1 Timote 3 - Nouveau Testament en Ngienboum

Pàlíe cú’tè pʉ̀a Kristo

¹ Anò gie n gee ńgɔɔn áa nénʉ́. Nyìŋ lɔɔn ńne ńtsɔ́ɔn légwɔ́ ndìe cú’tè pʉ̀a Kristo, mbà à tsɔ́ɔn fà’ gie á gẅiin mekù’.

² Á zɛ́te ngie ndìe cú’tè pʉ̀a Kristo à gwɔ́ nyìŋ gẅie mé té kíme yé té poŋ wɔ́. Á zɛ́te ngie à gẅiin pɔ́ tà’ manzwě wémɔ’ɔ́, tà á gÿo tsɔ́ mmó tà á cʉa. À gwɔ́ nyìŋ gẅie à sáŋa nò tá ńgÿo, ńgwɔ́ nyìŋ gẅie à kúe megʉ̀ mboŋó, ńku’u lézí’i pʉ̀a mmó.

³ Á té zɛ́te ngie à gwɔ́ nyìŋ gẅie à ma’ mbùm yé ná melù’ wɔ́, ńgie à sá’ mbʉ̀’ wɔ́. Á zɛ́te ngie à gwɔ́ nyìŋ gẅie à pʉlé, á nyìŋ gẅie à tè ntsaŋ fa’. Tà á gwɔ́ nyìŋ gẅie à záb ntʉ́m wé nà nkáb.

⁴ À gwɔ́ nyìŋ gẅie à líe mbʉ̀a ye mboŋó, ńgwɔ́ nyìŋ gẅie à gẅiin penkʉ́ pé nà ntí gie pɔ́ ge jú’ ncwò wé, é gÿo mekù’ mé.

⁵ Nyìŋ lɔɔn ńzɔɔn tè zsé lélíe mbʉ̀a yé wɔ́, á líe cú’tè pʉ̀a Ssé lêkɔ́?

⁶ Á té ne ńzɛ́te ngie nyìŋ gẅie à líe cú’tè à gwɔ́ nyìŋ gẅie à ka nyě ńgwɔ́ nyìŋ Kristo wɔ́, mbà ńgwɔ́ á tóo ńŋá’te nnɛ́, éfʉa nò, ńgwe ntsaŋ pá’ Sátà.

⁷ Á gíŋe ńne ńzɛ́te ngie à gwɔ́ nyìŋ gẅie pʉ̀a pie é té pʉ̀a Kristo wɔ́ é kíme yé pɔ́ mboŋó. Pú’u, etsɔ́ menò mé mie ńgwɔ́ mé kem é le gwɔ́ wó wɔ́, Sátà le ku’u lélʉ’ lekÿo tà ńdɔg ńgwoon yé wɔ́.

Pàfa’a tsɛ̀ɛ cú’tè pʉ̀a Kristo

⁸ Á gíŋe ńzɛ́te ngie pàfa’ mefà’ tsɛ̀ɛ cú’tè pʉ̀a Kristo gwɔ́ yɔ́b pʉ̀a pie é gẅiin mekù’, ńgwɔ́ pàshwóŋó nò nénʉ́, ńgwɔ́ pʉ̀a pie é té ma’ mbùm yɔb ná melù’ wɔ́, ńké le gwɔ́ pʉ̀a pie é kwoŋ nkáb ńgáte gaté wɔ́.

⁹ Á zɛ́te ngie pɔ́ kú’te nò nénʉ́ gie á laa lelyěen, e Ssé nyɛɛ wégè, ńkú’te nà ntí gie mbùm yɔb tè cúa wɔ́b gwɔ́.

¹⁰ Á zɛ́te ngie mé zɔɔn ḿvɔg ńtsa’a wɔ́b mboŋó, ńgwɔ́ gie mé lɔɔn tè *lɔ̌’ɔ yɔ́b gyá, mé lêen ńké ńdɔgɔ wɔ́b ńgÿo pàfa’a tsɛ̀ɛ cú’tè pʉ̀a Kristo.

¹¹ Á gíŋe ńzɛ́te ngie pànzwě pɔ́b gíŋe ńgẅiin mekù’, pɔ́ le gwɔ́ ngàŋ melɔ̀ɔn wɔ́, pɔ́ légÿo tsɔ́ mmó tà á cʉa wɔ́, ńgwɔ́ pʉ̀a pie à lɔɔn ńgwɔ́ pɔ́ gÿo kɔ̀ɔkɔ́ɔ gie mé cʉmé mbwo pɔ́b tà mé le lɔ̌’ mǒ gyá.

¹² Á zɛ́te ngie pàfa’ mefà’ tsɛ̀ɛ cú’tè pʉ̀a Kristo gẅiin pɔ́ tà’ tà’ manzwě, ńdíe membʉ̀a mɔ́b mboŋó, tà mbɔɔ penkʉ́ pɔ́b.

¹³ Pàfa’ mefà’ tsɛ̀ɛ cú’tè pʉ̀a Kristo lɔɔn fa’a fà’ mboŋó, mbà mé ge ná mekù’ mɔ́b, pɔ́ ku’u légɔɔn nò gie pɔ́ zába ntʉ́m ná Yěsô ńtí yɛ̌ tà pɔ́ le pɔ́g.

Ntʉ̀ nò gẅie Ssé la gÿo mé zsé

¹⁴ Timoté, mèŋ n ne ńkwaŋa ngie n te láte tá tó gyá gú wɔ́. Mèŋ n ké ńŋwe’e yɔɔn ŋwà’ne, ńnáa mbwo gù pá’ɔɔn,

¹⁵ légwɔ́ gie n dɔɔn tè tɔ́g ńtó wɔ́, ɔ̀ tóŋo yɔɔn ŋwà’ne, ńjú’ pá’ pʉ̀a pie e Ssé ee tá wɔ́b gẅiin légiŋ pú’u, á tsɛ̀ɛ cú’tè yɔ́b. Yɛ̌ cú’tè áa ye pʉ̀a Ssé gie ee ntentʉ́. Á tÿɔ́g ntóon gie e tyé ndʉŋ ndʉŋ á nà nò gie áa nénʉ́ tà ńgíŋ ńjÿɔ́’ tsɔ̌.

¹⁶ Áa nò ngie nò nénʉ́ gie Ssé la gÿo pege zsé, á piŋ ńnyɛɛ wégè pá’ ńgwɔ́ pege giŋe ná mánzsè Ssé, á gú’ tɛ’. Áa ngie: Yé gẅie à la sele ńcʉ́’ʉ nyìŋ mesoŋ, A Zẅìge Ndʉalʉ̌a la nyɛ ngie aa tè *lɔ̌’. *Mecÿɔ́’ Ssé la gyá yé. Pʉ̀a la sá’a nò yé mengwòŋo mengwòŋ, mé záb ntʉ́m ná yé jʉ’ ntsèm tsɛ̀ɛ njÿó. E Ssé la sa’a yé, ńdɔg ńgʉa né tÿǒ lepwó, á jʉ’ʉ legú’.