Suma 7 - Fana Ngbangɔ 1987

Awa Izrayɛlɛ 144.000

¹ So pɛ aye ko zu ko, mbi hũ aangelo siɔ. Kɔi alo ndozu ka tɔ, kɔi ka do, kɔi ka banga, kɔi mɛ ndɛ̃ ka mbongo. Ala ndogbanzi aya siɔ mɛ ndoya na lɛ sese ya, ta yá kɔi aya na le sese, bere na lɛ ngu, bere na li kɛkɛ ma.

² Mbi hũ nga angelo mɛ ndɛ̃ alo ka tɔ so ndoga, lo gbɔ̃ ndã ti minyangɔ na ndo lɛ azi tɛ Nzapa so ti lo, Nzapa mɛ lɛ lo ngɛ̃. Angelo ko ade kɔngɔ kpengbani hɛ̃ aangelo mɛ Nzapa ahɛ̃ la nguru ti gbɛ̃ngɔ na lɛ sese nga na ngu ya:

³ “Ta ĩ pia ĩ gbɛ̃ lɛ sese, bere ngu, bere akɛkɛ ma. Ĩ ku, nga ka e minya ndã tɛ Nzapa tɛ e na ndo lɛ awa lingɔ kwa tɛ lo hĩ wadila.”

⁴ Adi hɛ̃ mbi bungɔ tɛ azi mɛ aminya ndã tɛ Nzapa na ndo lɛ la. Ala koto ngbangbo kɔi na ndoni koto sui siɔ ndoni koto siɔ (144.000). Ala lo na ya ale tɛ awa Izrayɛlɛ zu.

⁵ Azi mɛ aminya ndã na ndo lɛ la lo mɛ: ale tɛ Yuda koto sui kɔi ndoni sɛ, ale tɛ Rubɛnɛ koto sui kɔi ndoni sɛ, ale tɛ Gadɛ koto sui kɔi ndoni sɛ,

⁶ ale tɛ Asɛrɛ koto sui kɔi ndoni sɛ, ale tɛ Nɛfɛtali koto sui kɔi ndoni sɛ, ale tɛ Manase koto sui kɔi ndoni sɛ,

⁷ ale tɛ Simeona koto sui kɔi ndoni sɛ, ale tɛ Levi koto sui kɔi ndoni sɛ, ale tɛ Isakarɛ koto sui kɔi ndoni sɛ,

⁸ ale tɛ Zabulona koto sui kɔi ndoni sɛ, ale tɛ Yozɛfu koto sui kɔi ndoni sɛ, ale tɛ Benzami koto sui kɔi ndoni sɛ.

Azi butu butu nvɛni

⁹ So pɛni ko, mbi ti ba ndo, ko mbi hũ azi butu butu nvɛni, ta kɔdɛ ti dikɔngɔ la da ma. Ala du azi ti sese zu, ti ale zu, nga na ti yanga kɔdɔrɔ zu. Ala longa so gbɛlɛ ngɛndɛ gbia, nga so gbɛlɛ Nyi Ngasã Ngbaga. Ala yuyu ambufu bɔngɔ, ala gbɔnɔ nga anzango mburu so ti la.

¹⁰ Ala ndodɛrɛ kɔngɔ kpengbani ya: “Nzapa tɛ e mɛ adu so ndo ngɛndɛ gbia, na Nyi Ngasã Ngbaga la aso e!”

¹¹ Aangelo zu aka ngɛndɛ gbia ni kɛrɛrɛ, ala ka nga akangba na asa siɔ mɛ le la ngɛ̃ kɛrɛrɛ. Aangelo ni awo tise lɛbɛ lɛbɛ so gbɛlɛ ngɛndɛ gbia, atolo lɛ la tise, avɔrɔ Nzapa ya:

¹² “Seni la! E ye ya Nzapa tɛ e lo wa ndara, lo wa nguru, lo lombe. E gonda lo, é hɛ̃ lo sia kɔli, é tɔndɔ lo, é yakɛ lo buru na buru. Seni la!”

¹³ Mbanga kangba kɔi na popo tɛ akangba ko sui sɛ ndoni siɔ ahũnda mbi ya: “Azi ko ayuyu ambufu bɔngɔ ko, ala ana? Ala lo wa?”

¹⁴ Mbi gbinya hɛ̃ lo ya: “Gbia, ta mbi hĩnga la ma, mɔ la mɔ hĩnga la.” La lo pa hɛ̃ mbi ya: “Adu azi mɛ ndo ahũ pɛnɔ ma wo ma. La ala kpokpo abɔngɔ tɛ la, ado na mɛnɛ tɛrɛ Nyi Ngasã Ngbaga, la abɔngɔ ni avuru ati nga ma tɛrɛ nyange.

¹⁵ Nda mɛ ala longa so gbɛlɛ ngɛndɛ gbia tɛ Nzapa, ndoli kwa hɛ̃ lo bi na lá, na ya da tɛ lo la. Zo mɛ adu so ndo ngɛndɛ gbia na batangɔ la.

¹⁶ Ta gwɛ̃ tɛ, bere gwɛ̃ ngu na gbɔ̃ngɔ la fani mɛ ndɛ̃ bɛ gbɔ ma. Ta lá bere ye mɛ ndɛ̃ mɛ ndogbi ha ha ha na zɔngɔ pɔrɔ tɛrɛ la fani mɛ ndɛ̃ ma.

¹⁷ Ta sanga ma, Nyi Ngasã Ngbaga mɛ adu so ndo bɛ ngɛndɛ gbia na batangɔ la, nga ma se tɛ wa batangɔ angasã ngbaga. Nyi Ngasã Ngbaga ni nga na nɔngɔ na la ka li ngu mɛ ndohɛ̃ zo bɛta du ya, ala nyɔ ni. Nzapa na mbongɔ ngulɛ zu ka lɛ la zingɔ.”