Zaki 5 - Fana Ngbangɔ 1987

Zaki atisa awa nwa

¹ Na olo ko, ĩ awa nwa, ĩ ma mbi: ĩ to to, í dema nga tɛrɛ ĩ na lo pɛnɔ mɛ ĩ na hũngɔ!

² Nwa tɛ ĩ azɔ̃zɔ̃, akangi atɛ nga bɔngɔ tɛ ĩ.

³ Sɔ atɛ faranga tɛ ĩ. Sɔ ni afa ya, ĩ na luangɔ tɛnɛ, ko sɔ ni nga na tɛngɔ mi tɛrɛ ĩ, nga ma se mɛ wá ndogbiri na ye. Sese angbã yakere ti wɛngɔ, ko ĩ kɛ̃ kia ĩ ndobo faranga duru duru.

⁴ Ta ĩ ndofuta nzɛ̃ tɛ awa kwa mɛ ndoli kwa ka le yaka tɛ ĩ ma. Ĩ ma demangɔ tɛ la hĩ! Azi mɛ ndokɔ tɛ tɛ ĩ ka yaka ndodɛrɛ kɔngɔ, ko kɔngɔ ni anɔ ngbĩi ati ka ma Gbia Nzapa mɛ lombe.

⁵ Ge lɛ sese ko, ĩ ndodu na ya anzɔ̃nzɔ̃ ye, ko ĩ ndoli nga ye na se gwɛ̃ ti tɛrɛ ĩ. Ĩ ndotɛ ye sĩ, ĩ kokɛnɛ nga ma abagara mɛ agwe na la ti kpɔngɔ la tɛngɔ.

⁶ Ĩ ndofa ngbanga ĩ bi li zo mɛ ta ali ye kɔi ma, ĩ ho lo, ko ta lo kɛ̃ lo ti tɛrɛ lo ma.

Lo gbengɔ bɛ nga na lo vɔrɔngɔ Nzapa

⁷ Aya bua, na lo ni ko, ale ĩ ndogbe bɛ ĩ, nga ka gbanda Gbia Yezo aga na ni. Ĩ ba wa lungɔ yaka hĩ! Lo ndogbe bɛ lo, lo ku ya, yaka tɛ ni ahɛ̃ nzɔ̃ tɛ. Lo ndogbe bɛ lo ngbĩi, nga ka kɔzo ngu na ndangba ngu ti zongo ani.

⁸ Ĩ gbe nga bɛ ĩ, í du na mimi bɛ, ta sanga ma, gangɔ tɛ Gbia adoli.

⁹ Aya bua, ta ĩ dema tɛrɛ ĩ na ili afɔ̃ ĩ ma, so Nzapa afa ngbanga tɛ ĩ. Wa fangɔ ngbanga adoli ti gangɔ, lo la nyɔ ngise.

¹⁰ Aya bua, ĩ da bɛ ĩ na awa pangɔ nyɔ Nzapa mɛ ndo atɛnɛ tɛnɛ tɛ Gbia Nzapa. Ale ĩ mu la nga ma awa fangɔ ĩ na nzɔ̃ lɛ lo ti gbengɔ bɛ na ya pɛnɔ.

¹¹ E ndopa ya, ala awa dengɔ bɛ, na lo mɛ ya, ala gbe ndo bɛ la sĩ. Ĩ ma ndo pa ti gbengɔ bɛ tɛ Yɔbɔ, ko ĩ hĩnga nga ye mɛ ndo Gbia Nzapa ahɛ̃ lo na pɛni. Ta sanga ma, vundu bɛ Nzapa sĩ, ko bɛ lo nga nzɔ̃ni ma wo ma.

¹² Aya bua, uzu ti aye zu ko, ta ĩ nyɔ ngɛ na ili yayu, bere na ili sese ma, ta ĩ nyɔ nga ngɛ na kɔdɛ mɛ ndẽ ma. Ĩ nɛ bo ndũ ya: “Ĩi” se adu ya ĩ ye, bere “Ipɔ” se adu ya ĩ ke, so ĩ ti na ngbanga tɛ Nzapa.

¹³ Se mbanga zo na popo tɛ ĩ ahũ pɛnɔ ko, ale lo vɔrɔ Nzapa. Se mbanga adu na dengɔ bɛ ko, ale lo ye bia ti gondangɔ na Nzapa.

¹⁴ Se mbanga zo na popo tɛ ĩ agã ngã ko, ale lo ili akangba ti Eklezia, ala sambela Nzapa na lo tɛ lo, ko ala do nga kpɔ̃ tɛrɛ lo na ili Gbia Yezo.

¹⁵ Se ala sambela, ala hĩnga ya, Gbia Nzapa ama sambela tɛ ani ko, lo na sarangɔ wa ngã ni, ko lo nga na kangɔ lɛ lo ndo siɔ ye mɛ wa ngã ko ali.

¹⁶ Ale ĩ pa siɔ ye tɛ ĩ hɛ̃ afɔ ĩ awa Kristo, ĩ sambela na lo tɛ la, ala sambela nga na lo tɛ ĩ, wa se mɛ Nzapa asara ĩ la. Ta sanga ma, sambela mɛ bɛta zo ndosambela na bɛ lo kɔi ko, andodu na nguru sĩ.

¹⁷ Elia ndo zo nga ma se tɛ e: lo sambela ndo kpengbani ya, ta ngu ani ma. Ko aɔ buru ta na nzɛ̃ mana ko, ta ngu ani ndo ge lɛ sese ma.

¹⁸ So pɛni, lo ti sambela, ngu ani, la sese ahɛ̃ tɛ.

¹⁹ Aya bua, se mbanga zo kɔi na popo tɛ ĩ, adɔ bɛta lege tɛ Nzapa azia, ko zo mɛ ndɛ̃ adiri na lo da ko,

²⁰ ĩ hĩnga ya: zo ko la aha wa lingɔ siɔ ye na siɔ lege mɛ lo da, adiri na lo na nzɔ̃ lege ko, zo ni ko aso tɔrɔ tɛrɛ wa lingɔ siɔ ye, ko Nzapa nga na kangɔ lɛ lo ndo asiɔ ye ma wo ma mɛ wa lingɔ siɔ ye ko ali.