Zaki 3 - Fana Ngbangɔ 1987

Ale e ndobata nyɔ e nzɔ̃ni

¹ Aya bua, na popo tɛ ĩ ko, ale ta azi mɛ aye hangɔ lo tɛ Nzapa adu sĩ ma. Ta sanga ma, ĩ hĩnga ya, e mɛ awa hangɔ lo tɛ Nzapa ko, ngbanga tɛ e adu gbanda kpengbani aɔ tɛ azi mɛ ndɛ̃ zu.

² E zu e ndoyu ndo na lege ndɛ̃ ndɛ̃ ndɛ̃. Se ta zo ayu ndo na ya tɛnɛ mɛ lo ndotɛnɛ bɛ kɔi ma ko, lo bɛta nzɔ̃ zo, ko lo lengbi nga ti kɛ̃ngɔ lo hɛ̃ tɛrɛ lo zu.

³ E ndobi ngo nwa na yanga ambarata ya, ala ma nyɔ e, wa ala ɔ ti lege mɛ e ye ya, ala ɔ ti da.

⁴ Bere í ba amasua hĩ, abɛ se ala adu kokɛnɛni buai, abɛ se kpengba yá ayuru ni ko, bo nyi gbi ti fɔ̃ngɔ na nda masua la ndofa lege, wa masua ni aɔ ti lege mɛ wa fɔ̃ngɔ nda ni aye.

⁵ Se tɛ nyɔ zo nga la. Nyɔ zo adu ye ti tɛrɛ mɛ yakere buai, ko zo ndomu ni ayakɛ na tɛrɛ lo na lo ti akokɛnɛ ye mɛ lo ndoli. Ĩ da bɛ ĩ na kota ngonda mɛ nyi wá mɛ yakere alengbi ti gbingɔ ni zu!

⁶ Nyɔ zo adu nga ma wá, ko adu ndo mɛ asiɔ lo ti lɛ sese zu ndolo da. Nyɔ adu ye ti tɛrɛ e, andogbɛ̃ tɛrɛ e zu. Ko andozɔ nga wá, so pɛni, wá ni agbɛ̃ du tɛ zo zu. Wá ni ndolo ka lifɛlo nvɛni.

⁷ Zo alengbi ti batangɔ lɛ asa ndɛ̃ ndɛ̃ ndɛ̃ mɛ ka ya ndo, ahũ, asa mɛ ndoara arangɔ, nga na akpĩ, ko lo bata ndo la wɛ.

⁸ Kanda ta zo kɔi ade ahĩnga batangɔ nyɔ lo ma. Adu siɔ ye mɛ azi aha gba. Siɔ yɔrɔ ti hongɔ na zo asĩ ya ni sĩngɔ.

⁹ E ndomu nyɔ e, e gonda na To e Nzapa, kanda nga bo ni la e ndozónga na azi mɛ Nzapa ali la nga ma lo.

¹⁰ E ndogonda Nzapa, ko e ti ndozónga afɔ̃ e bo na nyɔ e ko kɔi. Aya bua, ale ta e ndoli nga so ma.

¹¹ Ta bɛta ngu na siɔ ngu ndosi ndoni kɔi na ya do li ngu ma.

¹² Aya bua, ta burungu ndole na li nza ma, ko ta ndimɔ ndole nga na li mburu ma. Se mɛ nga ta bɛta ngu alengbi ti singɔ na do li ngu mɛ na hĩngɔ ya ni ma la.

Ndara mɛ alo ka tɛ Nzapa

¹³ Na popo tɛ ĩ ko, mbanga zo kɔi mɛ wa ndara dazu nga? Ale lo fa ndara ni na se nzɔ̃ du tɛ lo, lo ngara tɛrɛ lo, lo du nga na ndara na ya kwa mɛ lo ndoli, wa azi ahũ ya, lo wa ndara.

¹⁴ Kanda se ĩ du na siɔ sɔbɛrɛ ka ya bɛ ĩ na tɛrɛ afɔ̃ ĩ, ko se ĩ gi kɔdɛ ya, ĩ nvɛni ĩ du nzɔ̃ni aɔ la ko, ta ĩ yakɛ se tɛrɛ ĩ ya, ĩ awa ndara ma, ko ta ĩ mu nga se bɛta lo ya adu nvɛnɛ ma.

¹⁵ Ta gi tɛrɛ ndara ni ko alo ka tɛ Nzapa ma. Oko adu ndara ti le sese, ndara tɛ azi, ndara mɛ alo ka tɛ Satana.

¹⁶ Ta sanga ma, ndo ko la azi ndoli sɔbɛrɛ da, ndogi nga kɔdɛ ya, ani nvɛni ani du nzɔ̃ni aɔ afɔ̃ ani ko, adu ndo ti yenge yenge, adu nga ndo ti asiɔ kɔtɛ lo ndɛ̃ ndɛ̃ ndɛ̃.

¹⁷ Ndara mɛ ndolo ka tɛ Nzapa ko, ta ndodu na siɔ ye kɔi ma. Zo ko la na gi tɛrɛ ndara ni ko, lo dede zo, lo nga na nzɔ̃ bɛ. Lo ndoma vundu tɛ azi sĩ, lo ndoli nga anzɔ̃ ye. Ta lo ndoye zo kɔi, ko lo dɔ atanga ni lo zia ma. Ta nyɔ lo sɛ sɛ ma.

¹⁸ Azi mɛ na bɛ pii, ko ala ndoli nga ya, afɔ̃ ani adu na mangbingɔ ko, mbana gɛrɛ tɛ la la: bɛta du.