Suma 6 - Fana Ngbangɔ 1987

Nyi Ngasã Ngbaga akongbi ndã mɛ aminya na nyɔ buku

¹ So pɛni, mbi hũ Nyi Ngasã Ngbaga akongbi ndã ti uzu na popo ti ndã mbara mbara mɛ aminya na nyɔ buku. Na popo tɛ asa ko siɔ mɛ lɛ la ngɛ̃ ko, mbi ma legɔ̃ sa kɔi atɛnɛ tɛnɛ nga ma ngu la akini, lo pa ya: “Ga o!”

² Mbi ba ndo, ko mbi hũ mbufu mbarata. Wa kpɛngɔ na mbarata ni agbɔ̃ tale so ti lo, lo bi kpɔtɔ ti gbia na li lo. Lo ɔ nga ma zo mɛ anwɔ to wɛ, ko lo nɔ so nwɔngɔ to fani mɛ ndɛ̃.

³ Nyi Ngasã Ngbaga akongbi ndã ti sɛ mɛ aminya na nyɔ buku. Mbi ma legɔ̃ sa ti sɛ mɛ lɛ lo ngɛ̃ apa ya: “Ga o!”

⁴ La mbarata mɛ ndɛ̃ asi, tɛrɛ lo bengbani ngba ngbã ngba. Ahɛ̃ lege hɛ̃ wa kpɛngɔ na mbarata ko ya, lo sisi na to na popo tɛ azi ti lɛ sese, ko ala hongbi. Ahɛ̃ nga lo yɔngɔrɔ zabe.

⁵ Nyi Ngasã Ngbaga akongbi ndã ti ta mɛ aminya na nyɔ buku. Mbi ma legɔ̃ sa ti ta mɛ lɛ lo ngɛ̃ apa ya: “Ga o!” Mbi ba ndo, ko mbi hũ mbarata mɛ tɛrɛ lo vukɔni diri diri. Wa kpɛngɔ na mbarata ni agbɔ̃ kilo so ti lo.

⁶ Mbi ma ye nga ma legɔ̃ zo adu ka popo tɛ asa ko siɔ mɛ lɛ la ngɛ̃ apa ya: “Ngere ti kilo ti le tɛ mɛ ili ni la ble alengbi na faranga mɛ andofuta na zo na lo ti kwa tɛ lo ti lá kɔi zu. Ngere ti kilo ta ti le tɛ mɛ ili ni la ɔrgɛ alengbi na faranga mɛ andofuta na zo na lo ti kwa tɛ lo ti lá kɔi zu.” Zo ni ko apa nga hɛ̃ wa kpɛngɔ na mbarata ni ya, ta lo gbe kpɔ̃ nga na vinɔ ma.

⁷ Nyi Ngasã Ngbaga akongbi ndã ti siɔ mɛ aminya na nyɔ buku. Mbi ma legɔ̃ sa ti siɔ mɛ lɛ lo ngɛ̃ apa ya: “Ga o!”

⁸ Mbi ba ndo, ko mbi hũ mbarata mɛ tɛrɛ lo pɛɛɛ. Ili wa kpɛngɔ na mbarata ni ko la Kwá. Zo mɛ ndodu na se lɛ awa kwáni so pɛko lo. Ahɛ̃ la nguru ya, na popo tɛ azi siɔ siɔ ti lɛ sese zu ko, ala ho zo kɔi kɔi na zabe, na gwɛ̃, na ngã, nga na asa ti ya ndo.

⁹ Nyi Ngasã Ngbaga akongbi ndã ti kɔ̃ mɛ aminya na nyɔ buku. Mbi hũ atɔrɔ tɛrɛ azi mɛ ndo akpɔ la ge lɛ sese, ala dunga so gbe mɛsa ti lungɔ Nzapa na ye. Akpɔ ndo la, na lo mɛ ya, ala pa ndo tɛnɛ tɛ Nzapa hɛ̃ azi, ala ye ndo nga ya, tenɛ tɛ Nzapa adu biani.

¹⁰ Atɔrɔ tɛrɛ azi ni ko so ndodɛrɛ kɔngɔ kpengbani ya: “Gbia, mɔ mɛ santo, mɔ mɛ bɛta Nzapa, mɔ fa gbanda ngbanga tɛ azi ti lɛ sese mɛ ndo akpɔ e lá wa? Mɔ hɛ̃ nga gbanda etumbu hɛ̃ la lá wa?”

¹¹ Ahɛ̃ zo kɔi kɔi na popo tɛ la mbufu bɔngɔ, apa hɛ̃ la ya: “Ĩ wɔ tɛrɛ ĩ yakere, na lo mɛ ya, ta ĩ dɛ ĩ lengbi zu ma. Ambanga afɔ̃ ĩ mɛ ndoli kwa hɛ̃ Nzapa ade ka lɛ sese. Ale aho la nga ma se mɛ aho na ĩ hĩ, wadila Nzapa afa ngbanga tɛ azi ko la akpɔ ĩ na afɔ̃ ĩ ni.”

¹² Mbi hũ Nyi Ngasã Ngbaga akongbi ndã ti mana mɛ aminya na nyɔ buku. Lo ĩ kongbi ni ko, sese ayingi kpu kpu kpu. Lɛ lá avukɔ nga ma má bɔngɔ ti pili. Lɛ nzɛ̃ zu abɛbɛ nga ma mɛnɛ.

¹³ Atongolo alo ka lɛ ndozu, asa ge lɛ sese nga ma se mɛ se kpengba yá aya, ayingi akuku mango ka li kɛkɛ ko, akuku mango akia tise.

¹⁴ Ndozu ango tɛrɛ lo nga ma se mɛ andongo na gbogbo, ko ndozu amina. Ahɔtɔ zu na azúa zu ahãna tɛrɛ la na ndo tɛ la, aɔ.

¹⁵ Agbia, na awa batangɔ kɔdɔrɔ, na agbia tɛ aturugu, na awa nwa, na awa nguru, nga na ambanga azi mɛ ndɛ̃ zu mɛ ambɛ bere abɔrɔ ko, ala bere na ya do tɛ́nɛ, nga na popo atɛ̃nɛ ti hɔtɔ.

¹⁶ Ala pa hɛ̃ ahɔtɔ na atɛ̃nɛ ya: “Ĩ kara, ĩ sa ndo e, ĩ vĩ e, so Zo ko la adu ndo ngɛndɛ gbia ahũ e, so Nyi Ngasã Ngbaga ali ngɔnzɔ hɛ̃ e,

¹⁷ Ta sanga ma, lá ti ngɔnzɔ tɛ la alengbi we, ko ta zo kɔi ti longɔ gbɛlɛ la da ma!”