1 Korento 4 - Nouveau Testament en Ngienboum

Pafa’a fà’ Kristo

¹ Pú’u la, pi líe wég pá’ pafa’a fà’ Kristo mbɔɔ pá’ pʉ̀a pie pɔ́ gẅiin nò nà lekyɛ’té nò Ssé gie á laa lelyěen é shwóŋ pʉ̀a.

² Ammó gie mé ne ńzẅí’te mbwo pʉ̀a pie pɔ́ gẅiin nò nà fà’, á gwɔ́ pɔ́ ngie pɔ́ zsé pɔ́ ndà’ mmó gie mé zɛ́te ngie pɔ́ gÿo.

³ Á ké ńgʉa ná mèŋ, mbà á té ne ńgege wɔ̀ɔn pá’ à lɔɔn ńgwɔ́ pi gɔɔn nò nà fà’ yɔ́ɔn mɔ́. Kà pɔ́ tsɔ́ pʉ̀a mendyɛ̀’ɛ léńnéŋe ssé ńdíe nò ńnáa mǒ wɔ́. Kwà’ mèŋ, ńgwɔ́ n de zsé léshwóŋe nyìŋ pá’ fà’ yɔ́ɔn áa pú’u wɔ́.

⁴ Áa nénʉ́ ngie mbùm yɔ̀ɔn tè ne ńcúa wɔ̀ɔn nà tsɔ́ nò wɔ́. Tá mèŋ n tě ńdɔgɔ ńgɔɔn ngie atsɔ́ *lɔ̌’ té ná fà’ gie mèŋ n gÿo wɔ́ wɔ́. Cʉ̀apʉ̀a zɔ nyìŋ gẅie à gẅiin létsa’a fà’ yɔ́ɔn.

⁵ N dɔgɔ pú’u, shwóŋó gẅi ngie tà pi tʉ́ njÿó ńgɔɔn nò nà fà’a nyìŋ té gwɔ́ gie fʉ̀’ kǔ’. Té gwɔ́ gie Cʉ̀apʉ̀a tǒ. Yé zɔ ge gÿo kyɛ’ɛ kɔ̀ɔkɔ́ɔ wɔ́ gie áa tsɛ̀ɛ nzěm. À ge gÿo gÿo mé gyá ménkwaŋá mie ée tsɛ̀ɛ mentʉ́m pʉ̀a. E Ssé lêen ńké ńná ngɔ́ɔnte ye wɔ̌wɔ́ɔ nà ntí gie á ne ńzɛ́te ngie ngàŋ gẅiin.

⁶ Mefɛ́ pɔ́ɔn, mèŋ n gɔ̌ɔn nò ḿbiŋ ńda’te pá’ nò gie n gɔ̌ɔn áa ná mèŋ ńgwɔ́, mbɔɔ pá’ áa ná Apolos ńgwɔ́ pú’u. N da’te pú’u, pɔ́ lélɔg ńzí’i gẅi mmó. Mèŋ n kwǒŋ ngie pi fó ná peg ńzí’i mmó gie esag lekid gie e gɔɔn ngie: Mbɔ́ɔn nyìŋ légÿo mmó tà ńtɔ́gɔ gie mé la ŋwe’e, e lɔgɔ ńgɔɔn, ńdɔgɔ shwóŋó gẅi ngie nyìŋ gẅi à tè gẅiin lélɔg pá’ aa nzèm wetsɔ̌ nyìŋ ńŋá’te mvfò wetsɔ̌ wɔ́.

⁷ Akɔ́ zɔɔn ńgÿo ɔ̀ kwaŋ ngie ɔ̀ cʉ́a petsɔ́ pʉ̀a? Ɔ̀ gẅiin kɔ́ tà á té gwɔ́ pɔ́ gie e Ssé la ná né gù wɔ́? À lɔɔn ńgwɔ́ gie e Ssé la ná né gù nǎ, mbà ɔ̀ piŋe ńdɔgɔ ńŋá’te pɔ́ pá’ fʉ̀’ gie e Ssé la tè ná né gù nǎ wɔ́ mélà’a kɔ́?

⁸ Pi cʉ́’ʉ ńzɔ́gɔ ngie pi kéen ndá’ ḿbú ńgẅiin shúm ntsèm sie é ka ne ńzága mbwo pi. Pi kéen ndá’ ńcʉ́’ ngàŋa mmó ká? Pi kéen ḿvɔg ńcʉ́’ méfùɔ ńcʉa wég lá? Tá á kěen pé’e pi gwɔ́ méfùɔ, kwà’ nénʉ́, mbà á póŋo wɔ̀ɔn tɛ’, mbà à gwɔ̌ pɔ́ pege.

⁹ Mèŋ n ke ně ńgyá yɔ́ɔn ngie e Ssé ka gʉa ná peg megàŋ ntúm ńnáa yég jʉ’ á gwɔ́ pɔ́ nzsò nzèm. Pá’ pʉ̀a pie mé zǎ’ ntsaŋ yɔ́b tà ne ńdɔgɔ wɔ́b ńkwɔ́’ɔ né gÿɛ̌ pá’ mé ge zẅéte wɔ́b. Ngwòŋo ngwòŋ ne ńgyá, epʉ̀a mesoŋ mbɔɔ *mecÿɔ́’ Ssé ne ńgyá yɔ́b.

¹⁰ Anò Kristo kéen ńgÿo peg cʉ́’ mepʉ̀a. Tá ńké ńgʉa ná pi, mbà pi kéen ńcʉa ná Kristo ńzsé nò. Peg gwɔ́ mepepÿɛ́ɛ pʉ̀a. Pi gẅiin metʉ̀. Mé gÿo mekù’ mí, ḿbiŋ ńtóo ná peg ńgwága wég gwǎg.

¹¹ Enzyè ee zɔ́gɔ légyáŋa wég. Agága yég zɔ́gɔ léshÿó. Nzsǒ ma’ e tè wó wɔ́. Mé ee zɔ́gɔ pɔ́ lécúa wég. Atsɔ̌ le gwɔ́ gẅie ńgwɔ́ peg pʉ́le ńnéŋe tà’a jʉ’ à tè wó wɔ́.

¹² Kwà’ peg lɔg mbwó még é fa’a fà’ tà ńzi’i tá ńgẅiin yég mmó. Mé zóonte wég tá peg tsɔ́ɔn pɔ́ nò mbòŋo ná pʉ̀a. Mé kʉ́e wég peg tè zoŋ.

¹³ Mé shwóŋó té poŋ nà lezíŋ ség, peg lɔg pɔ́ shwóŋè mbòŋo ḿbÿɛ. Tà ńkú fʉ̀’ɔɔn mé líe wég ńgyá peg gwɔ́ pɔ́ pá’ kʉ̀ŋe sie ée tsɛ̀ɛ njÿó, ńgwɔ́ pɔ́ pá’ mefùbe sẅɛ̀ɛ mie ée tsetsɛ̀ɛ pʉ̀a mesoŋ.

¹⁴ N kě tě ŋwe’e yɔɔn nò ńdɔgɔ ńtéme pɔ́ shʉ́ ná pi wɔ́, n dɔgɔ ńzí’i gẅi pɔ́ mmó, á nue pi ee pènkʉ́ pɔ́ɔn pie mèŋ n kwoŋo gẅi tɛ’.

¹⁵ Pi zɔɔn ńgẅiin pʉ̀a pie pɔ́ zí’i gẅi nò Kristo tà é fó ńgwɔ́ pɔ́ ntsá’ legém, mbà metá pí té gyɔ́ɔn gyɔ́ɔn wɔ́. Mèŋ n zɔ tá gẅi á nue mèŋ n zɔ ka tǒ ńtsẅi nkʉ̀ mbòŋo mbwo pi, tá pi la nnɛ́ ná Yěsô Kristo.

¹⁶ Pú’u la n dɔgɔ ńgɔɔn mbwo pi ngie, pi pí fʉ̀’ ná mèŋ.

¹⁷ N gwɔ̌ túmo Timoté né pi ńtí pɔ́ pú’u. Aa nà nò Kristo ńgwɔ́ míŋ wɔ̀ɔn mie n kwoŋo yé tɛ’. À zsé pɔ́ ndà’ nò Cʉ̀apʉ̀a. Á ge tó kímte gẅi mmó gie n zí’i pʉ̀a á nà legiŋe nzèm Kristo pɔ́ kwà’ pá’ mèŋ n ne ńtóo nzɔ̌ nzɔ̌ tsɛ̀ɛ mecú’tè pʉ̀a Kristo ńzí’i pʉ̀a.

¹⁸ Etsɔ́ pʉ̀a tsetsɛ̀ɛ pi ka kwaŋ ngie n tè lá’ gíŋe tó tà gyá gẅi wɔ́, ńkwaŋ pú’u, ńzye léŋá’te.

¹⁹ Tá’ Cʉ̀apʉ̀a lɔɔn ńzẅíŋ, mbà mèŋ n ge tɔ́g tó gyá gẅí. E tó pú’u, ńde líe nò pɔ́ ndà’ nà shwóŋó gie pɔ́ sěen ńtáŋte ńgɔɔn mbwo lá’ gwɔ́, n gíŋe fa’a le zsé mmó gie pɛ̌ megàŋa ŋá’tè ku’u légÿo.

²⁰ Á nue anò *lefùɔ Ssé, á té gwɔ́ léseen ńtáŋte shwóŋè ńgɔɔn wɔ́, metʉ̀ Zẅìge Ndʉalʉ̌a zɔ̌ fa’a fà’.

²¹ Pi gʉa nà menò mɔɔn mémbʉ́a ńkaŋa gí. Pi kwǒŋ ngie n gwɔ tóo tsetsɛ̀ɛ pi ńgẅiin pɔ́ ngwɔɔn kà mèŋ n gwɔ tó ntʉ́m wɔɔn ne ḿboŋo poŋ, n ne ńkwoŋo gẅi kwoŋ?