2 Timote 2 - Nouveau Testament en Ngienboum

Andÿɔ́’ ncù we Yěsô Kristo gẅie à zsé pɔ́ ndà’ Yěsô

¹ Ńké ńgʉa ná gù míŋ wɔɔn, ɔ̀ ké ne ńjʉ́’ʉ pɔ́ nà metʉ̀ mie Yěsô Kristo lɔgɔ ńcÿó gʉm yégè, ńzsé ngie ɔ̀ ge tʉte tsɛ̀ɛ nò gie áa nénʉ́.

² Kímte nò gie ɔ̀ lɔ̌ɔn ńjú’u mèŋ n zí’i pʉ̀a, é laa pʉ̀a tà ńgyɔ́ɔn. Pɔ́ ée pàjÿò ńgyá. Ké cʉ́me pɔ́ yɛ̌ mbwo pʉ̀a pie pɔ́ ku’u légʉa ńzí’i yɔ́b petsɔ́ pʉ̀a, tè gʉa mǒ ńkúbe mmó.

³ Gyá jú ngɔ́’ pá’ kwà’ ndÿɔ́’ ncù we Yěsô Kristo.

⁴ Nyìŋ vɔg tà ńgwɔ́ tsẅɛ̀ɛ ncù, ńdege kɔ̀ɔkɔ́ɔ gie á ne ńdíe yé mbʉ̀a, ńzsé ngie à ge cʉ́’ʉ gÿo pɔ́ mmó gie á ge poŋo tándá wɔb.

⁵ Ndʉŋ ndʉŋ pá’ nyìŋ lɔɔn ne ńkÿo ndʉ̌, à tè kÿo nà ntí gie *lepʉ̌ ndʉ̌ ne ńzɛ́te wɔ́, mé le fà’ yé tsɔ́’.

⁶ Nyìŋ gẅie à fa’a nká’ nyìŋ, à lɔɔn ńtéŋe zì’i mboŋó, mbà yé zɔ ge vɔgɔ lépfɛ́ɛ mmó gie á fóo nká’.

⁷ Sáŋa nò ná menò mie mèŋ n gɔɔn lɔɔn, Cʉ̀apʉ̀a ge zɔɔn náa gú legyè lélɔg ḿbú ńjú’ ntsèm.

⁸ Kímte Yěsô Kristo, pá’ à la zíme nà legwé, à la fó nà ngẅɛ̀ fùɔ Ndavíd pá’ nkʉ̀ mbòŋo gẅie mèŋ n ne ńtsẅii é ne ńgɔɔn.

⁹ Mèŋ n gyá ngɔ́’ tà mé lɔgɔ metsɛ̂n ńkwɛ́ɛ wɔ̀ɔn pá’ fʉ̀’ gie mèŋ n gee nyìŋ tepòŋ la pá’ɔɔn ńtí pɔ́ nkʉ̀ mbòŋo ŋwɛ́. Tá’ mé kaa shwóŋè Ssé kwɛ́ɛ.

¹⁰ Áa mmó gie á gÿo mèŋ n ne ńgyá ngɔ́’ pɔ́ lêkɔ́ wɔ́, ńtíi pʉ̀a pie e Ssé tsɔ’ɔ́ wɔ́b, éshÿɔgɔ shÿɔg, ńzsé ngie Kristo ge gÿo pɔ́b yɔ́b tsẅɛ́. Pɔ́ fo pú’u, ńgẅiin legú’ tèmì.

¹¹ Menò mie mèŋ n gee ngɔ̌ɔn lɔɔn ée jʉ’ó ńgwɔ́ pú’u. Á lɔɔn ńgwɔ́ gie pege lâ Kristo la púte ńkwé, mbà pege lâ pɔ̌ ge gÿo púte gwɔ́ wó.

¹² Pege lɔɔn ńké ńne shÿɔgɔ tsɛ̀ɛ ngɔ́’ shÿɔg, mbà pege lâ pɔ̌ ge gÿo púte sá’a lá’ Tá pege ké ńgwá’a yé, mbà à ge gÿo gwá’a wégè yé.

¹³ Á lɔɔn ńgwɔ́ gie pege neŋé ḿmoŋo yé, mbà à ké tè wégè moŋe Á nue à lɔɔn ńgwɔ́ á le gÿo mmó té gwɔ́ gie áa nà we mà wɔ́

Ngàŋa fà’ gẅie mé zsé yé, ńtí léfa’

¹⁴ Mɔɔn ée menò mie ɔ̀ gẅiin lékímte mbwo mânyìŋ ntsèm, ńtyé mvfò Ssé éshʉa shʉa shwóŋ pʉ̀a ngie tà pɔ́ gwáa ńtága melà’ ná menò mie mé gɔɔn. Pɔ́ tág melà’ pú’u, é té kẅéte nà tsɔ́ mmó wɔ́, tà ńcʉ́’ pú’u, mbà é cʉŋte pʉ̀a pie pɔ́ jú’u mɛ̌ menò cʉŋte, á nzèm Ssé.

¹⁵ Kag tʉ̀ légwɔ tyé mvfò Ssé, ńgwɔ́ nyìŋ gẅie à lɔɔn ńgwɔ́ e Ssé zẅíŋe nò yé, gwɔ́ ngàŋa fà’ gẅie eshʉ́ té ge ne kúu yé nà fà’ yé wɔ́. Gwɔ́ ngàŋa fà’ gẅie à tsẅi nkʉ̀ nò gie áa nénʉ́, té gʉa mǒ ńkúbe tsɔ́ mmó.

¹⁶ Pɔ́ɔn le záb gú ncwò ná we pàzoŋ meshwóŋè mie é gwɔ́ pɔ́ sẅɛ̀ɛ sẅɛ̀ɛ, é meshwóŋè mie é táte nyìŋ taté lézáb ntʉ́m nà Ssé. Pʉ̀a pie é zoŋo mɛ̌ meshwóŋè ké fó lejʉ́ŋ Ssé ńkẅi’i ńkÿo kÿo.

¹⁷ Ashwóŋè pʉ̀a ŋwɛ́ lêen ńgwɔ́ pɔ́ pá’ fʉ̌ŋ gie e něŋ mbìd, ńne ńkẅi’i ńgá’a la. Himené pɔ́ Filétos lɔgɔ ńgwɔ́ lii pʉ̀a ŋwɛ́.

¹⁸ Pɔ́ kéen ńgwá’a mánzsè nò gie áa nénʉ́. Pɔ́ zɔ́gɔ ńgɔɔn ngie e Ssé kéen ńdá’ ńgÿo pege zíme ná legwé. Pɔ́ kéen ńgÿo pú’u, tà tsɔ̌ lelÿò pʉ̀a tè nyé ńgwɔ́ ná mánzsè nò gie áa nénʉ́ wɔ́.

¹⁹ Tà mbɔɔ pú’u, àcÿǒ ndá gie e Ssé la nuŋe á nyé ńtʉʉ tʉ. Mé la ŋwe’e ndùmo ngie: Cʉ̀apʉ̀a ne ńzsé pʉ̀a pie ée pé, ńgíŋe ńŋwe’e ngie: Nyìŋ lɔɔn ngie aa nyìŋ Cʉ̀apʉ̀a, á tém nzèm nò tepòŋ.

²⁰ Mé lɔɔn ńgʉa ndá ngàŋa mmó mé gyá mekáŋ mentí mentí. Mé gyá mie mé la lɔgɔ tʉ̌ gɔ̂l ńnyɛte, ńgyá mie mé la lɔgɔ tʉ̌ nkáb ńnyɛte, ńgíŋe ńgyá mbɔɔ mie mé la lɔgɔ tÿǒ ńkwóon, mbɔɔ mie mé la lɔgɔ tsǎ’ ḿbwóon. Me tʉ̌ gɔ̂l pɔ́ me tʉ̌ nkáb ée mie mé tÿɔ́gɔ ssé pɔ́ nà melyɛ’ɛ́ lá’ lÿò. Metsɔ́ gwɔ́ mie mé tÿɔ́gɔ ssé lyɛ̌’ ntsèm.

²¹ Nyìŋ lɔɔn ḿbɔ́ɔn meshwóŋè cÿɔ̌ nò mie mé zí’i pʉ̀a lɔɔn, mbà ngàŋ ge gwɔ́ pá’ káŋ gie mé tÿɔ́gɔ ssé pɔ́ nà lyɛ’ɛ́ lÿò. Mbà à ge gwɔ́ nyìŋ Cʉ̀apʉ̀a, mbà à ge kẅéte Ndè we, à lɔgɔ yé ńgÿo kɔ̀ɔkɔ́ɔ wɔ́ gie áa mbòŋ.

²² Kÿo shúm tepòŋ sie nkàŋ nyìŋ tsɔ́ɔn. Pia pʉ̀a pie pɔ́ tóŋo Cʉ̀apʉ̀a lê ntʉ́m mbòŋo fa’a nò gie á tyé ndʉŋ ndʉŋ, ńzáb ntʉ́m nà Ssé, ńkwoŋ pʉ̀a mesoŋ, éfa’ mbʉ́lè.

²³ Kÿo menò mie mé gwá ńzoŋo é gwɔ́ pɔ́ megʉ̀gʉ̀ menò mie é té kẅéte. Ɔ̀ zsě ngie mé zoŋ mɛ̌ menò tà ńcʉ́’ʉ lémag, ńtág pɔ́ melà’.

²⁴ Á piŋ ńké tè poŋ ngie ngàŋa fà’ Cʉ̀apʉ̀a tág mélà’ wɔ́. À gẅiin pɔ́ lékwoŋo mânyìŋ ntsèm, ńku’u lézí’i pʉ̀a mmó mboŋó, ńku’u légwɔ́ gie mé ge fʉ̀’ nò ná ye, á le pá.

²⁵ À gẅiin lélɔg mbʉ́lè ńda’te mmó mbwo pʉ̀a pie à gɔɔn nò pɔ́ kúbe pɔ́ shÿó. Ndyɛ̌’ tsɔ́ e Ssé gÿo ńná shÿó mbwo pɛ̌ pʉ̀a pɔ́ kúbe yɔb ntí lɔg sáŋa nò, éfó pú’u, ńzsé nò gie áa nénʉ́,

²⁶ ńgíŋe ńkwaŋa nò pá’ á kě ńne ńzɛ́te ngie pɔ́ kwaŋ, ńdeen ńké fóo tsɛ̀ɛ mejÿɔ́’ mie Sátà la lɔg ńgwoon wɔ́b ńkẅɛ. Mbà pɔ́ kaa tsoló ńcʉ́’ ńgwɔ́ pɔ́ megàŋa tsǎŋ, ńgÿo pɔ́ mmó gie Sátà ne ńkwoŋo.