Zaki 2 - Fana Ngbangɔ 1987

Azi zu bo kwɛ kɔi ka lɛ Nzapa

¹ Aya bua, ĩ ko la ĩ ye lo tɛ Yezo Kristo mɛ Gbia tɛ e ti ndima ko, ta ĩ mu zo kɔi na ndima aɔ afɔ̃ lo mɛ ndɛ̃ ma.

² E mu nga ma ya, azi sɛ aga na ndo mɛ ĩ bombi tɛrɛ ĩ da. Zo ti kɔi lo wa nwa, lo bi pɛtɛ mɛ alɛkɛ na wɔrɔ na li ti lo, lo yu nga bɔngɔ mɛ adɛ̃ ma ya ma. Zo ti sɛ, lo tɛ lo wa yɛlɛ, lo yu mbusu bɔngɔ.

³ Ko zo mɛ ayu bɔngɔ mɛ adɛ̃ ko, ĩ tɔndɔ lo, ĩ pa hɛ̃ lo ya: “Ga du ge ndo nzɔ̃ ngɛndɛ olo.” Ko ĩ kpɔ tɛ wa yɛlɛ ko, ĩ pa hɛ̃ lo ya: “Kɔme, lo tɛ mɔ na gɛrɛ mɔ, bere du ka lɛ sese so tɔ̃ gɛrɛ mbi.”

⁴ Se ĩ li nga so ko, afa ya, so popo tɛ ĩ ko, ĩ mu zo kɔi na ndima aɔ fɔ̃ lo, ko afa nga ya, ĩ li ló ni ko na se siɔ dangɔ bɛ tɛ ĩ.

⁵ Ayata mbi ti kpɔ̃ bɛ mbi, ĩ ma la: Nzapa asara ndo awa yɛlɛ ge lɛ sese olo akpã ya, ala ye lo tɛ Yezo Kristo sĩ, wa ala si ka Kɔdɔrɔ Gbia tɛ lo mɛ lo ko kapa ni hɛ̃ awa yengɔ lo.

⁶ Kanda tɛ ĩ ko, ĩ ndoba wa yɛlɛ ka lɛ ĩ samana. Azi mɛ ndohɛ̃ ĩ pɛnɔ, ndogia ĩ agwe na ĩ ka da ngbanga ko, adu awa nwa, ta seni la ma? Seni la!

⁷ Ala la ndogbɛ̃ nzɔ̃ ili Yezo Kristo mɛ Nzapa ahɛ̃ ĩ.

⁸ Biani, se ĩ tɔndɔ ndia tɛ Gbia Nzapa na seni, nga ma se mɛ Buku tɛ lo apa na ni ya: “Ĩ ye afɔ̃ ĩ nga ma se mɛ ĩ ndoye na tɛrɛ ĩ nvɛni” ko, ĩ ba ye mɛ afa ya, ĩ ndoli nzɔ̃ni la.

⁹ Kanda se ĩ mu zo na ndima aɔ afɔ̃ lo ko, ĩ li siɔ ye, ko ngbanga ati na ĩ, na lo mɛ ya, ĩ bi ndia.

¹⁰ Ta sanga ma, na popo tɛ andia zu, zo ko la abi bo kɔi gɛgɛrɛ, lo tɔndɔ atanga ni ko, afa ya, lo bi ndia hororo.

¹¹ Zo ko apa ya: “Ta mɔ ti kɔmbɛ ma” ko, nga bo lo la lo pa ya: “Ta mɔ ho zo ma.” Kanda se ta mɔ ti kɔmbɛ ma, wa se mɔ ho zo ko, afa ya, mɔ bi ndia.

¹² Ale ĩ hĩnga ya, atɛnɛ mɛ ĩ ndotɛnɛ, na aye mɛ ĩ ndoli ko, Nzapa afa gbanda ngbanga tɛ ĩ na lege ti ndia mɛ ndobi bɔrɔ tɛrɛ zo.

¹³ Zo ko la ta ndoma vundu tɛ afɔ̃ lo ma, na ngoi ti fangɔ ngbanga tɛ lo gbanda ko, ta Nzapa ama nga vundu tɛ lo ma. Kanda se zo ama vundu tɛ afɔ̃ lo ko, ta ngbanga ati gbanda na lo ma.

Lo yengɔ lo tɛ Nzapa nga na lingɔ nzɔ̃ ye

¹⁴ Aya bua, se zo apa ya, ni ye lo tɛ Nzapa, wa se ta lo li kwa mɛ afa ya, lo ye lo tɛ Nzapa ma ko, lo yengɔ tɛ lo adu gɛgɛrɛ. Ta lo yengɔ ko alengbi ti songɔ lo ma.

¹⁵ E mu nga ma ya, mbanga wa Kristo kɔi ti kɔli bere ti wali na gwe ti luangɔ bɔngɔ, ta lo nga na tɛ ti tɛngɔ ma.

¹⁶ Ko se ta ĩ hɛ̃ lo ni ma, wa se ĩ pa hɛ̃ lo ya: “Diri nzɔ̃ni, vĩ tɛrɛ mɔ na bɔngɔ nzɔ̃ni, tɛ ye ya mɔ asĩ” ko, tɛnɛ ko ĩ tɛnɛ hɛ̃ lo adu gɛgɛrɛ!

¹⁷ Lo yengɔ lo tɛ Nzapa adu nga so mɛ: se zo anɛ ya, ni ye lo tɛ Nzapa, wa se ta lo li nzɔ̃ ye ma ko, afa ya, lo yengɔ tɛ lo adu gɛgɛrɛ.

¹⁸ Kanda se zo apa ya: “Mɔ ye tɛ mɔ lo tɛ Nzapa, mbi ndoli tɛ mbi nzɔ̃ ye” ko, mbi na gbinyangɔ hɛ̃ lo ya: “Fa mbi na se mɛ mɔ lengbi ti yengɔ lo tɛ Nzapa, se ta mɔ li nzɔ̃ ye ma, wa mbi fa nga mɔ na nzɔ̃ ye tɛ mbi mɛ afa ya, mbi ye lo tɛ Nzapa.”

¹⁹ Mɔ hĩnga ya, Nzapa bo kɔi. Oko mɔ li nzɔ̃ni. Asiɔ tɔrɔ ahĩnga nga ya, Nzapa bo kɔi, ko tɛrɛ la ndodɔ za za za na lo ni.

²⁰ Wa buba ee! Mbi ye fangɔ na mɔ ya, se mɔ ye lo tɛ Nzapa, wa se ta mɔ li nzɔ̃ ye ma ko, lo yengɔ tɛ mɔ adu gɛgɛrɛ!

²¹ Nzapa amu ndo kotara e Abrahama ka le lo ya, lo bɛta zo nga sia? Nzapa amu ndo lo ya, lo bɛta zo, na lo mɛ ya, Abrahama amu ndo Izaki mɛ nyi lo ti kɔli, alu na Nzapa.

²² Ko mɔ hũ lo yengɔ tɛ lo na nzɔ̃ ye tɛ lo agwe ndoni kɔi, ko na lo ti nzɔ̃ ye tɛ lo ndo ko, lo yengɔ tɛ lo ati nzɔ̃ni buai.

²³ La tɛnɛ mɛ asu ka ya Buku tɛ Nzapa ati na seni. Tɛnɛ ni lo mɛ: “Abrahama aye ndo lo tɛ Nzapa, ko Nzapa amu ndo lo ya, lo bɛta zo.” Na lo ni ko, Nzapa ndoili ndo lo ya, lo kwa ni.

²⁴ Ĩ hũ wɛ: ta Nzapa ndomu zo ya, lo bɛta zo na lo ti lo yengɔ tɛ lo kɔi ma, kanda adu nga na lo ti nzɔ̃ ye mɛ lo ndoli.

²⁵ Se tɛ wali ngbabo mɛ ndo ili lo Rahaba nga la. Ngoi mɛ ndo Ayuda mɛ awa nɔngɔ kwa ĩ si ka tɛ lo ko, lo yamba la nzɔ̃ni. So pɛni, lo fa la na lege mɛ ndɛ̃, ala ɔ ti da. Nzapa amu ndo lo ya, lo bɛta zo na lo ti nzɔ̃ ye mɛ lo li.

²⁶ Nga ma se mɛ se tɔrɔ tɛrɛ zo asi ya tɛrɛ zo, ko lo kpi ko, se mɛ nga se zo aye lo tɛ Nzapa, wa se ta lo li nzɔ̃ ye ma ko, lo yengɔ tɛ lo adu gegɛrɛ la.