1 Timote 6 - Nouveau Testament en Ngienboum

Ntí gie nkwɔɔn gie aa nyìŋ Kristo gẅiin lé jú’ ncwò nyìŋ gẅie à gẅiin yé pú’u

¹ Á gʉa ná pʉ̀a pie pɔ́ ée ndá nkwɔɔn, mbà á ne ńzɛ́te ngie pɔ́ zsé ngie pɔ́ gẅiin légÿo mekù’ pʉ̀a pie pɔ́ gẅiin wɔ́b, ńzsé ngie mé té ge kím lezíŋ Ssé té poŋ wɔ́, é ké le gwága nò gie mé zí’i pʉ̀a ná Yěsô Kristo wɔ́.

² Á gʉa nà menkwɔɔn pie pʉ̀a pie é gẅiin wɔ́b ée pʉ̀a Kristo pɔ́ pɔ́ɔn lézẅɛ́’ pá’ pâ pɔ̌ ée mefɛ́ mefɛ́ ńgwága wɔ́b. Tà ńcʉ́’ pú’u, pɔ́ fa’a fà’a yɔ́b á poŋ ńcʉa pá’ pɔ́ ka zɔɔn ńne fa’a, mélà’mie pʉ̀a pie pɔ́ fa’a mbwo pɔ́b kéen ńzáb ntʉ́m ná Kristo tà pɔ́b menkwɔɔn cʉ́’ʉ ńkwoŋo wɔ́b kwoŋ. Ammó gie ɔ̀ ge ne zí’i pʉ̀a, é piŋ ne ńkẅiŋte wɔ́b légÿo pú’u, à yɔɔn:

Pàzí’i pʉ̀a nò ndyɛ̀’ɛ, e cú’u twó pʉ̀a

³ Nyìŋ lɔɔn ńzí’i pʉ̀a nò ndyɛ̀’ɛ ńdɔgɔ ńgwá’a shwóŋè nénʉ́ gie á fóo mbwo Cʉ̀apʉ̀a wege Yěsô Kristo, mbɔɔ mmó gie pege zí’i pʉ̀a, pɔ́ fóo mǒ ńzába ntʉ́m ná yé,

⁴ mbà ngàŋ ŋa’te ngie à zsé nò, tá ńké tè ne ńzsé wɔ́. À zsé yé pɔ́ lézoŋo nò, ńgwá fó nà nò gie mé gɔɔn, ńcu’u twó pʉ̀a. Á cʉa pú’u, pʉ̀a zye légẅiin kègɔ́’, ńzye lézoŋo nò, ńzye zoonte, ńzye légyéte mefɛ́ pɔ́b ná nò tepòŋ,

⁵ ńgwɔ́ fʉ̀’ ntsèm ne ńzoŋo nò tsetsɛ̀ɛ pɔ́b zoŋ, á nue pɔ́ cʉ́’ʉ ńzsé nò nénʉ́ wɔ́, ńkwaŋa yɔ́b pɔ́ ngie nyìŋ lɔɔn ńzáb ntʉ́m nà Ssé, mbà àa mánzsè gẅie à ge fó mǒ gẅiin nkáb.

Anò fù’u mbòŋo pɔ́ nò fù’u tepòŋ

⁶ Á ké ńzɔɔn ńgwɔ́ nénʉ́ ngie nyìŋ záb ntʉ́m ná Ssé, mbà aa ngàŋa fù’ pá’ nò lɔɔn ḿboŋo yé nà mmó gie Ssé nǎ mbwo yé.

⁷ Pege la zɔɔn tè lɔgɔ tsɔ́ mmó ńtóo tsɛ̀ɛ yɔ́ɔn njÿó wɔ́, pege piŋ ńké tě ńdá’a ńdɔgɔ tsɔ́ éfóo wó ńgee wɔ́.

⁸ Pú’u la, ńgwɔ́ gie pege lɔɔn ńgẅiin mmó léjÿó mbɔɔ nzsǒ ḿma’, mbà wɛ̌ nzẅìŋ kaa kɔ́gɔ.

⁹ Tá á ké ńgʉa ná pʉ̀a pie pɔ́ kwoŋo légẅiin shúm tà é gyɔ́ɔn gyɔ̌ɔn, mbà pɔ́ gwe tsɛ̀ɛ nkwà’te. Eshúm tepòŋ sie pɔ́ tsɔ́ɔn, é gwɔ́ sie é cʉŋte nyìŋ cʉŋte, é gwoon wɔ́b pá’ lejÿɔ́’ la. Sɛ̌ shúm tsóte pʉ̀a mesoŋ pɔ́ gwe ssé, ńkúu pyé.

¹⁰ Á nue le ké ńtsɔ́ɔn pɔ́ légẅiin nkáb, à lɔg menò ntí ntí ńtó. Etsɔ́ pʉ̀a léen ńgwá’ mbùm yɔb ná nò nkáb, éfʉa mánzsè, pɔ́ té gíŋe ńzáb ntʉ́m nà Ssé wɔ́, ńdɔg ńtóŋ ngʉ̀ngʉ̀ tà ńgyɔ́ɔn ńnéŋe ná pɔ́b.

Anò gie mé gɔ̌ɔn kwà’ mbwo Timoté

¹¹ Á ké ńgʉa ná gù gẅie ɔ́ɔ ngàŋa fà’ Ssé, ɔ̀ ne ńkÿo mɛ̌ menò tepòŋ, ńne ńkaga tʉ̀ ńgÿo pɔ́ menò mie é tyé ndʉŋ ndʉŋ, ḿbiŋ ne ńjú’u pɔ́ ndà’ ncwò Ssé, ńne ńzába ntʉ́m gú ná yé, ńne ńkwoŋo nyìŋ mesoŋ, ńne ńtʉte tʉte nzèm Ssé, ńtyé nà yɛ̌ nò wɔ́, ńgẅiin pɔ́ kwɔ́gɔ nnɛ́.

¹² Ké ne ḿma’a jú pɔ́ ncù mbòŋo we pàzáb ntʉ́m nà Ssé. Kú’te le gwɔ́ tèmì mboŋó, mélà’mie e Ssé la tóŋo gú, ntí pɔ́ wɛ̌. Ɔ̀ piŋ ńtyé mvfò pʉ̀a tà ńgyɔ́ɔn ńzẅíŋe nò mbòŋo gie ɔ̀ zába ntʉ́m gú mǒ.

¹³ Mèŋ n tsẅii yɔɔn nò né gú, ńtyé mvfò Ssé gẅie à gÿo shúm ntsèm gwɔ́ wó, mbɔɔ mvfò Yěsô Kristo gẅie à la tyé mvfò Ponte *Pilato ńgɔɔn nò nénʉ́ gie à zsé.

¹⁴ Mèŋ n ne ńtsẅii né gù ngie ɔ̀ gÿo shúm sie e Ssé gɔ̌ɔn né gù. Tè gʉa mǒ ńgwá’a tsɔ́. Tè gÿo mé túu *lɔ̌’ mǒ, ké ńne ńgÿo pɔ́ pú’u, tà ńkúu lyɛ̌’ gie Cʉ̀apʉ̀a wege Yěsô Kristo ge gÿo gíŋe tó.

¹⁵ À ge gÿo tóo nà fʉ̀’ gie e Ssé la záb. Yé Ssé gẅie à gẅiin tʉ̀ ntsèm. Yé zɔ̌ ndà’ Ssé, ńnéŋe pɔ́ tsɛ̀ɛ lekág, ńgwɔ́ Fùɔ cʉa mefùɔ, ńgwɔ́ Cʉ̀apʉ̀a mecʉ̀apʉ̀a,

¹⁶ ée ndà’ yé gílé yé gẅie aa tèkwé. À ńnéŋe nà jʉ’ gie á pú ńŋwʉŋe tà ńgwɔ́ gie à lɔɔn ńgwɔ́ nyìŋ mesoŋ le tsíŋte tà ḿbɔ́ɔnte jʉ’ó wɔ́. Nyìŋ laa zɔɔn ńgyá yé wɔ́, ńgwɔ́ nyìŋ le ku’u légyá yé wɔ́. Á poŋ mekù’ mé mbɔɔ lefùɔ sé e lá’a ńgwɔ́ pɔ́ wó. *Amen.

Ntÿɔgɔ́ mbwo ngàŋa mmó

¹⁷ Á gʉa ná pʉ̀a pie pɔ́ ée megàŋa mmó tsɛ̀ɛ yɔɔn njÿó, tsẅi né pɔ́b ngie pɔ́ pɔ́ɔn le ŋá’te nnɛ́, ńgie tà pɔ́ ńnéŋe ńzẅí’te wɔb lepòŋ pɔ́ nà shúm sie pɔ́ gẅiin, á nue á gwɔ́ pɔ́ fù’u njÿòon. Tsẅi né pɔ́b ngie pɔ́ zẅí’te wɔb lepòŋ pɔ́ mbwo Ssé gẅie à náa wege shúm ntsèm tà é gyɔ́ɔn gyɔ̌ɔn ngie pege lɔg ńkẅéte mbùm yege.

¹⁸ Tsẅi né pɔ́b ngie pɔ́ gÿo nò mbòŋo. Lefa’ mefà’ mbòŋo, à gwɔ́ yɔ́b fù’, ńgie pɔ́ zí’i légaba pwó, ńdɔg shúm sɔ́b ńkẅéte pʉ̀a.

¹⁹ Pɔ́ lɔɔn ńgÿo pú’u, mbà pɔ́ lɔgɔ ńcú’te fù’ yɔ́b ńde’e ná jʉ’ʉ mbòŋo, á jʉ’ gie yɛ̌ fù’ ge lá’a gwɔ́ pɔ́ wó, é lɔgɔ pú’u, gẅiin kwà’ le gwɔ́ wó.

Nzsònzèm ntÿɔgɔ́ pɔ́ tsyɛ̀’te

²⁰ Timoté, pɔ́ɔn lélɔgɔ mmó gie e Ssé ka cʉ́me mbwo gù, ńdɔg ḿma’a kwàŋ. Pɔ́ɔn shwóŋè gie á té kẅéte, tà ńcʉ́’ pú’u, á tɔ’ pʉ̀a tɔ’ lézáb ntʉ́m nà Ssé, á shwóŋè gie á gÿo mé zoŋo nò tà ńkwaŋ ngie mé lɔgɔ ńzsé nò.

²¹ Tsɔ́ pʉ̀a ka gwaa fʉa mánzsè ńzɔɔn ńgɔɔn pɔ́ ngie pɔ́ zsé tɛ’, pɔ́ piŋ ńcʉ́’ʉ ńzába ntʉ́m nà Ssé wɔ́. Mèŋ n ge cʉ́’ʉ lécʉ́me, ésẅíŋte ngie e Ssé gwɔ́ né pi.