2 Piɛ 3 - Nouveau Testament en Ngienboum

Cʉ̀apʉ̀a ge gÿo tó

¹ Meshǔ pɔ́ɔn pé tʉ̀ nzẅìŋ, mèŋ n gee pá’ɔɔn ńdɔgɔ ńnáa ŋwa’ne mbwo pi ngʉ̀a mbʉ́a. Áa tsɛ̀ɛ meŋwà’ne ŋwɛ́ membʉ́a, mèŋ n ne fa’a lékímte gẅi mmó gie pi la zí’i, ńdɔgɔ pú’u, ḿbʉ́’te legyè sí ngie e kwaŋa nò ndʉŋ ndʉŋ.

² Pi kímte shwóŋè gie pà *ntsẅì nkʉ̀ Ssé pe Ndʉalʉ̌a la tʉ́ njÿó ńgɔɔn, mbɔɔ *lepʉ̌ sie megàŋ ntúm Yěsô ka zí’i gẅí, éfóo mbwo Cʉ̀apʉ̀a á gwɔ́ nyìŋ gẅie à gÿo pege tsẅɛ́ɛ.

³ Pi zɔɔn ḿvɔg ńzsé ngie, áa gÿo gwɔ́ nà melyɛ’ɛ́ lá’ nzsó nzèm, etsɔ́ pʉ̀a kẅɛ, ńgÿo yɔ́b pɔ́ mmó gie membùm mɔ́b ne ńtsóte wɔ́b ngie pɔ́ gÿo. Pɔ́ ge gẅe gẅí,

⁴ é gɔɔn ngie: Yěsô la tè gɔɔn ngie à ge tó gwaa? À gwɔ́? Metá pég léen ńdá’ ńkwéte, à tsɔ́ mmó ké laa kúbe, à kɔ̀ɔkɔ́ɔ ké ńgwɔ́ pɔ́ pá’ á la gwɔ́ tà fó pá’ mé la nyɛte njÿó.

⁵ Pɔ́ gwaa gɔɔn pú’u, ńne ńdege tà ńzsé zsé ngie e Ssé la lá’ ńnyɛte lepwó pɔ́ tsetsá’ tà ntyě sagá. À la lɔg pɔ́ shwóŋè yé ńgÿo, tsetsá’ fó tsɛ̀ɛ ntse ńkẅɛ, á lɔg pɔ́ ntse ńnyɛte.

⁶ À la gíŋe ńdɔg pɔ́ ntse, é ntse gẅie é la pú ńjÿó tsetsá’ ńdɔg ḿbyág ngwòŋ we fʉ̀’ʉ mvfò,

⁷ ńgʉa nà lefaŋ se fʉ̀’ɔɔn, mbɔɔ tsetsá’ ye fʉ̀’ɔɔn, mbà yɛ̌ Shwóŋè zɔ̌ le’e wɔ́b le’e ńdɔgɔ ńzẅí’te lyɛ̌’ gie e Ssé ge gÿo ŋág megàŋ mbù pé. Á ge lá’ gwɔ́ lyɛ̌’ó, mmɔ̌g gÿo lepwó pɔ́ tsetsá’ pú ńdége.

⁸ Tá’ meshǔ pɔ́ɔn pe tʉ́ nzẅìŋ, à tsɔ̌ tà’a mmó aa wó gẅie á té poŋ ngie pi lege wɔ́. Áa mbwo Cʉ̀apʉ̀a tà’a lyɛ̌’ gwɔ́ pá’ ngù’ ntsá’, ngù’ ntsá’ gwɔ́ pá’ tà’a lyɛ̌’.

⁹ Cʉ̀apʉ̀a kaa líi légÿo mmó gie à la ka’a légÿo pá’ tsɔ́ pʉ̀a ne ńkwaŋa wɔ́. À gwiin pɔ́ kwɔ́gɔ nnɛ́ ńtí gẅí, á nue à tè ne ńkwoŋo ngie à tsɔ̌ tà’ nyìŋ pyé wɔ́, à ne ńkwoŋo pɔ́ ngie pʉ̀a metsèm gẅiin shÿó lékúbe mà.

¹⁰ Alyɛ’ɛ́ lá’ Cʉ̀apʉ̀a ge lá’ tó pɔ́ pá’ tsǒŋ tóo lá. À gwɔ́ lyɛ̌’ó, lefaŋ gwaa mag, ejʉ’ zẅɛ tà mé pɔ́g. Eshúm sie ée lefaŋ e pú shÿó, tsetsá’ pâ shúm sie ée ndùmo e pú ḿmag.

¹¹ Pá’ shúm asɛ̌ ge gÿo pú mag lɔɔn, á lɔgɔ shwóŋó gẅi ntí gie á póŋ ngie pi ńnéŋe pú’u. Á ne ńzɛ́te ngie pi ńnéŋe pɔ́ nà ntí gie Ssé ne ńkwoŋo, ńzsé pɔ́ ndà’ yé,

¹² ńne ńzẅí’te ngie lyɛ’ɛ́ lá’ Ssé tó, ńne ńkaga tʉ̀ légwɔ́ gie á ge lwo tó. Áa lyɛ̌’ gie mmɔ̌g ge lá’ túɔ lefaŋ e keme, é jʉ’ tóo ńtwěen, à kɔ̀ɔkɔ́ɔ gie áa lefaŋ wɔ́ à sí ńtsó.

¹³ Tá’ e Ssé la pÿé lefaŋ se sẅé, ḿbÿé tsetsá’ ye sẅé, á jʉ’ gie mé ge lá’ gwɔ́ wó é gÿo pɔ́ mmó gie áa ndʉŋ ndʉŋ mvfò yé. Áa mmó gie pege neŋé ne ńzẅí’te.

¹⁴ Meshǔ pɔ́ɔn pe tʉ̀ nzẅìŋ, áa mmó gie á gÿo, pi gwɔ́ zẅí’te yɛ̌ lyɛ’ɛ́ lá’, ńkàg tʉ̀ ńnéŋe té *lɔ̌’. Pi légÿo tsɔ́ mmó gie Ssé ge kaga gẅi mǒ wɔ́, pia pɔ̌ piŋ ńgwɔ́ tè cÿɔ́g.

¹⁵ Tà’a mmó gẅie á píŋ ně ńzɛ́te ngie pi kímte á gwɔ́ pɔ́ ngie, Cʉ̀apʉ̀a pʉ́le ńzẅí’te, à těen ńtɔ́gɔ ńtóo wɔ́, léná shÿó pá’ ńgwɔ́ pʉ̀a tsẅɛ́. Á gíŋe ńgwɔ́ pɔ́ mmó gie Pɔl, fɛ́ wege, ńgwɔ́ shǔ wege la gɔɔn tsɛ̀ɛ meŋwe’e mie à la náa mbwo pi. À la lɔg pɔ́ zse nò gie Ssé la náa mbwo yé tá ńdɔg ńgɔɔn.

¹⁶ À gɔɔn yɛ̌ nò tsɛ̀ɛ meŋwà’ne mie à ŋwe’e ntsèm, á fʉ̀’ gie à gɔɔn nò tà ńkíme yɔɔn twó nò. Mejʉ’ mie é tʉʉ lé jú’ ée tsɛ̀ɛ meŋwà’ne mé. Áa mmó gie á gÿó pʉ̀a pie é mwoonte mwoonte, ńnyé tè kwà’ ńzsé jʉ’ gie pɔ́ tyé wó, kúbe nò gie é lɔgɔ ńgɔɔn. Á gíŋe ńgwɔ́ pɔ́ pá’ pɔ́ gÿo ná metsɔ́ mejʉ’ ŋwà’ne Ssé. Pɔ́ ké ńgÿo pú’u, ńdɔg ńtóŋo ndoon ńnéŋe twó pɔ́b.

¹⁷ Meshǔ pɔ́ɔn pe tʉ̀ nzẅìŋ, á gʉa ná pi, mbà mèŋ n tʉ̌ njÿó é shwóŋó gẅí. Pi ké ńdaga twó gí, ḿbɔ́gɔ pà tè shʉ́ ńkúu wɔ́b léfʉte gẅi pi fʉa mánzsè, ńzye lémʉ’te ná mmó gie letʉ́m sí ka zɔɔn ńtyé mǒ tà ńtyé.

¹⁸ Pi lɔg pɔ́ pá’ pi ne ńzsé Yěsô Kristo, Cʉ̀apʉ̀a wege, ńgwɔ́ nyìŋ gẅie à gÿo pege tsẅɛ́ɛ, ńdɔg ńgʉa né mvfò, ńzsé ngie à ge kẅi’i cÿó gʉm gí, é ne ńgwɔ́ɔ né pi. Legú’ à gwɔ́ mbwo yé tà fó fʉ̀’ɔɔn, à lá’a ńgwɔ́ɔ pɔ́ pú’u! *Amen.