Yudɛ 1 - Fana Ngbangɔ 1987

Balangɔ

¹ Mbi Yudɛ mɛ wa kwa tɛ Yezo Kristo, mbi mɛ nga nyita Zaki la mbi su mbɛti olo mɛ. Mbi to ni hɛ̃ ĩ azi mɛ To e Nzapa aye ĩ, aili nga ĩ ya, ĩ du azi tɛ ni, ĩ mɛ Yezo Kristo ndobata ĩ. Mbi bala ĩ.

² Nzapa ama bɛ vundu tɛ ĩ, ali bɛ ya, bɛ ĩ adu pii nvɛni, ali bɛ nga ya, ĩ yengbi sĩ nvɛni ma ke!

Awa hangɔ lo tɛ Nzapa na nvɛnɛ

³ Aya bua, mbi ndoli ndo kpengbani ya, mbi su hɛ̃ ĩ mbɛti, na lo ti songɔ mɛ Nzapa aso na mbi, aso nga na ĩ. Ko ngoi mɛ mbi ndoda bɛ mbi nga so ko, mbi hũ ya, nzɔ̃ni ale mbi su hɛ̃ ĩ mbɛti, mbi sa nguru bɛ ĩ, wa ĩ li kpengbani, ĩ bata tɛnɛ tɛ Nzapa mɛ ndo ĩ ye lo ni. Adu tɛnɛ mɛ ndo lo hɛ̃ azi tɛ lo fani kɔi ti buai.

⁴ Mbi tɛnɛ nga so, ta sanga ma, ambanga asiɔ azi ali na popo tɛ e na poroso. Ala ndogbinya tɛnɛ ti nzɔ̃ bɛ tɛ Nzapa tɛ e ati ndɛ̃, ala ndopa nga ya, e lengbi ti lingɔ siɔ ye mɛ bɛ e aye. Ala kɛ̃ Yezo Kristo mɛ bo lo kɔi la wa hangɔ e na lo tɛ Nzapa, lo nga Gbia tɛ e. Asu ndo ka ya Buku tɛ Nzapa gã ya, Nzapa afa gbanda ngbanga abi li azi ni ko.

⁵ Bɛ se ĩ hĩnga atɛnɛ ni ko zu nzɔ̃ni ko, mbi ye ya mbi ti da bɛ ĩ na se mɛ ndo Gbia Nzapa aso na awa Izrayɛlɛ ka sese ti Egipito, nga na se mɛ ndo lo kpɔ na azi mɛ akɛ̃ yengɔ lo tɛ lo.

⁶ Ale ĩ da bɛ ĩ na aangelo mɛ ndo ta bɛ la ade na lo nguru mɛ Nzapa ahɛ̃ la ma. Nzapa ahɛ̃ ndo la ndo tɛ la nvɛni, ko ala dɔ ndo ni azia. Na lo ni ndo la Nzapa agbɔ̃nɔ la, agbele la na nzingiri mɛ ndongbã kaka, asa la ka ya mbingo ya, ala du kai ngbĩi nga ka lá ti fangɔ ngbanga alengbi, wa ni fa ngbanga ni bi li la.

⁷ Ale ĩ da nga bɛ ĩ na awa kɔdɔrɔ ti Sɔdɔmɛ na ti Gɔmɔrɔ, nga na awa kɔdɔrɔ mɛ ndɛ̃ mɛ so tɔ̃ Sɔdɔmɛ na Gɔmɔrɔ. Ala li ndo asiɔ ye nga ma se mɛ aangelo ko ali na ni, ala hɛ̃ ndo tɛrɛ la so lingɔ asiɔ ye ti kamɛnɛ, nga na asiɔ ye mɛ ta bɛta zo alengbi ti lingɔ ma. Nzapa ahɛ̃ ndo la etumbu na ya wá mɛ ta ndomingɔ bɛ gbɔ ma. Etumbu ko la Nzapa ahɛ̃ la ko, lo tisa azi zu ya, ta ala li nga so ma, so ni hɛ̃ nga la etumbu.

⁸ I ba se mɛ awa hangɔ lo tɛ Nzapa na nvɛnɛ mɛ ali popo tɛ ĩ ndoli nga la. Ala ndohũ Suma, ko Suma ni ndoto la ya, ala li asiɔ ye ti kamɛnɛ. Ala ndongara lo gbia tɛ Nzapa, ala ndoguru atɔrɔ ti ndima mɛ ka yayu.

⁹ Ye ko ala ndoli ko, abɛ nga Mikaɛlɛ mɛ gbia tɛ aangelo ko, ta lo li ndo ye ni ko ma. Ngoi mɛ ndo Mikaɛlɛ na Satana agbangbi na kinda tɛ Mɔizɛ so hĩngangɔ zo mɛ alengbi ti mungɔ ni ko, ta Mikaɛlɛ atara ndo ya, ni vɔ̃ to tɛrɛ Satana, ni guru nga lo ma. Kanda lo pa ndo hɛ̃ Satana ya: “Gbia Nzapa ahɛ̃ bɛ mɔ etumbu ma ke!”

¹⁰ Ko azi ni ko mɛ awa hangɔ lo tɛ Nzapa na nvɛnɛ ndoguru aye mɛ ta ala hĩnga nda ni ma. Ala nga ma asa ti ya ndo, ta ala nga na kɔdɛ ma. Ko yungɔ ndo mɛ ala ayu agbɛ̃ la ti buai.

¹¹ Siɔ lo ati ndo na la, na lo mɛ ya, ala mu ndo lege tɛ Kaina. Ala ndohɛ̃ ndo tɛrɛ la ya, ani lua na faranga, nga ma se mɛ ndo Balamɛ ndoli na ni. Ala saba ndo tɛrɛ Nzapa, ko ala ndo nga ma Kore mɛ ndo asaba nga tɛrɛ Nzapa.

¹² Ngoi ko la ala ndodu na popo tɛ ĩ so tɛngɔ ye ko, adu kamɛnɛ na lo tɛ ĩ. Kanda ta kamɛnɛ ndogbɔ̃ la ma, ala ndoda bɛ la bo na tɛrɛ la nvɛni. Ala nga ma ngu mɛ aga ndozu, la yá amu ni aɔ na ni, ta ati ani ma. Ala nga ma akɛkɛ mɛ bɛ se ngoi ti lengɔ ni alengbi ko, ta ale ma. Ala nga ma akɛkɛ mɛ abukana, ati la akpi kpɔɔ.

¹³ Ala nga ma kpengba mɔpo mɛ aya ka lɛ ngu. Ala ndosi na asiɔ ye ti kamɛnɛ, nga ma se mɛ kpengba mɔpo ndofua ka lɛ ngu fukpɔ fukpɔ. Ala nga ma atongolo mɛ ta ndongbã ndoni kɔi ma. Nzapa alɛkɛ hɛ̃ la ndo ya, ala ngbã buai ka ya mbingo mɛ kpiti kpiti.

¹⁴ Enɔki mɛ li kuni Adamu la apia ndo apa tɛnɛ na lo tɛ azi ni ko mɛ awa hangɔ lo tɛ Nzapa na nvɛnɛ. Lo pa ndo ya: “Ĩ ma la, Gbia Nzapa aga gbanda na aangelo tɛ lo butu butu mɛ ala asanto.

¹⁵ Lo ga gbanda na la ya, ni fa ngbanga tɛ azi zu, ni hɛ̃ nga etumbu hɛ̃ asiɔ azi zu na lo ti asiɔ ye zu mɛ ala li, nga na lo ti asiɔ tɛnɛ zu mɛ ala tɛnɛ tɛrɛ Nzapa, na ngoi mɛ ndo ala kɛ̃ mangɔ nyɔ lo.”

¹⁶ Ngoi zu ko, ta bɛ azi ni ko mɛ awa hangɔ lo tɛ Nzapa na nvɛnɛ ndode ma, ala ndoli ye na se gwɛ̃ ti tɛrɛ la, ala ndotɛnɛ tɛnɛ na baba, ala ndokara azi na tɛnɛ lɛkpɛ lɛkpɛ ya, ani lua ye na ti la.

Yudɛ atisa awa Kristo na lo tɛ asiɔ azi

¹⁷ Aya bua, tɛ ĩ ko, ale ĩ da bɛ ĩ na atɛnɛ mɛ ndo awa pangɔ kwa tɛ Gbia tɛ e Yezo Kristo apia apa hɛ̃ ĩ gã.

¹⁸ Ala pa ndo hɛ̃ ĩ ya: “Ngoi mɛ gbanda sese adoli ti wɛngɔ ko, ambanga azi ae gbanda ĩ, ala li nga gbanda aye bo na se gwɛ̃ ti tɛrɛ la.”

¹⁹ Azi ni ko adu awa kangbingɔ popo tɛ azi, ala du azi mɛ gwɛ̃ ti aye ti lɛ sese ako ndo bɛ la, ala nga azi mɛ ta Tɔrɔ Santo na ya tɛrɛ la ma.

²⁰ Aya bua, tɛ ĩ ko, ale ĩ ngbã bo na maingɔ na ya lo yengɔ tɛ ĩ mɛ alo ka tɛ Nzapa. Ale ĩ sambela Nzapa na nguru tɛ Tɔrɔ Santo.

²¹ Ale ĩ ngbã na ya yengɔ mɛ Nzapa ndoye na ĩ, na ngoi mɛ ĩ ndoku ya, Gbia tɛ e Yezo Kristo ama vundu tɛ ĩ, ahɛ̃ nga ĩ du ti kaka.

²² Ale ĩ ma vundu tɛ ambanga azi ko la ndodɛ kitɛ ti yengɔ lo tɛ Yezo.

²³ Ala ndomu lege ti gwengɔ ka ya wá, ale ĩ so la, so ala sa ya wá akpili. Wa tɛ azi mɛ ndɛ̃ ko, ĩ ma nga vundu tɛ la, kanda ale ĩ du na kpengba lɛ, so ala bi nga ĩ na ya siɔ ye tɛ la. Ta ĩ ye lo siɔ ye tɛ la ma, abɛ nga abɔngɔ tɛ la mɛ ala yu ali na siɔ ye ko, ta ĩ bɔrɔ ni ma.

Gondangɔ Nzapa

²⁴ Nzapa alengbi ti batangɔ ĩ ya, ta ĩ ti na ya siɔ lo ma. Lo lengbi nga ti kpongɔ siɔ ye tɛ ĩ zingɔ, mungɔ ĩ, lingɔ na ni ka ya ndima te lo na kota dengɔ bɛ.

²⁵ Lo ngengereni kɔi, lo Wa songɔ e na lo ye ko la Gbia tɛ e Yezo Kristo ali tɛrɛ e. Ndima, na nguru, nga na lo gbia adu na lo tɛ lo. Se tɛ lo ndo la, se tɛ lo na olo la, se mɛ nga lo na dungɔ na ni buru buru la! Seni la.