Efeso 4 - Nouveau Testament en Ngienboum

Epʉ̀a Kristo gwɔ́ pɔ́ tà’a nùɔ

¹ Mèŋ gẅie mèŋ n gee ndá tsǎŋ ńtí nò Cʉ̀apʉ̀a Yěsô Kristo, n ge fó ná menò mie mèŋ shwoŋó gẅí, é zɛ́te ngie pi gwɔ́ gÿo kɔ̀ɔkɔ́ɔ gí wɔ́, ńkímte ngie e Ssé ka tóŋo gẅi ngie pi gwɔ́ pʉ̀a pé.

² Pi sẅí’i mbùm gi ńnáa ssé, ńgwɔ́ pʉ̀a ḿbʉ́le pʉlé, ńgẅiin kwɔ́gɔ nnɛ́. À cʉa nà nkwòŋo gie ee tsetsɛ̀ɛ pi, pi gwá’a gyáŋa lóŋ.

³ Pi kag tʉ̀ lé ké ńgẅiin pɔ́ tà’ ncwò gẅie à fóo mbwo Zẅìge Ssé, yɛ̌ zɔ̌ gwɔ́ ná mbʉ́lè mbwo pʉ̀a, ńnáa wɔ́b tà’ ncwò.

⁴ Mbùm nnɛ́ Kristo ee yémɔ’ɔ́, a Zẅìge ndʉalʉ̌a gwɔ́ yémɔ’ɔ́ ndʉŋ ndʉŋ pá’ mmó gie e Ssé la tóŋo gẅí, pi ne ńzẅí’te á gwɔ́ pɔ́ yémɔ’ɔ́.

⁵ Pege metsèm gẅiin pɔ́ tà’ Cʉ̀apʉ̀a wémɔ’ɔ́, ḿbú ńzába ntʉ́m pɔ́ ná yé gílé yé, mbà pege metsèm la pú ńkẅé ntse pɔ́ nà lezíŋ tà’ nyìŋ.

⁶ E Ssé gwɔ́ pɔ́ yémɔ’ɔ́, aa Tá pà mânyìŋ ntsèm. À pǔ sá’a pʉ̀a metsèm, ńdɔgɔ pʉ̀a metsèm éfa’a fà’ yé, ńgwɔ́ nà wɔ̌wɔ́ɔ.

⁷ Á ké ńgʉa nà wɔ̌wɔ́ɔ tsetsɛ̀ɛ pege, mbà Kristo la lɔgɔ fù’ ńcÿó gʉm wɔ̌wɔ́ɔ á nà ntí gie yé Kristo kwoŋ.

⁸ Á lɔgɔ ńgwɔ́ pá’ mé la ŋwe’e tsɛ̀ɛ ŋwà’ne Ssé ngie; À la kwɔ́’ nê tÿǒ lepwó, Ńgwɔ kwɔ́’ ńdɔg megàŋa tsǎŋa ncù ńgʉa, Ńnáa fù’ ntí ntí mbwo pʉ̀a mesoŋ.

⁹ Pú’u, mé gɔɔn ngie à la kwɔ́’ nê tÿǒ lepwó, ńdɔgɔ ńgɔɔn ngie kɔ́? Ńdɔgɔ ńgɔɔn ngie Kristo la zɔɔn sẅɛ́’ tà ńkúu ndùmo ssé tsetsá’ jʉ’ɔɔn.

¹⁰ Nyìŋ gẅie à la sẅɛ́’, ńtóo ndùmo ssé tsetsá’, giŋé ńdɔgɔ ńgwɔ́ pɔ́ nyìŋ gẅie à la kwɔ́’ ńgʉa nê taa tÿǒ légwɔ́ gie à ge gwɔ́ nà shúm ntsèm.

¹¹ Yé zɔ la náa fù’ ye wɔ̌wɔ́ɔ nà pʉ̀a pé, ńdɔg ńcÿó gʉm yé, ńdɔg petsɔ́ ńgÿo megàŋ ntúm, ńdɔg petsɔ́ ńgÿo pʉ̀a pie é ńnéŋe ńtsẅi nkʉ̀ gẅie é fó mbwo Ssé, ńdɔg petsɔ́ ńgÿo pà sá’ Nkʉ̀ Mbòŋo, ńdɔg petsɔ́ ńgÿo pà kẅé mvfò, mbɔɔ pá’ pɔ́ ge ne zí’i pʉ̀a nò Ssé.

¹² À la záb pɛ̌ pʉ̀a légwɔ́ gie pɔ́ ge kẅéte pʉ̀a Kristo léfa’a fà’a Ssé, acú’tè pʉ̀a Kristo gie áa mbùm nnɛ́ ye, à kẅi’i ńgʉa nê mvfò.

¹³ À kẅi’i ńgʉa nê mvfò tà pege cʉ́’ ńgẅiin pɔ́ tà’ ncwò gẅie à fóo ná pá’ pege záb ntʉ́m wégè pɔ́ ná Yěsô Míŋ Ssé, ḿbiŋ ńzsé yé, ńgú’ tà tsɔ́ mmó le gíŋe ńzága wégè wɔ́, pá’ áa ná yé ńgwɔ́ pú’u.

¹⁴ À cʉa pú’u, pege é le gíŋe ńgwɔ́ mecʉ̀cʉ̀ŋ penkʉ́ pie ée pá’ kanú’ gie ntse shwoŋo ńdɔgɔ ńgee jʉ’ɔɔn, ńgee jʉ’ʉ wɔ́. Mé le gíŋe shwóŋó wégè ngie pege pʉ pʉ kà ngie pege cwóŋ cwóŋ wɔ́, tà pege jú’ mɛ̌ ménò mie mé zí’i pʉ̀a ńzẅíŋ wɔ́. Á fó pú’u, pege le gíŋe ńgwɔ́ pá’ mecʉ̀cʉ̀ŋ pie pɔ́ zẅíŋe, epʉ̀a kwaŋa menò ńdɔgɔ fʉte wɔ́b pɔ́ zẅíŋe cÿɔ̌ nò wɔ́.

¹⁵ Tà ńcʉ́’ pú’u, pege kwoŋe pege né pege, nyìŋ shwóŋó nò nénʉ́ á mbwo fɛ́ we, ńgú’u nà meshÿó ntsèm, Kristo gÿo pege ne ńdɔgɔ ndɔ́ɔn ndɔ́ɔn ńkẅi’i ńgwɔ́ pá’ yé gẅie aa twó nà mbùm nnɛ́.

¹⁶ Yé zɔ gÿo mejʉ’ nnɛ́ cú’te ńtemte ńgwɔ́ tà’a mmó. Menŋàŋ nnɛ́ tà ńgyɔ́ɔn kẅéte légÿo mejʉ’ mbùm temte, yɛ̌ jʉ’e nnɛ́ wɔ́ piŋ ńgwɔ́ tà ne fa’a yé fà’, mbùm nnɛ́ ntsèm pú ńgú’, ńtʉte ńcʉa pɔ́ nà nkwòŋe gie ee tsetsɛ̀ɛ pɔ́b.

Anzẅìŋe leńnéŋe pɔ́ we sẅé

¹⁷ Áa mmó gie á gÿo, mèŋ n ge gɔɔn yɔɔn nò tà cwoŋo gɔɔn né pi á nà lezíŋ Cʉ̀apʉ̀a ngie: Tà pi gíŋe ńgÿo shúm sí pá’ pʉ̀a pie pɔ́ té Ssé zsé la. Pɔ́ gÿo pɔ́ mmó gie nkwaŋá wɔ́b gẅie é té kẅéte shwóŋó wɔ́b ngie pɔ́ gÿo.

¹⁸ Menkwaŋá mɔ́b gwɔ́ pɔ́ me tsɛ̀ɛ nzěm. Pɔ́ gʉa nà leńnéŋe we sẅé gẅie Ssé ne náa, ńgwɔ́ pɔ́ megʉ̀, ńtí nue pɔ́ té mánzsè Ssé zsé. Mbà ntʉ́m wɔ́b léen shÿɔg.

¹⁹ Pɔ́ léen ńcʉ́’ pà tè kǔ shʉ́, ńgwá’ mbùm yɔb, ńgwɔ́ nà nò mpfwɔ́’, ńne ńkẅi’i ńgÿo menò tepòŋ ntí ntí té gwoonte mbùm yɔb.

²⁰ Tá á ké ńgʉa ná pi, mbà Kristo la tè zí’i gẅi légẅiin yɛ̌ ntí tsẅé wɔ́.

²¹ Á lɔɔn ńgwɔ́ ngie pi ka jú’u nò yé, tà mé shwóŋó gẅi nò nénʉ́ ntsèm gie á ne ńdíe yé,

²² mbà á ne ńzɛ́te ngie pi kẅɛɛ ná nzẅìŋe mà gẅie mé la lɔg ńzyé gẅí, ndʉŋ ndʉŋ pá’ nyìŋ sẅɛɛ nzẅìŋe nzsǒ ná yé ńgwá’a la. Wɛ̌ mà aa gẅie à kɔ̌ɔn ńcʉa nà shúm tepòŋ sie à kɔ̌ɔn ńtsɔ́ɔn, ńkẅi’i ḿbÿɔ́g pÿɔ́g. Sɛ̌ shúm tepòŋ gwɔ́ shúm sie é fʉte nyìŋ fʉte.

²³ Á gíŋe ne ńzɛ́te ná fʉ̀’ɔɔn ngie pi zẅíŋ e Ssé kúbe mà gẅi, à cʉ́’ʉ we sẅé, mbɔɔ nkwaŋá gẅi e cʉ́’ we sẅé.

²⁴ Á gíŋe ne ńzɛ́te ngie pi kúu ná mà we sẅé pá’ nyìŋ kaa nzsǒ sẅé ḿma’a ná ye la. E Ssé zɔ la nuŋe wɛ̌ mà. Wɛ̌ mà aa gẅie mé gyá ná nyìŋ gẅie à ne ńgiŋe ná pá’ á ne ńzɛ́te, ńgwɔ́ nyìŋ gẅie à léen ńnyé we le gwɔ́ ntsèm mbwo Ssé. Wɛ̌ légiŋ fóo ná nò nénʉ́.

²⁵ Á lɔɔn ńgwɔ́ pú’u, pi gwá’ cÿɔ̌ nò. Nyìŋ gɔɔn pɔ́ nò nénʉ́ mbwo mefɛ́ pé, mélà’mie pege pǔ ńgwɔ́ pɔ́ mekèm tà’ mbùm nnɛ́ yémɔ’ɔ́.

²⁶ Pi lɔɔn ńgyáŋa lóŋ, pi pɔ́ɔn légÿo nò tepòŋ, ḿbɔ́ɔn nèm légwaa pyé, agyáŋa lóŋ nyé ntʉ́m pi.

²⁷ Pi pɔ́ɔn lénná shÿó lɔg ńgwoon gẅi mbwo Sátà.

²⁸ Pʉ̀a pie pɔ́ gẅiin mà léjʉ gwá’ tsǒŋ, ńcʉ́’ ńdɔg mbwó mɔ́b, éfa’ tà ńtéŋe zì’i ńzsé ngie pɔ́ ge gẅiin mmó tà lɔgɔ tsɔ́ é kẅéte pʉ̀a pie é ne ńzága yɔ́b,

²⁹ ḿbɔ́ɔn mbɔɔ tà’a shwóŋè tepòŋ lékẅɛɛ ncwò pi. Pi gɔɔn pɔ́ nò gie á ge kẅéte ná yɛ̌ fʉ̀’, à gwɔ́ pɔ́ shwóŋè mbòŋo gie á ge kẅéte tsɔ́ pʉ̀a pɔ́ kẅi’i ńzáb ntʉ́m nà Ssé. Pi gɔɔn pɔ́ nò gie á ge kẅéte wɔ̌wɔ́ɔ ná pʉ̀a pie é ne ńzẅí’te.

³⁰ Tà pi gÿo Zẅìge ndʉalʉ̌a gie Ssé la lɔg ńcÿɔ’ɔ liŋé ná pi gyá ngɔ́’. À lɔ̌ɔn ńdɔgɔ ńnyɛɛ ngie pi ee pʉ̀a pé, ńgíŋe ńdɔgɔ ńnyɛɛ ngie alyɛ̌’ gé lá’ gwɔ́, à pú ńcu’u wégè, pege pú ńtsẅɛ́.

³¹ Pi pú ńkẅile shúm sie ée ntʉ́m pi ńgÿo ncwò gẅi pÿɔ́gɔ, ńkẅile lézá’ lekwɔɔn nyìŋ, ńkẅile gyáŋa lóŋ, tà pi gíŋe ńtág ntsaŋ, tà pi twó ncwò, pi pú ńgwá’ fʉ̀’ nò ntí ntí,

³² ńdíe mefɛ́ pí pɔ́ lê ntʉ́m mbòŋo, ńgẅiin tsɔ́ɔn mezìŋe nzèm petsɔ́ pʉ̀a, pi lege mefʉ̀a tsetsɛ̀ɛ pi né pi, ndʉŋ ndʉŋ pá’ Ssé la cʉa ná Kristo ńdege mí gí né pi.