Yoanɛ 19 - Fana Ngbangɔ 1987

¹ Pilato ahɛ̃ nyɔ ya amu Yezo, asɔ̃ lo na fimbo.

² Aturugu ango bilo abi li Yezo nga ma se tɛ gbia, kanda tɛ Yezo ko, bilo ni adu ndo bilo ti kĩ. Ala yu nga lo na bengba bɔngɔ.

³ Ala nɔ ka gbɛlɛ lo, abala lo ya: “Kota gbia tɛ Ayuda, zengba oo!” Ala baba ma lo.

⁴ Pilato ati lo ka ya da tɛ lo, asi, apa hɛ̃ azi ko butu butu ya: “Ĩ ma hĩ, mbi na singɔ na kɔli olo ge gegi hɛ̃ ĩ, wadila ĩ hĩnga ya, ta mbi hũ siɔ ye mɛ lo li, ya mbi fa ngbanga mbi bi li lo ma.”

⁵ La Yezo asi na bilo ti kĩ so li lo, nga na bengba bɔngɔ so tɛrɛ lo. Pilato apa hɛ̃ la ya: “Ĩ ba lo la!”

⁶ Ngoi mɛ agbia tɛ awa lungɔ Nzapa na ye, na awa batangɔ kota da Nzapa ĩ hũ Yezo ko, ala derɛ kɔngɔ ya: “Agɔngɔ lo ndo krusi! Agɔngɔ lo ndo krusi.” Pilato apa hɛ̃ la ya: “Ĩ mu lo, ko ĩ nvɛni ĩ gɔngɔ lo ndo krusi, ta sanga ma, ta mbi hũ tɛ mbi siɔ ye mɛ lo li, ya mbi fa ngbanga mbi bi li lo ma.”

⁷ Ayuda agbinya hɛ̃ lo ya: “E na mbanga ndia, ko na se ndia ni ko, ale aho lo, ta sanga ma, lo pa ya, ni Nyi Nzapa.”

⁸ Pilato ĩ ma tɛnɛ ko ala ĩ tɛnɛ ko, mbɛtɔ ti gbɔ̃ lo aɔ ndoni.

⁹ Lo diri, lo li ka da tɛ lo, lo hũnda Yezo ya: “Mɔ lo wa?” Ko ta Yezo agbinya tɛnɛ hɛ̃ lo ma.

¹⁰ La Pilato ahũnda lo ya: “Ta mɔ ye tɛnɛngɔ tɛnɛ hɛ̃ mbi ma? Ta mɔ hĩnga ya, mbi na nguru ti zingɔ mɔ, bere gɔngɔngɔ mɔ ndo krusi ma?”

¹¹ Yezo agbinya hɛ̃ lo ya: “Ta mɔ na nguru kɔi ndo mbi ma. Kɔtɛ nguru mɛ mɔ na ni bo la nguru mɛ Nzapa ahɛ̃ mɔ. Nda mɛ siɔ ye tɛ zo mɛ ahɛ̃ mbi hɛ̃ mɔ, aɔ ndo siɔ ye tɛ mɔ la.”

¹² Ato bo na ngoi ni ko la Pilato agi kɔdɛ ti zingɔ Yezo. Ko Ayuda ato nda derɛngɔ kɔngɔ ya: “Se mɔ zi kɔli olo ko, kanda ta mɔ ye kota gbia ti Roma ma! Zo zu ko la apa ya, ni kota gbia ko, wa kɛ̃ngɔ kota gbia ti Roma la!”

¹³ Ngoi mɛ Pilato ĩ ma tɛnɛ ni ko, lo pa ya, asi na Yezo ka gegi. Pilato adu so ndo kiti ti fangɔ ngbanga, na ndo mɛ andoili ya “Ndo mɛ adɔngɔ na tɛnɛ.” (Andoili ndo ni ko na yanga tɛ Ayuda ya “Gabata.”)

¹⁴ Lá ni ko adu ndo lipɛ yenga ti Lipandasi, na ge tɛ bɛ kɔmbitɛ. Pilato apa hɛ̃ Ayuda ya: “Ĩ ba kota gbia tɛ ĩ la!”

¹⁵ La ala dɛrɛ kɔngɔ ya: “Aho lo! Aho lo! Agɔngɔ lo ndo krusi!” Pilato ahũnda la ya: “Ĩ ye ya agɔngɔ kota gbia tɛ ĩ ndo krusi?” Agbia tɛ awa lungɔ Nzapa na ye agbinya hɛ̃ lo ya: “Kota gbia tɛ e kɔi bo la lo mɛ ka Roma.”

¹⁶ Pilato ĩ hũ so ko, azi Yezo hɛ̃ la ya, agɔngɔ lo ndo krusi. La ala gbɔ̃ Yezo aɔ na lo.

Agɔngɔ Yezo ndo krusi

¹⁷ Yezo nvɛni la ayɔ krusi tɛ lo so ya kɔdɔrɔ asi na ni, agwe na ni ka ndo mɛ ili ni la “Ndo ti kpokpo li zo.” (Andoili ndo ni ko na yanga tɛ Ayuda ya “Gɔlgɔta.”)

¹⁸ Ala ĩ si na Yezo kai ko, ala gɔngɔ lo ndo krusi. Na ngoi ni ko, ala gɔngɔ nga awa nzĩ se na ndo krusi mɛ ndɛ̃ osɛ, kɔi na ndo kɔti, kɔi na ndo ga, Yezo tɛ lo na ndo bɛ ni.

¹⁹ Kanda uzu ko, Pilato ahɛ̃ nyɔ ya, asu tɛnɛ, akpã ka ndo krusi ni. Tɛnɛ mɛ asu lo mɛ: “Yezo wa Nazarɛtɛ, Kota Gbia tɛ Ayuda.”

²⁰ Ayuda ma wo ma adi tɛnɛ ni ko, ta sanga ma, agɔngɔ Yezo ndo krusi na ndo mɛ ndũ na kɔdɔrɔ, ko asu ndo tɛnɛ ni na yanga tɛ Ayuda, na yanga tɛ awa Roma, nga na yanga tɛ azi ti Grɛsɛ.

²¹ La Ayuda mɛ agbia tɛ awa lungɔ Nzapa na ye ĩ hũ so ko, ala pa hɛ̃ Pilato ya: “Ale ta mɔ su ya: ‘Kota Gbia tɛ Ayuda’ ma, kanda ale mɔ su ya: ‘Kɔli olo apa ya, ni kota gbia tɛ Ayuda.’ ”

²² La Pilato agbinya hɛ̃ la ya: “Ye ko mbi su wɛ ko, angbã bo na se ko mbi su na ni.”

²³ Ngoi mɛ aturugu agɔngɔ Yezo ndo krusi wɛ ko, ala lɔ abɔngɔ tɛ lo, akangbi ya ni siɔ, turugu kɔi kɔi amu tɛ lo. Ala mu nga ma bɔngɔ tɛ lo mɛ yɔngɔrɔni, ta afũ ni fũngɔ ma, kanda asɔ̃ ni zɛ zɛ zɛ, ato ka ndozu azu ge tise.

²⁴ Ko aturugu atɛnɛ ka popo tɛ la ya: “Ta adu nzɔ̃ni ya, e suru ya yɔngɔrɔ bɔngɔ olo ma, kanda ale e to zeke, wa e gi zo mɛ bɔngɔ ni alengbi ti ngbãngɔ ti lo.” Na lo ni la tɛnɛ mɛ asu ka ya Buku tɛ Nzapa ati na seni. Tɛnɛ ni lo mɛ: “Ala kangbi abɔngɔ tɛ mbi na tɛrɛ la, ala to nga bɔngɔ tɛ mbi na zeke.” Ĩ ba ye mɛ ndo aturugu ali la.

²⁵ Azi mɛ ndo alonga so tɔ̃nda krusi tɛ Yezo lo mɛ: Maria mɛ ta Yezo, na nyita Maria ti wali, na Maria mɛ ya Klopasi, nga na Maria wa Magadala.

²⁶ Yezo ahũ ta lo, ahũ nga va lo ti kpɔ̃ bɛ lo so tɔ̃nda ta lo. La Yezo apa hɛ̃ ta lo ya: “Zo wali, ba nyi mɔ la.”

²⁷ Lo pa nga hɛ̃ va lo ko ya: “Ba ta mɔ la.” Ko ato bo na ngoi ko la va Yezo ni ko amu Maria, agwe na ni ka tɛ lo.

Yezo akpi

²⁸ So pɛni, Yezo ahĩnga ya, ni kɔ nda kwa tɛ ni na olo zu wɛ, ko so lingɔ ya tɛnɛ mɛ asu ka ya Buku tɛ Nzapa ati na seni ko, lo pa ya: “Gwɛ̃ ngu agbɔ̃ mbi.”

²⁹ Mbanga ta kɔi mɛ kpekpe kana asĩ ya ni ndo so ndo ko. La aturugu amu nzunzu, ado na kpekpe kana ni ko, agwa na li kɛkɛ mɛ ili ni la izɔpɛ, aya ni, aye ka nyɔ Yezo.

³⁰ Ngoi mɛ Yezo ĩ nyɔ kpekpe kana ni wɛ ko, lo pa ya: “Kwa zu awɛ!” So pɛni, lo wo na li lo, lo kpi.

Mbanga turugu kɔi akpɔ katɛ Yezo na to

³¹ Lá ni ko adu ndo lipɛ lá ti wɔngɔ tɛrɛ, ko ta agbia tɛ Ayuda aye ya, kinda tɛ azi angbã ka ndo krusi na lá ti wɔngɔ tɛrɛ ma. Ta sanga ma, lá ti wɔngɔ tɛrɛ ni ko adu ndo lá mɛ ngbondoni. Na lo ni la agbia tɛ Ayuda anɔ ahũnda Pilato ya, lo hɛ̃ nyɔ, akara gɛrɛ azi mɛ ka ndo krusi, ya ala kpili, wa azu na kinda tɛ la.

³² Pilato aye, la aturugu anɔ akara gɛrɛ wa nzĩ ti kɔi, akara nga gɛrɛ wa nzĩ ti se mɛ agɔngɔ la ndo krusi ndoni kɔi na Yezo.

³³ Ala ĩ si ndo Yezo ko, ala tã lo kpi wɛ, nda mɛ ta ala kara gɛrɛ lo ma la.

³⁴ Ko mbanga turugu kɔi amu to tɛ lo, akpɔ na katɛ Yezo, ko mɛnɛ na ngu asi bo na ngoi ni ko.

³⁵ Zo mɛ akambisa tɛnɛ olo ko, lo hũ ni na lɛ lo, ko tɛnɛ mɛ lo tɛnɛ adu biani. Lo hĩnga ya, ni tɛnɛ beta tɛnɛ, ko lo tɛnɛ nga so ya, ĩ ye nga lo ni.

³⁶ Ta sanga ma, ye ni ko asi ya, tɛnɛ mɛ asu ka ya Buku tɛ Nzapa ati na seni. Tɛnɛ ni lo mɛ: “Ta ako gbanda bio tɛrɛ lo kɔi ma.”

³⁷ Mbanga tɛnɛ mɛ asu ka ya Buku tɛ Nzapa lo mɛ: “Ala ya gbanda lɛ la, aba zo mɛ ala kpɔ katɛ lo.”

Yozɛfu na Nikodɛmɛ ahɔ kinda tɛ Yezo

³⁸ So pɛni ko, Yozɛfu mɛ wa Arimatea anɔ ahũnda Pilato ya, lo zi hɛ̃ ni lege, ni mu kinda tɛ Yezo ka ndo krusi, ni hɔ ni. Pilato azi lege hɛ̃ lo, la lo nɔ lo mu kinda tɛ Yezo. Yozɛfu aye ndo lo tɛ Yezo na gbe mbingo, na lo mɛ ya, lo ndokpɛ ndo mbɛtɔ tɛ agbia tɛ Ayuda.

³⁹ Nikodɛmɛ mɛ ndo anɔ mbanga lá kɔi na bi ka tɛ Yezo ko, lo nɔ nga ndoni kɔi na Yozɛfu ka tɛ Pilato. Lo nɔ ndo na pupu yɔmbɔ mɛ aalingbi na kpɔ̃ mɛ ili ni la mirɛ, nga na aloɛsi. Yɔmbɔ ni anɛ kilo nga ma ge tɛ sui ta.

⁴⁰ Yozɛfu na Nikodɛmɛ amu kinda tɛ Yezo. Na ngoi mɛ ala ndogana lo na mbufu bɔngɔ ko, ala so ndokĩkĩ yɔmbɔ ndo lo buai buai. Adu se li ye tɛ Ayuda mɛ ala ndoli na ngoi ti hɔngɔ kinda la.

⁴¹ Mbanga yaka kɔi ndo so tɔ̃ ndo mɛ agɔngɔ na Yezo ndo krusi. Ko fana du sende mɛ agɛ̃ na tɛrɛ tɛ́nɛ ndo so yaka ni ko, ta ade ahɔ zo na ya sende ni ko bɛ gbɔ ma.

⁴² Lá ni ko adu lipɛ lá ti wɔngɔ tɛrɛ tɛ Ayuda, ko sende ni so ndo ko ndũ, la Yozɛfu na Nikodɛmɛ ahɔ kinda tɛ Yezo bo so ya sende ni ko.