Tito 3 - Fana Ngbangɔ 1987

Se du tɛ awa Kristo

¹ Pa hɛ̃ azi tɛ Nzapa zu ya, ala bi tɛrɛ la hɛ̃ agbia kɔdɔrɔ, ala bi nga tɛrɛ la hɛ̃ agbia tɛ leta. Ale ala ma nyɔ la, aye nga lingɔ anzɔ̃ ye zu.

² Pa hɛ̃ la ya, ta ala tɛnɛ tɛnɛ siɔni na ili zo ma. Ale ala du na mangbingɔ, ali afɔ̃ la nzɔ̃ni, ali ye ngoi zu na tɛrɛ azi zu na dede bɛ.

³ Ta sanga ma, ndo uzu ko, e ndo awa buba, ta e ndoma ndo nyɔ ma, e yu ndo lege. E ti ndo ambɛ ti gwe ye ndɛ̃ ndɛ̃ ndɛ̃, e nga ndo na gwɛ̃ ti aye ndɛ̃ ndɛ̃ ndɛ̃ mɛ ndode bɛ zo. E ndo asiɔ azi, e ndo na gwɛ̃ ti ye tɛ afɔ̃ e. E ndokɛ̃ngbi ndo,

⁴ kanda ngoi mɛ ndo Nzapa mɛ Wa songɔ e afa ya, ni ndoli azi nzɔ̃ni, ni ndoye nga la ko,

⁵ lo so ndo e. Ko ta lo so ndo e, na lo mɛ ya, e li nzɔ̃ kwa ma, kanda lo so ndo e, na lo mɛ ya, lo ma vundu tɛ e. Lo kpo siɔ ye tɛ e na nguru tɛ Tɔrɔ Santo ya, Tɔrɔ Santo ati adú e fani mɛ ndɛ̃, ko e lua fana du.

⁶ Ta sanga ma, Nzapa ahɛ̃ e nguru tɛ Tɔrɔ Santo sĩ nvɛni ti ndo Wa songɔ e Yezo Kristo.

⁷ Nzapa ali ndo so ya, na lo ti nzɔ̃ bɛ tɛ ni ko, ni mu e ka le ni ya, e abɛta azi, ko e lua du ti kaka mɛ e ndolɛndɛrɛ.

⁸ Tɛnɛ ko la mbi tɛnɛ ko, adu bɛta tɛnɛ. Ko mbi ye ya, atɛnɛ mɛ mbi tɛnɛ ko, ha ni kpengbani, wadila azi ko la aye lo tɛ Nzapa ahɛ̃ tɛrɛ la na lingɔ anzɔ̃ kwa. Ba ye mɛ nzɔ̃ni, ko andoza nga azi la.

⁹ Ta mɔ bimbi tɛnɛ ti buba ma, ta mɔ dikɔ ili akotara mɔ gbara gbara ma, ta mɔ pa azi na pa ma, ta mɔ bimbi nga tɛnɛ na lo ti ndia tɛ Mɔizɛ ma. Aye ko zu adu gɛgɛrɛ, ta nda ni nga da ma.

¹⁰ Zo ko la akangbi popo tɛ awa Kristo ko, tisa lo ti fani kɔi. Se ta lo ma nyɔ mɔ ma ko, tisa lo ti fani se. Wa se ta lo ti ma ko, bɛ lo katɛ.

¹¹ Mɔ hĩnga ya, gi tɛrɛ zo nga so ayu lege tɛ Nzapa, ko asiɔ ye tɛ lo afa ya, lo fa ngbanga lo bi li lo nvɛni.

Ndangba wangɔ

¹² Ngoi mɛ mbi na tongɔ Artemisi, bere Tisikɛ ka tɛ mɔ ko, li kpengbani, mɔ nɔ mɔ tã mbi ka kɔdɔrɔ ti Nikopolisi. Ta sanga ma, mbi separa ya, ngoi ti de alengbi mbi kai.

¹³ Za nga Zenasi mɛ wa gbɔ̃ngɔ koko, mɔ za nga Apolɔsɛ na lo ti fɔnɔ tɛ la, ya ta ye kɔi azanga la ma.

¹⁴ Ale awa Kristo ti tɛ e ahĩnga hɛ̃ngɔ tɛrɛ la na lingɔ anzɔ̃ kwa, wadila ala za azi mɛ ta na ye ti la ma. Se ala li so ko, ta du tɛ la na dungɔ gɛgɛrɛ ma.

¹⁵ Azi zu mɛ e na la ge ndoni kɔi abala mɔ. Pa hɛ̃ awa Kristo mɛ bɛ la ndoye e ya, e bala la. Nzapa ali bɛ nzɔ̃ bɛ hɛ̃ ĩ zu ma ke!