Yoanɛ 11 - Fana Ngbangɔ 1987

Pa ti kwá tɛ Lazaro

¹ Mbanga kɔli kɔi na ayata lo ti wali ndodu ndo ka kɔdɔrɔ ti Betania, ili kɔli ni la Lazaro, ili ayata lo la Maria na Marta. Lá kɔi ko, tɛrɛ Lazaro asɔ.

² (Maria mɛ ndo akĩkĩ yɔmbɔ na ndo gɛrɛ Yezo, amu nga kwa li lo nvɛni, ambo na gɛrɛ Yezo ko, lo nyita Lazaro mɛ tɛrɛ lo asɔ.)

³ Ayata lo Maria na Marta ato ndo mbanga zo kɔi ya lo nɔ, lo pa hɛ̃ Yezo ya: “Gbia, tɛrɛ kwa mɔ ndosɔ.”

⁴ Yezo ĩ ma pa ti ngã ni wɛ ko, lo pa ya: “Ngã ko la agbɔ̃ Lazaro ko, ta na hongɔ lo ma. Ngã ni ko agbɔ̃ lo so fangɔ azi na ndima tɛ Nzapa, ko azi na gondangɔ mbi Nyi lo na lo ni.”

⁵ Yezo ndoye ndo Marta, na nyita lo Maria nga na Lazaro sĩ.

⁶ Ngoi mɛ lo ĩ ma ya, tɛrɛ Lazaro ndosɔ ko, ta lo nɔ ndo na lá ni ko ma, lo la ndo bi se so ndo mɛ apa na kwá hɛ̃ lo.

⁷ So pɛni, lo pa hɛ̃ ava lo ya: “E diri é gwe ka Yudea.”

⁸ Ava lo agbinya hɛ̃ lo ya: “Wa hangɔ lo tɛ Nzapa, bo lo biri biri ko, Ayuda ndogi kɔdɛ ya, ani boroka mɔ na tɛ́nɛ, ani ho mɔ, ko mɔ ti ye ya, mɔ diri mɔ nɔ kai?”

⁹ Yezo apa hɛ̃ la ya: “Ĩ hĩnga nzɔ̃ni ya, ndo ndovuru na ya saa sui kɔi ndoni sɛ. Se zo adɔ nɔ na ngoi mɛ ndo avuru ko, ta lo ta li gɛrɛ lo ma, na lo mɛ ya, ndo avuru, ko lo hũ ndo yango.

¹⁰ Wa se zo adɔ nɔ na bi ko, lo ta li gɛrɛ lo, na lo mɛ ya, mbingo avu lɛ lo.”

¹¹ Lo ĩ tɛnɛ tɛnɛ ko hɛ̃ la wɛ ko, lo pa nga hɛ̃ la ya: “Kwa e Lazaro ala langɔ, ko mbi ye ya mbi nɔ mbi zingɔ lo.”

¹² Ava lo agbinya hɛ̃ lo ya: “Gbia, se lo la langɔ ko, tɛrɛ lo na hãngɔ.”

¹³ Yezo asepara ndo pangɔ hɛ̃ la ya, Lazaro akpi, ko ava lo ndoda ndo tɛ la bɛ la ya, Yezo ndopa ya, Lazaro ala beta langɔ mɛ zo ndola.

¹⁴ La Yezo apa hɛ̃ la yango ya: “Lazaro akpi.

¹⁵ Ko bɛ mbi ade na lo tɛ ĩ, ta sanga ma, ta mbi kai ma, adu nga so, wa ĩ ye lo tɛ mbi. Wa é nɔ ka ndo kwa tɛ Lazaro.”

¹⁶ Ko Toma mɛ andoili lo ya Ngbɔ ĩ ma so ko, apa hɛ̃ afɔ̃ lo mɛ ava Yezo ya: “E nɔ nga kai, wa e na Gbia tɛ e, é kpili ndoni kɔi.”

Yezo wa songɔ azi na pɛ kwá

¹⁷ Yezo ĩ nɔ ĩ si kai ko, lo tã apia ahɔ Lazaro ala bi siɔ.

¹⁸ Kɔdɔrɔ ti Betania adu ndũ na Yeruzalɛmɛ, ta popo ni aɔ kilomɛtrɛ ta ma.

¹⁹ Ayuda ma wo ma alo ndo ka Yeruzalɛmɛ aga ka tɛ Maria na Marta so zungɔ na bɛ la na lo kwa tɛ nyita la.

²⁰ Ngoi mɛ Marta ĩ ma ya Yezo la ga ko, lo nɔ so ngorongɔ lo, ko Maria angbã tɛ lo adu ka ya da.

²¹ Marta na Yezo ĩ tengbi ko, Marta apa hɛ̃ lo ya: “Ee Gbia, se mɔ du ndo ge ko, ale ta nyita mbi akpi ma.

²² Ko mbi hĩnga ya, bɛ se mɔ yɔ ye ka ti Nzapa na olo ko, lo na hɛ̃ngɔ mɔ.”

²³ La Yezo apa hɛ̃ lo ya: “Nyita mɔ na songɔ.”

²⁴ Marta ĩ ma so ko, agbinya hɛ̃ lo ya: “Mbi hĩnga ya, lo so gbanda na lá ti fangɔ ngbanga, na ngoi mɛ gbanda awa kwáni aso na pɛ kwá.”

²⁵ Yezo agbinya hɛ̃ lo ya: “Mbi wa songɔ azi na pɛ kwá, mbi nga wa hɛ̃ngɔ la beta du. Zo ko la aye lo tɛ mbi, be se lo kpi ko, lo na songɔ.

²⁶ Wa zo ko alua beta du, aye nga lo tɛ mbi ko, ta tɔrɔ tɛrɛ lo na kpingɔ bɛ gbɔ ma. Mɔ ye lo tɛnɛ olo nyɔ mbi?”

²⁷ La Marta agbinya hɛ̃ lo ya: “Ĩi Gbia, mbi ye ya, mɔ Mɛsia, mɔ Nyi Nzapa mɛ ndo e ma ya, lo na gangɔ ge lɛ sese.”

Yezo ato to so Lazaro

²⁸ Marta ĩ tɛnɛ tɛnɛ ko wɛ ko, lo nɔ, lo ili nyita lo Maria, lo tɛnɛ hɛ̃ lo na papata ya: “Wa hangɔ lo tɛ Nzapa la kai, lo ndoili mɔ.”

²⁹ Maria ĩ ma bo so ko, lo lo, lo nɔ hiɔ, lo tã Yezo. (

³⁰ Ta Yezo ade asi ka lɛ kɔdɔrɔ ma, lo de bo ka ndo mɛ fɛrɛ Marta atã na lo.)

³¹ Ayuda ndo so ya da so ndozu na bɛ Maria, ko ngoi mɛ ala ĩ hũ Maria ĩ lo ĩ si na kpɛ ko, ala si nga, anɔ pɛko lo. Ala da bɛ la ya, Maria anɔ ka ndo sende so tongɔ to.

³² Ngoi mɛ Maria ĩ si na ndo mɛ Yezo da, ĩ hũ lo ko, Maria akuku gbɛlɛ lo, apa hɛ̃ lo ya: “Ee Gbia, se mɔ du ndo ge ko, ale ta nyita mbi akpi ma.”

³³ Yezo ĩ hũ to mɛ Maria ndoto sinyɛ sinyɛ, ĩ hũ nga to mɛ Ayuda mɛ aga pɛko Maria ndoto ko, kota vundu agbɔ̃ lo, li lo ahulu,

³⁴ la lo hũnda la ya: “Ĩ hɔ lo ka wa?” Ala gbinya hɛ̃ lo ya: “Gbia, ga mɔ ba ndo ni.”

³⁵ Lo ĩ si kai ko, lo to nga to.

³⁶ Ayuda ĩ hũ so ko, ala bema ya: “Biani, lo ye ndo Lazaro sĩ nvɛni.”

³⁷ Ko ambanga so popo tɛ la apa ya: “Lo ndo la lo ndosara lɛ wa ziba, wa ta lo gbanzi Lazaro na kpingɔ ma ya nɛ?”

Yezo aso Lazaro na pɛ kwá

³⁸ Vundu ti gbɔ̃ Yezo ma wo ma, lo nɔ ka ndo sende. Agɛ̃ ndo sende ni na tɛrɛ tɛ́nɛ, amu tɛnɛ mɛ ndɛ̃, avĩ na nyɔ ni.

³⁹ Yezo apa hɛ̃ la ya: “Ĩ bilingi tɛ́nɛ ni ĩ zi.” La Marta mɛ nyita wa kwáni apa hɛ̃ Yezo ya: “Gbia, lo fũ we, ta sanga ma, ahɔ lo ali na olo bi siɔ.”

⁴⁰ Yezo agbinya hɛ̃ lo ya: “Mbi pa fɛrɛ hɛ̃ mɔ ya, se mɔ ye lo tɛ mbi ko, mɔ na hũngɔ ndima tɛ Nzapa.”

⁴¹ La ala bilingi tɛ́nɛ ni azi. Ko Yezo aya lɛ lo ndozu, apa ya: “To mbi, mbi hɛ̃ mɔ sia kɔli, na lo mɛ ya, mɔ ma sambela tɛ mbi.

⁴² Mbi hĩnga tɛ mbi ya, mɔ ndoma mbi ngoi zu, kanda mbi tɛnɛ nga so na lo tɛ azi mɛ aka mbi kɛrɛrɛ, ya ala ye ya, mɔ la mɔ to mbi.”

⁴³ Lo ĩ tɛnɛ nga so we ko, lo dɛ kɔngɔ kpengbani ya: “Lazaro, si!”

⁴⁴ Wa kwáni Lazaro alo kai asi. Agana ndo gɛrɛ lo na ti lo na nyɔ bɔngɔ, agbe nga ndo lɛ lo na bɔngɔ. Yezo apa hɛ̃ la ya: “Ĩ zara lo, ko ĩ zia lo, lo gwe.”

Agbia tɛ Ayuda aye hongɔ Yezo

⁴⁵ Na popo tɛ Ayuda mɛ aga so bangɔ Maria ko, ambanga gba ahũ ye mɛ Yezo ali, la ala ye lo tɛ lo.

⁴⁶ Kanda ambanga mɛ ndɛ̃ anɔ ka tɛ Afarizeo, apa hɛ̃ la lo ye mɛ Yezo ali.

⁴⁷ La Afarizeo na agbia tɛ awa lungɔ Nzapa na ye abombi awa fangɔ ngbanga, ahũnda la ya: “Kɔli olo ndoli aye ti kpɛnɛ ma wo ma, ko ye mɛ e lengbi ti lingɔ nɛ?

⁴⁸ Se e zia lo ya, lo li aye nga so ko, azi zu na yengɔ lo tɛ lo, ko akota azi ti Roma na gangɔ gbɛ̃ngɔ kota da Nzapa tɛ e, ala nga na kpɔngɔ azi ti kɔdɔrɔ tɛ e!”

⁴⁹ Ko mbanga kɔli kɔi na popo tɛ la, ili lo Kaifa, lo ndo la kota gbia tɛ awa lungɔ Nzapa na ye na ya buru ni ko, lo pa hɛ̃ la ya: “Ta ĩ na kɔdɛ ma!

⁵⁰ Ĩ hĩnga ya, nzɔ̃ni ale zo kɔi akpi so azi zu, wa na lo tɛ lo kɔi ko, azi zu angbã lɛ la ngɛ̃.”

⁵¹ Ta Kaifa atɛnɛ ndo tɛnɛ ni ko na se bɛ lo ma. Kanda oko ndo lo kota gbia tɛ awa lungɔ Nzapa na ye na ya buru ni ko, la lo pia ndo lo pa nyɔ Nzapa ya, ale Yezo akpi so azi.

⁵² Ta lo lengbi ndo ti kpingɔ bo so Ayuda kɔi ma, kanda lo lengbi nga ti kpingɔ so bombingɔ lɛ aya Nzapa mɛ agundu na ndo kwe zu.

⁵³ Ato bo na lá ni ko ndo la agbia tɛ Ayuda amangbi ya, ani ho Yezo.

⁵⁴ Nda mɛ ndo ta Yezo ti ndofɔnɔ yango na popo tɛ Ayuda ma la. Lo na ava lo alo ndo so ndo ko, agwe ka ya mbanga kɔdɔrɔ kɔi mɛ ili ni la Efraimɛ. Efraimɛ ni ndũ na be ndo, la ala ngbã kai.

⁵⁵ Yenga ti Lipandasi tɛ Ayuda adoli ndo, ko uzu ti yenga ni tingɔ ko, azi ma wo ma agwe ka Yeruzalɛmɛ so lingɔ tɔrɔke ti onzingɔ ló tɛrɛ la.

⁵⁶ Ngoi mɛ ala ĩ si kai ko, ala so ndogigi Yezo. Ala ĩ li ka ya kota da Nzapa ko, ala hũndangbi tɛrɛ la ya: “Ĩ da bɛ ĩ ya nɛ? Yezo na gangɔ yenga, bere ta lo na gangɔ ma?”

⁵⁷ Agbia tɛ awa lungɔ Nzapa na ye, nga na Afarizeo ahɛ̃ ndo nyɔ ya, se zo ahĩnga ndo mɛ Yezo da ko, ale lo pa hɛ̃ ani, wa ani gbɔ̃ lo.