Yoanɛ 13 - Fana Ngbangɔ 1987

Yezo akpo gɛrɛ ava lo

¹ Adu ndo na lipɛ yenga ti Lipandasi tɛ Ayuda, ko Yezo ahĩnga ya, ngoi tɛ ni ti ziangɔ lɛ sese olo, diringɔ ka tɛ To ni alengbi wɛ. Ngoi zu lo ndoye ndo azi ti lɛ sese mɛ aye lo tɛ lo, ko lo ye ndo la ngbĩi lo kɔ nda ni.

² Ngoi mɛ ndɔ ĩ de ko, Yezo na ava lo abombi tɛrɛ la so ndotɛ ye. Satana apia ndo abi siɔ wangɔ bɛ Yudasi mɛ nyi Simɔ Iskariɔtɛ ya, lo ka Yezo.

³ Yezo nvɛni ahĩnga ya, Nzapa azia ye kwɛ zu na yamba ti ni, ni lo ka tɛ lo la ni ga, ko ni nga na diringɔ ka tɛ lo.

⁴ La Yezo azia tɛ ni, ahãna ndozu bɔngɔ tɛ lo azi, amu sumɛ, agbe gu ya lo.

⁵ Lo tɔ̃ ngu na ya sɛmbɛ, lo to nda kpongɔ gɛrɛ ava lo kɔi kɔi. Lo mu sumɛ mɛ fɛrɛ lo gbe gu ya lo, lo mbombo na gɛrɛ la.

⁶ Lo ĩ si na ndo Simɔ Petro ko, Simɔ Petro ahũnda lo ya: “Gbia, bo mɔ la mɔ kpo gɛrɛ mbi?”

⁷ Yezo agbinya hɛ̃ lo ya: “Ye mɛ mbi ndoli na olo ko, ta mɔ hĩnga nda ni ma, kanda mɔ na hĩngangɔ nda ni gesi.”

⁸ Petro apa hɛ̃ lo ya: “Ipɔ, ta mɔ kpo gɛrɛ mbi bɛ gbɔ ma!” Yezo agbinya hɛ̃ lo ya: “Se ta mbi kpo gɛrɛ mɔ ma ko, ta mɔ ti du zo tɛ mbi ma.”

⁹ Simɔ Petro apa hɛ̃ lo ya: “Gbia, wa ta mɔ kpo bo gɛrɛ mbi ma. Kpo nga ti mbi na li mbi!”

¹⁰ Yezo apa hɛ̃ lo ya: “Zo ko la agbɔ̃ ngu wɛ ko, ta lo ti du na gwɛ̃ ti gbɔ̃ngɔ ngu ma, ta sanga ma, tɛrɛ lo zu avuru wɛ, ko ye mɛ angbã, lo kpo bo la gɛrɛ lo. Tɛ ĩ tɛrɛ ĩ avuru wɛ, kanda ta ĩ zu ma.”

¹¹ (Yezo ahĩnga zo mɛ na kangɔ lo, nda mɛ lo pa ya: “Ta ĩ zu la tɛrɛ ĩ avuru ma” la.)

¹² Lo ĩ kpo gɛrɛ la wɛ ko, lo ti yu ndozu bɔngɔ tɛ lo, lo diri lo du ka tɛrɛ tɛ, lo pa hɛ̃ la ya: “Ĩ hĩnga nda ye ko mbi li tɛrɛ ĩ nga?

¹³ Ĩ ndoili mbi ya: ‘Wa hangɔ lo tɛ Nzapa’, ĩ ndoili nga mbi ya: ‘Gbia’, ko adu nzɔ̃ni, ta sanga ma, mbi wa hangɔ lo tɛ Nzapa, mbi nga Gbia.

¹⁴ Wa se mbi mɛ Gbia, mbi mɛ nga wa hangɔ lo tɛ Nzapa, mbi kpo gɛrɛ ĩ ko, ale ĩ kpo nga gɛrɛ afɔ̃ ĩ.

¹⁵ Ta sanga ma, mbi fa ĩ na nzɔ̃ le lo ya, ĩ li ye tɛrɛ afɔ̃ ĩ nga ma se ko mbi li na ni tɛrɛ ĩ.

¹⁶ Mbi pa hɛ̃ ĩ ti beta tɛnɛ ya, ta wa kwa ndoɔ gbia tɛ lo ma, ko ta wa nɔngɔ kwa ndoɔ nga wa tongɔ lo na kwa ma.

¹⁷ Na olo ko, ĩ hĩnga ni wɛ, se ĩ li ni na seni ko, ĩ na dungɔ na dengɔ bɛ.

¹⁸ “Ta mbi ndohá ĩ zu ma, mbi hĩnga azi mɛ mbi sara la mbi kpã ya, ala du ava mbi. Kanda ale tɛnɛ mɛ asu ka ya Buku tɛ Nzapa ati na seni. Asu ka Buku ya: ‘Zo mɛ e na lo e tɛ ye ya sɛmbɛ kɔi ko, lo sana lo ti wa kɛ̃ngɔ mbi.’

¹⁹ Uzu ti ye ni ko singɔ ko, mbi pia mbi pa hɛ̃ ĩ na olo mɛ, wa na lá ko ye ni ko asi ko, ale ĩ ye ya, ‘Mbi Zo mɛ mbi da.’

²⁰ Mbi pa hɛ̃ ĩ ti beta tɛnɛ ya, zo ko la ayamba zo mɛ mbi to lo ko, afa ya, zo ni ko ayamba nga mbi, wa zo ko la ayamba mbi ko, afa ya, lo yamba nga wa tongɔ mbi.”

Yezo apia apa ya Yudasi na kangɔ ni

²¹ Yezo ĩ tɛnɛ tɛnɛ ko wɛ ko, tɛrɛ lo akpi sui sui, la lo pa hɛ̃ ava lo ya: “Mbi pa hɛ̃ ĩ ti beta tɛnɛ ya, mbanga zo kɔi so popo tɛ ĩ na kangɔ mbi hɛ̃ awa kɛ̃ngɔ mbi.”

²² Ava lo ĩ ma so ko, ala bangbi lɛ la, ko ta ala hĩnga zo mɛ Yezo ndohá lo ma.

²³ Mbanga va Yezo kɔi ti kpɔ̃ bɛ lo adu so gunda Yezo.

²⁴ Simɔ Petro ako lɛ lo hɛ̃ lo ya, lo hũnda Yezo, wa Yezo adi ili zo mɛ lo ndohá lo.

²⁵ La va Yezo ko awo tɛrɛ lo ka ndo Yezo, ahũnda lo ya: “Zo mɛ mɔ ndohá lo na?”

²⁶ Yezo agbinya hɛ̃ lo ya: “Mbi na rnungɔ mapa, dongɔ na ngu tɛ, wa zo ko la mbi hɛ̃ lo mapa ni ko, lo la.” La Yezo amu mapa, ado na ngu tɛ, ahɛ̃ Yudasi mɛ nyi Simɔ Iskariɔtɛ.

²⁷ Bo na ngoi mɛ Yudasi ĩ mu mapa ka ti Yezo ko, Satana ali ya bɛ lo. Yezo apa hɛ̃ Yudasi ya: “Ye ko mɔ ye lingɔ ko, li ni hiɔ!”

²⁸ (So popo tɛ ava Yezo mɛ so tɛrɛ tɛ ko, ta zo kɔi ahĩnga nda tɛnɛ ko Yezo atɛnɛ hɛ̃ Yudasi ma.

²⁹ Ambanga ava lo ada bɛ la ya, oko Yudasi la wa batangɔ faranga ko, ka dɛ na lo ni la, Yezo apa hɛ̃ lo ya, lo nɔ, lo vɔ̃ ye tɛ ani ti yenga. Bere Yezo apa hɛ̃ lo ya, lo hɛ̃ ye hɛ̃ awa yɛlɛ.)

³⁰ Yudasi ĩ mu mapa ni ĩ tɛ wɛ ko, lo lo ka ya da bu, lo si. Bi avu ndo.

Yezo alu fana ndia hɛ̃ ava lo

³¹ Ngoi mɛ Yudasi ĩ si wɛ ko, Yezo apa ya: “Na olo ko, azi na hũngɔ ndima tɛ mbi Nyi Zo, ala nga na hũngɔ ndima tɛ Nzapa ti ndo mbi.

³² Wa se azi ahũ ndima tɛ Nzapa ti ndo mbi ko, Nzapa nvɛni nga na fangɔ ndima tɛ mbi Nyi lo bo lo mɛ.

³³ Aya mbi, angbã bi yakere, ta mbi na ĩ, e ti e du ndoni kɔi ma. Ĩ na gingɔ mbi, kanda ta ĩ na hũngɔ mbi ma. Tɛnɛ ko ndo mbi tɛnɛ hɛ̃ agbia tɛ Ayuda nga la mbi na tɛnɛngɔ na olo hɛ̃ ĩ, tɛnɛ ni lo mɛ: ta ĩ lengbi ti nɔngɔ ka ndo mɛ mbi na gwengɔ da ma.

³⁴ Wa ĩ ma fana ndia mɛ mbi lu hɛ̃ ĩ lo mɛ: ale ĩ ndoyengbi. Ale ĩ ndoyengbi nga ma se mɛ mbi ye na ĩ.

³⁵ Se ĩ yengbi, wadila azi zu ahĩnga ya, ĩ ava mbi.”

Yezo apia apa ya Petro na bɛrɛngɔ lo tɛ ni

³⁶ Simɔ Petro ahũnda lo ya: “Gbia, mɔ na gwengɔ wa?” Yezo agbinya hɛ̃ lo ya: “Ndo mɛ mbi na gwengɔ da ko, ta mɔ lengbi ti gangɔ pɛko mbi na olo mɛ ma, kanda mɔ na gangɔ pɛko mbi gesi.”

³⁷ Petro ahũnda lo ya: “Gbia, nda mɛ mɔ pa ya, ta mbi lengbi ti gangɔ pɛko mɔ na olo ma nɛ? Mbi ye ya mbi ka tɛrɛ mbi so mɔ!”

³⁸ La Yezo asana ahũnda lo ya: “Ti biani, mɔ ye ya mɔ ka tɛrɛ mɔ so mbi? Mbi pa hɛ̃ mɔ ti beta tɛnɛ ya, uzu ti kɔndɔ tongɔ mbela ko, mɔ na bɛrɛngɔ fani ta ya, ta mɔ hĩnga mbi ma.”