Galatia 4 - Nouveau Testament en Ngienboum

¹ Pi jú’u nò gie mè fa’a légɔɔn. Nyìŋ gẅie mé la nyé shúm né ye, á piŋ ńnyé ńgwɔ́ múɔ, à lɔɔn ńdá’ ńnyé tè gwɔ́ ndÿò, mbà à gwɔ̌ pɔ́ pá’ nkwɔɔn la, tà mbɔɔ pá’ shúm sie mé la nyé, é gwɔ́ pɔ́ sé.

² À lɔɔn ńnyé ńgwɔ́ pɔ́ múɔ mé múɔ, mbà à gẅiin lé jú’ ncwò pʉ̀a pie é tóonte yé mbɔɔ we pʉ̀a pie é líe shúm sé tà lá’ kú ngù’ gie tá we la záb.

³ Á gíŋ ńgwɔ́ pɔ́ ndʉŋ ndʉŋ pá’ á laa fʉ̀’ gie pege la nyé ńgwɔ́ pá’ púɔ penkʉ́ la, pege gwɔ́ menkwɔɔn ńtí legìŋ gẅie mé gíŋe mǒ tsɛ̀ɛ yɔɔn njÿó.

⁴ Tá’ afʉ̀’ gie Ssé la záb la gwɔ́ tà ńku’, á túmo Míŋ we. Á gwɔ́ tó manzwé zye yé. Á ne ńnéŋe ná pá’ *lepʉ̌ Mǒsê ně ńzɛ́te.

⁵ À la tó pú’u, lécu’ pʉ̀a pie *lepʉ̌ Mǒsê la ne ńdɔgɔ wɔ́b ńgÿo menkwɔɔn, mbɔɔ pá’ à ge gÿo pege metsèm cʉ́’ púɔ Ssé.

⁶ Áa nénʉ́ pi ee kwa’ púɔ Ssé. Aliŋé áa pá’ Ssé la ńnéŋe Zẅìge Míŋ we tsɛ̀ɛ mentʉ́m mégè, á Zẅìge gie á gÿo pege tóŋo Ssé le Abba. Á lɔgɔ ńgɔɔn ngie Tá wɔɔn.

⁷ Pú’u, ɔ̀ tè gíŋe ńgwɔ́ nkwɔɔn wɔ́. Ɔ̀ cʉ́’ ńgwɔ́ pɔ́ Míŋ we nzyé. Pá’ ɔ̀ cʉ̌’ ńgwɔ́ pɔ́ Míŋ we la, e Ssé ge gÿo ná shú shúm sie à la le’e lénáa mbwo púɔ pé.

Pɔl ne ḿbɔ́gɔ ngie pʉ̀a Galatia ge gíŋ gwɔ́ ménkwɔɔn tsɔ́ menò

⁸ Pi laa tsɔ́ fʉ̀’ pi tè ne ńzsé Ssé wɔ́, ńgwɔ́ menkwɔɔn shúm sie mé kwaŋ ngie ée messé, tá’ e tè Ssé wɔ́.

⁹ Á píŋ ńgʉa nà fʉ̀’ɔɔn pi ne ńzsé Ssé tà mèŋ n kɔ’ɔ́ fó gɔɔn pɔ́ ngie e Ssé ne ńzsé gẅí. Á piŋ ngǎ pi gíŋe ḿbiŋe nzèm, á tsɛ̀ɛ sɛ̌ shúm sie é té metʉ̀ gẅiin, ńké tè tsɔ́ mmó gẅiin? Pi kwoŋo légíŋe ḿbiŋ nzèm ńzẅíŋ menkwɔɔn mbwo pɔ́b keen?

¹⁰ Pi kwé’e nzẅìŋ tsɔ́ melyɛ’ɛ́ nzse, ńkwé’e we tsɔ́ mesaŋ, ńkwé’e we tsɔ́ mefʉ̀’ʉ lá’ laa we tsɔ́ mé ngù’ tɛ’.

¹¹ M bɔgɔ́ mmó gie pi ne ńgÿo lɛ, ńgwɔ́ mefà’ mie mèŋ n ka fa’a tsetsɛ̀ɛ pi cʉa sẅɛ̀ɛ.

¹² Mefɛ́ pɔ́ɔn, mèŋ sẅiŋté gẅi tɛ’, ńgie pi gʉa nà menò *lepʉ̌ ḿbí fʉ̀’ ná mèŋ. Á gʉa mǒ, mbà mèŋ n déen ńcʉ́’ pá’ pi la wɔ́. Á laa fʉ̀’ gie n daa tsetsɛ̀ɛ pi ńně shwóŋó gẅi nò Ssé, pi tè gÿo nò tepòŋ ná mèŋ pɛ́’ɛ̀ wɔ́.

¹³ Pi kímte ngie ammó gie á là gÿo n tsẅi nkʉ̀ mbòŋo mbwo pi à mvɔ́g mvfò fʉ̀’ gie n da tóo mbʉ̀a pi á laa pá’ n da ne ńguɔ.

¹⁴ Á laa fʉ’ó, mbà guɔ cǔɔ wɔ̀ɔn tɛ’ tà mèŋ m bú ḿbÿɔ́g. Tá pi ké tè wɔ̀ɔn nyìŋe, ńké tè wɔ̀ɔn gwá’. Tà ńcʉ́’ pú’u, mbà pi la kúe wɔ̀ɔn pɔ́ pá’ *cÿɔ́’ Ssé, kà pɔ́ pá’ Yěsô Kristo wɔ́ la.

¹⁵ Lekág gẅie à laa ntʉ́m pi, à kéen ḿpfó nzɔ̌? Mèŋ n ku’u légɔɔn ngie á la pé’e ńgwaa ńgwɔ́ pi tsɔ́’ menÿɔ́g mí ńdɔg ńkúbe mɔ́ɔn, mbà pi la tsɔ́’ ńdɔg ńkúbe fʉ’ó.

¹⁶ Áa fʉ̀’ɔɔn, mbà mèŋ n kéen ńcʉ́’ʉ ngàŋ mbù gẅi á nue mèŋ n kě ne shwóŋó gẅi pɔ́ nò nénʉ́ keen?

¹⁷ Pi ne ńgyá ngie pàzí’i gẅi menò ŋwɛ́ ne ńkwoŋo gẅi tɛ’, tá’ nkwaŋá gẅie pɔ́ gẅiin ná pi é té we mbòŋo wɔ́. Pɔ́ fa’a pɔ́ léfó nzèm mèŋ ńkẅile gẅi pi cʉ́’ʉ ńkwoŋo pɔ́ wɔ́b.

¹⁸ Tá á gʉa ná mèŋ, mèŋ n kwoŋo gẅí, tà ńgwɔ́ pi jÿó pì yɔ́ɔn ngwòŋ fʉ̀’ ntsèm, tà á le gwɔ́ pɔ́ ndà’ fʉ̀’ gie mèŋ n gee tsetsɛ̀ɛ pi wɔ́.

¹⁹ Egubé yɔ́ɔn, n gǐŋ ne ńgyá ngɔ́’ sẅe sẅe nà pi pɔ́ pá’ manzwě gẅie à ne ńdúme ńgee ńzyé la. Mèŋ n ge ké gyá ngɔ́’ pɔ́ pú’u, tà kú fʉ̀’ gie pi cʉ̌’ kwà’ pʉ̀a Kristo.

²⁰ Áa fʉ̀’ɔɔn pá’ɔɔn mèŋ n ne ńtsɔ́ɔn tɛ’ légwɔ́ tsetsɛ̀ɛ pi, tá ńzsé ntí gie ńgwɔ́ n dɔg shwóŋó gẅi nò pú’u. Á nue n ne ńkwaŋte menò mí ńcʉ́’ʉ ḿbɔ́gɔ pɔ̌g.

Ntí ye Agar pɔ́ ye Sara

²¹ Pi pie pi ne ńkwoŋo ngie *lepʉ̌ sá’a gẅí, pi shwóŋó wɔ̀ɔn: Pi tè ne ńjú’u mmó gie *lepʉ̌ ŋwɛ́ gɔɔn wɔ́ ka?

²² Mé la ŋwe’e tsɛ̀ɛ ŋwà’ne *lepʉ̌ ŋwɛ́ ngie: Ábalam la gẅiin gubé yépʉ́a, tà’ gwɔ́ gẅie à la zyé ná manzwé gẅie à laa nkwɔɔn, wetsɔ̌ gwɔ́ gẅie à la zyé ná manzwě gẅie à la tá.

²³ Míŋ nkwɔɔn laa gẅie pʉ̀a mesoŋ la kwoŋ kwoŋ ńzyé yé. Míŋ manzwě gẅie à la tá gwɔ́ gẅie mé la gwaa zyé yé á gwɔ́ pɔ́ nò gie e Ssé la ka’.

²⁴ Yɔɔn nò ngwɔ́ mé gíŋ ńjú’u nà tsɔ́ shÿó. Panzwě pɔɔn mépʉ́a lɔgɔ ńnyɛɛ *kʉ̀a sépʉ́a. Ndùŋ mvfò *kʉ̀a gwɔ́ gie á la fó ndùm lekwɔ’ɔ́ Sinay. Yɛ̌ *kʉ̀a gÿo, mé zyé gubé é gwɔ́ pɔ́ menkwɔɔn. Á lɔgɔ ńgwɔ́ Agar.

²⁵ Á gíŋ ńgwɔ́ ngie lezíŋ Agar tsẅé’e nà se sinay, é lekwɔ’ɔ́ sie ée Arabia. Agar lɔgɔ pá’ɔɔn ńgwɔ́ tÿǒsoŋo Yerósalem ye fʉ̀’ɔɔn, á gie pâ pʉ̀a pé metsèm gwɔ́ pɔ́ menkwɔɔn *lepʉ̌.

²⁶ Tá’ Yerósalem we tÿǒ lepwó à tè nkwɔɔn wɔ́, yé zɔɔ má wege.

²⁷ Aŋwà’ne Ssé zɔɔn ńgɔɔn ngie: Néŋe nê lekág, n gɔɔn né gù gẅie ɔ́ɔ nkǐŋ! Kága tà ngyè ɔ̀ kwɔ́’ɔ tÿǒ, n gɔɔn né gù gẅie ɔ̀ tè zsé pá’ manzwě aa ńdúmo pú’u tá ńzyé wɔ́! Á nue gubé manzwě gẅie mé la gwá’a ye ge gyɔ́ɔn cʉa pe manzwě gẅie à gẅiin ndǔm.

²⁸ Mefɛ́ pɔ́ɔn, á gʉa ná pi, mbà pi ee gubé gie mé la zyé wɔ́b á nà ntí gie Ssé la ka’, é ndʉŋ ndʉŋ pá’ Esâg la.

²⁹ Tá’ pá’ á laa tsɔ́ fʉ̀’, múɔ gẅie mé la kwoŋ kwoŋ ńzyé ne ńkʉ́e gẅie Zẅìge Ssé zɔ̌ la gÿo tá mé zyé yé la, á gíŋ ńgwɔ́ lyɛ̌’ɔɔn ńgwɔ́ pɔ́ pú’u.

³⁰ Aŋwà’ne Ssé zɔɔn ńgɔɔn ngie kɔ́ lɛ? Á gɔɔn ngie: Jwoŋo manzwě gẅie aa nkwɔɔn pɔ́ míŋ we. Á nue míŋ nkwɔɔn tè gẅiin tsɔ́ nò nà tÿɔgɔ́ tá wɔb pá’ míŋ manzwě gẅie mé la tá wɔ́.

³¹ Mefɛ́ pɔ́ɔn, áa mmó gie á gÿo pege té gubé manzwě gẅie aa nkwɔɔn wɔ́, pege gwɔ̌ pɔ́ gubé manzwě gẅie mé la tá.