Suma 8 - Fana Ngbangɔ 1987

Nda ti mbara mbara

¹ Ngoi mɛ Nyi Ngasã Ngbaga ĩ kongbi ndã ti mbara mbara mɛ aminya na nyɔ buku ko, ndo ade ka ndo zu ngĩi, aninga nga ma ge tɛ ndambu ti saa.

² Ko mbi hũ aangelo mbara mbara alonga so gbɛlɛ Nzapa. Amu mbana mbara mbara, akangbi na la kɔi kɔi.

³ Angelo mɛ ndɛ kɔi aga, alo so tɔ̃ mɛsa ti lungɔ Nzapa na ye. Lo gbɔ̃ ta nwa mɛ andozɔ yɔmbɔ ya ni so ti lo, alɛkɛ ta nwa ni na wɔrɔ. Ahɛ̃ lo yɔmbɔ ma wo ma ya, lo bombi na sambela tɛ azi tɛ Nzapa zu, lo zɔ ni ka ndo mɛsa ti wɔrɔ mɛ so gbɛlɛ ngɛndɛ gbia tɛ Nzapa.

⁴ Lo lo so gbɛlɛ Nzapa, lo ĩ zɔ yɔmbɔ ni we ko, guru ni alo so yamba ti lo, abombi na sambela tɛ azi tɛ Nzapa, agundu, ama ka ndozu.

⁵ So pɛni, angelo amu ta nwa ti yɔmbɔ ni, agbɔ lɛ wá mɛ so ndo mɛsa ti lungɔ Nzapa na ye, asa ya ni asĩ. Lo ĩ gana ni ka lɛ sese ko, ngu akini ngbũuu ngbũuu, bekpa agbo gbáaa gbáaa, ataima nzɛrrr nzɛrrr, sese ayingi kpu kpu kpu.

Aangelo aulu mbana

⁶ Aangelo mbara mbara, kɔi kɔi na mbana tɛ lo so ti lo. Ala lɛkɛ tɛrɛ la so ulungɔ mbana tɛ la.

⁷ Angelo ti uzu aulu mbana tɛ lo. Ngandangombe na wá abombi na mɛnɛ asa ka lɛ sese. Lɛ sese akangbi ota, mbanga lɛ ni kɔi abombi na akɛkɛ ti lɛ ni, nga na ndiri zu mɛ so da agbiri.

⁸ Angelo ti sɛ aulu mbana tɛ lo. Mbanga ye kɔi nga ma kota hɔtɔ mɛ ndoza lau lau aha, ati ka ya kota ngu buzuuu! Kota ngu akangbi ota, mbanga lɛ ni kɔi agbinyangbi, ati gi mɛnɛ.

⁹ Aye zu mɛ lɛ la ngɛ̃ ka ya ngu ni akpili, amasua zu mɛ nga ka lɛ ni agbɛ̃gbɛ̃.

¹⁰ Angelo ti ta aulu mbana tɛ lo. Kota tongolo mɛ ndoza lau lau nga ma tanda, alo ka ndozu ati ge lɛ sese, ati lɛ ngu, ati nga lɛ li ngu.

¹¹ (Ili tongolo ni la Bɛngɛ.) Ngu zu akangbi ta ta, mbanga ni kɔi kɔi ati seseni. Azi ma wo ma mɛ anyɔ sese ngu ni akpili zu.

¹² Angelo ti siɔ aulu mbana tɛ lo. Lɛ lá akangbi ota, lɛ nzɛ̃ akangbi ota, lɛ atongolo kɔi kɔi akangbi nga ta ta, ko ta mbanga lɛ ni kɔi kɔi zu ati asũ ma. Lá kɔi akangbi na ngoi ta, ko na mbanga ngoi ko, ta lá asũ ma. Bi akangbi nga na ngoi ota, ko ta nzɛ̃ na atongolo asũ na mbanga ngoi ma.

¹³ Mbi ti ba ndo, ko mbi hũ ngwalo aɔ ka lɛ ndozu yanga yenge. Mbi ma lo so ndodɛrɛ kɔngɔ ya: “Oo siɔ lo ee! Oo siɔ lo ee! Na ngoi mɛ se atanga aangelo ota na ulungɔ na mbana tɛ la ko, kota siɔ lo na tingɔ na azi ti lɛ sese.”