Tito 1 - Fana Ngbangɔ 1987

Balangɔ

¹ Mbi Polo mɛ wa kwa tɛ Nzapa, mbi mɛ nga wa pangɔ kwa tɛ Yezo Kristo la mbi to mbɛti olo hɛ̃ mɔ Tito. Mbi bala mɔ. Nzapa ahɛ̃ mbi kwa ya, mbi za azi tɛ ni mɛ ni sara la ni kpa. Mbi ndoza la ya, ala ye lo tɛ lo, ala hĩnga nga bɛta lo mɛ ndofa sé du mɛ ndode bɛ lo.

² Mbi ndoli so ya, ala lɛndɛrɛ luangɔ du ti kaka. Nzapa mɛ ta ndopa nvɛnɛ ma, ako ndo kapa ti hɛ̃ngɔ e du ti kaka, uzu ti lo lingɔ sese.

³ Ko ngoi mɛ ndo bi mɛ lo ko ĩ lengbi ko, lo fa e na lege ti luangɔ du ti kaka ni na ya tɛnɛ tɛ lo mɛ lo zia na yamba ti mbi, ya mbi pa hɛ̃ azi. Ko adu nyɔ mɛ Nzapa mɛ Wa songɔ e ahɛ̃ mbi la.

⁴ Mbi to mbɛti olo hɛ̃ mɔ Tito mɛ mɔ nga ma bɛta nyi mbi, na lo mɛ ya, e na mɔ e ye lo tɛ Yezo Kristo. To e Nzapa na Yezo Kristo Wa songo e ali bɛ nzɔ̃ bɛ hɛ̃ mɔ, ali bɛ nga ya, bɛ mɔ adu pii ma ke!

Kwa mɛ Polo ahɛ Tito ya lo li ka ya zua ti Krɛtɛ

⁵ Mbi zia ndo mɔ ka ya zúa ti Krɛtɛ ya, mɔ lɛkɛ alo mɛ ta mbi dɛ mbi lɛkɛ ma, ko mɔ kpã nga akangba ti Eklezia na ya kɔdɔrɔ kɔi kɔi, nga ma se mɛ ndo mbi pa na ni hɛ̃ mɔ.

⁶ Ale kangba ti Eklezia adu zo mɛ ta ndoli ye mɛ alengbi ti belangɔ lo na lo ni ma. Ale lo du na wali bo kɔi, ale aya lo adu awa Kristo, ale se li ye tɛ la adu nzɔ̃ni, ko ala du nga awa mangɔ nyɔ.

⁷ Ta sanga ma, wa batangɔ Eklezia adu zo mɛ azia kwa tɛ Nzapa na yamba ti lo. Ko ale ta lo du zo mɛ ndoli ye mɛ alengbi ti belangɔ lo na lo ni ma. Ale ta lo du wa yakɛ ma, ta lo du wa ngɔnzɔ ma, ta lo du wa nyɔngɔ kana sĩ ma, ta lo du wa gingɔ ló ma, ta lo du nga zo mɛ ndolua faranga na lege mɛ siɔni ma.

⁸ Ale lo ndoyamba azi zu mɛ ndosi ka tɛ lo nzɔ̃ni, ale lo ye lingɔ nzɔ̃ ye, lo du na nzɔ̃ kɔdɛ, lo du bɛta zo, lo du zo mɛ ndotɔndɔ Nzapa sĩ, lo du zo mɛ lo ndofɔ̃ nga bɛ lo.

⁹ Ale lo kpã bɛ lo ngĩi na ndo bɛta lo tɛ Nzapa mɛ aha na lo. Se lo li so, wadila lo lengbi ti sangɔ nguru bɛ azi mɛ ndɛ̃ na lege ti hangɔ la na bɛta lo ni ko, ko lo lengbi nga ti fangɔ na awa kɛ̃ngɔ bɛta lo ni ya, ala yu ndo.

¹⁰ Ale mɔ kpã awa batangɔ Eklezia, na lo mɛ ya, azi gba, mai bo Ayuda la ta ndoma nyɔ ma, ko ala ndohanda azi na abuba tɛnɛ.

¹¹ Ale mɔ gbanzi la, ta sanga ma, ala ndogbɛ̃ ambanga nda se wa zu, ko ala ndoha lo mɛ ta alengbi ma so luangɔ faranga na lege mɛ siɔni.

¹² Mbanga wa Krɛtɛ nvɛni mɛ wa pangɔ nyɔ anzapa tɛ la ti Krɛtɛ apa ndo ya: “Awa Krɛtɛ ndodu ngoi zu awa nvɛnɛ, ala nga ma asiɔ asa, awa ndɛkɔ mɛ kwa tɛ la bo la tɛngɔ ye kɔi.”

¹³ Wa Krɛtɛ ko ndo la apa so ko, lo tɛnɛ ndo bɛta tɛnɛ. Na lo ni ko, lɔngbi ló hɛ̃ la kpengbani, wadila ala du na bɛta lo yengɔ lo tɛ Nzapa.

¹⁴ Kɛ̃ hɛ̃ la kpengbani ya, ta ala ti kpã be la na ndo ndia tɛ azi mɛ akɛ̃ bɛta lo tɛ Nzapa ma.

¹⁵ Azi ko la bɛ la vuruni ko, ye kwɛ adu nga vuruni na lo tɛ la. Kanda azi ko la ta bɛ la vuruni ma, ta ala nga awa Kristo ma ko, ta ye kɔi adu nga vuruni na lo tɛ la ma. Ta sanga ma, kɔdɛ tɛ la nga na dangɔ bɛ tɛ la siɔni.

¹⁶ Ala ndopa ya, ani hĩnga Nzapa, kanda ye mɛ ala ndoli ndofa ya, ta ala hĩnga lo ma. Ala abɛta asiɔ azi, ta ala ndoma nyɔ ma, ta ala lengbi nga ti lingɔ nzɔ̃ ye kɔi ma.