Suma 3 - Fana Ngbangɔ 1987

Kwa mɛ Yezo ato hɛ awa Eklezia ti Sardɛ

¹ “Su tɛnɛ olo mɔ to hɛ̃ angelo mɛ ndobata awa Eklezia ti Sardɛ. Tɛnɛ ni alo ka nyɔ zo mɛ na atɔrɔ tɛ Nzapa mbara mbara, lo nga na atongolo mbara mbara. Zo ni ko apa ya, ni hĩnga ye zu mɛ ĩ ndoli. Ni hĩnga ya, pa ili ĩ afɔnɔ ya, ĩ dɛ lɛ ĩ ngɛ̃, kanda ĩ du azi mɛ ĩ kpili wɛ.

² Ko ale ĩ du na kpengba lɛ, ĩ kpengba na tanga lo yengɔ mɛ ka bɛ ĩ. Ta so ma ko, tanga lo yengɔ ni akpi ti buai. Ta sanga ma, ni hũ ya, ta kwa tɛ ĩ adu bɛtani ka lɛ Nzapa ma.

³ Wa ĩ da bɛ ĩ na ló mɛ ndo aha na ĩ, nga na tɛnɛ tɛ Nzapa mɛ ndo ĩ ma. Ale ĩ tɔndɔ ni, ko ĩ gbinya bɛ ĩ. Se ta ĩ du na kpengba lɛ ma ko, ni ga ni buta ĩ nga ma se tɛ wa nzĩ, ko ta ĩ na hĩngangɔ ngoi ti gangɔ tɛ ni ma.

⁴ Kanda so ya Eklezia tɛ ĩ nvɛni ti Sardɛ ko, ambanga azi mɛ abata bɔngɔ tɛ la ya, ta avu ma da. Ala yu gbanda mbufu bɔngɔ, ko ni na la, ani dɔ nɔ ndoni kɔi. Ta sanga ma, ala du azi mɛ alengbi ti dɔngɔ nɔ ndoni kɔi na ni.

⁵ Azi ko la agbe bɛ la na ya apɛnɔ, anwɔ ni ko, ala yu gbanda mbufu bɔngɔ. Ko ili la mɛ asu ka ya buku mɛ asuru na ili azi mɛ alua du ti kaka ko, ta ni fa gbanda ni, ni zi ma. Ni na pangɔ na gbɛlɛ To ni nga na gbɛlɛ aangelo tɛ lo ya, azi ni ko adu azi tɛ ni.

⁶ “Zo ko la ma lo adu da ko, ale lo ma tɛnɛ mɛ Tɔrɔ Santo atɛnɛ hɛ̃ awa Eklezia!”

Kwa mɛ Yezo ato hɛ̃ awa Eklezia ti Filadɛlfia

⁷ “Su tɛnɛ olo mɔ to hɛ̃ angelo mɛ ndobata awa Eklezia ti Filadɛlfia. Tɛnɛ ni alo ka nyɔ zo mɛ santo, zo mɛ bɛta zo, zo mɛ ndobata nyi kɛrɛrɛ tɛ gbia Davidi, zo mɛ se lo zi nyɔ ngise ko, ta zo kɔi alengbi ti vĩngɔ ni ma. Se lo vĩ nga nyɔ da ko, ta zo kɔi alengbi nga ti zingɔ ni ma.

⁸ Zo ni ko apa ya, ni hĩnga ye zu mɛ ĩ ndoli, ni hĩnga nga ya nguru tɛ ĩ adu bo yakere, kanda ĩ ndoma nyɔ ni, ko ta ĩ bɛre nga lo tɛ ni ma. Ni zi nyɔ ngise ya ĩ li ka ya da, ko ta zo kɔi alengbi ti vĩngɔ ni ma.

⁹ Azi ko la ali na li nɔ tɛ Satana, awa nvɛnɛ ko la ndomu tɛrɛ la ya, ani Ayuda, kanda ta ala Ayuda ma ko, ye mɛ gbanda ni li na la lo mɛ: ni ili gbanda la na nguru ya, ala ga akuku gbɛlɛ ĩ, agonda ĩ, ko ala hĩnga nga ya, ni ndoye ĩ.

¹⁰ Wa oko la ĩ ma ndo nyɔ mɛ ni hɛ̃ ya, ĩ gbe bɛ ĩ na ya apɛnɔ, la ĩ gbe be ĩ ko, ni na batangɔ ĩ na ngoi mɛ gbanda apɛnɔ ati ndo azi ti lɛ sese zu so tarangɔ bɛ la.

¹¹ Angbã yakere ni ga. Ale ĩ gbɔ̃ lo tɛ ni kpengbani, so zo agbula mbana gɛrɛ ĩ na ti ĩ.

¹² Azi ko la agbe bɛ la na ya apɛnɔ, anwɔ ni ko, ni kpã la gbanda nga ma ngbo da ka ya kota da Nzapa tɛ Nzapa tɛ ni, ko ala ngbã kai ti buai. Ni su gbanda ili Nzapa tɛ ni, nga na ili kɔdɔrɔ tɛ Nzapa tɛ ni na tɛrɛ la. Kɔdɔrɔ ni adu fana Yeruzalɛme mɛ gbanda alo ka tɛ Nzapa tɛ ni, wa azu ge tise. Ni su nga gbanda fana ili ni nvɛni na tɛrɛ azi ni ko.

¹³ “Zo ko la ma lo adu da ko, ale lo ma tɛnɛ mɛ Tɔrɔ Santo atɛnɛ hɛ̃ awa Eklezia!”

Kwa mɛ Yezo ato bɛ awa Eklezia ti Laodisea

¹⁴ “Su tɛnɛ olo mɔ to hɛ̃ angelo mɛ ndobata awa Eklezia ti Laodisea. Tɛnɛ ni alo ka nyɔ zo mɛ ili lo la ‘Seni la’. Lo bɛta temwɛ tɛ Nzapa, lo nga bɛta wa pangɔ tɛnɛ. Nzapa ali ndo ye zu ti ndo lo. Zo ni ko apa ya,

¹⁵ ni hĩnga ye zu mɛ ĩ ndoli, ni hĩnga ya, ta lo yengɔ tɛ ĩ adu woni ma, ni hĩnga nga ya, ta lo yengɔ tɛ ĩ adu kpengbani ma. Ni ndosepara ya, ale lo yengɔ tɛ ĩ adu woni bere kpengbani.

¹⁶ Wa oko la ta lo yengɔ tɛ ĩ woni ma, ta ni nga kpengbani ma ko, ni na ziangɔ ĩ!

¹⁷ Ĩ ndopa ya, ĩ awa nwa, ĩ lua ye zu, ta ye kɔi azanga nga ĩ ma. Kanda ta ĩ ndohĩnga ya, ĩ awa kota pɛnɔ, ĩ awa yɛlɛ, ĩ ndumbu, ĩ nga awa ziba ma.

¹⁸ Nda mɛ ni ndowa ĩ ya, í ga ka tɛ ni, í vɔ̃ wɔrɔ mɛ ayɔrɔ ka ya wá, bi ti tɛrɛ ni awɛ, wa se mɛ ĩ ti awa nwa la. Ale ĩ vɔ̃ abɔngɔ mɛ mbufuni ĩ yu, wa ĩ vĩ na ndumbu tɛrɛ ĩ, ndumbu ni ndohɛ̃ kamɛnɛ. Ale ĩ vɔ̃ nga yɔrɔ ti ziba, ĩ do le ĩ, wa se mɛ ĩ hũ ndo la.

¹⁹ Azi ko ni ndohɛ̃ la etumbu so fangɔ la na asiɔ ye tɛ la ko, adu azi mɛ bɛ ni aye la. Ĩ gbinya bɛ ĩ, ĩ du na gonvɛnɛ na ya lo yengɔ tɛ ĩ.

²⁰ Ĩ ma la: ni lo na tɔ̃ nyɔ ngise, ni ndogɔngɔ ni, ni ndoili ila. Zo ko la ama legɔ̃ ni, azi nyɔ ngise hɛ̃ ni ko, ni li ka ya da tɛ lo, ko ni na lo ani tɛ ye ndoni kɔi.

²¹ Azi ko la agbe bɛ la na ya apɛnɔ, anwɔ ni ko, ni hɛ̃ gbanda lege hɛ̃ la ya, ala dunga na ndo ngɛnde tɛ ni ti gbia, nga ma se mɛ ndo ni gbe na bɛ ni na ya apɛnɔ, ni nwɔ ni, ko ni na To ni ani dunga na ndo ngɛndɛ ti gbia tɛ lo.

²² “Zo ko la ma lo adu da ko, ale lo ma tɛnɛ mɛ Tɔrɔ Santo atɛnɛ hɛ̃ awa Eklezia!”