1 Korento 6 - Nouveau Testament en Ngienboum

Anò ná pá’ mefɛ́ mefɛ́ sẅiŋe mentsaŋ mɔ́b mbwo pʉ̀a njÿó

¹ Á gaa nyìŋ gẅi pɔ́ wetsɔ̌ nyìŋ Kristo gẅiin ntsaŋ á nyé té lɔg ńgʉa ńgyá pʉ̀a Ssé pɔ́ ŋag, ńgʉa ńgyá pɔ́ pʉ̀a pie pɔ́ té Ssé zsé?

² Pi tè ne ńzsé ngie pʉ̀a Ssé ge lá’a lyɛ̌’ ŋag pʉ̀a njÿó wɔ́ ka? À lɔɔn ńgwɔ́ gie pi ge lá’ ŋag pʉ̀a njÿó, mbà kɔ́ piŋ ńgÿo pi tè ku’u léŋag menò mie é zɔɔn fó tè tsɔ́ mmó ku’?

³ Pi tè ne ńzsé ngie pege ge lá’ ŋag *mecÿɔ́’ Ssé wɔ́ ka? Tà ngʉ̀a shÿɔ́’ɔ nà menò me fʉ̀’ɔɔn?

⁴ Tá pi ké ńgwɔ́ tà ntsaŋ gie e líe menò me fʉ̀’ɔɔn é kẅɛɛ tsetsɛ̀ɛ pi, pi gwóon ńdɔg ńgʉa ńgyá pʉ̀a pie cú’tè pʉ̀a Kristo té sáŋa wɔ́b nà tsɔ́ nò wɔ́, ńgie pɔ́ ŋag.

⁵ N dɔgɔ pá’ɔɔn ńtéme shʉ́ ná pi. Pi lɔgɔ pú’u, ńzága nzsé nò tsetsɛ̀ɛ pi gẅie à lɔɔn ńgwɔ́ á giŋ kěm nà nò gie áa tsetsɛ̀ɛ nyìŋ Kristo pɔ́ wetsɔ̌ keen?

⁶ Tá áa tsetsɛ̀ɛ pi, nyìŋ Kristo lɔgɔ wetsɔ́ ńgʉa jʉ’ gie mé ŋaga mentsaŋ wó, tà á fó ńgwɔ́ pɔ́ mvfò pʉ̀a pie pɔ́ té záb ntʉ́m ná kristo wɔ́.

⁷ Nyìŋ gẅi lézɔɔn ńdɔgɔ wetsɔ́ ńgʉa jʉ’ gie mé ŋaga mentsaŋ wó, á lɔgɔ ńnyɛɛ ngie cú’te gí té ne ńgiŋe wɔ́. Á zɔ́ɔn ngǎ mé fʉa nò mbwo nyìŋ gẅi, angàŋ tè shÿɔg shÿɔg wɔ́, ńjʉʉ mmó nyìŋ, à tè gwág?

⁸ Tá, pi zɔ̌ ke ńgíŋe fʉa nò á mbwo mefɛ́ pí. Pi zɔ jʉʉ shúm sɔ́b.

^9-10 Pi tè ne ńzsé ngie pʉ̀a pie pɔ́ gẅiin mà tepòŋ pɔ́ téen ńdá’a ńgẅiin yɔ́b jʉ’ tsɛ̀ɛ nò *lefùɔ Ssé wɔ́ ka? N gɔɔn pʉ̀a pá’ pie pɔ́ pumte wɔ̌wɔ́ɔ pâ pɔ̌ nuŋe nuŋe, mbɔɔ pʉ̀a pie é gu’te shúm ngie ee messé, mbɔɔ mbàŋa lâ pànzwě pie pɔ́ gÿo gÿɛ́, mbɔɔ pàgÿo menò sẅile sẅile, mbɔɔ mbàŋa gie é sele ńgÿo nò mámbàŋa pɔ́ manzwě tsetsɛ̀ɛ pɔ́b kà pànzwě wɔ́, mbɔɔ metsǒŋ, là pàkwoŋ nkáb tɛ’, lâ mepʉ̀a melù’, lâ pàshwóŋó tepòŋ nà mezíŋ pʉ̀a, lâ pàgwoon ńkẅé, ndyɛ̌’ pi fʉte mbùm gi nà mɔɔn menò ka, pɛ̌ pʉ̀a pɔ́ téen ńdá’a ńkúu nà nò *lefùɔ Ssé wɔ́.

¹¹ Áa pá’ tsɔ́ pʉ̀a tsetsɛ̀ɛ pi ka zɔɔn ńgwɔ́ pú’u. Tá’ e Ssé ka sɔg mɛ̌ menò ná pi, ńdɔgɔ gẅi ńgÿo pʉ̀a pé. E Ssé yege ka lɔgɔ Zẅìge yé ńgÿo pi cʉ́’ ńgwɔ́ pɔ́ pʉ̀a pie ée ndʉŋ ndʉŋ mvfò ye ńtí Cʉ̀apʉ̀a Yěsô Kristo.

Pi gẅiin mbùm gi tà ńzsé ngie pi lɔgɔ ńgu’te Cʉ̀apʉ̀a

¹² Etsɔ́ pʉ̀a ée tsetsɛ̀ɛ pi, wɔ̌wɔ́ɔ ná pɔ́b wɔ́ ně ńgɔɔn ngie à gÿo yé kɔ̀ɔkɔ́ɔ wɔ́ pɔ́ tè pɔ̌g *lepʉ̌. Áa nò tá’ eshúm ntsèm té kẅéte. Áa nò ngie ngwɔ́ n gÿo kɔ̀ɔkɔ́ɔ té pɔ́g *lepʉ̌. Tá’ à lɔɔn ńgwɔ́ n ké lezẅíŋ atsɔ́ mmó lɔgɔ wɔ̀ɔn ńgÿo nkwɔɔn ye wɔ́.

¹³ Pi giŋé ně ńgɔɔn ngie: Mé la gÿo mmó lejÿó ńtí lepfòm, ńgÿo lepfòm ńtíi mmó lejÿó. Áa nò tá’ e Ssé ge gÿo tágte mmó lejÿó gwá’, é gíŋe tágte lepfòm. Mbɔɔ pú’u, ńgwɔ́ nyìŋ á lelɔg mbùm ye ńgÿo kɔ̀ɔkɔ́ɔ gie à kwǒŋ wɔ́, á nue mbùm nyìŋ ee ye Cʉ̀apʉ̀a, Cʉ̀apʉ̀a zɔ̌ líe nò náa mǒ.

¹⁴ Ndyɛ̌’ pi lege ngie e Ssé gẅie à la zíme Cʉ̀apʉ̀a nà legwé, à ge gÿo lɔg metʉ̀ mé é gíŋe zíme wégè yégè nà legwé.

¹⁵ Pi tè ne ńzsé ngie mbùm gi ée mekèm mbùm Kristo wɔ́ ka? N ge lɔgɔ kème mbùm Kristo lɔg gÿo kème mbùm káa tÿǒ manzwě lá? Ngǎŋ,

¹⁶ ńzsé ngie pi tè ne ńzsé ngie nyìŋ pɔ́ káa tÿǒ manzwě lɔɔn ńtemte, mbà pɔ́ ye cʉ́’ ńgwɔ́ pɔ́ tà’ mbùm nɛ́ wɔ́? Ŋwà’ne Ssé zɔɔn ńgɔɔn ngie: Pɔ́b mépʉ́a ge cʉ́’ gwɔ́ pɔ́ tà’ mbàb nnɛ́.

¹⁷ Tá’, nyìŋ gẅie à laa ye nɛ́ pɔ́ nà Cʉ̀apʉ̀a, pɔ́ yé cʉ́’ ńgẅiin pɔ́ tà’a Zẅìge.

¹⁸ Pi nyɛte ḿbɔ́ɔn lélɔg mbùm gi ńgÿo kɔ̀ɔkɔ́ɔ gie pi kwǒŋ. Metsɔ́ menò tepòŋ mie pʉ̀a mesoŋ gÿo, ée nà pɔ́b ńgwɔ́ pɔ́ nzème pǐ. Tá ńgwɔ́ gie nyìŋ lɔɔn ńdɔg mbùm ye ńgÿo kɔ́ wɔ́, mbà à sele ńgÿo nò tepòŋ pɔ́ ná ye.

¹⁹ Tsyee pi tè ne ńzsé ngie mbùm gi aa jʉ’e Zẅìge Ndʉalʉ̌a wɔ́ ka? Yɛ̌ Zẅìge á tsẅé tsoló, mbà Ssé la ná né pi. Pi zɔ tè gẅiin twó mbùm gí wɔ́.

²⁰ E Ssé la náa mmó ńdɔg fó ndá nkwɔɔn ńcu’u gẅi. Pi ké ńdɔg mbùm gi ńná mekù’ mbwo Ssé.