛ̀’te

²² Mefɛ́ pɔ́ɔn pe mbàŋa mbɔɔ pe pànzwě, mèŋ n ne sẅíŋte gẅi ngie pi lɔgɔ kwɔ́gɔ nnɛ́, ńzẅí’te yɔɔn shwóŋè gie mèŋ n nǎ mbwo pi, ńdɔg ńkẅiŋte gẅí. N zɔ̌ɔn ńké kaa ŋwe’e á sag wɔ́.

²³ Pi zsé ngie mé kě ńnyé pwó ná fɛ́ wege Timoté. À lɔɔn ńtɔ́g ńtó, mbà mèŋ n ge gwɔ tó gyá gẅi peg yé gwɔ́.

²⁴ Pi tsyɛ’te pàtsyeen gẅi té vʉ’ʉ tsɔ̌, ńtsyɛ’te mbɔɔ pʉ̀a Ssé métsèm. Epʉ̀a pe Italia é gɔ̌ɔn ngie mèŋ n tsyɛ’te gẅí.

²⁵ E Ssé ne ńgwɔ́ né pi metsèm.