Yoanɛ 18 - Fana Ngbangɔ 1987

Aturugu agbɔ̃ Yezo

¹ Ngoi mɛ Yezo ĩ kɔ nda tɛnɛngɔ tɛnɛ so ko, lo na ava lo aha nɔ, agwe ka mbage nyi ngu mɛ ili ni la Sedrona. Mbanga nyi yaka kɔi nga ndo so ndo ko, ko lo na ava lo anɔ ka yaka ni ko.

² Yudasi mɛ wa kangɔ Yezo ahĩnga nga ndo ni ko, na lo mɛ ya, Yezo na la ndonɔ ndo kai fani sĩni.

³ La Yudasi amu ambanga aturugu na ambanga awa batangɔ kota da Nzapa, anɔ na la ka yaka ni ko. Agbia tɛ awa lungɔ Nzapa na ye, na Afarizeo la ato azi ni ko ndoni kɔi na Yudasi. Azi ni ko alɔ aye ti tiringɔ na to, ala sɔnɔ nga amɔinda, na atanda, aga na ni so ti la.

⁴ Yezo ahĩnga ye zu mɛ na lingɔ lo, la lo nɔ ka gbɛlɛ la, lo hũnda la ya: “Zo mɛ ĩ ndogi lo na?”

⁵ Ala gbinya hɛ̃ lo ya: “E ndogi Yezo wa Nazarɛtɛ.” Yezo apa hɛ̃ la ya: “Mbi lo mɛ.” Yudasi mɛ wa kangɔ lo alo nga so popo tɛ la.

⁶ Ngoi mɛ Yezo ĩ pa hɛ̃ la ya: “Mbi lo mɛ” ko, ala diri na nda la sɛrɛrɛ, akia tise gburrr!

⁷ Yezo ti hũnda la fani mɛ ndɛ̃ ya: “Zo mɛ ĩ ndogi lo na?” Ala gbinya hɛ̃ lo ya: “E ndogi Yezo wa Nazarɛtɛ.”

⁸ La Yezo agbinya hɛ̃ la ya: “Mbi pa fɛrɛ hɛ̃ ĩ ya, mbi lo mɛ, wa se adu mbi la ĩ ndogi mbi ko, ĩ zia ava mbi agwe tɛ la.”

⁹ Lo tɛnɛ tɛnɛ ni ko so ya, tɛnɛ mɛ ni tɛnɛ uzu ati na seni. Tɛnɛ ni lo mɛ: “Baba, azi mɛ mɔ hɛ̃ la hɛ̃ mbi ko, ta zo kɔi ayu ndo na ti mbi ma.”

¹⁰ Na ngoi ko ndo ko, Simɔ Petro na zabe tɛ lo so ti lo, lo hã ka ya da ni, lo fa na ma kɔli kɔi ti kɔti. Ili kɔli ni ko la Malkusi, lo wa kwa tɛ kota gbia tɛ awa lungɔ Nzapa na ye.

¹¹ Yezo ĩ hũ so ko, apa hɛ̃ Petro ya: “Diri na zabe tɛ mɔ ka ya da ni. Hĩnga ya, ale mbi hũ pɛnɔ mɛ To mbi aye ya, mbi hũ.”

Aturugu anɔ na Yezo ka gbɛlɛ Anɛ

¹² La aturugu na gbia tɛ la, nga na awa batangɔ kota da Nzapa agbɔ̃ Yezo, agbe lo.

¹³ Ala nɔ na lo uzu ka tɛ Anɛ. Anɛ ni ndo to ya Kaifa, Kaifa ndo la kota gbia tɛ awa lungɔ Nzapa na ye na buru ni ko.

¹⁴ Kanda nga bo Kaifa ndo la awa agbia tɛ Ayuda ya: “Nzɔ̃ni ale zo kɔi akpi so azi zu.”

Petro abɛrɛ ya ta ni va Yezo ma

¹⁵ Simɔ Petro na mbanga va Yezo kɔi agwe pɛko Yezo. Kota gbia tɛ awa lungɔ Nzapa na ye ahĩnga va Yezo ni ko nzɔ̃ni. Na lo ni la ngoi mɛ Yezo ĩ li ka ya gbágbá tɛ gbia ko, azia nga va Yezo ni ko ali.

¹⁶ Kanda Petro angbã tɛ lo ka gegi, so tɔ̃ nyɔ gbágbá. Ko va Yezo mɛ kota gbia tɛ awa lungɔ Nzapa na ye ahĩnga lo ko, lo lo ka ya gbágbá lo si, lo tɛnɛ tɛnɛ hɛ̃ zo wali mɛ wa batangɔ nyɔ gbágbá. Zo wali ko azi nyɔ gbágbá, la Petro ali.

¹⁷ Zo wali ko wa batangɔ nyɔ gbágbá ahũnda Petro ya: “Ta mɔ nga mbanga va Yezo ma?” Petro agbinya hɛ̃ lo ya: “Ipɔ! Ta mbi va lo ma.”

¹⁸ Awa kwa na awa batangɔ gbágbá ato wá, alonga tɛrɛ ni, ala so ndokpɛ, na lo mɛ ya, de ndoya, ko Petro alo nga so tɛrɛ wá ni, lo na la so ndokpɛ.

Kota gbia tɛ awa lungɔ Nzapa na ye ahũnda Yezo na ndo

¹⁹ Kota gbia tɛ awa lungɔ Nzapa na ye ahũnda Yezo na ndo na lo tɛ ava Yezo, nga na lo ti ye mɛ Yezo ndoha na azi.

²⁰ La Yezo agbinya hɛ̃ lo ya: “Mbi ndotɛnɛ ndo tɛnɛ na gbɛlɛ azi zu. Ngoi zu mbi ndoha azi na lo tɛ Nzapa na ya da sambela tɛ Ayuda, nga na ya kota da Nzapa. Ndo mɛ Ayuda ndobombi tɛrɛ la da la. Ko ta mbi tɛnɛ ndo tɛnɛ kɔi na gbe mbingo ma.

²¹ Wa nda mɛ mɔ ndohũnda mbi nɛ? Azi mɛ ndo ama mbi ko, hũnda la ya, tɛnɛ mɛ ndo mbi tɛnɛ hɛ̃ la nɛ? Ala nvɛni ahĩnga tɛnɛ ni nzɔ̃ni.”

²² Ngoi mɛ Yezo so ndotɛnɛ tɛnɛ ko, mbanga zo kɔi so gunda lo, lo wa batangɔ kota da Nzapa, lo ba ma Yezo gba, lo pa hɛ̃ Yezo ya: “Ta se mɛ mɔ lengbi ti gbinyangɔ na tɛnɛ hɛ̃ kota gbia tɛ awa lungɔ Nzapa na ye la ma!”

²³ La Yezo apa hɛ̃ lo ya: “Tɛnɛ mɛ mbi tɛnɛ, se adu ya, mbi tɛnɛ siɔni ko, fa siɔ tɛnɛ mɛ mbi tɛne. Wa se adu ya, mbi tɛnɛ nzɔ̃ tɛnɛ ko, nda mɛ mɔ ba ma mbi nɛ?”

²⁴ La Anɛ amu Yezo bo so ya kpu, ato lo ka tɛ Kaifa mɛ kota gbia tɛ awa lungɔ Nzapa na ye.

Petro ti bɛrɛ ya ta ni va Yezo ma

²⁵ Na ngoi ko ko, Simɔ Petro angbã tɛ lo ka tɛrɛ wá so ndokpɛ wá. La azi ahũnda lo ya: “Ta mɔ nga mbanga va Yezo ma?” Petro abɛrɛ ya: “Ipɔ, ta mbi va lo ma.”

²⁶ Mbanga wa kwa tɛ kota gbia tɛ awa lungɔ Nzapa na ye, lo songo kɔli ko fɛrɛ Petro afa ma lo, lo pa hɛ Petro ya: “Ta mbi hũ fɛrɛ mɔ na lo ka yaka ma?”

²⁷ Petro ti bɛrɛ ya: “Ta mbi ma.” Ko bo na ngoi ni ko la kɔndɔ ato mbela kɔkɔlia kɔɔɔ!

Anɔ na Yezo ka gbɛlɛ Pilato

²⁸ So pɛni, ala mu Yezo ka tɛ Kaifa, anɔ na lo ka da tɛ gbia Pilato. Adu ndo na nda perere nvɛni. Ngoi mɛ ala ĩ si kai ko, agbia tɛ Ayuda akɛ̃ ya, ta ani li kai ma, so ani ko nyɔ ndia tɛ ani Ayuda, ko agbanzi ani na tɛngɔ yenga ti Lipandasi.

²⁹ Nda mɛ Pilato alo ka ya da asi, anɔ ka gbɛlɛ la la. Lo hũnda la ya: “Ĩ vɔ̃ to tɛrɛ kɔli olo na lo nɛ?”

³⁰ Ala gbinya hɛ̃ lo ya: “Se ta lo li siɔni ma ko, ale ta e si na lo ge tɛ mɔ ma.”

³¹ Pilato apa hɛ̃ la ya: “Ĩ nvɛni ĩ́ mu lo, ĩ́ fa ngbanga tɛ lo na se nyɔ ndia tɛ ĩ.” Agbia tɛ Ayuda agbinya hɛ̃ lo ya: “Ta ndia tɛ e aye ya, e ho zo ma.”

³² Tɛnɛ ni ko asi ya, tɛnɛ mɛ ndo Yezo atɛnɛ so fangɔ se kwa mɛ lo na kpingɔ ati na Seni.

³³ La Pilato adiri ka ya da tɛ lo, aili Yezo, ahũnda lo ya: “Mɔ kota gbia tɛ Ayuda?”

³⁴ Yezo agbinya hɛ̃ lo ya: “Mɔ tɛnɛ so na se dangɔ be tɛ mɔ nvɛni, bere mɔ tɛnɛ na se mɛ azi ndopa na lo tɛ mbi hɛ̃ mɔ?”

³⁵ Pilato agbinya hɛ̃ lo ya: “Mɔ hũ mbi, mbi du wa Yuda? Azi ti kɔdɔrɔ tɛ mɔ, na agbia tɛ awa lungɔ Nzapa na ye la asi na mɔ ge tɛ mbi. Wa ye mɛ mɔ li nɛ?”

³⁶ Yezo agbinya hɛ̃ lo ya: “Ta lo lɛngɔ gbia tɛ mbi adu ge lɛ sese olo ma. Se adu ya, lo lɛngɔ gbia tɛ mbi adu ge lɛ sese olo ko, ale awa kwa tɛ mbi atiri to so gbanzingɔ ya, ta ahɛ̃ mbi hɛ̃ agbia tɛ Ayuda ma. Ko ta lo lɛngɔ gbia tɛ mbi adu ge lɛ sese olo ma.”

³⁷ Pilato ahũnda lo ya: “Alengbi ya, mɔ kota gbia?” Yezo agbinya hɛ̃ lo ya: “Tɛnɛ ni la mɔ tɛnɛ: mbi kota gbia. Mbi ga ge lɛ sese so fangɔ azi na beta lo, na lo ni la adú mbi. Azi zu ko la aye beta lo ko, ala la ndozi ma la, ama tɛnɛ mɛ mbi ndotɛnɛ.”

³⁸ Pilato ahũnda lo ya: “Beta lo alengbi na nɛ?” Pilato ĩ tɛnɛ tɛnɛ ko we ko, lo ti lo lo ka ya da, lo si, lo nɔ ka gbɛlɛ agbia tɛ Ayuda, lo pa hɛ̃ la ya: “Ta mbi hũ siɔ ye mɛ kɔli olo ali, ya mbi fa ngbanga mbi bi li lo ma.

Afa ngbanga ti hongɔ Yezo

³⁹ Kanda na se li ye ti kɔdɔrɔ tɛ ĩ, ngoi zu na yenga ti Lipandasi tɛ ĩ ko, mbi ndozi wa bɔlɔkɔ kɔi hɛ̃ ĩ. Ko ĩ ye ya mbi zi kota gbia tɛ Ayuda hɛ̃ ĩ?”

⁴⁰ Ayuda ĩ ma so ko, ala ti dɛre kɔngɔ ya: “Ipɔ, ta lo ma! E ye ya mɔ zi Barabasi!” Barabasi mɛ ndo ala ye ya azi lo ko, lo wa ndo nzĩ.