Suma 4 - Fana Ngbangɔ 1987

Andogonda Nzapa ka yayu

¹ So pɛni, mbi hũ suma mɛ ndɛ̃, ko mbi hũ nyɔ ngise mɛ azi zingɔ ka yayu, angbã gapoo. Zo ko ndo atɛnɛ tɛnɛ hɛ̃ mbi uzu ko, mbi ti mbi ma legɔ̃ lo so ndotɛnɛ tɛnɛ nga ma mbana la ndokpale. Lo tɛnɛ hɛ̃ mbi ya, mbi ma ka ndozu, ko ni fa mbi na aye mɛ na gangɔ gesi.

² Ta ĩ ninga ma ko, Tɔrɔ Santo asa tɛrɛ mbi. Mbi hũ ngɛndɛ gbia kɔi ka yayu, na zo so ndo ni du.

³ Yangba lɛ zo ni ko ndosũ nga ma anzɔ̃nzɔ̃ tɛ́nɛ mɛ ili ni la yaspɛ na sardoanɛ. Kɔngɔ mɛ ndosi ka lɛ ndozu, aka ngɛndɛ gbia ni kɛrɛrɛ atengbi. Kɔngɔ ni ndosũ nga ma tɛ́nɛ mɛ ili ni la emɛrodɛ.

⁴ Ambanga angɛndɛ gbia mɛ ndɛ̃ sui se ndoni siɔ aka nga angɛndɛ gbia ni ko kɛrɛrɛ atengbi. Akangba sui sɛ ndoni siɔ adunga so ndo angɛndɛ ko sui sɛ ndoni siɔ. Ala yuyu ambufu bɔngɔ, abi akpɔtɔ ti gbia mɛ alɛkɛ na wɔrɔ na li la.

⁵ Bekpa alo ka tɛrɛ ngɛndɛ gbia ni ataima nzɛrrr, nzɛrrr, agbo gbáaa, gbáaa! Ngu akini ngbũuu ngbũuu! Tanda mbara mbara so ndoza lau lau so gbɛlɛ ngɛndɛ gbia ni. Tanda ko mbara mbara adu atɔrɔ mbara mbara tɛ Nzapa.

⁶ Mbi hũ ye kɔi nga ma kota ngu so gbɛlɛ ngɛndɛ gbia ni, andosũ bai bai nga ma tala tala. Mbi hũ asa siɔ mɛ lɛ la ngɛ̃ aka ngɛndɛ ni kɛrɛrɛ. Lɛ la amu tɛrɛ la kwɛ zu, ge gbɛlɛ la nga ka pɛko la.

⁷ Sa ti uzu akpa bamara, sa ti sɛ akpa mbɔngu bagara, sa ti ta yangba lɛ lo akpa yangba lɛ zo, sa ti siɔ akpa ngwalo mɛ ndoɔ ka lɛ ndozu.

⁸ Sa kɔi kɔi na kpange ti lo mana, lɛ la amu tɛrɛ la zu, ka ya ni, nga ka koko ni. Bi na lá, ta ala ndonzɛ̃ na yengɔ bia ma. Bia mɛ ala ndoye lo mɛ: “Gbia Nzapa mɔ santo, mɔ bɛta santo, Mɔ lombe. Mɔ ndo da gã, mɔ da na olo, mɔ na gangɔ.”

⁹ Asa ko siɔ ndoye bia so gondangɔ, tɔndɔngɔ, hɛ̃ngɔ nga sia kɔli hɛ̃ Zo mɛ adu na ndo ngɛndɛ gbia, Zo mɛ ndodu lɛ lo ngɛ̃ buru na buru.

¹⁰ Wa na ngoi ko la asa ko ndoli nga so ko, akangba ko sui sɛ ndoni siɔ so ndokuku gbɛlɛ Zo mɛ adu so ndo ngɛndɛ gbia, Zo mɛ ndodu lɛ lo ngɛ̃ buru na buru. Ala so ndovɔrɔ lo, so ndohãna akpɔtɔ tɛ la ti gbia, so ndosa so gbɛlɛ ngɛndɛ gbia tɛ lo, so ndopa ya:

¹¹ “Oo Gbia Nzapa tɛ e, Azi alengbi ti gondangɔ mɔ, tɔndɔngɔ mɔ. Ala lengbi nga ti yengɔ ya, mɔ lombe. Ta sanga ma, mɔ li ye kwɛ zu. Mɔ ndo la mɔ ye ya, aye ni ko adu dazu, Nda mɛ mɔ li ni la.”