Zaki 4 - Fana Ngbangɔ 1987

Yengɔ aye ti lɛ sɛsɛ

¹ Nda to mɛ ĩ ndotiri, nga na nda pa mɛ ĩ ndopa na popo tɛ ĩ nɛ? Adu na lo ti asiɔ gwɛ̃ ti tɛrɛ ĩ!

² Ĩ ndosepara luaiigɔ ye, ko ĩ ndoha luangɔ ni gba, na lo ni la, bɛ ĩ ndongbã ngbũ ya ĩ ho afɔ̃ ĩ. Gwɛ̃ ti luangɔ ye ndogbɔ̃ ĩ, ko ta ĩ ndolua ni ma, nda mɛ andoti pa, andoti nga to na popo tɛ ĩ la. Ta ĩ ndolua ye mɛ ĩ ye ma, na lo mɛ ya, ta ĩ ndoyɔ ni ka ti Nzapa ma.

³ Ko se ĩ yɔ ye ka ti lo ko, ta ĩ ndolua ni ma, ta sanga ma, ĩ ndoyɔ ni na lo ti siɔ gwɛ̃ tɛ ĩ. Ye mɛ ĩ ndoyɔ ko, ĩ ndoyɔ ya, ĩ li na ye mɛ bɛ ĩ nvɛni alengbi ti dengɔ na lo ni.

⁴ Ĩ awa wezangɔ ló, ta ĩ hĩnga ya, zo ko la bɛ lo ndoye aye ti lɛ sese ko, lo wa kɛ̃ngɔ Nzapa ma? Biani, zo ko la bɛ lo ndoye aye ti lɛ sese ko, wa kɛ̃ngɔ Nzapa la.

⁵ Buku tɛ Nzapa apa ya: “Nzapa ndoli sɔbɛrɛ na lo ti Tɔrɔ mɛ ndo lo kpã ya tɛrɛ e.” Ta ĩ da bɛ ĩ ya, tɛnɛ ko Buku atenɛ ko adu gɛgɛrɛ ma!

⁶ Kanda Nzapa ti ndoli kota nzɔ̃ bɛ hɛ̃ e, ta sanga ma, Buku tɛ lo apa ya: “Nzapa ndokɛ̃ awa yakɛ, ko lo ndoli nzɔ̃ bɛ hɛ̃ azi mɛ ndongara tɛrɛ la.”

⁷ Na lo ni ko, ale ĩ ngara tɛrɛ ĩ hɛ̃ Nzapa, ĩ kɛ̃ Satana, wa Satana akpɛ ĩ agwe yɔngɔrɔni.

⁸ Ĩ fɔ̃ tɛrɛ ĩ na Nzapa, wa Nzapa afɔ̃ nga tɛrɛ lo na ĩ. Ĩ awa lingɔ siɔ ye, ta ĩ ti li siɔ ye ma. Ĩ azi mɛ nyɔ ĩ se se, ĩ lɛkɛ bɛ ĩ!

⁹ Ale ĩ du na vundu, í to to, í dema tɛrɛ ĩ, ĩ zia ngia, ko í to to, í zia nga dungɔ na dengɔ bɛ, í du na vundu.

¹⁰ Ĩ ngara tɛrɛ ĩ hɛ̃ Gbia, wa gbanda ko, lo ya ĩ ndozu.

Ta ĩ fa ngbanga tɛ afɔ̃ ĩ ma

¹¹ Aya bua, ta ĩ dingbi ma. Zo ko la adi nyita lo wa Kristo, bere afa ngbanga tɛ lo ko, afa ya, lo bi ndia, ko lo fa nga ngbanga tɛ ndia la. Kanda se mɔ fa ngbanga tɛ ndia ko, ta mɔ ti de wa tɔndɔngɔ ndia ma, mɔ ti wa fangɔ ngbanga tɛ ndia.

¹² Bo Nzapa kɔi la wa lungɔ ndia, bo lo kɔi la wa fangɔ ngbanga. Bo lo kɔi la lo lengbi ti songɔ azi, bo lo kɔi nga la lo lengbi ti kpɔngɔ la. Mɔ zo ko la mɔ ndofa ngbanga tɛ afɔ̃ mɔ ko, mɔ ndomu tɛrɛ mɔ ya, mɔ na?

Ĩ zia yakɛ

¹³ Ĩ azi mɛ ĩ ndopa ya: “Ndɛ bere ndã, e na nɔngɔ ka kɔdɔrɔ ko kɛpakala, e na lingɔ kai buru kɔi, e na dɛngɔ buze, ko e na luangɔ faranga da” ko, na olo ko, ĩ ma mbi kpa.

¹⁴ Ta ĩ hĩnga se mɛ ĩ du na ni na ndã ma! Ĩ nga ma nyi mbindã mɛ ndoga na pɛ nyi ngoi, ko so pɛni awe.

¹⁵ Ĩ ma tɛnɛ mɛ ale ĩ ndotɛnɛ lo mɛ: “Se Gbia aye ko, e na dungɔ le e ngɛ̃, e na lingɔ ye ko so, bere ye ko so.”

¹⁶ Kanda na olo ko, ĩ awa yakɛ, ĩ ndogonda nga tɛrɛ ĩ. Gi tɛrɛ yakɛ ko zu adu siɔni.

¹⁷ Ndani la, zo ko la ahĩnga nzɔ̃ ye mɛ lo lengbi ti lingɔ, ko ta lo li ni ma ko, lo li siɔ ye.