Zaki 1 - Fana Ngbangɔ 1987

Balangɔ

¹ Mbi Zaki mɛ wa kwa tɛ Nzapa, mbi mɛ nga wa kwa tɛ Gbia Yezo Kristo la mbi to mbɛti olo hɛ̃ ĩ, azi tɛ Nzapa zu mɛ ĩ gundu na le sese zu. Mbi bala ĩ.

Lo yengɔ lo tɛ Nzapa na lo ndara

² Aya bua, se ĩ hũ lɛ apɛnɔ ndɛ̃ ndɛ̃ ndɛ̃ ko, ale bɛ ĩ ade sĩ na lo ni.

³ Ta sanga ma, ĩ hĩnga ya, bɛ se ĩ hũ apɛnɔ, la ĩ ngba na yengɔ lo tɛ Nzapa ko, ĩ na tingɔ awa kpengba bɛ.

⁴ Kanda ale ĩ li kpengbani ya, lɛ kpengba bɛ tɛ ĩ asi yango, wa ĩ du abɛta anzɔ̃ azi, azi mɛ lɛ ĩ azi na lege tɛ Nzapa, ko ta nzɔ̃ ye kɔi azanga ĩ ma.

⁵ Kanda so popo tɛ ĩ, se ta zo adu na ndara ma ko, ale lo yɔ ni ka ti Nzapa, wa Nzapa ahɛ̃ lo, na lo mɛ ya, Nzapa ndoka ye hɛ̃ azi zu gɛgɛrɛ, ko lo ndoka ni na nzɔ̃ bɛ.

⁶ Kanda ale zo ni akpa bo bɛ lo na ndo ye mɛ lo yɔ ka ti Nzapa, ko ta lo dɛ kitɛ ni ma. Ta sanga ma, zo ko ndode kitɛ ko, lo nga ma mɔpo mɛ se yá aya ko, ada na ni yenge yenge.

⁷ Gi tɛrɛ zo nga so ko, ale ta lo da bɛ lo ya, ni na luangɔ ye ka ti Gbia Nzapa ma.

⁸ Ta sanga ma, lo ye lo tɛ Nzapa bɛ lo sɛ sɛ, ko ta lo ndoli ye kɔi na seni ma.

Awa yɛlɛ na awa nwa

⁹ Ale wa Kristo mɛ wa yɛlɛ asaba na lo ko la Nzapa aya lo ndozu.

¹⁰ Ale wa Kristo mɛ wa nwa asaba nga na lo ko la Nzapa azu na lo tise. Ta sanga ma, wa nwa na kpingɔ nga ma kasa pandara.

¹¹ Ngoi mɛ se lá aya tɛrɛ lo, asũ baka baka ko, aulɛ na kasa pandara, kasa pandara akiɔ̃ ati, ko dɛ̃ngɔ ni awe. Se tɛ wa nwa nga gbanda la. Ngoi mɛ gbanda lo dɛ so lingɔ kwa tɛ lo ko, lo kongbi ngbe lo kpi.

Apɛnɔ mɛ e ndohũ

¹² Dengɔ bɛ ati na zo ko ndogbe bɛ lo na ya pɛnɔ mɛ lo ndohũ. Ta sanga ma, na pɛ gbengɔ bɛ tɛ lo ko, Nzapa ahɛ̃ lo gbanda du ti kaka. Du ti kaka ni adu mbana gɛrɛ mɛ ndo lo ko kapa ni hɛ̃ awa yengɔ lo.

¹³ Ngoi mɛ se bɛ zo ahanda lo ya lo li siɔ ye ko, ale ta zo ni anɛ ya, Nzapa la ahanda ni ma. Ta sanga ma, ta zo kɔi alengbi ti handangɔ Nzapa ya, lo li siɔ ye ma. Ko ta Nzapa nvɛni ndohanda nga zo ya, lo li siɔ ye ma.

¹⁴ Kanda adu siɔ dangɔ bɛ tɛ zo nvɛni la ndohanda zo, ko ato lo ya lo li siɔ ye.

¹⁵ Na pɛ siɔ dangɔ bɛ tɛ zo ko, zo ali siɔ ye. Wa ngoi mɛ siɔ ye ni ati kotani buai ko, aho lo.

¹⁶ Ayata mbi ti kpɔ̃ bɛ mbi, ta zo ahanda ĩ ma:

¹⁷ anzɔ̃ ye zu ndolo ka yayu, ka tɛ Nzapa, wa azu ge tise. Lo la lo li lá, na nzɛ̃, nga na atongolo. Nzapa ndongbã ngoi zu na se tɛrɛ lo, ta lo ndosana tɛrɛ lo ya, ni zia ĩ na ya mbingo ma.

¹⁸ Bɛ lo nvɛni aye ndo, la lo hɛ̃ e bɛta du na lege ti bɛta tɛnɛ mɛ ndo lo tɛnɛ. Lo li so ya, e du abɛ li aye tɛ ni zu mɛ ni li.

Ale azi ali ye na se mɛ ala ndoma na ni

¹⁹ Ayata mbi ti kpɔ̃ bɛ mbi, ĩ da bɛ ĩ na tɛnɛ olo nzɔ̃ni: ale zo kɔi kɔi ama tɛnɛ tɛ afɔ̃ lo hiɔ, kanda ta lo tɛnɛ tɛnɛ hiɔ hiɔ ma. Ta ngɔnzɔ agbɔ̃ nga lo hiɔ hiɔ ma.

²⁰ Ta sanga ma, zo ko la ngɔnzɔ agbɔ̃ lo ko, ta lo lengbi ti lingɔ ye mɛ Nzapa aye ma.

²¹ Na lo ni ko, ale ĩ hã siɔ ye zu mɛ ka bɛ ĩ, ĩ zi, ĩ dɔ nga asiɔ lo zu ĩ zia. Ĩ ngara tɛrɛ ĩ, ĩ ye tɛnɛ mɛ Nzapa akpã ka bɛ ĩ, ta sanga ma, tɛnɛ ni alengbi ti songɔ tɔrɔ tɛrɛ ĩ.

²² Ta ĩ handa tɛrɛ ĩ nvɛni na mangɔ tɛnɛ tɛ Nzapa bo na ma ĩ kɔi ma, kanda ale ĩ li nga ni na seni.

²³ Ta sanga ma, zo ko la ama tɛnɛ tɛ Nzapa, ko ta lo li ni na seni ma ko, lo nga ma zo mɛ aba lɛ lo na tala tala, ahũ se mɛ lɛ lo ndodu na ni.

²⁴ Wa ngoi mɛ lo ba lɛ lo we, lo hã nɔ, lo ɔ ko, bɛ lo ali na se mɛ lɛ lo ndodu na ni bo na ngoi ni ko.

²⁵ Kanda zo ko la amanda bɛta ndia mɛ ndobi bɔrɔ tɛrɛ e, akpã bɛ lo bo ndo ni, ta lo ma ni bo na ma lo, wa so pɛni bɛ lo ali na ni ma, kanda lo ndoli nga ni na seni ko, zo mɛ Nzapa na sunungɔ lo na ya kwa mɛ lo ndoli la.

²⁶ Se zo amu tɛrɛ lo ya, ni wa vɔrɔngɔ Nzapa, wa se ta lo bata nyɔ lo nzɔ̃ni ma ko, lo handa tɛrɛ lo nvɛni, ko ló Nzapa tɛ lo adu gɛgɛrɛ.

²⁷ Ĩ ba se vɔrɔngɔ To e Nzapa mɛ lo ndoye ya, adu bɛtani lo mɛ: zangɔ aya ndũ, na awe muã na ya pɛnɔ mɛ ala ndohũ, batangɔ tɛrɛ na ya asiɔ lo ti lɛ sese zu mɛ ndohanda zo ya, lo li siɔ ye.