1 Korento 7 - Nouveau Testament en Ngienboum

Menò mie mé zɛté ńtí lɔ́ɔn ndá

¹ Pege gɔɔn nò fʉ̀’ɔɔn nà menò mie pi ka ŋwe’e tsɛ̀ɛ ŋwà’ne ńzɛ́te wɔ̀ɔn. Pi ka gɔɔn ngie: «Áa mbòŋ mbwo nyìŋ mbàŋa léńnéŋe té cʉa ná nzwě we».

² Tá’ à ke ńcʉ́’ gie nyìŋ pumo wɔ̌wɔ́ɔ pɔ́ yé nuŋe nuŋe, wɛ̌ mámbàŋa wɔ́ kú’te nzwě we, wɛ̌ manzwě wɔ́ kú’te ndúm we.

³ Á ne ńzɛ́te ngie mámbàŋa gÿo nò mámbàŋa ná nzwě we, manzwě gÿo nò manzwě nà ndúm we.

⁴ Manzwě tè gẅiin lélɔg mbùm ye ńgÿo mmó gie à kwoŋ wɔ́, mbùm ye gwɔ́ pɔ́ ye ndúm we. Á gíŋe ńgwɔ́ pɔ́ ndʉŋ ndʉŋ pá’ mámbàŋa tè gẅiin lélɔg mbùm ye ńgÿo mmó gie à kwoŋ wɔ́, mbùm ye gwɔ́ pɔ́ ye nzwě we.

⁵ Tà mámbàŋa lʉ’ʉ nò mbwo nzwé we, tà manzwě ké ńdʉ’ yé. À lɔɔn ngwɔ́ pi gÿo pú’u, pɔ́ ná mûɔ méfʉ̀’ gẅie pi lɔgɔ́ tà’ ncwò ńgyá ngie pi ge sẅíŋte Ssé, ésẅíŋte Ssé tà ńtsẅé jʉ’, pi gíŋe ńnéŋe tsɛ̀ɛ lɔ́ɔn ndá gí pá’ pi zɔɔn ńnéŋe, ḿbɔ́gɔ légwɔ́ gie à lɔɔn ńgwɔ́ Sátà lɔg pá’ pi kʉ́a légwoonte mbùm gí ńkwa’te gẅí,

⁶ é té pá’ɔɔn ńgwɔ́ pɔ́ *lepʉ̌ sie mèŋ n zába wɔ́, n gɔɔn pɔ́ mmó gie pi lɔɔn ńgÿo á poŋ.

⁷ Mèŋ n ne ńkwoŋo ngie pʉ̀a metsèm gwɔ́ pá’ mèŋ. Tá wɔ̌wɔ́ɔ à gẅiin yé mmó á gwɔ́ pɔ́ gie e Ssé la ná. Aye wetsɔ̌ nyìŋ gwɔ́ pɔ́ pá’ à ge zɔ́’, aye wetsɔ̌ gwɔ́ pɔ́ pá’ à ńnéŋe pú’u.

⁸ Mèŋ n ge gɔɔn mbwo menkẅì lâ mbwo mepfɔ̌g pànzwě ngie áa mboŋ ngie pɔ́ pʉ́le ńnéŋe pá’ mèŋ.

⁹ Tá ńké ńgwɔ́ gie pɔ́ gyǎ ngie pɔ́ té ku’u légwoonte mbùm yɔ́b wɔ́, pɔ́ zɔ́’, á nue mvfò lézɔ́’ ńcʉa léńnéŋe ńtsɔ́ɔn.

¹⁰ Ńgʉa ná pʉ̀a pie pɔ́ kéen ńdá’ ńzɔ́’, mbà mèŋ n ge tsẅii nò gie Cʉ̀apʉ̀a la záb á gwɔ́ ngie, manzwě gẅie à zɔ̌’, à tè gẅiin lékẅɛɛ ná ndúm we wɔ́.

¹¹ Tá ńké ńgwɔ́ gie à lɔɔn ńkẅɛɛ nà ndúm we tà á ke ńgíŋe ńzɔ́’ɔ tsɔ̌ nyìŋ, ńcʉ́’ pú’u, á piŋ nzèm pɔ́ ndúm we maga cÿɔ́g. Mámbàŋa piŋ ńké tè gẅiin léjwoŋo nzwě we wɔ́.

¹² Á gʉa ná petsɔ́ pʉ̀a, mèŋ n gɔɔn ngie: Nyìŋ lɔɔn ńgwɔ́ nyìŋ Kristo, ńgẅiin manzwě gẅie à tè nyìŋ Kristo wɔ́, wɛ̌ manzwé zẅíŋ ngie pɔ́ yé ńnéŋe tà ngàŋ jwoŋo yé. Mèŋ n zɔ gɔɔn yɔɔn nò, Cʉ̀apʉ̀a zɔ tě ńgɔɔn wɔ́.

¹³ Manzwě piŋ ngwɔ́ nyìŋ Kristo, andúm we tè nyìŋ Kristo wɔ́, ńzẅíŋ pá’ pɔ́ yé ge ńnéŋe, tà á kẅɛ̀ɛ ná ye,

¹⁴ á nue mámbàŋa gẅie à tè nyìŋ Kristo wɔ́, à lɔg pá’ à la nnɛ́ ná nzwě we gẅie aa nyìŋ Kristo, ńgwɔ́ lejʉ́ŋ Ssé. Manzwě gẅie à tè nyìŋ Kristo wɔ́ lɔg pá’ à la nnɛ́ nà ndúm we gẅie aa nyìŋ Kristo, ńgwɔ́ lejʉ́ŋ Ssé, ńgwɔ́ gie á ké tè pú’u wɔ́, mbà pènkʉ́ pɔ́b é té gẅiin légwɔ́ lejʉ́ŋ Ssé wɔ́. Pɔ́ piŋ ńgwɔ́ fʉ̀’ɔɔn ńgwɔ́ lejʉ́ŋ Ssé.

¹⁵ Tá á lɔɔn ńké ńgwɔ́ gie nyìŋ gẅie à tè nyìŋ Kristo wɔ́ gyǎ ngie à ge fag nnɛ́, mé nyé yé á fag. Á gʉa ná yɛ̌ ntí, atsɔ́ mmó té kú’te nyìŋ Kristo we mbàŋa kà we manzwě wɔ́. E Ssé la zɔɔn ńtóŋo wégè pɔ́ pá’ pege ge ńnéŋe lê mbʉ́lè.

¹⁶ Á zɔɔn ńgwɔ gwɔ́, gu gẅie ɔ́ɔ manzwě, ńgwɔ́ nyìŋ Kristo, ńgwɔ́ ɔ̀ gǎ tà ńkwa’ ńzsé ngie ɔ̀ ge lá’ gÿo tà ndúm gù tsẅɛ́? Kà gu gẅie ɔ́ɔ mámbàŋa, ńgwɔ́ nyìŋ Kristo, ńgwɔ́ ɔ̀ gǎ tá ńzsé ngie ɔ̀ ge lá’ gÿo tà nzwě gù tsẅɛ́?

Leneŋé nà jʉ’ gie e Ssé ka toŋó gẅi ngie pi ńnéŋe jʉ’ó

¹⁷ Tá á gʉa ná mɔɔn menò ntsèm, mbà á poŋ ngie àwɔ̌wɔ́ɔ gwɔ́ pɔ́ nà jʉ’ gie e Ssé la záb ngie à gwɔ́ wó, ńnéŋe nà jʉ’ gie e Ssé ka gwaa tóŋo yé á ńnéŋe wó. Áa mmó gie mèŋ n ne ńgɔɔn tsɛ̀ɛ mecú’tè pʉ̀a Kristo ntsèm ngie mé gÿo.

¹⁸ Á lɔɔn ńgwɔ́ gie e Ssé ka gwɔ tóŋo nyìŋ, mbà mé la pú’u yé, pá’ mé pú’u pà Yuda, tà ngàŋ fa’a lélʉ’ ngie à tè nyìŋ Yuda wɔ́, ńgwɔ́ gie à ka gwɔ tóŋo nyìŋ, mbà mé laa ngàŋ pú’u, tà á gɔɔn ngie à ge gÿo cʉ́’ʉ nyìŋ Yuda.

¹⁹ Legwɔ́ gie mé la pú’u nyìŋ kà mé la tè yé pú’ wɔ́ tè tsɔ́ nò mvfò Ssé wɔ́. Leku’té mbʉ̌ Ssé zɔɔ nò.

²⁰ Á lɔɔn ńgwɔ́ gie e Ssé la gwaa tóŋo nyìŋ, á ńnéŋe ná yɛ̌ jʉ’ wɔ́, angàŋ ké ńnéŋe pɔ́ jʉ’ó,

²¹ ńgwɔ́ gie Ssé la gwaa tóŋo gú ɔ̀ gwɔ́ nkwɔɔn, tè pú’ mbùm jù ńtí pú’u. Tá ńké ńgwɔ́ gie à lɔɔn ńgwɔ́ eshÿó kẅɛ tà ɔ̀ cʉ́’ ndù nnɛ́, ɔ̀ zẅɛ́’.

²² Pi zsé ngie nyìŋ gẅie Cʉ̀apʉ̀a ka gwaa tóŋo yé, á gwɔ́ nkwɔɔn, à kẅɛ̌ ndá nkwɔɔn nò tepòŋ, ńcʉ́’ ńgwɔ́ pɔ́ nyìŋ Cʉ̀apʉ̀a. Á giŋ ńgwɔ́ pɔ́ ndʉŋ ndʉŋ ná nyìŋ gẅie mé ka gwaa tóŋo yé á gwɔ́ ndù nnɛ́, angàŋ kéen ńcʉ́’ nkwɔɔn Kristo, ńdɔgɔ ńgwɔ́ yé nyìŋ Kristo

²³ Kristo la cú’u gẅi ndá nkwɔɔn lê ntʉ̀ nzẅìŋ mmó. Pú’u la tà pi cʉ́’ menkwɔɔn pʉ̀a mesoŋ.

²⁴ Mefɛ́ mefɛ́, wɔ̌wɔ́ɔ gwɔ́ mvfò Ssé, ńnéŋe pɔ́ nà jʉ’ gie e Ssé ka gwaa tóŋo yé á ne ńnéŋe jʉ’ó.

Anò ná pàtè lɔ̌ɔn ndá mbɔɔ nà mepfɔ̌g

²⁵ Á gʉa ná pʉ̀a pie pɔ́ kaa zɔ́’ɔ, mbà Cʉ̀apʉ̀a ka tè tsẅii nò gie mèŋ n ge gɔɔn né pɔ́b wɔ́. Tá’, mèŋ n ge gɔɔn pá’ mèŋ n ne ńkwaŋa yɔ́ɔn nà nò yɔ́b, ńdɔgɔ pá’ n gee nyìŋ gẅie Cʉ̀apʉ̀a la tsɔ́ɔn mezìŋe mɔ́ɔn, ńdɔgɔ wɔ̀ɔn ńgÿo nyìŋ gẅie ńgwɔ́ á gɔɔn nò mé jú’.

²⁶ Pá’ yɔɔn kème njÿó ne ńtʉʉ nzẅìŋ wɔɔn lɔɔn, n kwǎŋ yɔ́ɔn ngie áa mbòŋ mbwo wɔ̌wɔ́ɔ léńnéŋe té zɔ́’. Oon áa mbòŋ mbwo wɛ̌ nyìŋ wɔ́ɔ léńnéŋe pɔ́ pá’ à gwɔ̌.

²⁷ Á lɔɔn ńgwɔ́ gie pi manzwé kéen ńzɔ́’, ɔ̀ pɔ́ɔn léfa’a lékẅɛɛ ná yé, ńké ńgwɔ́ gie ɔ̀ kaa zɔ́’ɔ, ɔ̀ pɔ́ɔn léfa’a manzwě.

²⁸ Ɔ̀ lɔɔn ńzɔɔn ńzɔ́’, mbà ɔ̀ kaa tsɔ́ nò fʉa. Mûɔ manzwě lɔɔn ńzɔɔn ńzɔ́’, mbà à kaa tsɔ́ nò fʉa. Tá pʉ̀a pie pɔ́ zɔ̌’ ge gÿo gwɔ́ lyɛ̌’ ntsèm ne gyá pɔ́ ngɔ́’. Mèŋ n tsɔ́ɔn pɔ́ ngie tà pi kú yɛ̌ ngɔ́’.

²⁹ Mefɛ́ pɔ́ɔn, ammó gie mèŋ fa’a légɔɔn gwɔ́ pɔ́ ngie: Mefʉ̀’ njÿó té gíŋe ńgyɔ́ɔn wɔ́. Á ne ńzɛ́te ngie tà fó fʉ̀’ɔɔn, pʉ̀a pie pɔ́ zɔ̌’ ńnéŋe pá’ fʉ̀’ gie pɔ́ kaa zɔ́’ɔ la.

³⁰ Tà fó fʉ̀’ɔɔn pʉ̀a pie é ne ńdʉa, e ńnéŋe pá’ fʉ̀’ gie pɔ́ té ńne ḿmÿɔgɔ tsɔ́ nò wɔ́ la. Pʉ̀a pie é ne ńgẅe e ńnéŋe pá’ fʉ̀’ gie pɔ́ té ne ńkága wɔ́ la. Pʉ̀a pie pɔ́ ne ńjúu mmó ńnéŋe pá’ fʉ̀’ gie ammó gie pɔ́ júu á té yɔ́b wɔ́ la.

³¹ Pʉ̀a pie pɔ́ ne ńjÿó fù’ tsɛ̀ɛ yɔɔn njÿó ńnéŋe pá’ fʉ̀’ gie pɔ́ té ne ńjÿó wɔ́ la, á nue njÿó yɔɔn gie pege ne ńgyá lɔɔn tě ge lá’a gwɔ́ pɔ́ wó wɔ́.

³² M biŋ ne ńkwoŋo ngie tà tsɔ́ menò, gwaa ńgege gẅi ntʉ́m pi. Nyìŋ gẅie à kaa zɔ́’ɔ à kwǎŋte pɔ́ menò Cʉ̀apʉ̀a. À fa’ pɔ́ légÿo mmó gie á ge poŋo Cʉ̀apʉ̀a.

³³ Tá ńgʉa ná nyìŋ gẅie à zɔ̌’, mbà à kwaŋte pɔ́ menò me ndùmo ssé tsetsá’. À fa’ pɔ́ légÿo mmó gie á ge poŋo nzwě we.

³⁴ Á cʉa pú’u, legyè sé té tyé ná tà’a nò wɔ́. Manzwě gẅie à kaa zɔ́’ɔ kà pɔ́ múɔ manzwě wɔ́, à ké ńkwaŋte yé pɔ́ menò Cʉ̀apʉ̀a, ńzsé ngie à ge gwɔ́ pɔ́ nyìŋ Cʉ̀apʉ̀a á nà kɔ̀ɔkɔ́ɔ wɔ́ gie à ne ńgÿo, mbɔɔ gie à ne ńkwaŋa kwaŋ. Tá ńgʉa ná manzwě gẅie à zɔ̌’, à kwaŋte pɔ́ menò me ndùmo ssé tsetsá’, à fà’ pɔ́ légÿo mmó gie á ge poŋo ndúm we.

³⁵ Mèŋ shwóŋó gẅi mɔɔn menò, pɔ́ lélɔg ńkẅéte gẅí, mèŋ n tě ńdɔgɔ ńdʉ’ʉ pɔ́ lejÿɔ’ á mvfò pi wɔ́. N ne ńtsɔ́ɔn ngie pi tyé ná kɔ́ nò wɔ́, ńgÿo pɔ́ gie á poŋ ngie mé gÿo, ńgíŋe ne ńtsɔ́ɔn ngie pi la nnɛ́ pɔ́ ndà’ ná fà’a Cʉ̀apʉ̀a.

³⁶ Á gʉa ná mûɔ mbàŋa gẅie à kaŋá múɔ manzwě, anò yé gwɔ́ twó yé tɛ’, tá á ne ḿbɔ́gɔ légÿo pá’ á té ne ńzɛ́te wɔ́ ná ye, ńgyá ngie mé ge táŋte menò pá’ á ne ńzɛ́te, á gÿo pá’ à gyǎ pú’u. À tè pú’u, ńdɔgɔ fʉa pɔ́ tsɔ́ nò wɔ́. Á poŋ ngie pɔ́ zɔ́’.

³⁷ Tá ńgwɔ́ mûɔ mbàŋa ńnéŋe tà ńkwaŋte ntʉ́m ye ngie, à tè zɔ́’ wɔ́, é ké le gÿo mmó gie á té ne ńzɛ́te wɔ́ ná mùɔ manzwě wɔ́. À lɔɔn ńkwa’ ńkwaŋte pú’u, pɔ́ ntʉ́m ye, té nyìŋ ńtsóte yé, ḿbiŋ ńkú’te mbùm ye, mbà à gÿǒ mboŋó pá’ à kaa múɔ manzwě zɔ́’ɔ.

³⁸ Pú’u la, nyìŋ gẅie à zɔ’ɔ́ múɔ manzwě we gẅie à kaa pǐ, à gÿǒ mboŋó. Tá nyìŋ gẅie à gyǎ ngie à tè zɔ́’ wɔ́, à gÿǒ mboŋó tɛ’.

³⁹ Á gʉa ná manzwě gẅie à zɔ̌’, à ké ńgẅiin pɔ́ léla nnɛ́ nà ndúm we á nà fʉ̀’ gie ndúm we nyé wó. Andúm we ké ńkwé, á gẅiin lézɔ́’ɔ nyìŋ gẅie yé manzwě kwǒŋ. Anò gwɔ́ pɔ́ ngie wɛ̌ mámbàŋa gwɔ́ nyìŋ Kristo.

⁴⁰ Tá n kě ńkwaŋ yɔ́ɔn ngie à lɔɔn ńnéŋe té gíŋe nzɔ́’, mbà à ge jú’ mboŋó tɛ’. M biŋ ne ńkwaŋa ngie a Zẅìge Ssé áa ná mèŋ yɔ́ɔn.