Filipo 3 - Nouveau Testament en Ngienboum

Pɔl nyě mà lá’ gwɔ́b ńcʉ́’ʉ ńzsé yé pɔ́ nò Kristo

¹ Áa nà fʉ̀’ɔɔn, mbà mefɛ́ pɔ́ɔn, pi ne ńkága kǎg ńtí Cʉ̀apʉ̀a. À lɔɔn ńgwɔ́ n de kʉ́a léŋwe’e ŋwà’ne mbwo pi lélɔg ńkímte gẅi á mmó gie n ka zɔɔn ńgɔɔn mbwo pi wɔ́. Á ge pyɛ́bte gẅi légwe ná mejÿɔ’.

² Pi pɔ́ɔn pàzí’i pʉ̀a mmó pie ée pè tepòŋ! Mefà’ mɔ́b ée mbwo Ssé é sẅile sẅile! Ayɔ́b nò wɔ́ pɔ́ ngie mé lɔɔn tè nyìŋ pú’, e Ssé légÿo á tsẅɛ́ wɔ́.

³ Pege pɔɔn zɔ ee pʉ̀a pie mé la kwà’ ḿbú’u wégè. Pege zɔ̌ gwɔ́ pʉ̀a pie é gwɔ ne gu’te Ssé, ńne ńzẅí’te nò ncwò Zẅìge yé. Pege lɔgɔ pɔ́ Yěsô ńka’te, à lɔɔn ńgwɔ́ pege zɔɔn le lɔg shúm sie pʉ̀a mesoŋ gÿo ńtí mà lá’ gwɔ́b ńdɔg ńka’te wɔ́ le.

⁴ Tá mèŋ n gee nyìŋ gẅie n gwé’e ńkwoŋ, mbà à lɔɔn ńgwɔ́ n dɔg shúm sie mé gÿo ńtíi mà lá’ weg ńdɔg ńka’te. Tà ńgwɔ́ gie nyìŋ lɔɔn shwóŋó wɔ̀ɔn ngie à zsé nò mǒ, mèŋ shwóŋó yé ngie mèŋ n zsé nò mǒ ńcʉa yé.

⁵ Mé la zye wɔ̀ɔn, é cʉa lyɛ̌’ lefɔ̌ɔn, mé pú’u wɔ̀ɔn. Mèŋ n gee nyìŋ ná ngẅɛ̀ Israel, á nà tsìŋe ndá Mběnjameŋ, ńgwɔ́ nyìŋ Heber tà metá pɔ́ɔn gwɔ́ pɔ́ pà Héber, ńgʉa ná *lepʉ̌ pà Yuda, n gwɔ́ nyìŋ ná nùɔ pà *farisay.

⁶ N dɔ̌ɔn ńtíɛ kẅǐ nà *lepʉ̌ tɛ’, tà ńtsɔ́’ɔ kwò pʉ̀a Kristo té poŋ. Léku’té *lepʉ̌ lá’ zɔ laa pé’è ńtyɛ’te ngie nyìŋ aa tè fʉa, mbà a lɔɔn ńgwɔ́ mèŋ shwóŋó gẅi ngie n daa tè fʉa.

⁷ Tá’ mɔɔn menò mɛ́ mie é lâ mbwo mèŋ ńgwɔ́ pɔ́ lemaŋ, Kristo léen ńgÿo n gyá, mbà à la gwɔ́ pɔ́ pyé,

⁸ é té gwɔ́ pɔ́ ndà’ pú’u wɔ́, le zsé Yěsô Kristo, á Cʉ̀apʉ̀a wɔ̀ɔn zɔ cʉ̌’ ńcʉa nò ntsèm. À kɔ̀ɔkɔ́ɔ cʉ́’ ńgwɔ́ pɔ́ pyé. Mbà mèŋ n déen ńdʉ’ shúm ntsèm ńtí pɔ́ yé. N cʉ̌’ ńdíe sɛ̌ shúm ntsèm é gwɔ́ pɔ́ kʉ̀ŋe. Kristo zɔ̌ cʉ́’ʉ yɔ́ɔn pì,

⁹ légwɔ́ gie mèŋ n ge cʉ́’ gwɔ́ pɔ́ nà mbwo mé, ńgwɔ́ n de gíŋ ngie n gee tè fʉa mvfò Ssé, mélà’mie mèŋ n zsé *lepʉ̌ pà Yuda wɔ́. Mèŋ n gee mvfò yé ńgwɔ́ tè fʉa ńtí pɔ́ nò gie mèŋ n záb ntʉ́m wɔ̀ɔn ná Kristo, e Ssé zɔ gÿo ngie mèŋ n gwɔ́ nyìŋ nénʉ́ pá’ wɛ̌ nyìŋ wɔ́ gẅie à zǎb ntʉ́m wé ná Kristo.

¹⁰ Mèŋ n ne ńtsɔ́ɔn pɔ́ tà’a nò wémɔ’ɔ́. Á gwɔ́ ngie n zsé yé Kristo, ńzsé metʉ̀ mie é la gÿo á zíme ná legwé, ńgyá ngɔ́’ pá’ à la gyá yé, ńzẅíŋe lénáa twó yɔ́ɔn ńkwé pá’ à la náa yé,

¹¹ légwɔ́ gie, á lɔɔn tè gwɔ́ pɔ́ kɔ́ wɔ́, e Ssé lá’ ńgÿo n zím yɔ́ɔn nà legwé pá’ Kristo.

Pɔl ne ńtsɔ́ɔn légwɔ́ pɔ́ pá’ Kristo

¹² À lɔɔn ńgwɔ́ n de gɔɔn ngie mèŋ n ku’ú ná mɔɔn menò ntsèm mie mèŋ n ne ńtsɔ́ɔn lɔɔn wɔ́. N ké légɔɔn ngie n cʉ’ʉ́ nyìŋ gẅie tsɔ́ mmó té gíŋe ne ńzága nà yé wɔ́ wɔ́. N nyé mánzsè, ńtsaa ndʉ̌, ńtsɔ́ɔn légwɔ́ pá’ Kristo, mélà’mie à kéen ńzába pwó nà mèŋ ńtí pú’u.

¹³ Mefɛ́ pɔ́ɔn, ńgwɔ́ n de gɔɔn ngie n noonté tà ḿbú ńgwɔ́ pá’ Kristo wɔ́, mèŋ n ne ńgÿo pɔ́ tà’a mmó, á gwɔ́ légwɔ́ gÿo mmó, ńdege Kɔ̀ɔkɔ́ɔ gie mèŋ n ka gÿó, ńcʉ́’ʉ ńdíe pɔ́ gie áa mvfò.

¹⁴ Mèŋ n gee mánzsè ńtsaa pɔ́ ndʉ̌ lékúu jʉ’ gie n gee wó ńkẅé ntsɔ’ɔ́ fà’ gẅie e Ssé la ka’ lénáa mbwo pege á tÿǒ lepwó ńtí nò gie Kristo la kwé nà twó ségè.

¹⁵ Pege pie pege cʉ̌’ pɔ́ melÿò nà léju’ú nò Ssé, á poŋ ngie é wégè nkwaŋá e gwɔ́ pɔ́ pá’ɔɔn, ńké ńgwɔ́ gie etsɔ́ pʉ̀a pi gẅiin tsɔ́ nkwaŋá tà é té wɔɔn wɔ́, mbà Ssé ge shʉa shʉa, éshwóŋó gẅi nò gie áa yɛ̌.

¹⁶ Anò lÿò gwɔ́ pɔ́ ngie, à jʉ’ gie pege gʉ̌a tà ńkúu wó lɔɔn, pege ké ńgʉa pɔ́ lé mvfò.

¹⁷ Mefɛ́ pɔ́ɔn, pi métsèm, pi pí fʉ̀’ ná mèŋ. Peg ka nyɛɛ gẅi pá’ pi ge giŋ pú’u. Pi líe pʉ̀a pie é ne ńgiŋe pú’u, ńgiŋ gí.

¹⁸ Pʉ̀a tà ńgyɔɔn zɔɔn ńgwɔ́ tsetsɛ̀ɛ pege, mà wɔb sẅé pɔ́ we pʉ̀a pie pɔ́ nyiŋe legwé Kristo nà tÿǒ nkǐ nyiŋe. N dǎ zye shwóŋó gẅí, tà mbɔɔ lyɛ̌’ɔɔn, n giŋé ne ńgɔɔn tà ńdɔgɔ pɔ́ ntse nÿɔ́g ńgɔɔn.

¹⁹ Emɔ́b melyɛ̌’ ge lá’ maga tsɛ̀ɛ njÿó, pɔ́ gee lepÿé mmɔ̌g, mélà’mie yɔ́b ssé gwɔ́ pɔ́ lepfòm sɔ́b. Pɔ́ kága nà mmó gie eshʉ́ kɔ’ɔ́ kúu wɔ́b mǒ kǔ, ewɔ́b nkwaŋá piŋ ńtyé pɔ́ nà shúm njÿó.

²⁰ Á gʉa ná pege, mbà wégè ngwòŋ gwɔ́ pɔ́ tÿǒ lepwó. Pege ne ńzẅí’te ngie Cʉ̀apʉ̀a Yěsô Kristo fó wó ńtó, à gyô pege tsẅɛ̂.

²¹ À ge gÿo tó é sele yɔɔn mbùm nnɛ́ gie e tè ná tsɔ́ nò ku’, e cʉ́’ pá’ ye gie e gẅiin shʉ́shÿɔ́g. À gwɔ́ pú’u, ńdɔgɔ metʉ̀ mie à gẅiin lélɔg ńgÿo à kɔ̀ɔkɔ́ɔ cʉ́’ ńjú’ pɔ́ ncwò wé.