1 Korento 11 - Nouveau Testament en Ngienboum

¹ Pi gwɔ́ pʉ̀a pie pi píi fʉ̀’ ná mèŋ, ndʉŋ ndʉŋ pá’ mèŋ m bíi fʉ̀’ ná Kristo.

Mà gẅie á zɛ́te ngie mecú’tè pʉ̀a Kristo gẅiin

² Mèŋ n nǎ ngɔ́ɔnte gi pá’ pi tyé nà yɛ̌ nò wɔ́, ńkímte wɔ̀ɔn kimté. Mbɔɔ pá’ pi ne ńcwoŋo ńkú’te mà gẅie n da zí’i gẅí.

³ Áa mbòŋ tá’, ammó ké nyé wó gie n ne ńkwoŋo ngie pi zsé mboŋó. Nyìŋ gẅie à gẅiin nyìŋ mbàŋa ntsèm aa Kristo, nyìŋ gẅie à piŋ ńgẅiin manzwě aa mámbàŋa, nyìŋ gẅie à gẅiin Kristo aa Ssé.

⁴ Nyìŋ mbàŋa lɔɔn ńgwaa sẅíŋte Ssé, kà ńgwaa tsẅi nkʉ̀ gẅie é fóo mbwo Ssé wɔ́, ńdɔgɔ mmó ḿbwoon twó yé, mbà à lɔgɔ ńcʉŋe nzẅìŋ Kristo gẅie à gẅiin yé.

⁵ Tá manzwě gẅie à gwaa sẅíŋte Ssé, kà ńgwaa tsẅi nkʉ̀ gẅie é fóo mbwo Ssé wɔ́, à tè lɔgɔ mmó ḿbwoon twó yé wɔ́, à lɔgɔ pú’u, ńcʉŋe nzẅìŋ ndǔm we gẅie à gẅiin yé, à tyé fʉ̀’ó ńgwɔ́ pɔ́ pá’ manzwě gẅie mé zẅagá twó yé la.

⁶ Manzwě gẅie à kaa lɔgɔ mmó ḿbwoon twó yé wɔ́, à zẅag. Tá’ pà’ áa mbwó manzwě ńgwɔ́ nò shʉ́ pá’ à lɔɔn ngwɔ́ à twó yé gwɔ́ ye ńzẅag kà ye nkwǒon wɔ́ la, à pwoon twó yé.

⁷ Á gʉa ná mámbàŋa, à tè gẅiin légwɔ tsyɛ’te Ssé, ḿbwoon twó yé wɔ́, mélà’mie à sẅé Ssé. Mé líe yé ńgyá legú’ Ssé. Tá ńgʉa ná manzwě, mbà mé líe yé ńgyá pɔ́ legú’ mámbàŋa,

⁸ á nue e Ssé la fó pɔ́ ná mámbàŋa ḿbwóon manzwě. À la tè fó pɔ́ ná manzwě ḿbwóon mámbàŋa wɔ́.

⁹ E Ssé la piŋ tè pwóon mámbàŋa ńtí manzwě wɔ́. À la pwóon pɔ́ manzwě ńtí mámbàŋa.

¹⁰ Áa mmó gie á gÿó manzwě gẅiin lépwoon twó yé, ńdɔg ńnyɛ ngie à ná nnɛ́ ssé á mvfò ndúm we. Pú’u, ńtí *mecÿɔ́’ Ssé.

¹¹ Á ké ńgwɔ́ pú’u tá’, ńgʉa ná pá’ pege la nnɛ́ ná Cʉ̀apʉ̀a, ńgwɔ́ manzwě le gɔɔn ngie pɔ́ mámbàŋa ée té nò wɔ́. Mámbàŋa ké le gɔɔn ngie pɔ́ manzwě ée té nò wɔ́.

¹² Tà mbɔɔ pá’ e Ssé la fó pɔ́ ná nyìŋ mbàŋa ḿbwóon manzwě, manzwě zɔ kě ńzyé mámbàŋa. Ngwòŋo nò ntsèm piŋe fóo pɔ́ mbwo Ssé.

¹³ Pi sáŋ gí tá ńjú’. Tà áa pé’e ńgwɔ́ mbòŋ ngie manzwě sẅíŋte Ssé tsɛ̀ɛ cú’tè pʉ̀a Kristo té pwoon twó yé?

¹⁴ Mé ée nzɔ̌ nzɔ̌ ńzsé ngie áa nò shʉ́ mbwo mámbàŋa létsẅɛ́’ɛ twó tà á sag sag.

¹⁵ Tá letsẅɛ’ɛ́ twó tà á sag sag ké ńgwɔ́ mbwo manzwě ńgwɔ́ pɔ́ nò mekù’, á nue Ssé la gÿo menòŋo twó manzwě sag sag, ńgwɔ́ pá’ mmó gie á pwoon twó yé la.

¹⁶ Nyìŋ lɔɔn ńké ńgyá ngie à ge zoŋo nò náa ná yɔɔn nò, mbà peg tè gẅiin mà we ndyɛ̀’ɛ wɔ́. Mecú’tè pʉ̀a Ssé ké tè gẅiin mà we ndyɛ̀’ɛ wɔ́.

Anò ná lejÿǒ shúm léjÿó Cʉ̀apʉ̀a

¹⁷ Atsɔ́ nò gíŋe ńgwɔ́ ssé gie n ge gɔɔn nò mǒ fʉ̀’ɔɔn. Á gwɔ́ gie pi ne ńgÿo á téen ḿboŋo wɔ̀ɔn mɔ́. Pi ne ńkúu mecú’tè mí, á cʉ́’ʉ légwɔ́ gie nò mbòŋo á kɔ’ɔ́ kẅɛɛ wó, à ye tepòŋ zɔ̌ kẅɛɛ.

¹⁸ Á gʉa nà menò mie ée ssé, andùŋ mvfò nò aa pá’ n ka jǔ’ ngie pi ńnéŋe ssé tsɛ̀ɛ cú’tè gí, éfagte menùɔ menùɔ, ńgwɔ́ mèŋ n gyá ngie áa gǎ wɔ́, é gwɔ́ pɔ́ nò.

¹⁹ Áa nénʉ́ ngie pi gwɔ́ tà fagte menùɔ menùɔ, mé fó mǒ ńgyá pʉ̀a pie pɔ́ té kwoŋo fàgte wɔ́.

²⁰ N dɔgɔ ńgyá ngie pi kúu tsɛ̀ɛ cú’tè, ńgwɔ jÿó shúm léjÿó Cʉ̀apʉ̀a, nkwaŋá gẅi té tyé ná yé wɔ́.

²¹ N gɔɔn pá’ɔɔn, á nue afʉ̀’ʉ léjÿó gwɔ́ tà ńku’, awɔ̌wɔ́ɔ sẅɛte ńnéŋe ssé, ńjÿó sé shúm sie à ně ńdɔg ńtó. Tà mé gyá petsɔ́ pʉ̀a gwɔ ńnéŋe nzyè, mbà petsɔ́ pʉ̀a é nǔ tà ḿbʉ́a

²² Pi te gẅiin mendá mí léńnéŋe wó, ḿpfɛ̂ mmó, ḿbiŋ ńnú wɔ́ ka? Kà pi kwoŋo pɔ́ lélɔg shʉ́ ńkú pʉ̀a pie pɔ́ té mmó léjÿó gẅiin, ńdɔgɔ pú’u ńgwága cú’tè pʉ̀a Kristo? Pi gɔɔn ngie mèŋ n gɔɔn né pi ngie kɔ́? Ngie n ná ngɔ́ɔnte gi la? Ngǎŋ! Kwà’ nénʉ́, à lɔɔn ngwɔ́ n de ngɔ́ɔnte gi ná.

²³ N da ké ńzí’i gẅi mmó gie mèŋ n zɔ la jú’u mbwo Cʉ̀apʉ̀a, á gwɔ́ ngie: Á laa letsẅɛ́’ gẅie mé la sẅiŋe Cʉ̀apʉ̀a Yěsô, á pí mbelég,

²⁴ ńná ndǎg mbwo Ssé, ḿbwɔ́’ ńgɔɔn ngie: Yɔɔn ee mbùm nnɛ́ yɔɔn mie mé náa ná twó sí. Pi cʉ́’ ńne ńgÿo pá’ɔɔn ńdɔgɔ ńkímte wɔ̀ɔn.

²⁵ Pɔ́ jÿó mmó tà ńtsẅé jʉ’, á gíŋe ńkaa ntú’ ńgɔɔn ngie: Ntú’ yɔɔn ee pá’ɔɔn ńgwɔ́ *kʉ̀a sẅé gie e Ssé lɔgɔ metse mɔ́ɔn ńgwaa. Pi cʉ́’ ńne ńgÿo pá’ɔɔn, ńdɔgɔ ńkímte wɔ̀ɔn fʉ̀’ ntsèm gie pi ge gÿo ne núu.

²⁶ Pi zsé ngie ngwòŋ fʉ̀’ ntsèm gie pi pfɛ̌ yɔɔn mbelég, ńgíŋe ńnú yɔɔn ntú’, pi lɔgɔ pú’u ésá’a ngie Cʉ̀apʉ̀a la kwé, é ké lá’a sá’a pɔ́ pú’u, tà lá’ kú lyɛ̌’ gie à ge lá’ gíŋe tó.

²⁷ Áa mmó gie á gÿo mé gɔɔn ngie nyìŋ lɔɔn ḿpfɛ́ mbelég Cʉ̀apʉ̀a, kà ńnú pɔ́ ntú’ ye nê ngwág wɔ́, mbà ngàŋ fʉ̌a nò ná mbùm nnɛ́, mbɔɔ nà metse Cʉ̀apʉ̀a.

²⁸ Pú’u lá, awɔ̌wɔ́ɔ tsa’ mbùm ye. Tá ńdeen ńké ḿpfɛ́ yɔɔn mbelég ḿbiŋ ńnú yɔɔn ntú’,

²⁹ á nue nyìŋ lɔɔn ḿpfɛ́ mbelég, ńnú tú’, té ne ńkímte mmó gie é lɔgɔ ńgɔɔn, mbà ngàŋ lɔgɔ ńtóŋte ntsaŋ ńnéŋe ná ye.

³⁰ Áa mmó gie á gÿó tá pʉ̀a tà ńgyɔ́ɔn gwɔ́ tsetsɛ̀ɛ pi, ńgwɔ́ mé guɔ. Petsɔ́ gwɔ́ menkǒon, mbà petsɔ̌ léen ńkwéte.

³¹ Pege laa pé’è ḿvɔg ńtsa’ mbùm yege, mbà à lɔɔn ngwɔ́ pege lÿɔ́’te tà pege é le gwe nà ntsaŋ mvfò Ssé wɔ́.

³² Tá Cʉ̀apʉ̀a à ŋaga wégè, ńdɔgɔ ńtÿɔ́gte wégè, ḿbɔ́gɔ pá’ à lɔɔn ngwɔ́ mé lá’ ńteme wég laa pʉ̀a njÿó ńŋag.

³³ Pú’u la, mbà mefɛ́ pɔ́ɔn, pi lɔɔn ńgwɔ́ fʉ̀’ gie pi cu’té léjÿó shúm, pi pyɛ́b petsɔ́ pʉ̀a.

³⁴ Nzyè lɔɔn ne ńgyáŋa nyìŋ, á gwɔ́ fó mbʉ̀a yé, ḿvɔg ńjÿó mmó, légwɔ́ gie pi tè gʉa jʉ’ gie pi cú’te wó, étóŋte pɔ́ ntsaŋ gie Ssé ge ŋaga gẅi ŋag wɔ́. Á gʉa ná metsɔ́ menò, mbà mèŋ n ge gÿo tó tá nyɛte.