Suma 5 - Fana Ngbangɔ 1987

Zo mɛ alengbi ti zarangɔ ya buku

¹ Mbi hũ buku mɛ agana ganangɔ so kɔti ti Zo mɛ adu so ndo ngɛndɛ gbia. Asu mbɛti lɛ buku ni mbage na mbage, aminya nyɔ buku ni na ndã fani mbara mbara ya so zo azara ni.

² So pɛni, mbi hũ angelo mɛ wa nguru so ndohũnda ndo na kɔngɔ ya: “Zo mɛ alengbi ti kongbingɔ ndã olo zingɔ, ko lo zara nga ya buku olo na?”

³ Ko ta zo kɔi ka yayu, bere ge lɛ sese, bere ka gbe sese, mɛ alengbi bɛ ti zarangɔ ya buku ni, bangɔ ni da ma.

⁴ Ngoi mɛ mbi hũ so ko, mbi to sinyɛ sinyɛ, na lo mɛ ya, ta zo kɔi mɛ alengbi ti zarangɔ ya buku ni, bere bangɔ ni da ma.

⁵ La mbanga kangba kɔi na popo tɛ akangba ko sui sɛ ndoni siɔ apa hɛ̃ mbi ya: “Ta mɔ to to ma. Ba bamara ko kai, lo ale tɛ Ayuda, lo tara Davidi, lo nwɔ aye zu, lo lengbi ti kongbingɔ ndã ko zu mbara mbara zingɔ, zarangɔ nga ya buku ni.”

⁶ Mbi hũ Nyi Ngasã Ngbaga alo so ndo bɛ ngɛndɛ gbia ni. Akangba ko sui sɛ ndoni siɔ, na asa ko siɔ mɛ lɛ la ngɛ̃ aka lo kɛrɛrɛ. Mɔ̃ hũ Nyi Ngasã Ngbaga ni ma bere aho lo hongɔ. Nza li lo mbara mbara, nga na lɛ lo mbara mbara adu atɔrɔ mbara mbara mɛ Nzapa ato la na lɛ sese kwɛ zu.

⁷ La Nyi Ngasã Ngbaga ni ai tɛrɛ lo ka tɔ̃nda Zo mɛ adu so ndo ngɛndɛ gbia, amu buku mɛ Zo ko agbɔ na kɔti ti lo.

⁸ Nyi Ngasã Ngbaga ĩ mu buku ni ko, akangba ko sui sɛ ndoni siɔ, na asa ko siɔ mɛ lɛ la ngɛ̃ akuku gbɛlɛ lo. Kundi na ta nwa ti wɔrɔ mɛ yɔmbɔ asĩ ya ni, alengbi na ti akangba ni zu kɔi kɔi. Yɔmbɔ ni ko adu sambela mɛ azi tɛ Nzapa ndosambela na Nzapa.

⁹ Ala ndoye fana bia ya: “Mɔ lengbi ti mungɔ buku Kongbingɔ andã ni zingɔ. Ta sanga ma, aho ndo mɔ, Ko na lo ti kwá mɛ ndo mɔ kpi ko, Mɔ tɔ̃ ambanga azi hɛ̃ Nzapa. Azi mɛ mɔ tɔ̃ la ko, adu azi ti ale zu, Ti yanga kɔdɔrɔ zu, nga na ti lɛ sese zu.

¹⁰ Mɔ li ala ti azi mɛ mɔ Gbia tɛ la. Mɔ li nga la ala ti awa lungɔ Nzapa tɛ e na ye ya, Ala li kwa hɛ̃ lo. Ala lɛ nga gbanda gbia na ndo azi ti lɛ sese.”

¹¹ Mbi ti mbi ba ndo, ko mbi ma legɔ̃ aangelo butu butu nvɛni. Ta kɔdɛ ti dikɔngɔ la da ma. Ala ka ngɛndɛ gbia ni kɛrɛrɛ. Akangba ko sui se ndoni siɔ, na asa ko siɔ mɛ lɛ la ngɛ̃ nga so ndo ko.

¹² Mbi ma aangelo so ndoye bia na kɔngɔ ya: “Nyi Ngasã Ngbaga mɛ ndo aho lo ko, Azi alengbi ti yengɔ ya, lo wa nguru, lo na ye zu, Lo wa ndara, lo lombe. Azi alengbi ti gondangɔ lo, Tɔndɔngɔ lo, yakɛngɔ nga lo.”

¹³ Mbi ma nga aye zu mɛ Nzapa ali ka lɛ ndozu, ge lɛ sese, ka gbe sese, nga ka ya kota ngu, aye ti lɛ sese kwe zu mɛ Nzapa ali, so ndoye bia ya: “E gonda Zo mɛ adu ndo ngɛndɛ gbia, E gonda nga Nyi Ngasã Ngbaga, E tɔndɔ la, é yakɛ la, E ye ya, ala na nguru buru na buru!”

¹⁴ Asa ko siɔ mɛ lɛ la ngɛ̃ ayeka da ya: “Seni la!” Akangba ko sui sɛ ndoni siɔ akuku, avɔrɔ Zo mɛ adu ndo ngɛndɛ gbia, nga na Nyi Ngasã Ngbaga.