1 Timote 2 - Nouveau Testament en Ngienboum

Anò ná letsyɛ’te Ssé

¹ Pú’u la, mèŋ n ge gwɔ gíŋ gɔɔn nò, é vɔg gɔɔn ngie á ne ńzɛ́te ngie pʉ̀a Ssé ne tsyɛ’te yé nà twó mânyìŋ ntsèm, ńne ńdúɔ mbwo yé ngie à kẅéte wɔ̌wɔ́ɔ, ńne sẅíŋte yé, ńne síe yé nà twó wɔ̌wɔ́ɔ.

² Mé ne sẅíŋte Ssé nà twó mefùɔ, tà mbɔɔ ná twó petsɔ́ pʉ̀a pie é sá’a lá’. Légwɔ́ gie pege ge ńnéŋe mboŋó, à lá’a yege gwɔ́ lá’a mbʉ́lè. Pege gwɔ́ pʉ̀a pie é gÿo mmó gie á poŋ Ssé, ńgẅiin tsẅé gie á gẅiin mekù’.

³ Lesẅiŋté Ssé nà twó pʉ̀a aa mbòŋ, ńgwɔ́ mmó gie á poŋ Ssé gẅie à gÿo pege tsẅɛ́ɛ.

⁴ Yé gẅie à ne ńkwoŋo ngie pʉ̀a mesoŋ metsèm tsẅɛ́, ḿbiŋ ńzsé nò nénʉ́.

⁵ E Ssé zɔɔn ńgwɔ́ pɔ́ yémɔ’ɔ́. Tá’ mánzsè gwɔ́ pɔ́ wémɔ’ɔ́ tsetsɛ̀ɛ Ssé pâ pʉ̀a mesoŋ Aa Yěsô Kristo, ńgwɔ́ yé nyìŋ mesoŋ

⁶ Kwà’ yé máŋwɛ́ la náa twó yé ńdɔg ńcu’ pʉ̀a metsèm mbwo legwé, ńdɔg pú’u, ńnyɛɛ ná fʉ̀’ gie e Ssé la záb ngie yé Ssé ne ńkwoŋo ngie epʉ̀a mesoŋ metsèm tsẅɛ́.

⁷ E Ssé la zába wɔ̀ɔn ngie mèŋ n gwɔ́ ntsẅì nkʉ̀ we, ńgwɔ́ ngàŋ ntúm Yěsô létsẅii yɛ̌ nò. À la cʉ́me mbwo mèŋ ngie mèŋ n zí’i pʉ̀a pie é té pà Yuda wɔ́, lézáb ntʉ́m ná Kristo, mbɔɔ lézsé nò gie áa nénʉ́. Mèŋ shwóŋó nò nénʉ́, mèŋ n těen ńcÿɔ nò wɔ́.

Ntí gie manzwě kà mámbàŋa wɔ́ gẅiin lélɔg ńnéŋe tsɛ̀ɛ cú’tè pʉ̀a Kristo pú’u

⁸ Á gʉa ná nò létsyɛ’te Ssé mèŋ n ne ńtsɔ́ɔn ngie nzɔ̌ nzɔ̌ wɔ́ gie pʉ̀a Kristo cu’té wó wɔ́, mbàŋa tsyɛ’te Ssé, ńgwɔ tsyɛ’te, ńgwɔ́ pʉ̀a pie é té záb mbwó nà shúm tepòŋ tá ḿbiŋ ńkwé’e ńnáa tÿǒ fʉ̀’e létsyɛ’te Ssé wɔ́. Pɔ́ gíŋe ńgwɔ́ pʉ̀a pie é té ngàŋ lóŋ wɔ́, ńké tè fa’ mentsaŋ wɔ́.

⁹ N giŋé ne ńtsɔ́ɔn ngie pànzwě lɔɔn ńne ńgee lê tsɛ̀ɛ cú’tè pʉ̀a Kristo, pɔ́ ma’ menzsǒ mie ée mbòŋ mbwo pʉ̀a Ssé, é menzsǒ mie é té gwɔ́ pɔ́ tsɔ̌ ntí wɔ́, é mie é gwɔ́ pɔ́ mé pànzwě pie mekù’ ée ná pɔ́b. Tà pɔ́ cʉ́’ʉ lékẅiŋ mbùm yɔb, ńtáŋte menòŋo twó mɔ́b pɔ́ nà tsɔ̌ ntí gie e sẅile sẅile. Kà ńjÿɔ́g pɔ́ shúm sie é cÿɔ́g pɔ́ nkáb tɛ’ wɔ́, tà pɔ́ ma’ menzsǒ lélɔg ńnyɛ pɔ́ nnɛ́.

¹⁰ Á zɛ́te ngie pɔ́ lɔg pɔ́ mà wɔ́b ńnyɛ ngie pɔ́ ée pànzwě pie é sí. Áa pá’ pànzwě pie é gÿo mmó gie á poŋ Ssé gẅiin légÿo.

¹¹ Pànzwě lɔɔn ńnéŋe ńtóo tsɛ̀ɛ cú’tè, pɔ́ pʉ́le ńnéŋe ssé, ńzẅí’te mmó gie mé ne ńzí’i tà pɔ́ le pége shwǒŋ wɔ́.

¹² N kaa zẅíŋ ngie pànzwě zí’i mbàŋa mmó wɔ́. Pɔ́ gíŋe tè gẅiin lésá’ mbàŋa wɔ́. Pɔ́ gẅiin pɔ́ lépʉ́le ńnéŋe, ńjÿɔ́’ ncwò wɔ́b.

¹³ Pi zɔɔn ńzsé ngie Ssé la vɔg ḿbwóon Adam, tá mbɔ́ɔntè ḿbwóon Eva.

¹⁴ Adam zɔ la piŋ tè zẅíŋ mé fʉte yé wɔ́. Manzwě zɔ la zẅíŋ mé fʉte yé, á fʉa nò mbwo Ssé.

¹⁵ Tá’, mèŋ n gɔɔn pá’ɔɔn, manzwě ge lɔg pɔ́ pá’ à gẅiin penkʉ́ tá tsẅɛ́. Tá’, á zɛ́te ngie à ké ńzáb pɔ́ ntʉ́m nà Ssé, ńkwoŋ pʉ̀a mesoŋ, ńgẅiin mbùm yé lê mekù’, ńgÿo mmó gie á poŋ Ssé.