Yoanɛ 3 - Fana Ngbangɔ 1987

Yezo na Nikodɛmɛ

¹ Mbanga kɔli kɔi na li nɔ tɛ Afarizeo, ili lo Nikodɛmɛ, lo ndo mbanga gbia tɛ Ayuda.

² Ĩ da na bi kɔi ko, lo m ka tɛ Yezo, lo pa hɛ̃ lo ya: “Wa hangɔ lo tɛ Nzapa, e binga ya, Nzapa la ato mɔ ya, mɔ ha e na lo tɛ ni. Ta sanga ma, se ta Nzapa adu ndoni kɔi na zo ma ko, ta zo alengbi ti lingɔ gi tɛrɛ aye ti kpɛnɛ mɛ mɔ ndoli ma.”

³ Yezo agbinya hɛ̃ lo ya: “Mbi pa hɛ̃ mɔ ti beta tɛnɛ ya, se ta ati dú zo fani mɛ ndɛ̃ ma ko, ta lo lengbi ti tingɔ zo ti Kɔdɔrɔ Gbia tɛ Nzapa ma.”

⁴ Nikodɛmɛ ĩ ma so ko, ahũnda Yezo ya: “Zo mɛ ati kangba wɛ ko, ati dú lo fani mɛ ndɛ̃ nga sia? Ta kɔdɛ ti lo diringɔ lingɔ ka ya ta lo, ya ati dú lo fani mɛ ndɛ̃ da ma.”

⁵ Yezo agbinya hɛ̃ lo ya: “Mbi pa hɛ̃ mɔ ti beta tɛnɛ ya, zo ko la ta adú lo na lege ti ngu ma, ta Tɔrɔ Santo adú nga lo ma ko, ta lo lengbi ti singɔ ka Kɔdɔrɔ Gbia tɛ Nzapa ma.

⁶ Zo ko la zo adú lo ko, lo zo, wa zo ko la Tɔrɔ Santo adú lo ko, lo na Tɔrɔ tɛ Nzapa.

⁷ Tɛnɛ mɛ fɛrɛ mbi tɛnɛ hɛ̃ mɔ ya, ale ati adú zo fani mɛ ndɛ̃ ko, ta mɔ bema na lo ni ma.

⁸ Yá ndoya ti lege mɛ lo ye. Mɔ lengbi ti mangɔ bo gigi tɛ lo, kanda ta mɔ hĩnga ndo mɛ lo lo da, bere ndo mɛ lo ndogwe da ma. Ba se tɛ zo mɛ Tɔrɔ Santo adú lo la.”

⁹ La Nikodɛmɛ ahũnda Yezo ya: “Ye ni ko ndoli nga sia?”

¹⁰ Yezo agbinya hɛ̃ lo ya: “Oo, mɔ mɛ wa hangɔ awa Izrayɛlɛ na ye ko, ta mɔ dɛ mɔ hĩnga ye olo ma?

¹¹ Mbi pa hɛ̃ mɔ ti beta tɛnɛ ya, e ndotɛnɛ tɛnɛ ti aye mɛ e hĩnga, e ndopa nga lo ti aye mɛ e hũ, kanda ta ĩ ndoye tɛnɛ mɛ e ndotɛnɛ hɛ̃ ĩ ma.

¹² Ngoi mɛ mbi ndopa hɛ̃ ĩ lo ti aye mɛ ndosi ge lɛ sese ko, ta ĩ ndoye ma. Wa se mbi pa hɛ̃ ĩ lo ti aye mɛ ndosi ka yayu ko, ta ĩ ndoye nga ma.

¹³ Ta zo kɔi ade ama ka yayu ma, wenge bo mbi Nyi Zo mɛ mbi lo kai, mbi zu ge lɛ sese!

¹⁴ “Ngoi mɛ ndo Mɔizɛ ka be ndo ko, lo ya ndo ngbɔ mɛ alɛkɛ na nwa ndozu na li kɛkɛ so songɔ azi. Ko se mɛ nga azi na yangɔ mbi Nyi Zo ndozu na ndo kɛkɛ la.

¹⁵ Ala na yangɔ mbi ya, zo zu ko la aye lo tɛ mbi ko, Nzapa ahɛ̃ lo du ti kaka.”

¹⁶ Ta sanga ma, be Nzapa aye ndo azi ti lɛ sese ma wo ma, la lo to ndo ngbongi Nyi lo hɛ̃ la ya, se zo aye lo tɛ lo ko, ta lo kpi ma, ko lo lua du ti kaka.

¹⁷ Ta Nzapa ato ndo Nyi lo ge lɛ sese ya, lo fa ngbanga, lo bi li azi ma, kanda lo to ndo lo ya, lo so azi.

¹⁸ Zo ko aye lo tɛ Nyi Nzapa ko, ta Nzapa afa gbanda ngbanga abi li lo ma. Kanda zo ko la akɛ̃ lo tɛ Nyi Nzapa ko, Nzapa apia afa ngbanga abi li lo wɛ, na lo mɛ ya, ta lo ye lo tɛ ngbongi Nyi Nzapa ma.

¹⁹ Ĩ ba nda ngbanga mɛ gbanda Nzapa afa abi li azi lo mɛ: wa vurungɔ na ndo aga ndo ge lɛ sese, kanda azi aye tɛ la mbingo aɔ vuru ndo, na lo mɛ ya, ala awa lingɔ siɔ ye.

²⁰ Zo ko ndoli siɔ ye ko, zo mɛ akɛ̃ vuru ndo la, ko ta lo ndoga ka tɛ wa vurungɔ na ndo ma. Ta sanga ma, lo ndokpɛ ya, ta asiɔ ye tɛ ni asi yango, wa azi ahũ ni ma.

²¹ Kanda zo ko ndoli beta ye ko, zo mɛ ndoga ka tɛ wa vurungɔ na ndo ya, kwa mɛ ni ndoli asi yango ngbɛ̃, azi ahũ, ko ahĩnga ya, ni ndoli kwa ni na se nyɔ Nzapa la.

Yezo na Yoanɛ

²² So pɛni ndo la Yezo na ava lo agwe ka sese ti Yudea, ali kai bi yakere, ko Yezo ahɛ̃ azi batisimɔ.

²³ Yoanɛ ndohɛ̃ ndo nga azi batisimɔ ka kɔdɔrɔ ti Ɛnɔ, na lo mɛ ya, ngu ndo kai ma wo ma. Kɔdɔrɔ ni ndo ndũ na kɔdɔrɔ ti Salimɛ. Azi ndoga ndo ka tɛ Yoanɛ, ko lo ndohɛ̃ la batisimɔ.

²⁴ Na ngoi ko ndo ko, ta ade abi Yoanɛ bɔlɔkɔ ma.

²⁵ Ko ambanga ava Yoanɛ, na wa Yuda mɛ ndɛ̃ kɔi ato nda bimbingɔ tɛnɛ na lo ti tɔrɔke ti onzingɔ ló tɛrɛ zo.

²⁶ Ala nɔ ka tɛ Yoanɛ, ahũnda lo ya: “Wa hangɔ lo tɛ Nzapa, zo ko ndo ĩ na lo ka mbage ngu ti Yurdɛnɛ, lo mɛ ndo mɔ ndopa lo tɛ lo hɛ̃ e ko, be mɔ ade ndo lo? Ba na olo ko, lo ndohɛ̃ nga azi batisimɔ, ko azi zu ndonɔ ka tɛ lo!”

²⁷ Yoanɛ apa hɛ̃ la ya: “Se ta Nzapa ahɛ̃ zo ye ma ko, ta zo alengbi ti luangɔ ni ma.

²⁸ Ĩ nvɛni atemwɛ ti tɛnɛ mɛ ndo mbi tɛnɛ hɛ̃ ĩ ya: ‘Ta mbi Mɛsia ma, kanda Nzapa ato mbi uzu tɛ lo!’ ”

²⁹ La Yoanɛ ato matɔ hɛ̃ la ya: “Na ngoi yenga ti mungbingɔ ko, kɔ wali na ya lo ndodunga ndoni kɔi, ko fɔ̃ kɔ wali ndolo tɛ lo so tɔ̃nda kɔ wali, so rnangɔ tɛnɛ mɛ kɔ wali ndotɛnɛ. Ko se kɔ wali atɛnɛ tɛnɛ ko, bɛ fɔ̃ lo ade zɔgɔrɔ. Mbi tɛ mbi nga ma fɔ̃ kɔ wali, ko na olo ko, be mbi ade zɔgɔrɔ.

³⁰ Ale zo ni ko ati kotani, wa mbi ti tɛ mbi gɛgɛrɛ.”

Zo mɛ alo ka yayu

³¹ Zo ko la alo ka yayu ko, lo ɔ azi zu. Wa zo ko ndodu ge lɛ sese ko, lo zo ti lɛ sese, ko lo ndopa tɛ lo lo ti aye mɛ ndosi ge lɛ sese. Zo ko la alo ka yayu ko, lo ɔ azi zu.

³² Lo ndopa lo ti aye mɛ lo hũ, nga na atɛnɛ mɛ lo ma, ko ta zo kɔi ndoye tɛnɛ tɛ lo ma.

³³ Zo ko la aye tɛnɛ tɛ lo ko, zo mɛ ahĩnga ya, tɛnɛ tɛ Nzapa adu bɛta tɛnɛ la.

³⁴ Zo ko la Nzapa ato lo ko, zo ni ko ndopa tɛnɛ mɛ Nzapa atɛnɛ, ta sanga ma, Nzapa asa nguru tɛ Tɔrɔ Santo ma wo ma na tɛrɛ lo.

³⁵ Bɛ Nzapa aye Nyi lo, la lo zia aye zu na yamba ti lo.

³⁶ Zo ko la aye lo tɛ Nyi Nzapa ko, lo lua du ti kaka. Wa zo ko la akɛ̃ nyɔ Nyi Nzapa ko, ngɔnzɔ ni angbã ya Nzapa, ko ta zo ni ko alua du ti kaka ma.