Filipo 2 - Nouveau Testament en Ngienboum

Mé ńnéŋe ńgẅiin ndà’ mà gẅie aa we Kristo

¹ Tà légwɔ́ gie pi laa Kristo léen ńtemte zɔ tè ne ńgÿo pi kẅi’i shÿɔgɔ wɔ́? Tà ntí gie Kristo lɔg ńkwoŋo gẅi zɔ tè ne ńkẅiŋte gẅi wɔ́? Tà pia Zẅìge Ndʉalʉ̌a zɔ tè nùɔ wɔ́? Tà pi tè gẅiin nkwòŋe laa tsɔ́ɔn mezìŋe á tsetsɛ̀ɛ pi wɔ́?

² Pá’ áa pú’u la, pi gÿo n kág lê ntʉ́m wɔ̀ɔn ntsèm, pi ké ne ńgẅiin pɔ́ tà’ nkwaŋá, ńgẅiin pɔ́ tà’ ncwò, ńgẅiin pɔ́ tà’ ntʉ́m, ńgíŋ ńgẅiin pɔ́ tà’ ntí letsɔ̌ɔn nò.

³ Tà pi gÿo tsɔ́ mmó gie á gwɔ́ pɔ́ lélɔg sá’ ndʉ̀’, kà pɔ́ lélɔg fáŋ sẅɛ̀ɛ sẅɛ̀ɛ wɔ́. Pi sẅí’i pɔ́ mbùm gi ńnáa ssé, ńdíe petsɔ́ pʉ̀a pɔ́ pá’ fʉ̀’ gie pɔ́ cʉa gẅi la.

⁴ Tà nyìŋ gẅi kwaŋ pɔ́ ndà’ yé twó. À gíŋe ńkwaŋa ye petsɔ́ pʉ̀a.

⁵ Pi gẅiin nkwaŋá gẅie Yěsô Kristo la gẅiin.

⁶ À la tè lɔg pá’ à gwɔ́ pɔ́ Ssé tà ḿmag, ńcʉŋe nà légwɔ́ gie pɔ́ Ssé ge ké ńnéŋe pɔ́ tà’a jʉ’ wɔ́.

⁷ Tà ńcʉ́’ pú’u, mbà à la zẅíŋe légwɔ́ ngàŋa fà’, ńnyé kɔ̀ɔkɔ́ɔ gie á laa yé, ńcʉ́’ʉ nyìŋ mesoŋ. Mé zyé yé pá’ mé zyé pʉ̀a mesoŋ.

⁸ À la zẅíŋe lésẅí’i mbùm yé ńnáa ssé, ḿbiŋ ńzẅíŋe lé jú’ ncwò Ssé, tà mé kíme yé nà tÿǒ nkǐ, á kwé.

⁹ Áa mmó gie á la gÿo tá e Ssé ńnéŋe yé jʉ’e lÿò, ńná lezíŋ sie é cʉa mezíŋ ntsèm né yé,

¹⁰ légwɔ́ gie nyìŋ lɔɔn ńjú’ lezíŋ ŋwɛ́, kà ńgwɔ́ nyìŋ gẅie à gwɔ́ pɔ́ tÿǒ lepwó wɔ́, kà ndùmo tsetsá’ wɔ́, kà nzèm ssé tsetsá’ wɔ́, á ná mekù’ cʉa mefùɔ né yé.

¹¹ Á piŋ ne ńzɛ́te ngie mbàa wɔ̌wɔ́ɔ sá’ ngie Yěsô Kristo aa Cʉ̀apʉ̀a. Mé ge gɔ́ɔn pú’u, é lɔg ná mekù’ á mbwo Ssé Tá.

Pi gwɔ́ pá’ kyɛ̀’ gie áa tsɛ̀ɛ njÿó la

¹² Á cʉa pú’u, mbà mefɛ́ pɔ́ɔn pè ntʉ̀ nzẅìŋ, pá’ pi ee ńké ńzɔɔn ńjú’u pɔ́ ncwò Ssé tà fó pá’ n daa tsetsɛ̀ɛ pi la, pi kě ne ńgíŋe ńtÿɔ́gɔ kwò pɔ́ mǒ á nà fʉ̀’ɔɔn gie mèŋ n te tsetsɛ̀ɛ pi wɔ́ lɔɔn. Pi kag tʉ̀, tà nyìŋ gÿo megʉa. E Ssé kéen ńgÿo pi tsẅɛ́, pi lêen ńké fa’ mefà’ mie é pumo ná pʉ̀a pie é kéen ńtsẅɛ́.

¹³ E Ssé zɔɔn ne fa’a tsɛ̀ɛ ntʉ́m pi légwɔ́ gie pi ge kwoŋ shúm sie é poŋo yé, mbɔɔ légwɔ́ gie pi ge gíŋ gÿo sɛ̌ shúm.

¹⁴ Pi gÿo kɔ̀ɔkɔ́ɔ té zẅɛ́te, té tsɔ̌ zòŋo nò tsetsɛ̀ɛ pi,

¹⁵ légwɔ́ gie, atsɔ́ mmó gie mé ge la’a gẅi mǒ á té gwɔ́ wó wɔ́. A*lɔ̌’ɔ gí á le gwɔ́ wó wɔ́. Pi lɔg ńgwɔ́ tsɛ̀ɛ yɔɔn njÿó, ńgwɔ́ púɔ Ssé pie tsɔ́ *lɔ̌’ té ná pɔ́b wɔ́, à lɔgɔ ńgwɔ́ ngie pi ee kyɛ̀’ gie á kyɛ’ɛ jʉ’ tsetsɛ̀ɛ yɔɔn nùɔ pʉ̀a pie é gwɔ́ pɔ́ megàŋa cÿɔ̌ nò, ńgíŋ ńgwɔ́ pà sẅáŋ lekÿɛ̀bɛ.

¹⁶ Pú’u, pi lɔgɔ pá’ pi ne ńtsẅii nkʉ̀ mbòŋo mbwo pɔ́b, é gẅie é gÿo mé gẅiin le gwɔ́ tèmì. À lá’a lyɛ̌’ gie Kristo gǐŋ ńtó, n díe gẅí, à nò gí poŋo wɔ̀ɔn. Wɔ̌wɔ́ɔ gyá ngie mefà’ mie mèŋ n da gyá ngɔ́’ fa’ é la tè cʉa sẅɛ̀ɛ wɔ́.

¹⁷ À gẅi lézáb ntʉ́m ná Yěsô aa pá’ shúm pwɔ́’ sie pi nuŋe mvfò Ssé, ńgwɔ́ gie mé lɔɔn ńzẅé wɔ̀ɔn, mbà é lɔgɔ ńgwɔ́ pá’ wɔ̀ɔn pwɔ́’ gẅie mèŋ n nuŋé mvfò Ssé. Á tó ńgwɔ́ pú’u, mbà mèŋ n gee shÿó mbòŋo, mbà pege ge pú kág.

¹⁸ Tà mbàa pi gí pi kág, pege pú ńkág métsèm.

Pɔl tumó Timoté pɔ́ Epafolodite

¹⁹ Mèŋ n ne ńtsɔ́ɔɔn létúmo Timoté né pi, pá’ Cʉ̀apʉ̀a Yěsô lɔɔn ńzẅíŋ. À tó ńgúɔ gẅí, ḿbiŋ nzèm shwóŋó wɔ̀ɔn, n dɔg ńgẅiin shÿɔ́g,

²⁰ é gwɔ́ pɔ́ ndà’ yé gẅie peg yé ne sáŋa nò ná menò mie ée ná mèŋ, ńgíŋe ne ḿmÿɔgɔ mí.

²¹ Petsɔ́ pʉ̀a ne sáŋa nò pɔ́ ndà’ ná yɔ́b twó tà pɔ́ téen sáŋa nò ná nò Yěsô Kristo wɔ́.

²² Tá ńgʉa ná Timoté, mbà pi zsě ngie à gẅiin mà mbòŋo. Peg yé ka pǔ ńtsẅi nkʉ̀ mbòŋo mbwo lá’. Á pú ńkẅéte wɔ̀ɔn ndʉŋ ndʉŋ pá’ múɔ mbòŋo kẅéte tá we la.

²³ Mèŋ n ne ńkwaŋa ngie mé lɔɔn ńgwɔ́ tà ńzá’ ntsaŋ yɔ̀ɔn, mbà mèŋ n ge gwóon túmo yé né pi.

²⁴ Cʉ̀apʉ̀a pǐŋ ńgÿo mèŋ n zsé ngie kwà’ mèŋ n ge tɔ́g tó gyá gẅí.

²⁵ Mèŋ n ka kě ńgyá ngie á poŋ, n gÿo fɛ́ wege Epafolodite piŋ nzèm, ńtsɛ́ɛ gẅí. Á yé gẅie pi ka túmo yé á tó ńná shúm sie é ka ne ńzága mbwo mèŋ lá. Àa nyìŋ gẅie peg yé lǎ zye fà’, ńzye ńdÿɔ́’ ncù ná nò Yěsô Kristo.

²⁶ Kwà’ yé zɔɔn ne ńtsɔ́ɔn tɛ’ légíŋe ńgyá gẅi métsèm, á nue à zsě ngie pi ka jú’u nò guɔ yé, á gege gẅi tɛ’.

²⁷ Á ka gẅiin légege gẅí, aguɔ ŋwɛ́ laa wó tɛ’, tà á ka cʉ́’ʉ méjʉ’ à kwé. Tá e Ssé tsɔ́ɔn mezìŋe mé, ńgíŋe ńtsɔ́ɔn mbàa mɔ́ɔn ngie tà mèŋ n gwɔ́ tsɛ̀ɛ ngɔ́’, ńgíŋe ńkaa tsɔ̌.

²⁸ Áa mmó gie á gÿo kwà’ mèŋ yɔ́ɔn n ne ńtsɔ́ɔn lélwo ńtúmo yé mbwo pi, éfa’a ngie pi gwaa ne kága pá’ pi giŋé ńgyá yé, letʉ́m sɔ́ɔn ná’a sẅéte.

²⁹ Pú’u la, pi kúe yé lê kwà’ lekág, ńzsé ngie aa fɛ́ gẅi nzèm Cʉ̀apʉ̀a. Pi gÿo mekù’ ntí pʉ̀a pá’ pɔ́b lɛ,

³⁰ á nue á ka cʉ́’ʉ méjʉ’, à tóo fa’a fà’ Kristo, ńkwé mǒ. À ka tóo ńgÿo mmó gie pi kɔ̌ɔn ńge gÿo ná mèŋ, tá ńtúm pɔ́ yé, á cʉ́’ʉ méjʉ’ à náa twó yé.