1 Jâŋ 2 - Nouveau Testament en Ngienboum

Kristo ge tó kẅéte wégè

¹ Epúɔ mémá pɔ́ɔn, mèŋ n ŋwe’e mɔɔn menò légwɔ́ gie pi ge gẅiin shÿó tà pi le gÿo nò tepòŋ wɔ́. Tá ńgwɔ́ gie nyìŋ gÿo nò tepòŋ, mbà pege gẅiin wege nyìŋ lejʉ́ŋ Tá, á gwɔ́ Yěsô Kristo, yé gẅie aa ndʉŋ ndʉŋ mvfò Ssé.

² À la zɔɔn ńdɔgɔ twó yé, ńnuŋe pwɔ́’ pá’ à lɔɔn ńgwɔ́ e Ssé lege menò tepòŋ mégè. Pá’ à lɔɔn ńgwɔ́ á le lege pɔ́ ndà’ mégè wɔ́, pá’ ńgwɔ́ á gíŋe ńdege me pʉ̀a mesoŋ ntsèm tsɛ̀ɛ njÿó.

³ Pege lɔɔn ńgÿo mmó gie Ssé ne ńtsẅii né pege, mbà wɛ̌ légwɔ́ ge nyɛɛ wégè ngie pege zsé Ssé

⁴ Nyìŋ gẅie à gɔɔn ngie: «Mèŋ n zsé yé» Tá ńké tè mbʉ̌ mé kú’te, mbà ngàŋ aa ngàŋa cÿɔ nò, anò nénʉ́ gie á fó mbwo Ssé lɔgɔ tě ńgwɔ́ tsɛ̀ɛ ntʉ́m ngàŋ wɔ́.

⁵ Tá nyìŋ gẅie à kú’te shwóŋè Ssé, aa nyìŋ gẅie à kwa’ ńkwoŋ Ssé tà shwóŋó nò. Wɔɔn aa pá’ pege lɔg ńzsé ngie pega Ssé léen ńtemte.

⁶ Nyìŋ lɔɔn ńgɔɔn ngie: Peg Ssé léen ńtemte, á zɛ́te ngie ngÿǒ menò mé gwɔ́ pá’ me Yěsô Kristo laa pú’u.

Lepʉ̌ se sẅé

⁷ Meshǔ pɔ́ɔn pe tʉ̀ nzẅìŋ, sɔɔn té gwɔ́ pɔ́ *lepʉ̌ sẅé sie mèŋ n ŋwe’e fʉ̀’ɔɔn ńnáa né pi wɔ́, à gwɔ́ pɔ́ nzẅìŋe *lepʉ̌ gẅie pi ne ńzsé tà fó nzyeté, wɛ̌ nzẅìŋe *lepʉ̌ à gwɔ́ pɔ́ shwóŋè gie pi la jú’.

⁸ Tà mbɔɔ pú’u, *lepʉ̌ sie mèŋ n ŋwe’e ńnáa né pi, ée pá’ɔɔn, ńké ngwɔ́ se sẅé, ée se sẅé ńcʉa nà mmó gie mé ne ńgyá ná Kristo mbɔɔ ná pi gí. Pi zɔɔn ńgyá pá’ nzěm ne ḿmaga, tà mbà kwà’ kyɛ̀’ zyě lékyɛ’ jʉ’.

⁹ Nyìŋ gẅie à gɔɔn ngie ngÿǒ menò mé ee me jʉ’e fɔ̌g, ḿbiŋe ne ḿbʉa fɛ́ we, ngàŋ lɔgɔ ńnyé ńgwɔ́ pɔ́ tsɛ̀ɛ nzěm.

¹⁰ Nyìŋ gẅie à kwoŋo fɛ́ we, aa nyìŋ gẅie ngÿǒ menò mé ée me jʉ’ʉ fɔ̌g. À lɔɔn ńgwɔ́ á le kwɔɔnte nà tsɔ́ mmó ńgwe ssé wɔ́.

¹¹ Tá nyìŋ gẅie à pʉa fɛ́ we, aa nyìŋ gẅie ngÿǒ menò ée me tsɛ̀ɛ nzěm, á giŋe tsɛ̀ɛ nzěm, ńké tè ne ńzsé jʉ’ gie à gee né wó wɔ́, mélà’mie nzěm léen ńgÿo á fʉ̀.

¹² Penkʉ́ pɔ́ɔn, mèŋ n gee tsɛ̀ɛ yɔɔn ŋwà’ne, ńne shwóŋó gẅi ngie e Ssé cʉa nà mmó gie Yěsô Kristo la gÿo, ńdege menò tepòŋ mí ńná né pi.

¹³ N ne shwóŋó gẅi melÿò ngie: Pi ee pɛ́’ɛ̀ ńne zsé Nyìŋ gẅie aa wó tà fó nzyeté, ńne shwóŋó gẅi pûɔ shum ngie pi kéen ńtʉ ńcʉa nyìŋ tepòŋ.

¹⁴ Penkʉ́ pɔ́ɔn, mèŋ n gee pá’ɔɔn ńne ńŋwe’e shwóŋó gẅi ngie pi ne ńzsé Tá wege, ńgʉa ná pi melÿò, mbà mèŋ n gee pá’ɔɔn ne shwóŋó gẅi ngie pi ne ńzsé nyìŋ gẅie aa wó tà fó nzyeté, ńgʉa ná pi pûɔ shum, mèŋ n ne shwóŋó gẅi ngie, pi ne ńtʉte tʉte, ashwóŋè Ssé ké ńgwɔ́ pɔ́ ntʉ́m pi, pi kěen ńtʉ̀ ńcʉa nyìŋ tepòŋ.

¹⁵ Tà pi tÿɔ́g nÿɔ́g mí nà njÿó, tà pi tÿɔ́g nÿɔ́g nà shúm sie ée tsɛ̀ɛ njÿó. Nyìŋ lɔɔn ńkwoŋ njÿó, mbà à tè ne ńkwoŋo Ssé Tá wɔ́,

¹⁶ á nue àkɔ́ɔkɔ́ɔ gie áa tsɛ̀ɛ njÿó, pá’ shúm sie mbùm nyìŋ tsóte yé á tsɔ́ɔn, pá’ shúm sie nyìŋ záb lejÿɔ́g mǒ ńtsɔ́ɔn légẅiin, mbɔɔ shúm sie pʉ̀a mesoŋ lɔgɔ ńŋá’te, sɛ̌ shúm téen fó mbwo Tá wege wɔ́, éfó pɔ́ tsɛ̀ɛ njÿó.

¹⁷ Njÿó zɔɔn ńgwɔ́ ssé ne ńcʉa cʉa, tà mbɔɔ shúm sie pʉ̀a mesoŋ ne ńgyá tsɛ̀ɛ njÿó ńtsɔ́ɔn légẅiin. Tá nyìŋ gẅie à gÿo mmó gie Ssé ne ńkwoŋo, à ge gwɔ́ pɔ́ wó fʉ̀’ ntsèm.

Ngàŋ mbù Kristo

¹⁸ Penkʉ́ pɔ́ɔn, afʉ̀’ʉ nzsònzèm ne ńku’u. Pi la jú’ mé gɔɔn ngie, angàŋ mbù Kristo ge lá’ tó. Áa fʉ̀’ɔɔn, mbà megàŋ mbù Kristo kěen ńtó tà ńgyɔ́ɔn gyɔ́ɔn. Áa mmó gie á gÿǒ pege zsé ngie à fʉ̀’ʉ nzsònzèm ne ńku’u.

¹⁹ Megàŋ mbù fǒ pɔ́ tsɛ̀ɛ cú’tè yégè ńkẅɛ ńgʉa. Pɔ́ ka zɔ̌ɔn tè pʉ̀a pégè wɔ́. Pɔ́ kaa pé’è ńgwɔ́ pʉ̀a pege, mbà pɔ́ ka zso tsetsɛ̀ɛ pege. Tá’, á ka kě ḿboŋ ngie à kẅɛ pɔ́ pú’u, ná pɔ́b, áwɔ̌wɔ́ɔ gyá ngie pɔ́ ka tè pʉ̀a pege wɔ́,

²⁰ ńgʉa ná pi, mbà Kristo ka náa Zẅìge Ndʉalʉ̌a né pi. Áa mmó gie á gÿo pi métsèm zsé nò nénʉ́.

²¹ Mèŋ n ka gwaa ŋwe’e ŋwà’ne ná né pi mèŋ n tě ńdɔgɔ ńgɔɔn ngie pi tè ne ńzsé nò nénʉ́ gwɔ́ wɔ́. Á gwɔ́ pɔ́ nò gie pi ne ńzsé. Pi giŋé ńne ńzsé ngie, etsɔ́ cÿɔ nò lɔɔn ńgwɔ́ é le tsɛ̀ɛ nò nénʉ́ kẅɛ.

²² Angàŋa cÿɔ nò aa wɔ̌? À tè gwɔ́ pɔ́ nyìŋ gẅie à gɔɔn ngie Yěsô tè *Nzà’nkÿo wɔ́ le? Aa ngàŋ mbù Kristo, ńgwɔ́ nyìŋ gẅie à gwaa lʉ’ʉ nò Tá, ńdʉ’ mbɔɔ ye Múɔ.

²³ Nyìŋ lɔɔn ńdʉ’ʉ lézẅíŋe nò Múɔ, mbà à lʉ’ʉ lézẅíŋe nò Tá wege, nyìŋ gẅie à zẅiŋé nò Mùɔ, à giŋé ńzẅíŋe ye Tá wege.

²⁴ Áa mmó gie á gÿo mèŋ n gɔɔn mbwo pi ngie pi kú’te shwóŋè gie pi la jú’ tà fó nzyeté kwà’ mboŋó. Ashwóŋè gie pi la jú’ tà fó nzyeté lɔɔn ńgwɔ́ tsɛ̀ɛ ntʉ́m gẅí, mbà pi gí ge temte ná Múɔ mbɔɔ ná Tá.

²⁵ Kristo la ka’a mbwo pege ngie, pega Ssé ge lá’a gwɔ́ pɔ́ fʉ̀’ ntsèm.

²⁶ Yɔɔn áa mmó gie n kě ne fa’a léshwóŋó gẅí, ńtí pʉ̀a pie é fa’a léfʉte gẅi pi fʉa mánzsè,

²⁷ ńgʉa ná pi, mbà Kristo la náa Zẅìge yé né pi. Yɛ̌ Zẅìge piŋ ńké ńne ńgwɔ́ ná pi, áa mmó gie á gÿo, á té ne ńzɛ́te ngie nyìŋ mesoŋ zí’i gẅi mmó wɔ́, á nue Zẅìge Ndʉalʉ̌a ne ńzí’i gẅi kɔ̀ɔkɔ́ɔ, ammó gie á la’te piŋ ńgwɔ́ nénʉ́, é té cÿɔ̌ nò wɔ́. Pú’u la, pi ké ńda pɔ́ nnɛ́ ná Kristo pá’ Zẅìge Ndʉalʉ̌a la zí’i gẅí.

²⁸ Pá’ áa pú’u la, mbà penkʉ́ pɔ́ɔn, pi ké ńda nnɛ́ pɔ́ ná Kristo, ńzsé ngie á ge lá’a lyɛ̌’ gie à kẅɛ̌, pege é le tsɔ́ mmó pɔ́g, ntʉ́m wégè pú le cÿɔ’ɔ nà tsɔ́ mmó wɔ́. Á gwɔ́ lyɛ̌’ó, pege é le tyé mvfò yé eshʉ́ kúu wégè wɔ́.

²⁹ Pi ne ńzsé ngie Kristo gÿo mmó gie áa ndʉŋ ndʉŋ mvfò Ssé, pú’u la pi gíŋe ńzsé ngie nyìŋ lɔɔn ńgÿo mmó gie áa ndʉŋ ndʉŋ mvfò Ssé, mbà à ge cʉ́’ʉ míŋ Ssé.