Yoanɛ 2 - Fana Ngbangɔ 1987

Yenga ti mungbingɔ ati ka kɔdɔrɔ ti Kana

¹ Ĩ la ndo so pɛni bi ta ko, ambanga azi adu yenga ti mungbingɔ ka kɔdɔrɔ ti Kana, ka sese ti Galilea. Maria ta Yezo anɔ nga yenga ni,

² ko aili nga Yezo na ava lo ya, ala ga yenga ni, la ala nɔ ndo.

³ Ngoi mɛ vinɔ ĩ wɛ ko, ta Yezo apa hɛ̃ Yezo ya: “Ba, ala nyɔ vinɔ ni zu wɛ.”

⁴ La Yezo agbinya hɛ̃ lo ya: “Zo wali, mɔ̃ pa hɛ̃ mbi pangɔ, wa mbi li kwa tɛ mbi? Ta ngoi tɛ mbi ti lingɔ ye adɛ alengbi ma.”

⁵ Ta lo ĩ ma so ko, apa hɛ̃ awa kwa ya: “Ye ko la lo pa ya, ĩ li ko, ĩ li bo ni.”

⁶ Ambanga ta ngu mana mɛ asɔ̃ na tɛnɛ ndo so ndo ko. Na se li ye tɛ Ayuda ko, ala ndotolo ngu na ya ni, na lo ti tɔrɔke ti onzingɔ na ló. Ta ni kɔi ndomu mbenda sui miambe, bere mbenda ngbangbo kɔi ndoni sui sɛ.

⁷ Yezo apa hɛ̃ awa kwa ko ya: “Ĩ tolo ngu na ya ata olo asĩsĩ.” La ala nɔ atolo ngu aga asa da, la ata ni asĩsĩ.

⁸ Yezo apa hɛ̃ awa kwa ko ya: “Na olo ko, ĩ tɔ̃ ni yakere, ĩ nɔ na ni hɛ̃ gbia ti yenga.” Ala tɔ̃, anɔ na ni hɛ̃ lo.

⁹ Gbia ti yenga atara ngu mɛ agbinya, ati vinɔ. Ko ta lo hĩnga ndo mɛ vinɔ ni alo da ma. (Bo awa kwa mɛ ndo atolo ngu la ahĩnga.) La gbia ti yenga aili kɔ wali,

¹⁰ apa hɛ̃ lo ya: “Zo zu mɛ ndoili yenga ko, lo ndokangbi nzɔ̃ vinɔ uzu hɛ̃ azi mɛ lo ili la. Wa ngoi ko ala nyɔ, agbɔ̃nɔ la wɛ, wadila akangbi vinɔ mɛ nyi nzɔ̃ni gesi. Kanda tɛ mɔ ko, mɔ bata beta vinɔ ngbĩi, mɔ kangbi ni bo na olo!”

¹¹ Ĩ ba se mɛ ndo Yezo ali na kɔzo ye ti kpɛnɛ tɛ lo ka kɔdɔrɔ ti Kana, mɛ ka sese ti Galilea la. Lo li ndo nga so, so fangɔ ndima tɛ lo yango. Ava lo ahu ndo ye ko lo li, la ala ye lo tɛ lo.

¹² So pɛni ko, Yezo na ta lo, na ayata lo ti kɔli, nga na ava lo alo so ndo ko, agwe ka kɔdɔrɔ ti Kapɛrnaume. Ko ta ala li ndo kai bi gba ma.

Yezo atoma awa kangɔ ye ka ya kota da Nzapa

¹³ Ngoi mɛ ndo yenga ti Lipandasi tɛ Ayuda ĩ doli ko, Yezo agwe ka Yeruzalɛmɛ.

¹⁴ Lo ĩ li ka ya kota da Nzapa ko, lo tã azi so ndoka abagara, na angasã ngbaga, nga na ambipa. Lo tã nga awa tongbingɔ faranga adunga so tɛrɛ mɛsa tɛ la.

¹⁵ Lo mu kpu, lo lɛkɛ na fimbo, lo toma na azi ko zu, na angasã ngbaga, nga na abagara tɛ la ka ya kota da Nzapa, ala si. Lo sa faranga tɛ awa tongbingɔ faranga tise, lo tukia amɛsa ni.

¹⁶ Lo pa hɛ̃ awa kangɔ ambipa ya: “Ĩ lɔ ambipa tɛ ĩ ndo mɛ ĩ zi! Ta ĩ gbinya da tɛ To mbi ati da ti buze ma!”

¹⁷ Ava lo ĩ ma tɛnɛ ko lo ĩ tɛnɛ ko, bɛ la ada na tɛnɛ mɛ asu ka ya Buku tɛ Nzapa ya: “Ae Nzapa, mbi ye da tɛ mɔ ma ya ma, ko lo ni ndozɔ bɛ mbi nga ma wá.”

¹⁸ So pɛni, agbia tɛ Ayuda ahũnda lo ya: “Ye ti kpɛnɛ mɛ mɔ lengbi ti lingɔ, fangɔ na e, wa e hĩnga ya, Nzapa la ahɛ̃ mɔ nguru ti lingɔ na aye olo nɛ?”

¹⁹ Yezo agbinya hɛ̃ la ya: “Ĩ kara kota da Nzapa olo ĩ zi, mbi na diringɔ wangɔ ni na ya bi ta.”

²⁰ La agbia tɛ Ayuda apa hɛ̃ lo ya: “Oo! Kota da Nzapa mɛ ndo azi amu buru sui siɔ ndoni mana so wangɔ ni ko, mɔ pa ya, se akara ni azi ko, mɔ diri mɔ wa ni na ya bi ta gɛgɛrɛ?”

²¹ Kanda kota da Nzapa mɛ ndo Yezo ndoha lo ni ko, adu tɛrɛ lo nvɛni.

²² Ngoi mɛ ndo Yezo ĩ so na pɛ kwá tɛ lo ko, bɛ ava lo ada na tɛnɛ ko ndo lo tɛnɛ. La ala ye lo tɛnɛ mɛ Buku tɛ Nzapa atɛnɛ, nga na tɛnɛ mɛ Yezo atɛnɛ.

Yezo ndohĩnga tɛnɛ zu mɛ ka ya bɛ zo

²³ Ngoi mɛ ndo Yezo ade ka Yeruzalɛmɛ, na ngoi yenga ti Lipandasi tɛ Ayuda ko, azi ma wo ma ahũ ndo aye ti kpɛnɛ mɛ lo li, la ala ye lo tɛ lo.

²⁴ Kanda ta Yezo akpa ndo bɛ lo na ndo lo yengɔ tɛ la ma, na lo mɛ ya, lo hĩnga dangɔ bɛ tɛ la zu.

²⁵ Ta lo ndoye nga ya, apa hɛ̃ ni lo ti se li ye tɛ azi mɔ, ta sanga ma, lo nvɛni lo ndohĩnga lo zu mɛ ka ya bɛ azi.