Tito 2 - Fana Ngbangɔ 1987

Polo apa hɛ Tito ya lo ha azi na bɛta lo tɛ Nzapa

¹ Tɛ mɔ ko, ha azi na lo mɛ alengbi na bɛta lo tɛ Nzapa.

² Pa hɛ̃ abange ya, ala li ye na nyɔ kpɔ̃ ni, ala du azi ti ndima, ala du na nzɔ̃ kɔdɛ. Ale ala kpengba na ya lo yengɔ lo tɛ Nzapa, ala ye afɔ̃ la, ala gbe bɛ la.

³ Pa hɛ̃ atara bange ya, ale se li ye tɛ la adu nga ma se li ye tɛ azi tɛ Nzapa. Ta ala di zo ma, ta ala ti ambɛ ti nyɔngɔ kana ma. Ale ala ndohɛ̃ nzɔ̃ wangɔ

⁴ hɛ̃ aya awe mɛ adu na kɔli ya, ala ye akɔ la na aya la.

⁵ Ale atara bange aha na aya awe ya, ala du na nzɔ̃ kɔdɛ, ala du na vuru bɛ, ala li kwa ti ya da tɛ la nzɔ̃ni, ala du anzɔ̃ azi, ala ma nyɔ akɔ la. Ta so ma ko, azi na tɛnɛngɔ ya, tɛnɛ tɛ Nzapa adu siɔni.

⁶ Gbɔ̃ nga gɛrɛ aya kɔli ya, ala du na nzɔ̃ kɔdɛ.

⁷ Na ya lo zu ko, ale mɔ nvɛni mɔ fa nzɔ̃ lɛ lo ti lingɔ nzɔ̃ ye. Na ngoi ko la mɔ ndoha azi na lo tɛ Nzapa ko, ta nyɔ mɔ adu sɛ sɛ ma, ko mɔ ha nga ni na se mɛ alengbi.

⁸ Tɛnɛ tɛnɛ tɛ Nzapa na seni, so zo adi mɔ. Li so wadila kamɛnɛ agbɔ̃ awa kɛ̃ngɔ mɔ, na lo mɛ ya, ta ala lua e na siɔ ye kɔi ma.

⁹ Pa hɛ̃ ambɛ ya, ale ala ma nyɔ ato gbia la, ko na ya alo zu ko, ale ala li ye mɛ ndode bɛ ato gbia la. Ale ta ala kɛ̃ tɛnɛ mɛ ato gbia la ndotɛnɛ hɛ̃ la ma.

¹⁰ Ale ta ala nzĩ nga ye kɔi na ti ato gbia la ma. Kanda ngoi zu ko, ale ala fa ya, ani awa lingɔ nzɔ̃ kwa, wadila ato gbia la ahĩnga ya, ala abɛta azi. Se ala li so, wadila na ya lo zu ko, azi agonda lo tɛ Nzapa mɛ e ndoha, Nzapa mɛ Wa songɔ e.

¹¹ Ale du tɛ azi tɛ Nzapa adu gi tɛrɛ oko, ta sanga ma, Nzapa afa nzɔ̃ bɛ tɛ lo so songɔ azi zu.

¹² Nzɔ̃ bɛ ni ndoha e na kɛ̃ngɔ siɔ du, nga na kɛ̃ngɔ gwɛ̃ ti aye ti lɛ sese ya, so lɛ sese olo ko, e li ye na nyɔ kpɔ̃ ni, e li bɛta ye, e li nga ye mɛ ndode bɛ Nzapa.

¹³ Ale e li so na ngoi mɛ e ndoku lá ti dengɔ bɛ mɛ e ndolɛndɛrɛ. Lá ni ko adu lá mɛ gbanda Wa songɔ e Yezo Kristo mɛ kota Nzapa tɛ e adiri na ni.

¹⁴ Lo nvɛni lo ka ndo tɛrɛ lo na lo tɛ e, so tɔ̃ngɔ e na ya siɔ ye zu. Lo li ndo so ya, e du na vuru bɛ, e ti azi tɛ ni, wa e li anzɔ̃ kwa na gonvɛnɛ.

¹⁵ Ha la na aye ko, sa nguru bɛ la, bela nga la. Pa hɛ̃ la alo ni ko na nguru mɛ Nzapa ahɛ̃ mɔ. Ta mɔ ye ya, zo kɔi asamana na mɔ ma.