Efeso 2 - Nouveau Testament en Ngienboum

E Ssé náa légwɔ́ we sẅé mbwo pʉ̀a Kristo

¹ Pi laa tsɔ́ fʉ̀’ ńgwɔ́ mbwo Ssé, mbà pi léen ńkwé ńtí pá’ pi láa ngàŋa mefʉa ńgíŋ ńgwɔ́ pàgÿo menò tepòŋ.

² Pi laa fʉ̀’o ńně ńgÿo pɔ́ yɛ̌ ntí menò. Pi la ne ńgiŋe pá’ pʉ̀a pie ée tsɛ̀ɛ yɔɔn njÿó ne ńgiŋe pú’u, ńně ńjú’u ncwò fùɔ *messé tepòŋ gwie à sá’a *messé tepòŋ mie ée tÿǒ tsɛ̀ɛ fÿág. Yé zɔ aa fʉ̀’ɔɔn ńne ńtsóte pʉ̀a pie pɔ́ lʉ’ʉ lé jú’ ncwò Ssé, pɔ́ ne ńgÿo menò tepòŋ.

³ Pege metsèm ka zɔɔn ńgwɔ́ pɔ́ pá’ pɔ́b, ńne ńgÿo pɔ́ mmó gie ntʉ́m nyìŋ mesoŋ ne ńtsɔ́ɔn, éshúm sie ntʉ́m nyìŋ mesoŋ lâ nkwaŋá wé tyé mǒ, mbà mé la zyé wégè pege gwɔ́ pɔ́ pʉ̀a pie e Ssé ne ńgyáŋa lóŋ ná pɔ́b pá’ à ne ńgyáŋa lóŋ ná petsɔ́ pʉ̀a.

⁴ Tá’ e Ssé kě ńtsɔ́ɔn mezìŋe pʉ̀a mesoŋ tɛ’. Á la piŋ ńcʉa pɔ́ nà ntí gie à la lɔg ńkwoŋo wégè,

⁵ á gÿo pega Kristo pú ńgíŋe ńgwɔ́ wó, tà mbɔɔ pá’ pege laa mbwo ye tsɔ́ fʉ̀’, mbà pege léen ńkwé ńtí mefʉ̀a mégè. À la lɔg pɔ́ pòŋo ntʉ́m yé ńgÿo pege tsẅɛ́.

⁶ Pá’ pege léen ńda nnɛ́ ná Yěsô Kristo la, à la pú ńzíme wégà pɔ̌ nà legwé, ńgíŋe ńgÿo peg cʉ́me nzèm Yěsô Kristo, pega pɔ̌ pú ńkwɔ́’ ńnéŋe tÿǒ lepwó ńně sá’a kɔ̀ɔkɔ́ɔ wɔ́.

⁷ À la gÿo mɔɔn menò pá’ à ge lá’ lɔg la’te ná yɛ̌ kème njÿó wɔ́ gie á ne ńtóo ngie à la cÿó gʉm yégè tà ńcʉa ntí, á fóo ná pá’, à cʉa nà Yěsô Kristo ńgẅiin pòŋo ntʉ́m ná pege pú’u.

⁸ À la cÿó gʉm gí, ńgÿo pi tsẅɛ́, éfóo ná pá’ pi la záb ntʉ́m ná Yěsô. Á té fóo né pi wɔ́, à la lɔg pɔ́ pòŋo ntʉ́m yé ńgÿo.

⁹ Á gwɔ́ pú’u, ńké těen fóo nà mefà’ mie pi fǎ’ wɔ́. Pú’u la, ńgwɔ́ nyìŋ á le lɔ́g ńŋá’te wɔ́.

¹⁰ Pege lɔɔn ńgwɔ́ kɔ́ wɔ́, mbà pege zẅɛ́’ɛ pɔ́ Ssé. E Ssé la cʉa ná Yěsô Kristo ḿbwóon wégè, légwɔ́ gie pege ge fa’ mefà’ mbòŋo mie yé Ssé la lá’ ńcwoŋte ńzáb pá’ pege ge fa’.

Kristo cu’té pʉ̀a mentí mentí ńdɔg ńgÿo tà’ nùɔ

¹¹ Pú’u la, pi kímte pá’ pi ka zɔɔn ńgwɔ́, mé la zyé gẅi pi tè pà Yuda pie mé pú’u wɔ́b gwɔ́, é Pà Yuda pie mé pú’u wɔ́b, pɔ́ lɔg pú’u, ńgyá ngie pɔ́ ee pʉ̀a Ssé ńcʉ́’ ńkʉ́e gẅi kʉ́e ngie pi tè pʉ̀a Ssé wɔ́, ńgɔɔn pú’u, tá lepu’ú wɔ́b ŋwɛ́ gwɔ́ pɔ́ liŋé gie mé la lɔg pɔ́ pwó ńgÿo nà mbùm yɔb.

¹² Pi gíŋ ńkímte ngie á kaa fʉ̀’ ayɛ̌, pi tè ne ńzsé ngie tsɔ̌ nyìŋ aa wó ńgwɔ́ *Nzà’nkÿo, tà mé gẅiin lézẅí’te yé wɔ́. Pi gwɔ́ tsetsɛ̀ɛ pʉ̀a Israel ńgwɔ́ pɔ́ megʉ̀, pi tè nò nà *kʉ̀a yɔ́ba Ssé gẅiin tà mbɔɔ nà mmó gie e Ssé la ka’a mbwo pɔ́b. Pi laa gí tsɛ̀ɛ yɔɔn njÿó, pi tè ne ńzẅí’te tsɔ́ mmó wɔ́, ńgíŋe tè ne ńzsé Ssé wɔ́.

¹³ Tá’, á ké ńgwɔ́ fʉ̀’ɔɔn, mbà pi pie pi kaa ngʉ̀a shʉ̀shʉ̀a, pi ka lɔg pá’ pi lǎ nnɛ́ ná Kristo. E Ssé kaa gẅi ńtÿɔ́gɔ lejʉ́ŋ ye, á nue Yěsô Kristo la pfɛte metse mé ńkwé ńtí gẅí.

¹⁴ Kristo la kwé ńdɔg ńtágte tʉ́a nká’ gẅie à kɔ̌ɔn fege wégè. Pege zẅɛ́’ɛ pɔ́ yé ńgẅiin mbʉ́lè tsetsɛ̀ɛ pege. Mbà á kaa fʉ̀’e mvfò pà Yuda pâ pà túm gwɔ́ pɔ́ megàŋ mbù. À kéen ńtemte wégè ńdɔgɔ wégè ńgÿo pʉ̀a tà’ nyìŋ.

¹⁵ Yěsô ka pyág mbʉ̌ pà Yuda mie é gɔɔn ngie, gÿo yɔɔn, ńgÿo gi, tá ńdɔg ńgwɔ́ nyìŋ Ssé, ḿbyága pú’u, pá’ pʉ̀a Yuda mbɔɔ pʉ̀a pie é té pà Yuda wɔ́ ge lɔg pá’ wɔ̌wɔ́ɔ ná pɔ́b wɔ́ lǎ nnɛ́ ná Yěsô, é temte, é cʉ́’ʉ nùɔ ye sẅé. À lɔg ḿmag mbù tsetsɛ̀ɛ pɔ́b, pɔ́ ńnéŋe lè mbʉ́lè.

¹⁶ Pá’ pege kéen ḿbú ńcʉ́’ʉ tà’ nùɔ la, á lɔgɔ ńgɔɔn ngie mbù gẅie é kaa tsetsɛ̀ɛ menùɔ mégè é kéen ḿmag. Wɛ̌ le gwɔ́ ka fó pɔ́ ná pá’ Kristo ka kwě nà tÿǒ nkǐ ńdɔg ńgÿo mbù gẅie é kaa tsetsɛ̀ɛ menùɔ mégè lâ Ssé é mag. Pege metsèm cʉ́’ ńgwɔ́ pɔ́ púɔ Ssé. Yɔɔn áa mmó gie á ka mag mbù gẅie é kaa tsetsɛ̀ɛ pege.

¹⁷ Kristo la tóo létsẅi nkʉ̀ mbòŋo gẅie é náa sẅétè á mbwo pi pie pi tè pà Yuda wɔ́, mbà pi ka tè lejʉ́ŋ Ssé wɔ́, ńgíŋe ńtsẅi mbɔɔ mbwo pà Yuda pie pɔ́ kaa lejʉ́ŋ Ssé.

¹⁸ Pú’u, pi tà mbɔɔ peg pà Yuda cʉa pɔ́ ná yé Kristo, ńgee lejʉ́ŋ Ssé Tá, tà’ Zẅìge Ndʉalʉ̌a wémɔ’ɔ́ zɔ ké ńkẅéte wégè.

¹⁹ Á cʉa pú’u, pi tè gíŋe ńgwɔ́ megʉ̀ wɔ́, ńké tè gíŋe ńgwɔ́ pɔ́ pʉ̀a pie é cʉa cʉa wɔ́. Pi lɔgɔ ńgwɔ́ gí pʉ̀a lá’ pá’ petsɔ́ pʉ̀a pie ée pʉ̀a Ssé. Pi lɔgɔ ńgwɔ́ nà tsìŋe ndá Ssé.

²⁰ Pi cʉ̌’ ńgwɔ́ pɔ́ pá’ mbelég gie mé lɔ̌g ḿbwóon ndá. Acÿó ndá gwɔ́ ngàŋ ntúm Yěsô pâ pà *ntsẅì nkʉ̀ Ssé, Yěsô Kristo lê twó yé gwɔ́ tóon gẅie à pi’ ndá.

²¹ Yé zɔ gÿo tá mesǎg ndá tyé ndʉŋ ndʉŋ, ńkwɔ́’ né tÿǒ, é gwɔ́ ndá gie e Ssé yé máŋwɛ́ ńnéŋe tsoló.

²² Pi gí lâ petsɔ́ pʉ̀a, pi lɔg pɔ́ pá’ pi la nnɛ́ ná Kristo, tá ńgwɔ́ tsɔ́ gwǒŋo ndá ŋwɛ́, ńdɔgɔ ńgwɔ́ ndá gie mé ne ḿbwóon, á gwɔ́ jʉ’ gie e Ssé ńnéŋe wó, tá Zẅìge yé zɔ̌ gwɔ́ wó.