Heber 11 - Nouveau Testament en Ngienboum

Lezǎb ntʉ́m nà Ssé

¹ Lezǎb ntʉ́m nà Ssé, aa lecwoŋo ńzsé mboŋó ngie, ammó gie mé ne ńzẅí’te ngie e Ssé ná, à ge lá’ ná, ńgíŋ ńgwɔ́ lécwoŋo ńzsé ngie, eshúm sie mé té ne ńdɔgɔ nÿɔ́g ńgyá wɔ́ kwà’ ńgwɔ́ wɔ́.

² E Ssé la gɔɔn nà tsɔ́ pʉ̀a pé pe fʉ̀’e mvfò ngie, ée kwà’ pʉ̀a, á fó pɔ́ nà yɔb ntí lezǎb ntʉ́m ná yé.

³ Pege fǒ pɔ́ ná pá’ pege záb ntʉ́m nà Ssé tá ńjú’ ngie e Ssé la lɔgɔ shwóŋè yé ńnyɛte njÿó, éfó mǒ ńzsé ngie ammó gie pege gyǎ lê nÿɔ́g, á la fóo nà mmó gie mé té gyá lê nÿɔ́g wɔ́.

⁴ Á la fó pɔ́ ná pá’ Abe la záb ntʉ́m wé nà Ssé, tá á nuŋe wé pwɔ́’ é poŋo mbwo Ssé ńcʉa we Kain. Á la fó pɔ́ mǒ, e Ssé líe yé tà ngie, aa ndʉŋ ndʉŋ mvfò yé, mbà à la cʉ́’ʉ lényɛ, ńzẅíŋe mmó gie Abe lɔ̌g ńtóo mvfò yé. Á la fó pɔ́ ná pá’ Abe la záb ntʉ́m wé nà Ssé, à nyé lyɛ̌’ɔɔn ńgɔɔn nò mbwo pege gɔɔn, tá mbà à léen ńkwé.

⁵ Á la fó pɔ́ ná pá’ Henɔg la záb ntʉ́m wé nà Ssé, tá Ssé lɔgɔ yé ńgʉa gʉa tà à tè kwé. Mé fa’a yé mé té gíŋe ńgyá yé wɔ́, á nue á la gwaa gwɔ́, mbà Ssé ně ńdɔgɔ yé ńgʉa. Ŋwà’ne Ssé gɔɔn ngie e Ssé la gwaa lɔgɔ yé gʉa, mbà nò yé poŋó yé.

⁶ Mé lɔgɔ ńgyá ngie nyìŋ lɔɔn tè záb ntʉ́m nà Ssé wɔ́, mbà shÿó pá’ ńgwɔ́ nò yé poŋ Ssé té wó wɔ́. Nyìŋ lɔɔn ńne sẅɛ’te nnɛ́ nê lejʉ́ŋ Ssé á gẅiin lé zɔɔn ḿvɔg ńzẅíŋ ngie e Ssé ee wó, ḿbiŋ ńne ńtsɔ́’ɔ fà’a pʉ̀a pie pɔ́ ne fa’a yé.

⁷ Á la fó pɔ́ ná pá’ Noah zǎb ntʉ́m wé nà Ssé, à tè lɔgɔ mmó gie Ssé tʉ̌ njÿó ńnyɛɛ yé, ńdɔg ḿma’a kwàŋ wɔ́. À piŋ ńgwɔ́ mmó gie mé la nyé tè gyá. Áa yɛ̌ Noah kwóon *máamáa kanú’, lélɔg ńgÿo ngẅɛ̀ ye kúu tsoló ńtẅɛ́, ńdɔg pú’u, ńnyɛ ngie ntsaŋ ee twó petsɔ́ pʉ̀a, tá mbà á gʉa ná yé, á fó ná pá’ à zǎb ntʉ́m wé nà Ssé, e Ssé cʉ́’ ńdíe yé pɔ́ pá’ nyìŋ gẅie aa ndʉŋ ndʉŋ mvfò yé.

⁸ Á la fó pɔ́ ná pá’ Ábalam la záb ntʉ́m wé nà Ssé, tá e Ssé tóŋo yé á jú’ ncwò wé, ńgʉa lê tsɛ̀ɛ tsɔ́ ngwòŋ gẅie e lɔ́ɔn ńge gÿo cʉ́’ gwɔ́ pɔ́ we, ńdu ssé ńgʉa té zsé jʉ’ gie à gee tà kúu wó.

⁹ Á la fó pɔ́ ná pá’ à zǎb ntʉ́m wé nà Ssé tá á tó ńnéŋe tsɛ̀ɛ ngwòŋ gẅie e Ssé la ka’a mbwo yé, ńnéŋe wó pɔ́ pá’ ngʉ̀ la, pâ pʉ̀a pé tsẅé tsɛ̀ɛ *mentàb, Esâg lâ pé pʉ̀a lá’ ńtsẅé pɔ́ jʉ’ó á tsɛ̀ɛ *mentàb, Yakwɔ́b lâ pé pʉ̀a lá’ ńtsẅé pɔ́ jʉ’ó á tsɛ̀ɛ *mentàb, pɔ́b yɔ́b gíŋe ńgwɔ́ pʉ̀a pie mé la ka’a lé ná wɔɔn ngwòŋ mbwo pɔ́b.

¹⁰ Ábalam la gÿo pú’u, á nue à la ne ńzẅí’te tÿǒsoŋ gie á gẅiin cÿǒ gie á tʉ́te. E Ssé lê twó yé zɔ̌ ne ńzsé pá’ yɛ̌ tÿǒsoŋ ge gÿo gwɔ́, yé lê twó yé zɔ piŋ ńkwɛ́.

¹¹ Á la fó pɔ́ ná pá’ Sara la záb ntʉ́m wé nà Ssé yé, á tsɛ ńcʉ́’ ńgwɔ́ pɔ́ ndÿò tɛ’ tá’, e Ssé ké ńgÿo yé gẅie à laa zyé shwoŋ, ńzyé múɔ á nue à la ne ńkwa’a ńzsé ngie e Ssé ka’a mmó mbwo nyìŋ ndà’ ńná.

¹² Áa mmó gie á la gÿo Ábalam, tà’ mangʉa njʉ’ wémɔ’ɔ́, gẅie à la cʉ́’ ńgwɔ́ pɔ́ ńkwé kwě, á gab ngẅɛ̀ tà’ máamáa tsìŋe ndá. Nyìŋ mesoŋ gẅie à fóo ná yɛ̌ tsìŋe ndá, á gyɔ́ɔn pá’ mecÿɔ́’ saŋ pie ée tÿǒ lefaŋ mbɔɔ pá’ memvòm mváŋ mie é tue nkʉ̀ŋ ntse té pàa, ńgwɔ́ mé le sáŋ tà ńzsé nzẅìŋ wɔ́.

¹³ Pɔ́b metsèm la gwaa kwéte ńne ńzába ntʉ́m wɔ́b pɔ́ nà Ssé, ńké nyé pɔ́ tè gẅiin mmó gie e Ssé la ka’a mbwo pɔ́b. Tá pɔ́ la ké ńtyé ńgyá pá’ á nyé ngʉ̀a shʉ̀shʉ̀a, anò poŋo wɔ́b tɛ’, pɔ́ shʉa shʉa ńgɔɔn ngie pɔ́ ée ndùmo ssé tsetsá’ ńgwɔ́ pɔ́ megʉ̀, ḿbiŋ ńgwɔ́ pɔ́ legúɔ.

¹⁴ Pɔ́ la gɔɔn pú’u, ńdɔgɔ ńkwa’a ńnyɛɛ ngie pɔ́ nyé tá ńgwá fa’a jʉ’ gie kwà’ lá’a yɔ́b áa wó.

¹⁵ Pɔ́ laa pé’e ńnéŋe ńkwaŋa nò ná lá’ gie pɔ́ la pu’ ssé éfó wó ńgʉa, mbà pɔ́ la tè zág shÿó légÿo tá ḿbiŋe wó wɔ́.

¹⁶ Atsɔ̌ légÿo pú’u la tè gíŋe ńgwɔ́ wó mbwo pɔ́b wɔ́, á nue pɔ́ la cʉ́’ʉ ńtsɔ́ɔn pɔ́ tsɔ́ lá’ gie á poŋ ńcʉa yé yɛ̌, á lá’ gie áa tÿǒ lepwó. Áa mmó gie á gÿo e Ssé lɔg pɔ́ lekág ńzẅíŋ ngie mé tóŋo yé lê Ssé yɔb. À la zɔɔn ńnyɛte tà’a tÿǒsoŋ ńne ńdɔgɔ ńzẅí’te wɔ́b.

¹⁷ Á la fó pɔ́ ná pá’ Ábalam la záb ntʉ́m wé nà Ssé, tá á tyé lélɔgɔ Esâg ńnuŋe pwɔ́’ mbwo Ssé nuŋe, á nà fʉ̀’ gie e Ssé la lʉŋte yé, ńtyé lélɔgɔ Esâg ńnuŋe pwɔ́’ pú’u, á gwɔ́ mbwo ye ńgwɔ́ ndà’ múɔ, ńgwɔ́ mámbàŋa, mbà e Ssé la lá’ ńka’a nò mbwo yé ńtí Esâg.

¹⁸ Á gwɔ́ pá’ e Ssé la gɔɔn nò mbwo Ábalam ngie: «Ɔ̀ ge lá’ cʉa pɔ́ ná Esâg tá gẅiin ngẅɛ̀ gie n da ka’a mbwo gù».

¹⁹ Tá Ábalam tyé lélɔgɔ yé ńnuŋe pwɔ́’, á nue à la ne ńzsé tsɛ̀ɛ ntʉ́m yé ngie, e Ssé kǔ’ mbàa lezíme nyìŋ gẅie à kwě. Áa mmó gie á la gÿo e Ssé piŋe míŋ we mbwo yé, tà á cʉ́’ ńgwɔ́ pɔ́ pá’ fʉ̀’ gie múɔ zimé nà legwé la, ńdɔgɔ pú’u, ńtʉ́ʉ njÿó ńnyɛɛ fʉ̀’ʉ nò

²⁰ Á la fó pɔ́ ná pá’ Esâg la záb ntʉ́m wé nà Ssé tá á néŋ mbʉ́lè ná Yakwɔ́b mbɔɔ ná Esaẅi, ńne ńtʉ́ʉ njÿó shwóŋó wɔ́b menò ná pɔ́b, é gwɔ́ mie pɔ́ ge lá’ tá gyá.

²¹ Á la fó pɔ́ ná pá’ Yakwɔ́b la záb ntʉ́m wé nà Ssé, tá á gwɔ́ tà ńcʉ́’ʉ lékwé, ńnéŋ mbʉ́lè ná penkʉ́ Yesyɛ̂b wémɔ’ɔ́ wémɔ’ɔ́, ńne ńtóonte twó yé, ńgu’te Ssé.

²² Á la fó pɔ́ ná pá’ Yesyɛ̂b la záb ntʉ́m wé nà Ssé, tá á gwɔ́ tà ńcʉ́’ʉ ńgʉa gʉa, ńkím ngie púɔ Israel ge lá’ fó Egipto kẅɛ, ńgíŋe ńtsẅi pá’ à ge lá’ gwɔ́ tà kwé, mé cʉ́’ ńgÿo nà mekẅǐ mé.

²³ Á la fó pɔ́ ná pá’ tá pà Mǒsê pɔ́ má we la záb ntʉ́m wɔ́b nà Ssé, tá pɔ́ gwɔ́ tà ńzyé yé, ńdÿoon yé lÿoon ná mesaŋ métá. Pɔ́ la gyá á poŋo ná shÿó tɛ’, pɔ́ zɔɔn tè pɔ́gɔ léfʉa *lepʉ̌ fùɔ wɔ́.

²⁴ Á la fó pɔ́ ná pá’ Mǒsê la záb ntʉ́m wé nà Ssé, tá á gwɔ́ tà ńgwɔ́ ndÿò, ńdʉ’ mekù’ nyìŋ gẅie má we aa míŋ fùɔ Faraon.

²⁵ À la gyá yé, á gwɔ́ mbòŋ mbwo yé lékúu nùɔ pʉ̀a Ssé pâ pɔ̌ púte ńgyá ngɔ́’, ńtɔ́gɔ yé lé jú’ mboŋó ná mûɔ méfʉ̀’ tá ńké ńgwɔ́ tsɛ̀ɛ mefʉa.

²⁶ À la ne ńgyá ngie mé lɔɔn ńgwága yé pá’ mé la gÿo ńgwága *Nzà’nkÿo, mbà le gwɔ́ pú’u, ge gwɔ́ mbwo yé gwɔ́ mbòŋ é cʉa fù’ gie áa Egipto, á nue nÿɔ́g mé la tyé pɔ́ nà ntsɔ’ɔ́ fà’ gẅie à ge lá’ gẅiin.

²⁷ Á la fó pɔ́ ná pá’ à la záb ntʉ́m wé nà Ssé, tá fùɔ Egipto tsɛ ne ńgyáŋa lóŋ, á fó wó ńkẅɛ ńgʉa té pɔ́gɔ mmó gie à lɔɔn ńgwɔ́ á gÿo ná ye. Letʉ́m sé e tʉte tʉte, á nue á la gwɔ́ pɔ́ pá’ fʉ̀’ gie à ne ńdɔgɔ nÿɔ́g ńgyá Ssé gẅie ńgwɔ́ nyìŋ á le yé gyá.

²⁸ Á la fó pɔ́ ná pá’ à la záb ntʉ́m wé nà Ssé, tá á zye nò *Páskà. Á gwɔ́ pá’ à la tsẅi mé lɔg metse *menjʉ̀njÿò, ńzɔ́’ mezí ndá, ńzsé ngie *cÿɔ́’ Ssé gẅie à tóo ḿbyág ngàŋ mbù Ssé, à tè kíbe púɔ letwó pʉ̀a Israel yɔ́b wɔ́.

²⁹ Á la fó pɔ́ ná pá’ pʉ̀a Israel la záb ntʉ́m wɔ́b nà Ssé, tá pɔ́ zyɛ́’ɛ máa ntse gẅie mé tóŋ ngie ntse pepàŋ, ńgwɔ zyɛ́’ ńne ńgiŋe ná tsetsá’a njǔm. Epʉ̀a Egipto gyá fʉ̀’ʉ, ntse kaa wɔ́b.

³⁰ Á la fó pɔ́ ná pá’ pʉ̀a Israel la záb ntʉ́m wɔ́b nà Ssé, pɔ́ kéle tÿǒsoŋ Yériko kéle lyɛ̌’ sɔɔn mbʉ́a, tá nká’ gẅie mé la pwóon ńdɔg ńkéle tÿǒsoŋ é keme ḿbʉle ssé.

³¹ Á la fó pɔ́ ná pá’ Raab ngàŋa gÿɛ́ manzwě la záb ntʉ́m wé nà Ssé, tá pâ pàtʉʉ twó mbwo Ssé té pú ńdége wɔ́. Mé la tè yé zẅé á nue à la kúe pà mánaŋ pà Israel mboŋó, á nà fʉ̀’ gie mé la túmo wɔ́b.

³² N ge kíme wɔ́, é nyé wɔ́? N dɔɔn ngie n ge gɔɔn nò ná Gédeon, é gɔɔn ná Barag, é gɔɔn ná Samsoŋ, é gɔɔn ná Jefte, é gɔɔn ná fùɔ Ndavíd, é gɔɔn ná Samîɛ mbɔɔ ná petsɔ́ pà *ntsẅì nkʉ̀ Ssé, n de gẅiin fʉ̀’ lélɔg ńgɔɔn wɔ́.

³³ Pɔ́ ée pʉ̀a pie pɔ́ la fó pɔ́ ná pá’ pɔ́ la záb ntʉ́m wɔ́b nà Ssé, ḿma’ ncù ńjÿó túmo túm, ésá’a lá’ pɔ́ ndʉŋ ndʉŋ, pɔ́b léen ńzẅí’te mmó gie Ssé la ka’a mbwo pɔ́b tà ńgẅiin, ńjÿɔ́’ ncwò mepú’ ntʉ̀,

³⁴ ḿbyág mentʉ̀ ntʉ̀ mmɔ̌g, ńtsẅɛ́ nně ncù tá mé té lɔg ńzẅé wɔ́b gwɔ́, ńguɔ ḿbiŋ sẅéte tà ḿboŋ, ńtyé tsẅɛɛ ncù, ńgwɔ́ pàlÿɔ́’ ńgwá, ḿbú ńjwoŋ mencwò ncù mie é fóo melá’a ndyɛ̀’ɛ.

³⁵ Á la fó pɔ́ ná pá’ tsɔ́ pànzwě la záb ntʉ́m wɔ́b nà Ssé, epʉ̀a pɔ́b pie pɔ́ la kwé, zím tà pâ pɔ̌ gíŋe ńnéŋe. Tá á gʉa ná tsɔ́ pʉ̀a, mé gÿo pɔ́ lêkɔ́ ná pɔ́b wɔ́, pɔ́ té nyé lézáb ntʉ́m nà Ssé ńzsé ngie mé ge kyɛɛ wɔ́b nyé wɔ́. Á laa mbwo pɔ́b, mvfò gwɔ́ pá’ pɔ́ ge kwé, ńzsé ngie e Ssé ge gÿo zíme wɔ́b,

³⁶ ńgíŋ ńgʉa ná tsɔ́ pʉ̀a, mé tém shʉ́ ná pɔ́b, ńdɔg ngwɔɔn ńcúa wɔ́b, ńtóo ná tsɔ́ pʉ̀a mé té gÿo pɔ́ ndà’ pú’u wɔ́, ńgíŋ ńkwɛ́ɛ wɔ́b lê metsɛ̂n, ḿma’a wɔ́b ndá tsǎŋ,

³⁷ ńtóo nà tsɔ́ pʉ̀a mé lɔg metóon ńtémte wɔ́b ńzẅé, ńtóo nà tsɔ́ pʉ̀a, ńdɔgɔ sɔ̌ shʉ́ʉ wɔ́b ńzá’, ńtóo ná tsɔ́ pʉ̀a, ńdɔg nně ncù ńgwaa wɔ́b. Etsɔ́ pʉ̀a cʉ́’ pà tè ndá, ḿma’ *mengùb *njʉ̀njÿò lâ *mengùb mvfó, atsɔ́ lága mmó té nyé ńgwɔ́ mbwo pɔ́b wɔ́, me nẅɛɛ wɔ́b, ńnyɛɛ wɔ́b ngɔ́’.

³⁸ Pɔ́ la ne ńgwá ḿbúu menkwòŋo tsẅɛ, mbɔɔ ndùm mekwɛ́, ńkúu tsɛ̀ɛ memvwɔ́’ tóon, mbɔɔ tsɛ̀ɛ yɛ̌ mvwɔ́’ wɔ́. E laa pʉ̀a, mà wɔb poŋ poŋ, tà njÿó yɔɔn tè ku’u jʉ’ gie ńgwɔ́ pɔ́ ńnéŋe wó wɔ́.

³⁹ Á la fó ná pá’ pʉ̀a ŋwɛ́ métsèm la záb ntʉ́m wɔ́b nà Ssé, nò yɔ́b poŋ Ssé, tá’ sɔɔn nyìŋ wɔb tè záb lejÿɔ́g nà lepoŋ gẅie Ssé la ka’a mbwo pɔ́b wɔ́.

⁴⁰ Pú’u mélà’mie e Ssé la kwaŋa tsɔ́ nò ńzáb, á gwɔ́ ye mbòŋo mbwo pege tɛ’. À la ne ńkwoŋo ngie pega pɔ̌ pú ńgwɔ́ métsèm, tá à gÿo pega pɔ̌ ku’ pʉ̀a pé ndà’ ndà’.