Filipo 1 - Nouveau Testament en Ngienboum

Tsyɛ̀’te pà náa ŋwà’ne

¹ Yɔɔn ŋwà’ne fóo mbwo mèŋ Pɔl. Peg Timoté gẅie peg yé pú fa’a nzèm Yěsô Kristo náa mbwo pi pie pi la zẅɛ́’ɛ Yěsô Kristo ńgwɔ́ pʉ̀a Ssé, á gẅi gẅie pi ee tÿǒsoŋ Filipo. Á gíŋe ńgwɔ́ gí pi pà líe cú’tè pʉ̀a Kristo laa pi pàfa’a tsɛ̀ɛ cú’tè.

² Tá wege Ssé mbɔɔ Cʉ̀apʉ̀a Yěsô Kristo ne ńgwɔ́ né pi, ńne ńnéŋe sẅétè ntʉ́m pi.

Pɔl sǐe Ssé ḿbiŋ sẅíŋte yé nà twó pʉ̀a Filipo

³ Mèŋ n kwaŋte gẅi tsɛ̀ɛ ntʉ́m mèŋ fʉ̀’e kɔ́ wɔ́, ésíe Ssé yɔ̀ɔn.

⁴ N gwɔ́ sẅíŋte Ssé nà twó sí fʉ̀’ ntsèm, ntʉ́m wɔ̀ɔn ne ńkága kǎg,

⁵ ńkága pú’u, ńtí gí mmó gie pi gÿo lélɔg ńkẅéte wɔ̀ɔn, n dɔg nkʉ̀ mbòŋo Yěsô Kristo sa jʉ’. Á gie pi gÿǒ tà fó lyɛ̌’ gie pi la zẅíŋ nkʉ̀ mbòŋo ńgʉa ńkúu lyɛ̌’ɔɔn.

⁶ Mèŋ n zsě ngie yé Ssé gẅie à la zye mefà’ mbòŋo tsɛ̀ɛ ntʉ́m pi, á ge lɔg gʉa pɔ́ lê mvfò tà lá’ kúu lyɛ̌’ gie Yěsô Kristo ge lá’ gíŋ tó.

⁷ Mèŋ n gẅiin lé ne ńkwaŋa pɔ́ pú’u ná pi, mélà’mie m bǔ ńkwoŋo gẅi tà ḿmag ntʉ́m wɔ̀ɔn. Pi metsèm zɔɔn ne ńkẅéte wɔ̀ɔn nà fà’ gie e Ssé la lɔg ńcÿó gʉm yɔ́ɔn pɔ́ lê pòŋo ntʉ́m yé, tà mbɔɔ fʉ̀’ɔɔn gie n gee ndá tsǎŋ lɔɔn, mbɔɔ fʉ̀’ gie mèŋ n ne ńnyɛɛ ngie nkʉ̀ mbòŋo ée nénʉ́, mbɔɔ fʉ̀’ gie mèŋ n ne ńgÿo pʉ̀a nyɛte ńzẅíŋe.

⁸ E Ssé ne ńzsé ngie mèŋ n neŋé ńtsɔ́ɔn légyá gẅi tɛ’, ḿbiŋ ńzsé ngie mèŋ n kwoŋo gẅi lê ntʉ́m wɔ̀ɔn ntsèm, ndʉŋ ndʉŋ pá’ Yěsô Kristo.

⁹ Ammo gie mèŋ m biŋ ńnéŋe sẅíŋte Ssé ńtsɔ́ɔn ngie à ná né pi aa yé légÿo pi kẅi’i ńgẅiin nkwòŋe ńdɔg ńgʉa lê mvfò, ńne ńcwoŋo ńzsé Ssé mboŋó, ńne ńzsé tyɛ̀’te gie áa nà nò mbòŋo pɔ́ ye tepòŋ.

¹⁰ À cʉa pú’u, pi ku’u lépíi ye mbòŋo, éshwoŋo nò nénʉ́. À lá’a lyɛ̌’ gie Kristo ge lá’ gíŋ tó, pi gwɔ́ pà tèfʉa.

¹¹ Yěsô ge gÿo pi ké ne fa’a pɔ́ mefà’ mbòŋo, ńzsé ngie pʉ̀a ge ne gyá, é gu’te Ssé, é gé’e lezíŋ sé.

Kristo aa nò ntsèm

¹² Mefɛ́ mefɛ́, pi zsé ngie ngɔ́’ gie é ka kúu wɔ̀ɔn, e ka gÿo ngie nkʉ̀ mbòŋo kẅi’i sa pɔ́ jʉ’,

¹³ tà pàlÿɔ́’ ncù pie é pyɛ́bɛ mbʉ̀a ngúmnɔ́ɔn lâ pʉ̀a metsèm ne ńzsé ngie mèŋ n gee ndá tsǎŋ pá’ɔɔn ntí pɔ́ nò Kristo.

¹⁴ Mèŋ n ka gwɔ̌ tà ńkúu tsǎŋ, lelÿò mefɛ́ mefɛ́, gyá pú’u, ńkẅi’i ńzáb ntʉ́m wɔ́b ná Cʉ̀apʉ̀a. Tà pɔ́ ne shÿɔ́gɔ shwóŋó nò Ssé fʉ̀’ɔɔn té pɔ́g.

¹⁵ Áa nénʉ́ ngie tsɔ́ pʉ̀a ée tsetsɛ̀ɛ pɔ́b, éshwóŋó nò Kristo pɔ́ lélɔg fa’a nò ná mèŋ, mbɔɔ lélɔg ńdʉŋte ntyě. Tá petsɔ́ ké shwóŋó yɔ́b pɔ́ lê nkwaŋá mbòŋo.

¹⁶ Pɔ́ shwóŋó pú’u, nue pɔ́ kwoŋo wɔ̀ɔn. Pɔ́ ne ńzsé ngie e Ssé zɔ ka kwoŋ ngie n gwɔ́ ndá tsǎŋ jʉ’ɔɔn légwɔ́ gie n ge pÿɛɛ nò ná nkʉ̀ mbòŋo, é nyɛ ngie ée nénʉ́.

¹⁷ Tá pʉ̀a pie é shwóŋó nò Kristo lê nkwaŋá tepòŋ, pɔ́ lélɔg ńdʉŋte ntyě, kwaŋ yɔ́b pɔ́ ngie pɔ́ ge kẅi’i menò ná ngɔ́’ gie mèŋ n ne ńgyá ndá tsǎŋ lɔɔn.

¹⁸ Á nò ge gyáŋa wɔ̀ɔn mǒ mélà’a kɔ́? Nyìŋ lɔɔn ńgwɔ́ shwóŋó nò Kristo, ńdɔg nkwaŋá mbòŋo kà nkwaŋá tepòŋ wɔ́, mbà á té *lɔ̌’ wɔ́, anò gwɔ́ pɔ́ ngie à shwóŋó nò Kristo. Ntʉ́m wɔ̀ɔn ge kág kág, é ké lá’a zɔ́gɔ kága kág mǒ.

¹⁹ Mèŋ n zɔɔn ne ńzsé ngie ngɔ́’ gie é ka kúu wɔ̀ɔn ge tó cʉ́’ gÿo mèŋ n tsẅɛ́ tsẅɛ́. Mèŋ n tsẅɛ́ɛ pú’u, ńzẅɛ́’ɛ ntí gie pi ne ńdɔgɔ sẅíŋte Ssé pú’u, ńgíŋe ńzẅɛ́’ɛ Zẅìge Yěsô Kristo gie á ne ńtóonte wɔ̀ɔn.

²⁰ Ammó gie mèŋ n ne ńtsɔ́ɔn tɛ’, nkwaŋá wɔ̀ɔn ńnéŋe ńtyé pɔ́ mǒ, á gwɔ́ pɔ́ ngie tà mèŋ n gÿo tsɔ́ mmó gie eshʉ́ ge fó mǒ é kúu wɔ̀ɔn. Tà ńcʉ́’ pú’u, mbà á lɔɔn ńgwɔ́ pɔ́ fʉ̀’ɔɔn, kà fʉ̀’e kɔ́ wɔ́, n nyé pɔ́ ntentʉ́ kà fó ńkwé kwé wɔ́, mbà mèŋ n ne ńzsé mboŋó ngie mé ge fó nà wɔɔn leńnéŋe, é gu’te Kristo.

²¹ Kristo zɔɔn ńgwɔ́ yɔ́ɔn nò ntsèm. N dɔɔn ńgwɔ́ wó, mbà mèŋ n gee wó ńtí Kristo, ńké ńkwé, mbà mèŋ n jÿǒ pì nzèm yé.

²² Tà áa pú’u, pá’ɔɔn ńgwɔ́ gie n dɔɔn ńnyé ńgẅiin léńnéŋe ndùmo ssé tsetsá’, éfa’ mefà’ mbòŋo, mbà mèŋ n ge kaŋ pɔ́ lékwé kà leńnéŋe? N kaa zsé gie mèŋ n ge kaŋ wɔ́.

²³ Menò mémbʉ́a mɔɔn mvfò mèŋ. Mèŋ n ne ńtsɔ́ɔn léfó ndùmo ssé tsetsá’ ńgʉa peg Kristo zɔ̌ cʉ́’ʉ ńnéŋe. Áa yɔ́ɔn twó ye mbòŋo mǒ.

²⁴ Tá’, áa mbòŋ ngie mèŋ n gíŋe ńnéŋe ńtí gẅí.

²⁵ Mèŋ n ne ńnyɛte ńzsé pú’u. Pege ge gíŋe ńnéŋe mèŋ n ne ńkẅéte gẅi métsèm lécwoŋo ńzẅíŋe nò Yěsô, ńgẅiin lekág.

²⁶ Pú’u la, mèŋ n ge gÿo piŋ tà gíŋe gwɔ́ tsetsɛ̀ɛ pi, pi zẅɛ́’ɛ wɔ̀ɔn ńkẅi’i ńgẅiin lekág gẅie à fóo ná pá’ pi lǎ nnɛ́ ná Yěsô Kristo.

Ncù ńtí nkʉ̀ mbòŋo Yěsô

²⁷ Ammó lÿò gie pi kě ńgẅiin légÿo á gwɔ́ pɔ́ ngie, pi ké ńne ńgiŋe pɔ́ ná mà we pʉ̀a pie é jú’u nkʉ̀ mbòŋo Yěsô Kristo. Á nà ntí gie n dɔɔn ńtó gyá gẅi lo, éfó tè tó lo, n ké ne ńjú’u pɔ́ pá’ mé gɔɔn ngie pi nyě ńgẅiin pɔ́ tà’ ncwò, ńne ńdɔgɔ pɔ́ tà’ ntʉ́m ńdÿɔ́’ɔ, légwɔ́ gie pi ge pɔ́ɔnte nò gie pi la zẅíŋ, á gwɔ́ nò nénʉ́ gie á fóo ná nkʉ̀ mbòŋo.

²⁸ Megàŋ mbù lɔɔn ḿvege gẅi tà pi cÿɔ’. Pi lɔɔn tè cÿɔ’, mbà á ge gwɔ́ mbwo pɔ́b, é gwɔ́ liŋé ngie pɔ́ ée ná mánzsè lepyé, tá’ é ké gwɔ́ mbwo pi é gwɔ́ liŋé ngie pi ée nà mánzsè letsẅɛ́. E Ssé zɔ gÿo mɔɔn menò.

²⁹ A la cÿó gʉm gí, pi gwɔ́ pʉ̀a Kristo, tá á ké tè gwɔ́ pɔ́ ndà’ pú’u wɔ́, á gíŋe ńgwɔ́ mbɔɔ légyá ngɔ́’ ńtí Kristo.

³⁰ Yɛ̌ ngɔ́’ ée ncù gẅie pi ne ḿma’a, mbà pi la gyá pá’ mèŋ m ma’a. Mèŋ n kě ńnyé ḿma’a pɔ́ wɛ̌.