2 Korento 3 - Nouveau Testament en Ngienboum

Pafa’a fà’ ná kʉ̀a sẅé

¹ Peg gɔɔn ńdɔgɔ ńgíŋe ńzye zye léla’te ntí pʉ̀a pie peg ée pɛ̌ keen? Kà á ne ńzɛ́te pɔ́ ngie peg kẅé ŋwà’ne gie á la’te pʉ̀a pie peg ee pɛ̌, pá’ tsɔ́ pʉ̀a gÿo tá ńdɔg ńtóo mvfò pi, kà lékẅé mbwo pi tá ńdɔg ńgʉa tsɔ́ jʉ’ wɔ́?

² Pi pɛ zɔ yég ŋwà’ne, mbà mé la ŋwe’e tsɛ̀ɛ ntʉ́m wég, pʉ̀a metsèm ne ńzsé ḿbiŋ ne ńtóŋo,

³ ńgwɔ́ mé lɔg pɔ́ nÿɔ́g ńgyá ngie pi ee ŋwà’ne gie Kristo la ŋwe’e, ńtúmo wég peg tó ńná. À la tè lɔg pɔ́ nkwòŋ ŋwà’ne tá ńŋwe’e yɛ̌ ŋwà’ne wɔ́, à la gwɔ́ ŋwe’e, ńcʉa pɔ́ nà Zẅìge Ssé, yé Ssé gẅie aa wó, ńgwɔ́ ntentʉ́. À la tè ŋwe’e nà metǎfelé tóon wɔ́, à la ŋwe’e pɔ́ nà ntʉ́m pʉ̀a mesoŋ.

⁴ Peg gɔɔn nò ná fa’a yég pá’ɔɔn, á nue peg lɔg pá’ peg la nnɛ́ ná Kristo, ńkwa’ ńzsé ngie e Ssé zẅíŋe nò yég.

⁵ Peg ké tě ńgɔɔn pá’ɔɔn ngie ńgwɔ́ peg lɔg kwà’ még metʉ̀ ńgÿo tsɔ́ mmó wɔ́. Metʉ̀ mie peg lɔgɔ ńgÿo yɔɔn fà’ é fóo pɔ́ mbwo Ssé.

⁶ Yé zɔ ka gÿo peg ku’u légwɔ́ pafa’a fà’, á nà *kʉ̀a ye sẅé. Yɛ̌ *kʉ̀a á té fóo pɔ́ nà *lepʉ̌ sie mé la ŋwe’e wɔ́, á fóo pɔ́ nà Zẅìge Ssé. *Lepʉ̌ sie mé la ŋwe’e, é gyó nyìŋ kwé kwě, a Zẅìge gÿo nyìŋ gwɔ́ pɔ́ wó.

⁷ Pi giŋé ne ńzsé gí pá’ nò *lepʉ̌ á laa pú’u. Mé la ŋwe’e nà tǎfelé tóon, é gÿo mé kwé kwě. Tá’ mbɔɔ pú’u, afà’ ná nò *lepʉ̌ ŋwɛ́, gẅiin máamáa shʉ́shÿɔ́g, tà pʉ̀a Israel é té fʉ̀’ʉ lélíe wɛ̌ shʉ́shÿɔ́g nà shÿó Mǒsê wɔ́, mbɔɔ pá’ à lɔ̌ɔn tě ńnéŋe wɔ́.

⁸ Pá’ á laa pú’u la, á ge gǎ tá fà’ ná nò Zẅìge Ndʉalʉ̌a, á le náa shʉ́shÿɔ́g tà ńtɔ́gɔ wɛ̌ wɔ́?

⁹ Á lɔɔn ńgwɔ́ gie nò ná fà’a *lepʉ̌ sie, tà mbɔɔ pá’ é lɔ́ɔn ńgÿo mé kwé kwě á la gẅiin shʉ́shÿɔ́g, mbà anò ná fà’ gie á gÿo pʉ̀a tyé ndʉŋ ndʉŋ mvfò Ssé á ge ké gẅiin shʉ́shÿɔ́g é cʉa yɛ̌,

¹⁰ ńgwɔ́ pege zɔɔn éfó ńgɔɔn ngie, shʉ́shÿɔ́g we fʉ̀’ɔɔn pǔ ńgwɔ́ wó tɛ’, tà we fʉ̀’e mvfò à la tè tsɔ́ mmó wɔ́.

¹¹ Á zɔɔn ńgwɔ́ gie ammó gie á lɔ́ɔn tè lá’a zɔ́gɔ é gwɔ́ pɔ́ wó wɔ́, á la gẅiin we shʉ́shÿɔ́g, mbà mmó gie á ge lá’a zɔ́gɔ gwɔ́ pɔ́ wó, ge ké gẅiin shʉ́shÿɔ́g é cʉa yɛ̌.

¹² Pá’ peg ne ńnyɛ́te ńzsé ngie mɔɔn menò ée nénʉ́ la, peg shʉashʉa ńgɔɔn nò mǒ.

¹³ Peg tè ne ńgÿo pá’ Mǒsê gẅie à lɔ̌ɔn éshuu nkǔɔ nà shÿó wé ńdɔgɔ ḿbɔ́gɔ shʉ́shÿɔ́g gẅie à lɔ̌ɔn tè ńnéŋe wɔ́ légwɔ́ mag pʉ̀a Israel ne ńgyá wɔ́.

¹⁴ Tá’, á la zɔɔn ńgwaa wɔ́, mbà legyè sɔ́b léen ńjÿɔ́’ɔ, é léen ńjÿɔ́’ɔ jÿɔ́’ɔ tà ńkú lyɛ̌’ɔɔn, á nue pɔ́ gwɔ́ tóŋo ŋwà’ne Nzẅìŋe *Kʉ̀a, nkǔɔ yá yɛ̌ nyé ńgwɔ́ pɔ́ wó, é nyé ńgwɔ́ pɔ́ wó, mélà’mie nyìŋ lɔɔn ńnyé té la nnɛ́ ná Kristo, yɛ̌ nkǔɔ nyé ńgwɔ́ pɔ́ wó.

¹⁵ Tà ńkú lyɛ̌’ɔɔn pʉ̀a Israel gwɔ́ tà ne ńtóŋo meŋwà’ne Mǒsê, étsɔ̌ nkǔɔ pwoon legyè sɔ́b.

¹⁶ Tá nyìŋ kě ńgwɔ́ tà sele nnɛ́ ńdíe Cʉ̀apʉ̀a, nkǔɔ zyɛ́bɛ,

¹⁷ á nue Cʉ̀apʉ̀a gwɔ́ pɔ́ Zẅìge, ajʉ’ gie Zẅìge Cʉ̀apʉ̀a piŋ ńgwɔ́ wó la, atsɔ́ mmó gie ńgwɔ́ á táte nyìŋ, á té gíŋe ńgwɔ́ jʉ’ó wɔ́.

¹⁸ Pege metsèm tè gíŋe ńgẅiin tsɔ̌ nkǔɔ ná shÿó wégè wɔ́, shʉ́shÿɔ́g Cʉ̀apʉ̀a ne ńtéme ná pege ḿbiŋe nzèm pá’ kyɛ̀’ gie á téme ná gyá shÿó la. Cʉ̀apʉ̀a gẅie à gwɔ́ pɔ́ Zẅìge, à ne ńgÿo pege kúbe ntí, ńgÿo pege sẅé yé, shʉ́shÿɔ́g gẅie aa ná pege, piŋ ne ńkẅi’i kẅi’i.