Suma 9 - Fana Ngbangɔ 1987

¹ Angelo ti kɔ̃ aulu mbana tɛ lo. Mbi hũ tongolo mɛ ndo alo ka ndozu ati ge lɛ sese. Ahɛ̃ tongolo ni nyi kɛrɛrɛ ti zingɔ na nyɔ du mɛ lipi lipi.

² Tongolo ni ĩ zi nyɔ du ni ko, guru nga ma guru ti wá mɛ ndoza butu butu alo ka ya du ni asi. Ko guru ni avukɔ lɛ lá na lɛ ndozu kpiti kpiti.

³ Akatɛ alo so ya nguru ni asi, amu lɛ sese tuuu! Se ala tɛ zo ko, asɔ nga ma se tɛ kpakete.

⁴ Ahɛ̃ nyɔ hɛ̃ akatɛ ni ya, ta ala tɛ ndiri, bere kɛkɛ, bere tɛ ti yaka ma. Kanda ahɛ̃ nyɔ hɛ̃ la ya, ala tɛtɛrɛkɛ bo azi ko la ta aminya ndã tɛ Nzapa na ndo lɛ la ma.

⁵ Ta ahɛ̃ nyɔ hɛ̃ akatɛ ni ya, ala kpɔ azi ni ko ma, kanda ahɛ̃ nyɔ hɛ̃ la ya, ala hɛ̃ pɛnɔ hɛ̃ azi ni ko na ya nzɛ̃ kɔ̃. Se ala tɛtɛrɛkɛ azi ko, asɔ nga ma se tɛ kpakete.

⁶ Na ya nzɛ̃ ko okɔ̃ ko, azi na gingɔ ya, kwá aho ani, kanda ta kwá na hongɔ la ma. Ala na separangɔ ya, ani kpili, kanda kwá na kpɛngɔ la, gwengɔ yɔngɔrɔni.

⁷ Akatɛ ni akpa ambarata mɛ alɛkɛ la so tiringɔ na to. Ambanga aye na li la nga ma kpɔtɔ ti gbia mɛ alɛkɛ na wɔrɔ, yangba lɛ la nga ma yangba lɛ azi.

⁸ Kwa li la agbɔ̃gbɔ̃ nga ma kwa li awe, tɛ̃ la nga ma tɛ abamara.

⁹ Ala yuyu aye nga ma nwa na li bɛ la. Gigi ti kpange ti la ndokpale nga ma gigi tɛ ambarata mɛ ndogiɔ apusu pusu ma wo ma, ndogwe na ni gburu gburu ka to.

¹⁰ Sã la nga ma sã kpakete, tɛ̃ la nga ma tɛ̃ kpakete. Sã la ni la ndohɛ̃ la nguru ya, ala tɛtɛrɛkɛ na azi na ya nzɛ̃ kɔ̃.

¹¹ Gbia tɛ la da, lo angelo mɛ ndobata du mɛ lipi lipi. Andoili lo na yanga tɛ Ayuda ya: “Abadona.” Andoili lo na yanga tɛ azi ti Grɛsɛ ya: “Apoliona.” (Nda ni ya: “Wa gbɛ̃ngɔ ye.”)

¹² Pɛnɔ ti uzu aɔ we, wa ĩ ba angbã apɛnɔ mɛ ndɛ̃ sɛ na gangɔ so pɛni.

¹³ Angelo ti mana aulu mbana tɛ lo. Mbi ma legɔ̃ zo atɛnɛ tɛnɛ ka nda ngɔrɔ siɔ ti mɛsa ti wɔrɔ mɛ so gbɛlɛ Nzapa, adu mɛsa mɛ andolu ye ndo ni hɛ̃ Nzapa.

¹⁴ Zo ni ko apa hɛ̃ angelo ti mana mɛ na mbana so ti lo ya: “Aangelo siɔ mɛ ndo agbele la na nzingiri ka tɔ̃ kota ngu mɛ ili ni la Efratɛ ko, zara la.”

¹⁵ Angelo ti mana azara aangelo ko siɔ. Alɛke ndo la akpã ngĩ ya, ala ku saa ni ko, aku lá ni ko, aku nzɛ̃ ni ko, aku nga buru ni ko ya, na popo tɛ azi ta ta ti lɛ sese zu ko, ala ho zo kɔi kɔi.

¹⁶ Adi hɛ̃ mbi bungɔ tɛ aturugu mɛ awa kpɛngɔ na mbarata: ala koto koto ngbangbo sɛ (200.000.000).

¹⁷ Na ya suma mɛ ndo mbi hũ ko, ĩ ba se mɛ mbi hũ na ambarata nga na awa kpɛngɔ na ambarata ni lo mɛ: awa kpɛngɔ na ambarata ni ayuyu abɔngɔ ti nwa mɛ mbanga tɛrɛ ni bengbani nga ma wá, mbanga tɛrɛ ni bolo nga ma lɛ ndozu, mbanga tɛrɛ ni nga ma gangba. Li ambarata ni nga ma li abamara. Wá, na guru, na nwa tɛnɛ ndolo ka yanga la ndosi,

¹⁸ Apɛnɔ olo ota, wá, na guru, nga na nwa tɛ́nɛ andosi ka yanga ambarata ni, ko akpɔ azi kɔi kɔi na popo tɛ azi ta ta ti lɛ sese zu.

¹⁹ Nguru mɛ ambarata na ni ti tɛtɛrekɛngɔ na azi ndodu ka yanga la, nga ka ya sã la. Sã la nga ma ngbɔ, ko ye kɔi ka li sã la ni nga ma li ngbɔ. Ala ndomu li sã la ni, atɛtɛrɛkɛ na azi.

²⁰ Atanga azi zu mɛ ndo ta ala kpili na ngoi ti apɛnɔ ni ma ko, ta ala zia ndo lingɔ siɔ ye tɛ la nvɛni ma. Ala kɛ̃ ndo kia avɔrɔ asiɔ tɔrɔ, na angbilondo mɛ ala lɛkɛ na wɔrɔ, na nwa, na nvale, na tɛ́nɛ, nga na kɛkɛ. Angbilondo ni ko zu, ta ndohũ ndo ma, ta ndoma ndo ma, ta ala ndodɔ nga nɔ ma.

²¹ Ta azi ni ko azia nga kpɔngɔ azi, bere hãngɔ biando, bere lingɔ asiɔ ye ti kamɛnɛ, bere nzĩngɔ nzĩ ma.